Башталганы 23

Сарраныҥ божогоны ла оныҥ мӧҥкӱзин кӧдӱргени

1Сарра јӱс јирме јети јаш јажаган. 2Ол Ханаан јеринде Кирьят-Арбада божогон. Эмди ол јердиҥ ады Хеврон. Авраам Сарраныҥ јада калганына карыгып, ӧксӧп ыйлаган. 3Оноҥ божогон ӱйинеҥ туура базып, хеттерге баштанган:

4– Мен слерге туш-туура, кӧчкӱн кижи. Јада калган ӱйимниҥ сӧӧгин јууп саларга меге јер беригер.

5Хеттер Авраамга каруу јандырып, айткан:

6– Бисти ук, бийибис! Сен Кудайдыҥ кӱндӱлӱ, сӱӱген кижизи. Ӱйиҥниҥ сӧӧгин эҥ јакшы сӧӧксалгышка јуу. Бистиҥ кажыбыс ла мындый керекке бойыныҥ ада-ӧбӧкӧлӧриниҥ сӧӧксалгыжынаҥ берер.

7Авраам хеттерге бажырып, 8айткан:

– Ӱйимниҥ сӧӧгин јуурга јӧпти берип турган болзогор, уксагар да, мениҥ адымнаҥ Цохардыҥ уулы Эфронноҥ сурап кӧрзӧгӧр: 9оныҥ јалаҥыныҥ кырындагы куй-ташты – Махпеланы меге сатсын. Мен оны слердиҥ кӧзигерче ле толо баазыла садып аларым. Мӧҥӱн акчала тӧлӧӧрим.

10Эфрон хеттердиҥ ортозында отурган. Каланыҥ каалгазыныҥ јанында јуулган ончо улуска угуза, ол мындый каруу берген:

11– Јок, бийим, мени ук: бу јалаҥды куй-тажыла кожо менеҥ сый эдип ал. Мениҥ улузым керечилер: мен сеге бу јалаҥды ӱйиҥниҥ сӧӧгин јууп салзын деп сыйлап јадым.

12Авраам ол јердиҥ улузына бажырып, 13јуулгандарга угуза Эфронго айткан:

– Сурап турум, сӧзимди уксаҥ: јалаҥ учун менеҥ бу мӧҥӱн акчаны ал. Мен анда ӱйимниҥ сӧӧгин јууп салайын.

14Эфрон каруузына айткан:

15– Бийим! Мени уксаҥ да, јердиҥ баазы тӧрт јӱс мӧҥӱн шекель. Сеге де, меге де ол неме бе? Анда ӱйиҥниҥ сӧӧгин јууп сал.

16Авраам Эфронло јӧпсинип, тӧрт јӱс мӧҥӱн шекельди, којойымдардыҥ ортозында јарадылган кемјӱле Эфронго бескелеп берген. 17Анайып Эфронныҥ Мамреге коштой Махпеладагы јалаҥы куй-тажыла, ончо агаштарыла кожо 18Авраамныҥ јери боло берген. Каланыҥ каалгазыныҥ јанына јуулган хетт укту улус оныҥ керечилери болгон.

19Мыныҥ кийнинде Авраам Ханаан јеринде Мамреге коштой (эмди Хеврон дейтен јер), Махпела јалаҥдагы куй-ташка Сарра ӱйиниҥ сӧӧгин јууп койгон. 20Анайып, јалаҥ ла куй-таш хеттердеҥ Авраамга кӧчӱп, сӧӧк јууйтан јер болуп калган.

ទើបបានជ្រើសរើសហើយ៖

Башталганы 23: АЛТ

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី Библия: Башталганы

Башталганы 23

ខគម្ពីរពេញនិយមពី
Башталганы 23

ព្រះគម្ពីរ:

Алтай тил

ជំនាន់បកប្រែ: Библия: Башталганы - АЛТ