Ro 13
13
Ñe'me Dios choqogaa'me jaliaĝanaqa jena'me aleua
1'Noota qom ñajenaĝagueta gaa'me jo'ne qo'mi nejaliaĝatelo'te qa'a eja Dios lamaĝa's; qaya'te nejaliaĝa jo'ne ja chiyaqayi ñe'me Dios. 2Qama'le jogaa'me ja yoqocha'alo naa'me jaliaĝanaqa, nach'egaua nautetedapega joga'me lamaĝajoĝonaĝac ñe'me Dios, nataq'aen gaa'me nauteta joñe'me Dios yataqata 'uo qomle ga'me ne'uaĝanague'j. 3Qa'a naa'me jaliaĝanaqa ja eetedapega yoqochoqote't jogaa'me 'yetedac ga'me chimaqachidiñe daa'me 'noote', dite jogaa'me ja no'en joda'me 'yetedac. Qama'le da'me ami qom ja jetaque at'oyiya jonaa'me jaliaĝanaqa, 'noota ta'le aniyamaĝachela't qaedi naa'me jaliaĝanaqa yataqata ami yiyamaĝade'n. 4Qa'a naa'me naajo' nataq'aen da'me t'onataĝatedape'uo joñe'me Dios, nataq'aen male yaqanatet da'me ami lecochiyalo, qalaĝaja qom ja no'en joga'me auauoyi, qama'le eja at'oiya'aguet qa'a na'me ledaĝanaĝat ja ch'e lequi'i, nataq'aen naajo' t'onataĝatedape'uo joñe'me Dios, qama'le yaqanate't da'me yauote da'me ne'uaĝanague'j jogaa'me chiyoĝo's. 5Chane'eja 'noota qom auoqochiiyalo jogaa'me jaliaĝanaqa, qa'a nach'ena jena'me jenjo' yataqata naq'aeta da'me qadajoĝoc, nataq'aen qaedi ja ami 'te qoye'uaĝa'n.
Da'me noqopich'i
6Chane'eja queda'me yataqata t'onataĝatedape'uo joñe'me Dios naajo' jaliaĝanaqa nataq'aen mach'e 'yetedac joga'me qoyen 'lonatac, 'noota qom auejechiñe nale ami qoyajela'y na'me oñita'ña. 7Qama'le 'noota da'me auejechiñe onolqa'tape nale ami qoyajela'y naa'me at'achaqachidi', a'naleua'y uotaĝa 'uo nale ga'me qonaviiñe joga'me auañiya. Qom auauoyi jenjo', male yataqata ami qo'yamaqate'n. 8Ja 'noota qom 'uo joga'me anep'iyaĝaua dite da'me aueñi anep'iyaĝaiqui da'me 'uo da'me adoqopich'ii, qa'a joga'me noqopitalo yemeda jogaa'me laqaya' joote yataqata quetede'egue da'me ya'uo naajo' namaĝajoĝonaĝaco. 9Joote uo'oe naa'me uayelo naa'me namaĝajoĝonaĝaco jo'ne eetac:
“Ena'te auepita'a jaga'me ja adoua,
Ena'te aualataĝan,
Ena'te auecachi,
Ena'te anaje'teguet da'me auepita'a joga'me ja adoĝot.”
Naa'me naajo' namaĝajoĝonaĝaco nataq'aen jogaa'me laqaya' nedii's qama'le qoyemata'a't qama'le jenjo' chiyaqayi jo'ne eetac:
“Yataqata adoqopita joga'me adaqaya, aue'tem da'me anoqopitela't nale.”
10Joda'me noqopich'i qaya'te joga'me 'naĝat qama'le qom qadoqopitalo jogaa'me qadaqaya' male jauoqotac ga'me uetalegue ga'me namaĝajoĝonaĝac.
Da'me 'liyelaĝajoĝoc ñe'me Cristo
11Male jouaqatauelo naa'me noloqo'ote jo'ne p'atedegue, qalaĝaja da'me ami ena'am ta'le maliaĝa a'uochetac, qalaĝaja nayi 'noota ta'le aneloyiye, qa'a male qoyoqo'ta ga'me nolo' qomle joñe'me Dios male qo'mi nec'alaĝatedegue, ja ena'am ca'li yemta jep'iyaqa joñe'me Jesús. 12Joote qo'mi nedalo'te da'me pi'yaq, yamta'le da'me nete'. Chane'eja jaĝanaĝadiñi gaa'me 'lonataqa da'me 'lalaĝa, qama'le janaĝaiñe da'me yoqochiñe, ena'am ga'me coico le'ec yaqataĝata't nale 'uo ga'me nalada't. 13'Noota qom onaĝaic nataq'aen yoqovita ga'me jauoqo queda'me jouaqaue ga'me yoqochiñe, ena'te auec'achiya ga'me neualaĝayaĝac jo'ne ja yataĝalegue, chayovida'a da'me ena'te ami taĝayaqa nataq'aen da'me ja no'en qom 'uo joga'me jetaque yejam, laqaya da'me 'noota ta'le qaya'te qadamanaĝa jo'ne ja no'en. 14Ena'te jelaqaque joga'me neloiquiaĝac, dite da'me janaĝaiñe da'me Jaliaĝanec Jesús nataq'aen ena'te ñetaqaque gaa'me aleua lamaico.
ទើបបានជ្រើសរើសហើយ៖
Ro 13: TSN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Nuevo Testament Toba del Oeste © 2010 Sociedad Bíblica Argentina
