Marko 1
1
O Jovan Krstitel spreminela o drumo e Isuseske
1Akava tano o početok taro evangelije e Devleskere Čhaveskoro, o Isus Hristos. 2Sar soj pišimo ko prorok Isaija:
“Akje, Me bičhavava me glasniko angla tute,
so ka spreminel to drumo.
3Ov tano o glaso so vikinela ki pustina:
‘Spreminen o drumo e Gospodareskoro!
Ramnonen o drumija leskere!’ ”
4Hem agjar alo o Jovan Krstitel, so sine ki pustina. Ov propovedinela sine e manušenge deka trebela te iranen pe ko Devel hem te oven krstime, te šaj o Devel te oprostinel lengere grevija. 5Togaš avena sine but manuša ki leste tari celo Judeja hem taro celo Erusalim. Ola priznajnena sine pumare grevija hem ov krstinela len sine ki reka Jordan. 6E Jovaneskere šeja sine kerde taro bala e kamilakere, a ki kičma sine phandlo kožno pojas, hem hala sine skakulcija hem divo avgjin. 7Ov propovedinela sine vakerindor: “Pala mande avela pobaro mandar, kaske so na sijum dostojno te tejlovav leskere sandale te phravav. 8Me krstinava tumen pajneja, a ov ka krstinel tumen e Sveti Duhoja.”
E Isuseskoro krstiba
9Ko odova vreme alo o Isus taro Nazaret ki Galileja hem o Jovan krstingja le ki reka Jordan. 10Samo so iklilo o Isus taro pani, dikhla sar o nebo pravgjola hem sar o Sveti Duh hulela upro leste sar gulubi. 11Togaš šundilo glaso taro nebo: “Tu sijan mo manglo Čhavo so tute tani mi vojla.”
E Isuseskoro iskušenie
12Odma palo odova o Duho e Devleskoro bičhalgja e Isuse ki pustina. 13Hem odothe sine saranda dive iskušimo taro Beng. Sine maškar o diva životne, a o angejla služinena sine leske.
O Isus počmingja te propovedinel
14Palo odova koga o car Irod čhigja e Jovane ko zatvor, o Isus gelo ki Galileja hem propovedinela sine o evangelije e Devleskoro. 15Hem vakjerela sine:
“Alo o vreme! Paše tano o carstvo e Devleskoro!
Pokajnen tumen hem verujnen ko evangelije!”
O Isus vikinela e prvo učenikon
16Togaš o Isus dži kote nakhela sine taro Galilejsko ezero, dikhla e Simone hem leskere phrale e Andreja, sar frdena o mreže ko pani, soske ola sine ribajra. 17I o Isus vakergja lenge: “Aven pala mande hem me ka kerav tumen ribajra manušengere!” 18Hem ola odma mukhle pumare mreže hem gele pala leste. 19Koga gele adathar hari podur, o Isus dikhla e Zavedejeskere čhaven, e Jakove hem e Jovane, sar bešena sine ko pumaro čamco hem namestinena sine pumare mreže. 20Odma o Isus vikingja len, hem ola mukle pe dade e Zavedeje ko čamco zaedno sa e manušencar so kerena sine buti, hem gele palo Isus.
O Isus ikavela demonen
21Koga ale ko Kapernaum, ko prvo sabotno dive o Isus odma kugja ki sinagoga hem počmingja te sikavel e manušen. 22Ola čudinena pe sine taro leskoro učibe, soske ov sikavela len sine sar adava so isi le vlast, a na sar o učitejla e Zakoneskere. 23Ama ki sinagoga sine jekh manuš, so sine opsednimo lošno duhoja, hem počmingja te vikinel: 24“So mangeja tu amendar, Isuse taro Nazaret? Aljan li te uništine amen? Džanava koj sijan tu: Tu sijan o Svetco e Devleskoro!” 25Ama o Isus zaptingja le vakerindor: “Phan to muj! Iklov lestar!” 26Koga o Isus vakergja adava, o lošno duho silno tresingja e manuše hem vikaja iklilo lestar.
27A sa o manuša so sine andre čudisalile hem počminge maškar peste te pučen pe: “Soj akava! Savo tano akava nevo učibe vlasteja! E lošno duhonge zapovedinela, hem ola da šunena le!” 28Hem odma šundilo baši o Isus ki celo Galileja.
O Isus sasljarela bute manušen
29Samo so iklile tari sinagoga, o Isus e Jakoveja hem e Jovaneja ale ko kher e Simoneskoro hem e Andrejaskoro. 30A andre sine pašli i sasuj e Simoneskiri so sine la bari treska, i odma adava vakerge e Isuseske. 31Togaš o Isus alo uza late, astargja lakoro vas hem vazdingja la. Hem i treska odma mukhla la, i oj služingja lenge.
32Paloručko, koga pelo o kham, sa o manuša taro Kapernaum anena sine ko Isus e nasvalen hem manušen so sine len demojna. 33A anglo udar khedisalili bari gužva taro celo gradi. 34Hem o Isus sasljargja bute manušen, so sine nasvale taro razno nasvalipe. Ikagja but demonen, hem na dozvolingja lenge te keren lafi, soske ola džange koj tano ov.
O Isus propovedinela ki celo Galileja
35Tajsutno dive, rano sabajle, o Isus uštilo, iklilo taro kher hem gelo ko jekh mirno than, hem adathe molingja pe. 36A o Simon hem okola so sine leja, iklile te roden le. 37I koga arakhle le, vakerge leske: “Sarinen rodena tut!” 38A o Isus odgovoringja lenge: “Ajde te dža ko najpašutne gava hem adathe te propovedinav, soske me adaleske aljum.” 39Hem ov džala sine ki celo Galileja hem propovedinela sine ko lengere sinagoge hem ikavela sine demonen.
O Isus sasljarela leprozno manuše
40Jekh manuš, so sine nasvalo tari lepra, alo anglo Isus, pelo ko kočaka hem silno molingja le: “Te manglan tu, šaj te sasljare ma!” 41E Isuseske pelo odobor žal, pružingja po vas, pipingja le hem vakergja: “Mangava! Saslov!” 42Samo so pengja adava o Isus, i lepra taro manuš našavdili, hem ov saslilo. 43Pred te mukhel le o Isus, zapovedingja leske: 44“Ma vaker nikaske akava! Samo dža hem sikav e sveštenikoske deka sijan sasto, hem de žrtva baši to očistiba, sar so o Mojsej naredingja, te šaj te ovel svedoštvo lenge.” 45Ama o manuš, samo so iklilo adathar, počmingja sarinenge te vakerel so ulo leja, agjar so o Isus našti khuvela sine javno ko gradi, samo ačhola sine ko čuče thana. A palem o manuša avena sine ki leste taro sa o strane.
ទើបបានជ្រើសរើសហើយ៖
Marko 1: MAR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល