LUKE 3
3
Baptisma Diya John Pora Raasta Jugar Kora
1Eitu desh te ketiya Tiberius Caesar ponchas saal sason kori thakise, Pontius Pilate Judea laga rajyopal, aru Herod he Galilee laga tetrarch, aru tar laga bhai Philip he Ituraea aru Trachonitis laga tetrarch, aru Abilene laga tetrarch Lysanias asile, 2hei homoi te Annas aru Caiaphas he mahan puruhit thakise, tetiya Zechariah laga putro John jungol te thaka homoi te tar darai Isor laga kotha ahhise; 3aru tar Jordan usor te thaka nagor sob te jai kene, paap pora khyama pabole mon ghurai ahha laga baptisma lobo nimite prachar kori ahhise. 4Isaiah bhavobadi laga kitab te eneka likhi thaka nisna,
“Jungol te ekta awaz chillai kene kua ekjon eitu ase:
Prabhu laga raasta jugar koribi,
tar laga khuj raasta sidha bonai lobi.
5Bhoyam jaga sob bhorta hoi jabo,
aru porbot aru pahar jaga sob niche kori namai lobo,
aru tera thaka sidha kori lobo,
aru uncha, doha jaga sob homan raasta hobo;
6aru manuh khan sob pora Isor laga poritran dekhibo.”
7Genti napara manuh khan, kon tar pora baptisma lobole ahhise, taikhan ke tar pora koise, “Tumikhan sanp laga bacha khan! Ahhi thaka khong pora polabole kon pora tumikhan ke hushier koribole dise? 8Mon ghurai lua nisna phol dhoribi. Aru tumikhan nijor ke eneka nakobi, ‘Amikhan laga pitri Abraham ase.’ Kilemane moi tumikhan ke koi ase, Isor pora eitu pathor khan pora bhi Abraham laga bacha khan ulai dibo pare. 9Etiya bhi kuthar tu gos laga hipa te rakhi kene ase. Eitu nimite kon tu gos bhall phol nadhore eitu kati kene jui te phelai dibo.”
10Aru genti napara manuh khan pora tar ke hudise, “Tetiya amikhan pora ki koribo lage?” 11Aru tar pora jawab di kene koise, “Kon manuh logot te duita upor pindha kapoor ase, tar pora nathaka manuh logot te bhag kori lobi, aru kon logot te ahar ase, tar pora bhi eneka bhag kori lobi.” 12Khajana tula manuh khan bhi baptisma lobole ahhi kene hudise, “Guru amikhan pora bhi ki koribo lage?” 13Tar pora tarkhan logot te koise, “Tumikhan pora kiman tulibole odhikar dise, eitu pora besi na-tulibi.” 14Sepahi khan bhi ahhi kene hudise, “Aru amikhan bhi ki koribo lage?” Tar pora tarkhan ke koise, “Jobor-josti pora kon laga bhi nalobi nahole misa sakhi nadibi, aru tumi ki tangkha pai ase eitu pora khushi hobi.”
15Manuh khan pora akha kori rukhi thaka nisna, sob manuh pora nijor mon te John he Messiah tu ase neki? Eneka bhabna korise, 16tetiya John pora jawab di kene koise, “Moi tumikhan ke paani te he baptisma di ase; kintu moi pora besi shaktiman ekjon ahhi ase, kon laga juta rosi khulibole moi jugyo nahoi; Tar pora he tumikhan ke jui te aru Pobitro Atma te baptisma dibo. 17Muli thaka dhan safa kora khola-chamos Tar laga haat te dhori kene ase, aru Tar he nijor laga dhan mula jaga safa koribo aru ghehu dhan bhoral te jama koribo, kintu dhan chamra tu tar pora ketiya bhi namora jui te jolai dibo.”
18Eitu nisna mon uthai diya kotha besi koi kene, manuh khan logot te bhall khobor prachar korise. 19Kintu Herod tetrarch kon pora tar bhai laga patni Herodias loise eitu nimite aru tar pora beya kam kora sob nimite John pora tar ke gali di kene thakise, 20aru eitu khan sob upor te beya kam ekta kora tu, tar pora John dhori kene bandhighor te rakhise.
21Eitu homoi ketiya manuh khan sob tu baptisma loise, aru eitu nisna Jisu bhi baptisma loise aru prathana kori thakise, tetiya sorgo khulise, 22aru tar upor te Pobitro Atma kopo-chiriya nisna soku pora dekhi kene nami ahhise, aru sorgo te awaz ekta pora koise, “Tumi Moi laga priyo putro ase; tumi logot te Moi besi khushi pai.”
Jisu Khrista Laga Khandan Kahani
23Ketiya Jisu he tar laga dhormo kam shuru hoise, tar umor tu tris saal nisna thakise, aru tar tu Joseph, kon Heli laga putro thakise, tar laga putro eneka manuh khan pora bhabna kori thakise, 24aru Heli tu Matthat laga putro, Matthat tu Levi laga putro, Levi he Melchi laga putro, Melchi he Janna laga putro, Janna he Joseph laga putro, 25Joseph he Mattathias laga putro, Mattathias he Amos laga putro, Amos he Nahum laga putro, Nahum he Esli laga putro, Esli he Naggai laga putro, 26Naggai he Maath laga putro, Maath he Mattathias laga putro, Mattathias he Semein laga putro, Semein he Josech laga putro, Josech he Joda laga putro, 27Joda tu Joanan laga putro, Jo-Joanan he Rhesa laga putro, Rhesa he Zerubbabel laga putro, Zerubbabel he Shealtiel laga putro, Shealtiel he Neri laga putro, 28Neri he Melchi laga putro, Melchi he Addi laga putro, Melchi he Cosam laga putro, Cosam he Elmadam laga putro, Elmadam he Er laga putro, 29Er he Joshua laga putro, Joshua he Eliezer laga putro, Eliezer he Jorim laga putro, Jorim he Matthat laga putro, Matthat he Levi laga putro, 30Levi he Simeon laga putro, Simeon he Judah laga putro, Judah he Joseph laga putro, Joseph he Jonom laga putro, Jonom he Eliakim laga putro, 31Eliakim he Mele-a laga putro, Mele-a he Menna laga putro, Menna he Mattatha laga putro, Mattatha he Nathan laga putro, Nathan he David laga putro, 32David he Jesse laga putro, Jesse he Obed laga putro, Obed he Boaz laga putro, Boaz he Sala laga putro, Sala he Nahshon laga putro, 33Nahshon he Amminadab laga putro, Amminadab he Admin laga putro, Admin he Arni laga putro, Arni he Hezron laga putro, Hezron he Perez laga putro, Perez he Judah laga putro, 34Judah he Jacob laga putro, Jacob he Isaac laga putro, Isaac he Abraham laga putro, Abraham he Terah laga putro, Terah he Nahor laga putro, 35Nahor he Serug laga putro, Serug he Reu laga putro, Reu he Peleg laga putro, Peleg he Eber(Sala) laga putro, Eber(Sala) he Shelah laga putro, 36Shelah he Cainan laga putro, Cainan he Arphaxad laga putro, Arphaxad he Shem laga putro, Shem he Noah laga putro, Noah he Lamech laga putro, 37Lamech he Methuselah laga putro, Methuselah he Enoch laga putro, Enoch he Jared laga putro, Jared he Mahalale-el laga putro, Mahalale-el he Cainan laga putro, 38Cainan he Enos laga putro, Enos he Seth laga putro, Seth he Adam laga putro, Adam he Isor laga putro.
ទើបបានជ្រើសរើសហើយ៖
LUKE 3: NagaMe
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2014, The Bible Society of India
All rights reserved.
