Башталганы 22
22
Авраам Исаакты Кудайга тайылгага экелгени
1Оныҥ кийнинде Кудай Авраамды ченеген.
– Авраам! – деп, Ол айткан.
– Угуп турум! – Авраам каруу јандырган.
2Кудай айткан:
– Бойыҥныҥ уулыҥды, сок јаҥыс сӱӱген уулыҥды – Исаакты алып, Мориа јерине бар. Андагы кырлардыҥ бирӱзинде уулыҥды Меге бӱткӱлӱнче ӧртӧӧр тайылгага экел. Кандый кырда экелерин Мен сеге айдып берерим.
3Эртен тура Авраам эштегин ээртеп, эки јалчызын ла Исаак уулын кожо алып, бӱткӱлӱнче ӧртӧӧр тайылгага керектӱ одынды јарып ооктойло, Кудайдыҥ айдып берген јерине барган. 4Ӱчинчи кӱнде Авраам ол јерди ыраактаҥ кӧрӱп ийген.
5– Слер мында эштектиҥ јанында артып калыгар, – деп, Авраам јалчыларына айткан. – Мен уулымла кожо барып, Кудайга бажырала, ойто келерим.
6Авраам бӱткӱлӱнче ӧртӧӧр тайылгага керектӱ одынды Исаакка јӱктендирген. Оноҥ отук ла бычак алып, экӱ кожо баргандар.
7Исаак Авраамга:
– Ада! – деген.
Авраам:
– Угуп турум, уулым! – деп, каруузын јандырган.
– Бисте отук ла одын бар – уулы айткан, – је бӱткӱлӱнче ӧртӧӧр тайылгага экелетен кураан кайда?
8Авраам айткан:
– Бӱткӱлӱнче ӧртӧӧр тайылгага экелетен кураанды Кудай Бойы ла кӧрӧр, уулым.
Экӱ оноҥ ары барган.
9Кудайдыҥ айдып берген јерине једип, Авраам тагыл тургускан, ого от салган. Оноҥ Исаакты кӱлӱп, тагылдагы одынныҥ ӱстине салала, 10бычагын чыгарып, уулына талайган. 11Бу ла тушта теҥеринеҥ Кайраканныҥ ангели ого баштанып, айткан:
– Авраам! Авраам!
– Угуп турум! – деп, ол каруузын јандырган.
12– Уулыҥа колыҥды кӧдӱрбе, – деп, ангел айткан, – ого тийбе! Эмди Мен билерим: сен Кудайдаҥ коркып јадыҥ, бойыҥныҥ сок јаҥыс уулыҥды Меге берерге кысканбадыҥ.
13Авраам мӱӱстериле јыраага илинип калган кучаны кӧрӱп ийген. Ол барып, кучаны тудала, оны уулыныҥ ордына Кудайга бӱткӱлӱнче ӧртӧӧр тайылгага экелген.
14Бу јерди Авраам Яхве-Ирэ (Яхве Бойы кӧрӧр) деп адаган. Оныҥ учун эмди де: «Кайраканныҥ кырында кӧрӱне берер», – деп айдыжат.
15Кайраканныҥ ангели теҥеридеҥ Авраамга такып баштанып, 16айткан:
– Бойымла чертенип турум деп, Кайракан айдат: сок јаҥыс уулыҥды кысканбай, мынайып эткениҥ учун 17Мен сени ажындыра алкаарым. Мен сениҥ калдыктарыҥды теҥеридеги јылдыстардый, талайдыҥ јарадындагы кумактый тоозы јок кӧп эдерим. Олор ӧштӱлериниҥ калаларын јуулап алар. 18Сен Мениҥ сӧзимди уккан учун, калдыктарыҥ ажыра јер ӱстинде ончо калыктар алкыш алар.
19Авраам јалчыларына бурулуп, олорло кожо Беэр-Шева јаар барган. Анайып, ол Беэр-Шевада јуртай берген.
Нахордыҥ балдары
20Бу керектиҥ кийнинде, бир канча ӧйдиҥ бажында, Авраамга јетиргендер: «Сениҥ Нахор карындажыҥныҥ ӱйи Милка ого мындый уулдар таап берген: 21Уц (бу тун уул), Буз, Кемуэл (бу Арамныҥ адазы), 22Кесед, Хазо, Пилдаш, Идлаф ла Бетуэл». 23Бетуэл Ревекка деп кысту болгон.
Бу сегис уулды Авраамныҥ Нахор карындажына Милка чыгарып берген.
24Нахордо Реум деп кул ӱйинеҥ Тевах, Гахам, Тахаш ла Маха деп балдар база болгон.
ទើបបានជ្រើសរើសហើយ៖
Башталганы 22: АЛТ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Российское Библейское Общество, 2025
© Институт перевода Библии, 2025