Yiuano 1
1
Lizi lia Muono
1Hambangelo kuakele Lizi, kaha Lizi liakele hamo na Njambi, kaha Lizi liapuile vene Njambi. 2Lizi liakele hamo na Njambi, hume hambangelo. 3Muli ikeye Njambi uatangele viuma vioshe, kukuesi cuma civatangele kuakuhona ikeye. 4Muli ikeye muakele muono, kaha muono uapuile ceke ca vantu voshe. 5Ceke catuile mu milima, kaha na milima kuyasele kucihiana.
6Kuakele yala ivatumine kuli Njambi, lizina liendi liapuile Yiuano. 7Uezile ngue mukaleho, mukuhandeka vukaleho vua ceke, linga voshe vatsiliele kuhitila muli ikeye. 8Ikeye kapuile ceke, vuno honi uezile nakuambulula vukaleho vua ceke. 9Ceke ca vusunga cije cikatuila hali muntu uoshe cezile ha mavu.
10Lizi liakele ha mavu, kaha na mavu va atangele kuhitila muli ikeye, vuno honi cipue ngoco vene mavu ka amuzivukile. 11Uezile ku vendi, vuno honi vantu vendi kuvamutambuile. 12Vuno honi kuli voshe vaje vamutambuile, vaje vatsilielele mu lizina liendi, uavahanene nzili yakupua vana va Njambi, 13vaje vasemukile keti ku maninga cipue ku mashungu a yala, cipue ku cizango ca kusemuka ku yala, vuno honi Njambi ikeye vavenia uapuile Ishavo.
14Kaha Lizi liahimpukile muntu nakukala hakati ketu, uashulile na kavumbi na vusunga, tunamono vumpau vuendi, vumpau vuje hakupua Muana umolika ua Ishe.
15Yiuano uahandekele vukaleho hali ikeye nakutambeka nguendi, “Ou ikeye uje injahandekele nguange, ‘Ou eja munima yange napu uakama kupulakana yange, muomu ikeye uakeleko tele kanda yange!’ ”
16Hakushula cendi, yetu voshe tunatambula kavumbi ha kavumbi. 17Muomu lishiko cilivene valihanene kuhitila muli Mosesa, vuno honi kavumbi na vusunga viezile kuhitila muli Yesu Kilistu. 18Naumo uahi uamonaho Njambi, kuvanga lika Muana uje umolika, uje ali kuyehi na mutima ua Ishe, uje ikeye namuzivukisa.
Vukaleho vua Yiuano Muka Kumbuitika
(Mateu3:1-12; Mako1:1-8; Luka3:1-18)
19Ovu vukevuo vukaleho vuahanene Yiuano omo Vayunda vatumine vasasendote na Valevi kuhuma ku Yelusalema mukumuihula nguavo, “Yove iya?”
20Yiuano uahandekele vukaleho, kavianene kuvakumbulula, vuno honi uahandekele kuli vakevo nguendi, “Keti yange Kilistu.”#1:20 Lizina lia Kilistu likeliovene limolika na Mesiya vuno honi vialitepesa lika ngue Kilistu mu Cingelengu kaha Mesiya mu Cihevelu.
21Vamuhuile nguavo, “Ambahoni yove iya? Yove Eliya ndi?”
Vuno honi Yiuano uavakumbuluile nguendi, “Houe, keti yange!”
Vamuhuile naua nguavo, “Yove kananguizi ndi?”
Yiuano uavakumbuluile nguendi, “Houe keti yange.”
22Kaha vamuhuile nguavo, “Indi yove iya honi? Tuleke linga tukaleke vaje vanatutumu kuli yove. Ulitumbula nguove yove iya?”
23Yiuano uavakumbuluile nguendi,
“Yange lizi liaumo atambeka mu mpambo nguendi,
‘Sungameseni ngila ya Muene,’ ngue muahandekele kananguizi Isaya.”
24Honi omo vavatumine kuli Vafaliseho, 25vehuile Yiuano nguavo, “Nkuma vikahoni ulinakumbuitikila nga keti yove Kilistu, cipue Eliya, cipue kananguizi?”
26Yiuano uavakumbuluile nguendi, “Yange njimbuitika na mema, vuno honi hakati keni hanemana umo uje kumuzivuka. 27Ikeye umo uje eja munima yange, yange kunjafuililile cipue kuzitula miva yaha vinkaku viendi.”
28Vioshe evi vialingiuilile mu Mbeteni musinia lia ndonga ya Yundau kuje kuakele nakumbuitikila Yiuano.
Yesu ikeye Muna Mpanga ua Njambi
29Liamukuavo Yiuano uamuene Yesu alinakuija kuli ikeye, kaha uahandekele nguendi, “Taleni, Muna Mpanga ua Njambi uje akambata vupi vua vaka mavu! 30Ou ikeye uje injahandekele nguange, ‘Munima yange mukeja yala uakama kupulakana yange muomu ikeye uakeleko hambangelo tele yange kanda njisemuke.’ 31Yange kunjamuzivukile nguange ikeye, vuno honi njezile nakumbuitika na mema linga vaka Isaleli vamuzivuke.”
32Yiuano uambuluile vukaleho ovu nguendi, “Njamuene Cimbembesi ashuluka kuhuma muilu ngue livembe, na kutonkama hali ikeye. 33Yange kunjazivukile nguange ikeye, vuno honi uje uanjitumine kumbuitika na mema ikeye uahandekele kuli yange nguendi, ‘Hali uje ukamona Cimbembesi akashulukila naku mutonkama ikeye vene akambuitika na Cimbembesi Uakulela.’ 34Yange vene vavenia njacimono nakuhandeka vukaleho nguange ou ikeye vene Muna Njambi.”
Vandongisi va Yesu Vakulivanga
35Liamukuavo naua Yiuano uemanene na vandongisi vendi vavali, 36omo uamuene Yesu uakele nakuhita, uahandekele nguendi, “Taleni, Muna Mpanga ua Njambi!”
37Vaje vandongisi vavali vovuile Yiuano ahandeka evi, kaha vakavele Yesu. 38Omo Yesu uatengulukile, kaha uavamuene valinakumukava, kaha uahandekele kuli vakevo nguendi, “Muli nakutonda vika?”
Vamukumbuluile nguavo, “Lambi” (Kulumbununa “Mulongisi”). “Nkuma uakala kuli?”
39Uahandekele kuli vakevo nguendi, “Ijeni mumone.” Vaile nakumona kuje kuakele nakukala, vakele nendi litangua lije. Muomu yapuile ntsimbu ya muciuana ya mutania ua cinguezi.
40Umo ua vaje vavali uje uovuile Yiuano ahandeka nakumukava uapuile Anduleo, munaina ya Simoni Petulu. 41Hajevene Anduleo uauanene munaina Simoni, kaha uamulekele nguendi, “Tunauana Mesiya.” lizi eli lilumbunuka ngualio Kilistu. 42Ambahoni Anduleo uatualele munaina Simoni kuli Yesu.
Yesu uamutalele, kaha uahandekele kuli ikeye nguendi, “Yove Simoni muna Yiuano, vuno honi vakakutumbula Kefase.” (Lije lilumbununa Petulu).
Yesu asana Filipu na Natanele
43Liamukuavo cimene Yesu uayonguele kuya ku Ngalileya. Tele ali nakuya uauanene Filipu kaha uahandeka kuli ikeye nguendi, “Njikave!” 44Honi Filipu uahumininine ku Mbetesainda, ku nganda kuje ku vakele Anduleo na Petulu. 45Filipu uauanene Natanele, kaha uamulekele nguendi, “Tunauana uje yasonekele Mosesa mu livulu lia Lishiko uje naua na tunanguizi ivasonekele, ikeye Yesu uaku Nazaleta, muna Yosefa.”
46Natanele uamuhuile nguendi, “Nkuma ku Nazaleta kuasa kuhuma cuma cacili ndi?”
Filipu uamukumbuluile nguendi, “Ija ukamone.”
47Omo Yesu uamuene Natanele alinakuija kuli ikeye, uahandekele hali Natanele nguendi, “Ou ikeye Kaisaleli ua vusunga, uje muli ikeye kumuesi makuli!”
48Natanele uamuhuile nguendi, “Uanjizivukila kuli?”
Yesu uamukumbuluile nguendi, “Njakumuene uatumama muintsi lia muti ua mukuyu tele kanda Filipu akusane.”
49Natanele uamukumbuluile nguendi, “Mulongisi, yove unapu Muna Njambi! Yove Muene ua Isaleli!”
50Yesu uamukumbuluile nguendi, “Unatsiliela muomu njinakuleke nguange njakumuene uatumama muintsi lia muti ua mukuyu ndi? Ukamona viuma viakama kupulakana evi!” 51Kaha naua Yesu uahandekele kuli ikeye nguendi, “Muavusunga njimileka nguange, mukamona lilu liashokoloka, kaha na tungelo va Njambi valonda na kushuluka hali Muna Muntu.”
ទើបបានជ្រើសរើសហើយ៖
Yiuano 1: NNTZ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
