MATTHEW 22
22
Saadi Bhojon Laga Dristanto
1Arubhi Jisu he tarkhan logote dristanto pora kotha koise, 2“Sorgo rajyo tu ekta raja, kon he nijor putro karne saadi laga bhojon khabole dise eitu logote tulona kori kene sabo pare, 3aru kiman jon ke nimontron di thakise, eitu khan sob ke matibole Tar laga nokor khan pathaise; kintu taikhan ahha nai. 4Arubhi Tar pora dusera nokor khan pathai kene koise, ‘Kiman jon ke mati kene ase, taikhan ke kobi, Sabi, Moi khua lua sob jugar kori kene ase, Moi laga mostu goru aru goru puali katise, aru ki lage eitu sob jugar hoise; saadi laga bhojon khabole ahhibi.’ 5Kintu taikhan pora eku hisap kora nai aru dusera te he jai jaise, ekjon tar laga kheti te jaise, dusera ekjon tar laga bepari te jaise, 6Tetiya dusera khan pora raja laga nokor khan ke dhorise, beya pora sorom khilaise, aru morai dise. 7Tetiya raja khong uthise, aru Tar laga sepahi khan pathai kene manuh ke morai diya khan sob nosto kori dise, aru taikhan laga sohor sob jui pora jolai dise. 8Tetiya Tar laga nokor khan ke koise, ‘Saadi tu jugar hoi kene ase, kintu kon ke matise taikhan jugyo nahoi. 9Eitu nimite raasta te jabi, aru tumikhan pora kiman jon ke log pai eitu khan sob ke saadi te khabole matibi.’ 10Aru eitu nokor khan raasta phale jai kene, kiman manuh ke log korise eitu khan sob jama korise aru bhall beya mati kene saadi kora ghor sob tu alohi khan pora bhorta hoise.
11“Kintu ketiya raja ahhi kene alohi khan ke log korise, tar pora ekjon saadi laga kapoor napindhi kene dekhise; 12aru tar pora tai ke hudise, ‘bondhu, keneka saadi laga kapoor napindhi kene tumi iyate ahhise?’ Aru tai kotha kobo napara hoi jaise. 13Tetiya raja pora hohai kora manuh khan ke koise, ‘Tar laga haat aru theng bandhi kene bahar andhera jaga te phelai dibi. Tate manuh khan kanda aru dant korsin kori thakibo.’ 14Kilemane besi manuh ke matibo, kintu olop he basi lobo.”
Caesar Ke Khajana Diya
15Tetiya pharisees khan jaise aru Tar nijor pora kua kotha te keneka dhoribo eitu laga budhi bonaise. 16Aru tarkhan laga chella khan, Herod laga manuh khan logot te Jisu usor te pathaise, aru koise, “Guru-ji, amikhan pora jane, apuni hosa ase, aru Isor laga hosa jivon raasta sikhai ase, aru manuh ke bhoi nakore; kilemane manuh khan laga mukh sai kene apuni kam nakore. 17Etiya, amikhan ke kobi, apuni keneka bhabna kori ase. Caesar ke khajana dibole kanoon te koi ase na nai?” 18Kintu, Jisu he taikhan laga chalak tu jani kene koise, “Tumi kopoti khan, kile Moi ke porikhya kori ase? 19Khajana laga poisa tu Moi ke dekhabi.” Aru taikhan pora denarius ekta anidise. 20Aru Jisu he taikhan ke koise, “Eitu kon laga protima ase?” 21Taikhan pora koise, “Caesar laga.” Tetiya Jisu he taikhan ke koise, “Caesar laga ki ase eitu Caesar ke di dibi, aru Isor laga ke ase eitu Isor ke di dibi.” 22Ketiya taikhan pora eitu hunise, taikhan asorit hoise; aru Tar ke shari kene jai jaise.
Sadducees Pora Ponuruthan Laga Hudise
23Eitu eke din te Sadducees khan, kon pora ponuruthan nai eneka koi, tarkhan bhi Tar usor te ahhise; aru ekta prosno hudise, 24aru koise, “Guruji, Moses pora koise, ‘Jodi manuh ekjon, bacha napai kene morile, tetiya tar laga patni tu kokai bhai ekjon pora lobo lage, aru teneka tar bhai karne hontan ulai dibo lage.’ 25Etiya amar majot te konuba satta bhai-kokai thakise; prothom bhai pora patni ke saadi korise aru hontan napai kene morise, aru tar laga patni tu bhai ke shari dise. 26Teneka he ditiyo bhai, aru tritiyo bhai bhi, satta tak bhi mori jaise. 27Tar khan sob mora pasot te, heitu tiruta bhi mori jaise. 28Tetiya, ponuruthan din te, eitu satta manuh majot te tai tu kon laga patni hobo? Kilemane tai tu sob laga patni thakise.”
29Kintu Jisu he tarkhan ke uttar dise, “Tumikhan galti hoise, kilemane tumikhan pora Hastro nahole Isor laga shakti bhi najane. 30Kilemane ponuruthan te saadi nakore, nahole saadi koribole bhi nadibo, kintu sorgo dut nisna he hoi thakibo. 31Aru mori kene thaka manuh khan ponuruthan hobo karne, Isor pora tumikhan ke ki koise, eitu tumikhan pora porha nai neki, 32‘Moi Abraham laga Isor, aru Isaac laga Isor, aru Jacob laga Isor’? Tar tu mora laga Isor nahoi, kintu jinda thaka laga Isor ase.” 33Aru ketiya jama kori thaka manuh khan pora eitu hunise, taikhan pora Tar sikhai diya te besi asorit paise.
Dangor Hukum
34Kintu, Tar pora Sadducees khan ke chup-chap kori diya, ketiya pharisees khan pora hunise, taikhan eke logot jama korise. 35Aru tarkhan majot te, pondit ekjon pora Tar ke porikhya kori kene ekta prosno korise. 36“Guru-ji, kanoon hisap te sobse dangor hukum tu kon tu ase?” 37Aru Jisu he tar ke uttar dise, “Tumar Prabhu Isor ke tumar mon sob, aru tumar atma sob, aru tumar gyan sob pora prem koribi. 38Eitu he sobse dangor aru prothom hukum ase. 39Aru ditiyo bhi eitu nisna he ase, tumar aspas ke tumi nijor nisna he prem koribi. 40Eitu duita te he hukum aru bhavobadi laga kanoon kotha sob lagi kene ase.”
Khrista Kon Laga Putro Ase?
41Eitu homoi te ketiya pharisees khan eke logote jama korise, Jisu he taikhan ke ekta prosno korise, 42aru koise, “Tumikhan pora Khrista tu kon ase eneka bhabi? Tar tu kon laga Putro ase?” Taikhan pora uttar dise, “David laga putro ase.” 43Tar he taikhan ke koise, “Tenehole keneka David he, atma te Prabhu eneka matise, aru koise,
44“‘Prabhu he moi laga Prabhu ke koise,
Moi Tumar dushman khan tumar theng niche te loi najua tak,
Moi laga daina haat phale bohibi’”?
45“Jodi David pora bhi Prabhu eneka matise, keneka Tar tu David laga putro hobo?” 46Aru kon manuh pora bhi Tar ke uttar dibole para nai, teneka eitu din pora konu manuh pora bhi Tar ke prosno koribole himat pua nai.
ទើបបានជ្រើសរើសហើយ៖
MATTHEW 22: NagaMe
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2014, The Bible Society of India
All rights reserved.
