Mateu 11
11
Tunganda vaje Vatumine Yiuano Muka Kumbuitika
(Luka7:18-35)
1Omo Yesu uamanusuile kushika vandongisi vendi likumi na vavali, uahumine kuje kaha uayile nakulongesa nakuambulula mu vinganda viavo.
2Honi omo Yiuano tele ali mu kamenga uevuile vije vialingile Kilistu, kaha uatumine vandongisi vendi na mezi aua nguendi, 3yemuye mukahandeke kuli ikeye ngueni, “Yove uje ali nakuija indi tuvandamene mukuavo naua?”
4Kaha Yesu uavakumbuluile nguendi, “Yemuye mukaleke Yiuano vije munevu navije munamono, 5tupuputua vamona na vilema venda, vaka mbumba vanajele na tuveveve vevua, vatsi vasanguka, kaha na vihutu vali nakuvambuluila Muzimbu Uacili. 6Uakukuisula uje kesi na vimpata hali yange.”
7Omo vakele nakuya, Yesu uaputukile kuhandeka ku civunga via Yiuano nguendi, “Nkuma vika muayile mukumona mu mpambo? Muayile mukumona lihongo litepuzoka na mpunzi ndi? 8Indi vika honi muaililile kuje? Muayile mukumona muntu nazala vuzalo vuasenga ndi? Taleni, vaje vazala vuzalo vuasenga vakala mu mapela a muene. 9Vika muaililile kuje? Muayile mukumona kananguizi ndi? Eyo, njimileka nguange muakamuene viavingi kupulakana kananguizi. 10Ou ikeye vene uje ivasonekele nguavo, ‘Tala njikatuma kanganda kange kulutue luove, uje akavuahesa ngila yove. 11Muavusunga njimileka nguange, hakati ka vaje vanasemuka ku mpuevo naumo uahi uakama nahumuho kupulakana Yiuano muka kumbuitika, vuno honi uoshe uje alikehesa mu Vumuene vua muilu napu uakama kupulakana ikeye. 12Kuhuma ku matangua a Yiuano muka kumbuitika kuheta kulelo lino, Vumuene vua muilu vunayanda cikuma kaha vantu vakukaluua mitima vanavuambata nampindangano. 13Muomu voshe tunanguizi na valongisi va mashiko vahandekele vunanguizi noho Yiuano, 14kaha nga mutonda kucitava, Yiuano ikeye Eliya uje akeja. 15Uoshe uje ali na matuitui ovue.
16“Vuno honi vika njasa kusetekesa na vantu valelo? Njivasetekesa ngue vanike vaje vanatumama ku cihela ca kulandesela oku valisana muvakehela nguavo, 17‘Tuamiohieselele miaso, vuno honi kumuakinine, tuamimbilile miaso ya ha kutsa vuno honi kumualilile.’ 18Muomu Yiuano uezile kuakuhona kulia cipue kunua, kaha vahandekele nguavo, ‘Ali na lihamba!’ 19Kaha omo Muna Muntu uezile oku alia na kunua, kaha vahandeka nguavo, ‘Mutaleni uamutupu na cipenda, kavusamba ua vaka kutambula lisimu na vaka vupi!’ Vuno honi mana a Njambi vana ashulisisa na vilinga viendi.”
Mu Vinganda muje muakele Vantu Vakuhona Kutsiliela
(Luka10:13-15)
20Kaha Yesu uaputukile kutenuka mu vinganda muje mualingile cikuma vikomoueso viendi, muomu kuvatengulukile. 21“Cisingo kuli yove Kolazini! Cisingo kuli yove Mbetesainda! Muomu nga vije vikomoueso vialingiuile muli yeni, ngue vialingiuililile mu Tile na Sindone ngue vatengulukile laja mukuzala vinjeke naku likuita muto. 22Vuno honi njimileka nguange, ha litangua lia kusompa Njambi akevuila cikeketima Tile na Sindone kupulakana yeni. 23Kaha yove Kapenauma, nkuma uatondele kulijundula yove vavenia muilu ndi? Houe, vakakuneha ha mavu mu ngehena. Muomu nga vikomoueso vije vialingiuile kuli yove ngue vialingiuililile mu Sondoma, ngue nganda ije hanga kuicili na lelo lino. 24Vuno honi njimileka nguange, ha litangua lia kusompa Njambi akevuila cikeketima Sondoma kupulakana yove.”
Ijeni kuli Yange Muuane Kuhuima
(Luka10:21-22)
25Kaha ha ntsimbu ije Yesu uahandekele nguendi, “Njitsantsela kuli yove Tate, Muene ua melu na mavu, muomu unashueke evi viuma kuli vaka mana na vaka kulilongesa, kaha unavisholola ku vanike vavandende. 26Eyo Tate, muomu mukemo muuatondele linga cilingiue.
27“Viuma vioshe Tate nanjihanavio, kaha naumo uahi azivuka Muana kuvanga lika Ishe, kaha naua naumo uahi azivuka Ishe kuvanga lika Muana na kuli vaje Muana ahangula linga avashololueye.
28“Ijeni kuli yange yeni voshe vaje vanahono nakuambata viteli viakulema, kaha njikamihana kuhuima. 29Lituikeni mukambo uange, kaha lilongeseni kuli yange muomu yange njapua uakulikehesa nakulihana, kaha mukauana kuhuima mu miono yeni. 30Muomu mukambo uange uapua ua uasi, kaha na citeli cange capua ca cehu.”
ទើបបានជ្រើសរើសហើយ៖
Mateu 11: NNTZ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
