MATTHEW 6
6
Dukhiya Ke Daan Diya
1“Manuh khan aage te dekhai dibole dhormo kam nakoribole hushier koribi; eneka nahole sorgot te thaka tumar Pitri pora tumi eku bhi inam napabo.
2“Eitu nimite, tumi ketiya dukhiya khan ke daan dibo, tumar aage te bigul baja bole nadibi, kopoti khan pora he, girja ghor aru raasta te dusera pora taikhan ke stuti koribo dibo nimite eitu nisna kore. Moi tumikhan ke hosa koi ase, taikhan nijor inam pai loise. 3Kintu ketiya tumikhan pora dukhiya khan ke daan dibo, tumar daina haat pora ki kori ase eitu banya haat pora janibole nadibi, 4tetiya tumi dukhiya khan ke diya daan tu gupon te hobo; aru tumar sorgo Pitri Kon he gupon te kora dekhi, Tar pora tumikhan ke inam dibo.
Prabhu Laga Prathana
5“Aru ketiya tumikhan prathana kore, kopoti khan nisna nakoribi; kilemane taikhan pora girja ghor aru raasta phale khara kori kene prathana kora tu bhall lage, tetiya hole he taikhan tu dusera manuh khan pora dekhibo. Hosa bhi Moi tumikhan ke koi ase, taikhan laga inam paise. 6Kintu ketiya tumikhan prathana kore, tumar nijor laga kamra te jabi aru dorja bond korilobi aru gupon te thaka tumar Pitri logote prathana koribi; aru gupon te thaka tumar Pitri pora tumikhan ke inam dibo.
7“Aru prathana kora te porjati khan nisna phaltu kotha loi kene besi nakobi; kilemane taikhan pora besi kotha koi kene prathana kora tu he hunibo eneka bhabna kori ase. 8Taikhan nisna nahobi, kilemane tumar Pitri pora namanga aage te tumikhan ki dorkar ase eitu jani loise. 9Eitu nimite eneka he prathana koribi:
“Sorgot te thaka amar Pitri,
Tumar nam pobitro hobi.
10Tumar rajyo ahhibi,
Sorgo te keneka ase,
eneka prithibi te bhi Tumar itcha koribi.
11Hodai din laga khua-lua ahar aji amikhan ke dibi.
12Aru amikhan logot dhaar thaka khan ke keneka amikhan pora maf kori diye,
eitu nisna amikhan laga dhaar bhi maf kori dibi.
13Aru porikhya te amikhan ke loi najabi,
Kintu beya ekjon pora udhar kori lobi.
14Kilemane jodi tumikhan pora manuh khan laga paap khyama kori diye, Sorgot laga tumar Pitri pora bhi tumikhan ke khyama kori dibo; 15kintu jodi tumikhan pora dusera ke khyama nakore, tumar Pitri pora bhi tumar paap khyama nakoribo.
Logun
16“Aru ketiya tumi khan logun loi, kopoti khan nisna, chehera te dukh nadekhabi, kilemane manuh khan aage te logun loi ase eneka dekhai dibole taikhan pora nijor chehera beya kori kene dekhai diye. Hosa bhi, Moi tumi khan ke koi ase, taikhan nijor laga inam pai loise. 17Kintu ketiya tumi logun thake, tumar matha tel pora abishek kori lobi aru tumar chehera bhall pora safa korilobi, 18eneka hole tumi logun te thaka tu dusera pora nadekhibo kintu khali tumar gupon te thaka Pitri pora dekhibo; aru tumar Pitri kon he gupon te dekhi ase Tar pora tumi ke inam dibo.
Sorgo Te Sampoti Jama Koribi
19“Tumi nijor karne sampoti prithibi te jama nakoribi, kon jagate puka aru mamor he khai aru kon jagate choor manuh khan pora bhangai kene choor kori loi, 20kintu nijor karne sampoti sorgo te jama koribi, kon jagate puka aru mamor he nakhai aru choor manuh khan pora bhangai kene choor koribole naparibo. 21Kilemane kon jagate tumar sampoti ase, tate tumar mon bhi thakibo.
22“Soku tu nijor gau nimite bati ase. Eitu nimite, jodi tumar soku tu bhall ase, tumar gau sob tu puhor te thakibo; 23kintu jodi tumar soku tu bhall nahoi, tumar gau sob tu andhera pora bhorta thakibo. Tetiya, jodi tumar laga puhor tu eneka andhera ase, eitu andhera tu kiman dangor hobo!
24“Konu manuh pora bhi malik duijon ke seva koribole naparibo; kilemane nokor ekjon pora malik ekjon ke ghin koribo nahole ekjon ke prem koribo, nahole ekjon ke seva dibo aru dusera ke hisap nathaka hobo. Tumi Isor aru sampoti eke logote seva koribo naparibo.
Chinta Nakoribi
25“Eitu nimite moi tumikhan ke koi ase, tumar jivon karne chinta nakoribi, tumikhan ki khabo nahole ki pibo, nahole tumar gau karne, ki pindhibo. Ahar pora jivon he dangor nahoi neki, nahole kapoor pora gau he dangor nahoi neki? 26Akash te chiriya khan sabi: taikhan pora bijon naphelai nahole kheti nakate nahole bhoral te dhan jama nakore, aru eneka hole bhi tumar sorgot laga Pitri pora taikhan ke palli ase. Eitu khan sob pora tumikhan he sobse dangor nahoi neki? 27Aru tumar majote konuba pora chinta kora karne nijor jivon te olop holebhi lamba koribo paribo neki? 28Aru tumar pindhibole kapoor nimite kile chinta kori ase? Jungol laga phul, lily laga bhabna kori sabi, taikhan keneka uthi; taikhan dukh kori kene kam nakore, nahole suta nabonai; 29kintu tumikhan ke moi koi ase, Solomon pora bhi tar laga mahima sob te iman tak bhi pindha nai. 30Kintu jodi kheti te ula jungol ghans ekta, kontu aji jinda ase aru kali tu jui jola jaga te phela diye, eitu khan ke Isor he iman pindhai dile, Tar pora tumikhan ke arubhi besi pindhibo nadibo neki, Oh biswas te komzur khan? 31Eitu karne eneka koi kene, chinta nakoribi, ‘Amikhan ki khai thakibo?’ nahole ‘Amikhan ki pibo?’ nahole ‘Amikhan ki pindhibo?’ 32Kilemane porjati khan pora eitu khan sob nimite chinta kori kene bisare; aru hosa bhi tumar sorgot laga Pitri pora eitu sob tumar khan lage eneka jani ase. 33Kintu prothom te Isor laga rajyo aru Tar laga dharmikota bisaribi, aru eitu khan sob tumikhan ke di dibo.
34“Eitu nimite ahha kali karne chinta nakoribi, kilemane ahha kali pora nijor laga chinta anidibo. Aji laga chinta tu aji karne kafi ase.
ទើបបានជ្រើសរើសហើយ៖
MATTHEW 6: NagaMe
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2014, The Bible Society of India
All rights reserved.
