Marko 16
16
O Isus uštilo taro mule
1Koga nakhla i sabota, i Marija tari Magdala, i Marija e Jakoveskiri daj hem i Saloma kinge mirisija te šaj te džan te makhen o telo e Isuseskoro. 2Rano sabajle ko prvo dive taro kurko, koga o kham iklilo, gele ko grobo.
3Hem drumaldan pučena pe sine: “Koj ka cidel amenge o bar taro udar e groboskoro?”
4Ama koga resle, dikhle deka o bar sine cidimo. A adava sine čače baro bar. 5Koga khuge ko grobo, dikhle jekhe terne manuše ko parne šeja sar bešela tari desno strana, a ola darandile.
6I ov phengja lenge: “Ma daran! Tumen rodena e Isuse taro Nazaret, so mulo ko krsto. Ov uštilo taro mule hem nane akate! Akje dikhen o than kaj so pašlilo. 7Nego džan hem vakeren leskere učenikonge hem e Petareske: ‘Ov džala angleder tumendar ki Galileja. Adathe ka dikhen le, sar so angleder phengja tumenge.’ ”
8O džuvla sine but bunime hem lele te tresinen, i našle taro grobo. Nikaske ništo na vakerge, soske darandile.
O Isus sikavela pe ko but thana
9[Rano sabajle ko prvo dive taro kurko, koga o Isus uštilo taro mule, prvo sikagja pe e Marijake tari Magdala, so latar angleder ikalgja efta demonen. 10Oj geli hem vakergja adava okolenge so sine leja, so tugujnena sine hem rovena. 11Koga šunge ola deka o Isus dživdo hem deka oj dikhla le, na verujnge la.
12Palo adava o Isus sikagja pe ko javer izgled pe duje učenikonge, sar džana sine ko jekh gav. 13Ola irange pe hem vakerge e javere učenikonge, ama ni len da na verujnge.
14Palo adava, o Isus sikagja pe e dešujekhe učenikonge sar hana sine maro zaedno. I opmeningja len so na sine len vera hem soj lengere vile barale, soske na verujnge okolen so dikhle le deka uštilo taro mule.
15Hem phengja lenge: “Džan ko celo sveto hem propovedinen o evangelije sa e manušenge. 16Koj ka verujnel hem ka ovel krstimo, ka ovel spasimo, ama koj na verujnela, ka ovel osudimo. 17A akala znakija ka oven adalencar so ka verujnen: Ko mo anav ka ikalen demonen; ka keren lafi ko neve čhibja; 18te astarge sapa pe vastencar hem te pile nešto otrovno, nane te ovel lenge ništo; ka čhiven pumare vasta upro nasvale hem ola ka sasljoven.”
O Isus voznesinela pe ko nebo
19Koga phengja akava, o Gospodari o Isus voznesisalilo ko nebo hem bešla tari desno strana e Devleskiri.
20Hem o učenikija gele ko sa o thana te propovedinen, a o Gospodari kerela sine buti lencar adaleja so potvrdinela sine leskoro lafi e znakoncar.]
ទើបបានជ្រើសរើសហើយ៖
Marko 16: MAR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល