MATTHEW 21
21
Jiti Kene Jua
1Aru ketiya tarkhan Jerusalem usor te pongchise, tetiya Olive pahar phale thaka Bethphage te jaise, tetiya Jisu he duijon chella pathai kene, 2tarkhan ke koise, “Tumikhan laga aage te thaka bosti te jabi, aru loge loge tumikhan pora tate gadho ekta, tai laga bacha ekta logot te bandhi kene dekhibo; eitu khuli kene Moi karne anibi. 3Jodi konuba pora tumikhan ke kiba kole, eneka kobi, ‘Prabhu he eitu khan lagi ase,’ aru tar pora ene pathai dibo.” 4Eitu, bhavobadi pora ki kotha koi rakhise, eitu hidho hobo nimite eneka koise,
5“Zion laga putri ke eneka kobi,
‘Sabi, tumi laga raja tumar usor te,
nomro hoi kene gadho te bohi kene,
aru gadho laga bacha upor te bohi kene ahhi ase.’”
6Chella khan jai kene Jisu pora kua nisna korise; 7Tarkhan pora gadho aru eitu laga bacha tu anise, aru tarkhan laga kapoor eitu upor te lagai dise aru tate Tar bohise. 8Jama kori thaka manuh khan besi bhag pora taikhan laga kapoor tu raasta te bichai dise, aru konuba manuh pora gos laga daal kati kene raasta te bichai dise. 9Aru Tar aage te jua manuh khan aru Tar piche te ahha khan he jur pora chillai kene koise, “Hosanna, David laga Putro ke! Prabhu laga nam te kon ahhi ase Tar ashish! Sob pora uncha mahan jaga te Tar ke hosanna!” 10Aru ketiya Tar Jerusalem te ahhise, sohor sob tu hala-gula hoi kene koise, “Eitu kon ase?” 11Aru jama kori thaka manuh khan pora koise, “Eitu Jisu, Galilee te Nazareth laga bhavobadi ase.”
Jisu Girja Safa Kora
12Aru Jisu he girja ghor te jaise tate bikiri kora aru kina manuh khan sob khedai dise, aru Tar he toka-poisa bodli kora manuh laga mez tu ulta kori kene phelai dise aru kobutor bikiri kora manuh laga soki bhi phelai dise. 13Tar pora taikhan ke koise, “Eitu likha ase, ‘Moi laga ghor tu prathana kora ghor eneka matibo,’ kintu tumi khan pora eitu dacoit manuh laga ghor bonai dise.”
14Aru soku andha aru lengera khan girja ghor te, Tar usor te ahhise, aru Tar pora hustho kori dise. 15Kintu ketiya prodhan puruhit khan aru pondit khan pora ki asorit kam Tar kora tu dekhise, aru bacha khan pora girja ghor te, “David laga Putro ke Hosanna!” eneka hala kora hunise, taikhan soku jolise; 16aru taikhan pora Tar ke koise, “Eitu khan pora ki koi ase, Apuni huni ase na?” Aru Jisu he taikhan ke koise, “Hoi; tumikhan pora eitu ketiya bhi porha nai neki,
“‘Kesua khan aru dudh pi thaka huru bacha khan laga mukh pora,
apuni aradhana jugar kori loise?’”
17Aru taikhan shari kene, Tar Bethany sohor te jai kene tate thakise.
Jisu He Dimoru Gos Haun Kora
18Phujor te, Tar sohor phale ghurai ahha homoi te bhuk lagise. 19Aru raasta kinar phale ekta dimoru gos dekhi kene, Tar tate jaise, aru tate eku pua nai kintu pata he thakise. Aru Tar he eitu ke koise, “Etiya pora tumi eku phol nadhoribi!” Aru eitu dimoru gos tu loge loge sukhi jaise.
20Ketiya chella khan pora eitu dekhise tarkhan asorit lagise, aru koise, “Keneka eitu dimoru gos tu loge loge sukhi jaise?” 21Aru Jisu pora tarkhan ke uttar dise, “Hosa, Moi tumikhan ke kobo, jodi tumikhan biswas kore, aru ekebare hondeh nahoi, tetiya eitu dimoru gos logot te ki korise, khali eitu nahoi, kintu jodi tumi eitu pahar ke kobo, ‘Uthai lobi aru samundor te dhubi jabi,’ eitu hobo. 22Aru prathana te tumikhan pora ki ki mange, jodi tumikhan biswas thakile, tumikhan pora eitu pabo.”
Jisu Laga Odhikar Hudise
23Aru Tar mondoli ghor te sikha homoi, prodhan puruhit aru bridho khan ahhise, aru koise, “Ki odhikar pora tumi eitu kam sob kori ase aru kon pora tumi ke eitu odhikar dise?” 24Jisu he uttar di koise, “Moi bhi tumikhan ke ekta prosno hudibo, aru jodi tumikhan pora eitu uttar dibo pare, tetiya Moi bhi ki odhikar pora eitu kam kori ase eitu kobo. 25John pora Baptisma diya kam tu kot pora ahhise? Sorgo pora na, nahole manuh pora?” Aru taikhan ekjon he ekjon logote alusona kori kene koise, “Jodi amikhan pora kobo, ‘Sorgot pora,’ tetiya Tar he amikhan ke kobo, ‘tetiya kile tumikhan pora tar ke biswas kora nai?’ 26Kintu jodi amikhan pora koi, ‘manuh pora,’ tetiya jama kori thaka manuh khan ke amikhan pora bhoi kori ase; kilemane sob manuh pora John tu ekta bhavobadi eneka biswas kori ase.” 27Eitu nimite taikhan pora Jisu ke koise, “Amikhan pora najane,” Aru Tar bhi taikhan ke koise, “Tetiya Moi bhi ki odhikar pora eitu kam kori ase, eitu nakobo.
Dui-jon Putro Laga Dristanto
28“Tumi khan pora ki koi? Ekjon manuh, duijon putro thakise; aru tar he prothom putro ke koise, ‘Putro, jabi aru aji angur kheti te kam koribi.’ 29Aru tar he uttar dise, ‘Moi najabo;’ kintu pasote tar mon ghuraise aru jaise. 30Aru tar jai kene ditiyo putro ke bhi eke kotha tu koise; aru tar he uttar dise, ‘Moi jabo,’ kintu jua nai. 31Duijon majote kon he pitri laga itcha korise?” Taikhan pora koise, “prothom pora he korise.” Jisu he taikhan ke koise, “Hosa, Moi tumikhan ke koi ase, khajana kortula khan aru biyobichar khan sorgot te tumikhan aage te jabo. 32Kilemane John tu, hosa bhi dharmik manuh ekjon ahhise, aru tumikhan pora tar kua kotha te biswas kora nai, kintu khajana kortula khan aru beisa khan pora he biswas korise; aru tumikhan pora ketiya eitu dekhise, tetiya bhi tumikhan pora paap shikar kori kene biswas kora nai.
Kishan Laga Dristanto
33“Dusera dristanto ekta aru hunibi. Angur kheti kora malik ekjon thakise, aru kheti te sob phale berah lagai loise, aru angur mihin koribole gant ekta khundise, aru minar ekta bonai loise, aru kheti kora manuh khan ke eitu sabole dise, aru dusera desh ekta te jai jaise. 34Ketiya phol pakibole homoi ahhise, kheti kora manuh khan usor te phol jama koribole Tar laga nokor pathai dise; 35aru kheti kora manuh khan pora Tar laga nokor khan ke dhori kene besi pitise, dusera ekjon ke morai dise, aru ekjon tu pathor pora mari dise. 36Arubhi malik pora aage te pathai diya nokor khan pora besi pathai dise; aru kheti kora manuh khan pora eke kam tu taikhan ke bhi korise. 37Pasot te Tar pora nijor putro ke pathai dise, aru koise, ‘Taikhan pora Moi laga putro ke tu sonman koribo pare.’ 38Kintu ketiya kheti kora manuh khan pora putro ke dekhise, taikhan pora taikhan majot te koise, ‘Eitu he uttarodhikar heijon tu ase; ahhibi amikhan pora tar ke morai dibo aru tar laga uttarodhikari tu loi lobo.’ 39Aru taikhan pora tar ke dhorise aru angur kheti bahar te loi jaise aru morai kene phelai dise. 40Eitu karne ketiya kheti malik tu ahhibo, kheti te kam kora manuh khan ke ki koribo?” 41Taikhan pora Tar ke koise, “Tar pora eitu beya kishan khan tu dukh-kosto hoi kene morai dibo, aru kon pora homoi thik te angur phol dibo, taikhan ke koribole dibo.”
42Jisu he taikhan ke koise, “Tumikhan pora Hastro te eneka porha nai neki:
“‘Pathor kon tu ghor bona manuh khan pora ninda kori dise
eitu he bhetimul pathor tu hoise;
eitu Prabhu laga kam thakise,
aru eitu amikhan laga soku aage te asorit nahoi neki’?
43Eitu karne tumikhan ke Moi koi ase, Sorgo rajyo tu tumikhan pora loi jabo aru phol thik homoi te diya manuh khan ke di dibo. 44Aru kon he eitu pathor upor te giribo tukura hobo; aru kon upor te eitu giribo mihin hoi kene dhuli hobo.”
45Ketiya prodhan puruhit khan aru Pharisees khan pora eitu dristanto tu hunise, taikhan laga kotha he koi ase eneka tarkhan pora jani loise. 46Kintu ketiya taikhan pora Tar ke dhori bole sesta korise, jama kori thaka manuh khan ke bhoi lagise, kilemane manuh khan pora Tar tu ekta bhavobadi eneka biswas kori thakise.
ទើបបានជ្រើសរើសហើយ៖
MATTHEW 21: NagaMe
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2014, The Bible Society of India
All rights reserved.
