Yiuano 8
8
Mpuevo ivakuatele oku alinga vupangala
[1Vuno honi Yesu tele nayi ku Munkinda ua Oliveta. 2Cimene mene uahilukilile ku vimbalaka via Njivo ya Njambi. Kaha vantu voshe vezile kuli ikeye kaha uatumamene ha mavu nakuvalongesa. 3Valongisi va mashiko na Vafaliseho vanehele mpuevo uje vakuatele oku alinga vupangala, nakumuimika ha lutue luavo voshe, 4kaha vahandekele kuli Yesu nguavo, “Mulongisi, ou mpuevo tuamuuana alinga vupangala. 5Mu lishiko lije Mosesa uatushikile lihandeka ngualio mpuevo ua cifua eci napande kumutsiha na mavue. Honi yove uhandekaho vika?” 6Vahandekele eci mukumueseka, linga vamu uaneneho mulonga. Yesu uakotamene nakusoneka na munie uendi ha mavu. 7Omo vatualeleho kumuihula, kaha uandukile nakuhandeka kuli vakevo nguendi, “Nkuma iya uje hakati keni kesi na vupi aputuke kumuasha livue.” 8Kaha naua uakotamene nakusoneka ha mavu. 9Vuno honi omo vovuile eci, vaputukile kuya umo na umo kuputukila ku vakuluntu, kaha Yesu uasalele likaliendi na mpuevo uje yemanene nendi. 10Yesu uandukile nakuhandeka kuli uje mpuevo nguendi, “Mpuevo, valikuli? Nkuma naumo uahi nakuhisa ndi?”
11Uje mpuevo uahandekele nguendi, “Naumo uahi, Muene.”
Kaha Yesu uahandekele nguendi, “Nange kunjikuhisa. Ya, kuhuma hano keti ukalinge vupi naua.”]
Yesu ikeye ceke ca mavu
12Kaha naua Yesu uahandekele kuli vakevo nguendi, “Yange ceke ca mavu. Uoshe anjikava kakende mu milima vuno honi akakala na ceke ca muono.”
13Kaha Vafaliseho vahandekele kuli ikeye nguavo, “Ulinakuhana vukaleho vuove vavenia, vukaleho vuove keti vua vusunga.”
14Yesu uavakumbuluile nguendi, “Cipue vene njilinakuhana vukaleho vuange vavenia, vukaleho vuange vunapu vua vusunga muomu njizivuka oku njihuma noku njiya, vuno honi yeni kumuzivuka oku njihuma noku njiya. 15Mukasompo mu vuntu, vuno honi yange uahi njikasompo. 16Cipue vene nga njikasompo, kusompa cange capua ca vusunga, muomu keti likaliange njikasompo, vuno honi yange na Tate uje uanjitumine. 17Mu lishiko lieni vanasoneka nguavo vukaleho vua vantu vavali vunapu vua vusunga. 18Njihana vukaleho vuange hali yange vavenia, kaha naua na Tate uanjitumine ahana vukaleho hali yange.”
19Kaha vahandekele kuli ikeye nguavo, “Ali kuli Isho?”
Yesu uavakumbuluile nguendi, “Nga kumuzivuka yange kaha na Tate kumu muzivuka. Nga muanjizivukile nga na Tate muamuzivuka naua.”
20Uakele nakuhandeka evi oku tele ali nakulongesa mu vimbalaka via njivo ya Njambi kuyehi na mulili ua vimbongo via mulambu, vuno honi naumo uahi uamukutile, muomu ntsimbu yendi tele kanda ihete.
Kumuasa kuya kuje kunjili na kuya
21Yesu naua uahandekele kuli vakevo nguendi, “Njili nakuya, kaha mukanjitonda, vuno honi mukatsa na vupi vueni. Muomu kumuasa kuya kuje kunjili na kuya.”
22Kaha vantuama va Vayunda vahandekele nguavo, “Aya nakulitsiha ndi? Vikahoni vianalumbununa mukuhandeka nguendi, ‘Kumuasa kuya kuje kunjili na kuya?’”
23Kaha uahandekele kuli vakevo nguendi, “Yeni muhuma hano ha mavu, vuno honi yange njahuma muilu. Yeni mu vaka mavu, vuno honi yange keti njiuahano ha mavu. 24Njamilekele nguange mukatsa ku vipi vieni, cilivene mukatsa ku vipi vieni kuvanga noho mukatsiliela ngueni, ‘Yange vene ikeye.’”
25Vahandekele kuli ikeye nguavo, “Yove iya?”
Yesu uavakumbuluile nguendi, “Vika vinjihandekela viakulifua hume hambangelo kuli yeni? 26Njili naviavingi via kuhandeka hali yeni na viavingi via kumisompa, vuno honi ou uanjitumine uapua ua vusunga, kaha njihandeka ku vaka mavu vije vinjinevu kuli ikeye.”
27Kuvazivukile nguavo uakele nakuhandeka kuli vakevo via Ishe. 28Nankuma Yesu uahandekele nguendi, “Omo mukajundula Muna Muntu, ambahoni mukazivuke ngueni yange vene, kunjesi nakulilingila viuma lika liange, vuno honi njikahandeka viuma evi kuya muje Tate nanjishikilamo. 29Nauje uanjitumine ali nange, kanjisezele lika liange, muomu ntsimbu yoshe njikalingi via kumuvuahelesa.”
30Yesu tele acili nakuhandeka viuma evi, vavengi vatsilielele muli ikeye.
Vusunga vuka mipatula
31Yesu uahandekele kuli Vayunda vaje vatsilielele muli ikeye nguendi, “Nga mutualelelaho kuononoka vilongesa viange, kaha cilivene mu vandongisi vange va vusunga, 32kaha mukazivuka vusunga, na vusunga vukamipatula.”
33Vamukumbuluile nguavo, “Yetu tuvatekuluila va Avilahama kaha kanda tupueho tu vandungo ku muntu. Ulumbununa vika omo uhandeka nguove, ‘Vakamipatula’?”
34Yesu uavakumbuluile nguendi, “Muavusunga vene njimileka nguange, uoshe alinga vupi napu ndungo ua vupi. 35Ndungo kakele na muhela ua kutumamenena ku ntanga ije keti yendi, vuno honi muana ikeye atumamenena ntsimbu yoshe. 36Nga Muana akupatula, cilivene ukapua uakupatuka. 37Njazivuka vene nguange muvatekuluila va Avilahama, vuno honi mulinakutonda ngila yakunjitsihilamo, muomu muli yeni kumuesi lizi liange. 38Njihandeka vije vinjinamono kuli Tate, neni naua muapande kulinga vimunevu kuli ishueni.”
39Vamukumbuluile nguavo, “Avilahama ikeye tatetu.” Yesu uahandekele kuli vakevo nguendi,
“Nga muapuile mu vana va Avilahama, ngue muli nakulinga vialingile Avilahama. 40Vuno honi mulinakutonda kunjitsiha, yala uje namilekesa vusunga vuje vunjevuile kuli Njambi. Eci keti cikeco calingile Avilahama. 41Cilivene muli nakulinga vije vialingile ishueni.”
Vahandekele kuli ikeye nguavo, “Yetu keti tuvana vaku vupangala, tuli na Tate umolika, ikeye Njambi likaliendi.”
42Yesu uahandekele kuli vakevo nguendi, “Nga Njambi uapuile Ishueni, ngue muanjizange, muomu njahumu kuli Njambi kaha yange uno. Kunjalizilile lika liange, vuno honi ikeye uanjitumine. 43Nkuma vika kumuvuisisa vinjihandeka? Muomu kumutambula lizi liange. 44Muahuma kuli Ishueni liyavolo, kaha muahangula kulinga mashungu a ishueni. Uapuile muka kutsiha hume hambangelo kaha uapua uakuhona vusunga, muomu kumuesi vusunga muli ikeye. Omo akuisa, akahandeka kuya muje muafuilamo, muomu ikeye uapua ua makuli naua ishe ua vaka makuli. 45Vuno honi muomu njikahandeka vusunga, kumuasa kunjitsiliela. 46Nkuma iya hakati keni ahandeka nguendi nanjiuana na mulonga ua vupi? Nga njihandeka vusunga, kaha vika kumunjitsiliela? 47Uoshe ahuma kuli Njambi evua mezi a Njambi. Mulonga kumueku evuilila muomu kumuhumu kuli Njambi.”
Yesu na Avilahama
48Vakuluntu va Vayunda vamukumbuluile nguavo, “Nkuma kutuahandekele muacili omo tuahandeka nguetu u Kasamaliya kaha uli na lihamba ndi?”
49Yesu uakumbuluile nguendi, “Kunjesi na lihamba, vuno honi njikasingimika Tate, kaha yeni ku munjisingimika. 50Kunjekutonda vumpau vuange vavenia, vuno honi kuali ali nakutonda vumpau kaha ikeye naua muka kusompa. 51Muavusunga njimileka nguange, uoshe aniunga lizi liange kakatsiho.”
52Vakuluntu va Vayunda vahandekele kuli ikeye nguavo, “Tunamono cili vene nguetu uli na lihamba. Avilahama uatsile, kaha na tunanguizi vatsile, vuno honi uhandeka nguove, ‘Uoshe aniunga lizi liange kakatsiho.’ 53Nkuma yove u uakama kupulakana tatetu Avilahama uje uatsa ndi? Na vaje tunanguizi vatsile. Nkuma usinganieka nguove yove iya?”
54Yesu uavakumbuluile nguendi, “Nga njilihana vumpau yange vavenia, kaha vumpau vuange vunapu vuangoco. Tate ikeye muka kunjihana vumpau, ou muhandeka ngueni, Njambi yeni. 55Cipue vene ku mumuzivuka. Vuno honi yange njimuzivuka, nga njihandeka nguange kunjimuzivuka, kaha njipua ua makuli ngue yeni. Vuno honi njamuzivuka naua njiniunga lizi liendi. 56Ishueni Avilahama uavuahelele ngeci akamone litangua njikeja, kaha ualimuene nakuvuahelela.”
57Kaha Vakuluntu va Vayunda vahandekele kuli ikeye nguavo, “Kanda uhete ha miaka makumi atanu (50), honi nkuma uamumono vati Avilahama?”
58Yesu uahandekele kuli vakevo nguendi, “Muavusunga vene njimileka nguange, ntsimbu kanda Avilahama a semuke, yange kunjakele.”
59Nankuma vambatele mavue nakumuasha, vuno honi Yesu ua lishuekele nakuhuma mu vimbalaka via njivo ya Njambi.
ទើបបានជ្រើសរើសហើយ៖
Yiuano 8: NNTZ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
