LUKE 2
2
Jisu Khrista Jonom Kora
1Eitu din te Caesar Augustus darai prithibi sob te manuh khan nam likhibole ekta hukum pathai dise. 2Eitu, Syria laga rajyopal, Quirinius homoi te prothom nam likha tu thakise. 3Aru sob manuh nijor nijor laga nagor te nam likhi bole jaise. 4Tetiya Joseph bhi Galilee te thaka Nazareth pora Judea te thaka Bethlehem nagor, David raja laga sohor tate jaise, kilemane tar bhi David laga khandan pora thakise, 5aru Mary, kon tar logot te saadi kori bole bondobos kori kene thakise, tai bhi nam likhi bole loi jaise. Eitu homoi tai tu bacha bukhi kene thakise. 6Aru ketiya taikhan tate thakise, bacha jonom dibole homoi pongchise. 7Aru tai prothom lora ke jonom dise aru gorom kapoor pora merai di kene, dana-patro te rakhise, kilemane taikhan karne alohi boha jaga pua nai.
Sorgo Dut Aru Mer Roikhya Khan
8Aru eitu desh te mer roikhya khan nagor pahar te, raati te mer roikhya kori thakise. 9Aru sorgo dut ekjon tarkhan logot te ulaise, aru Prabhu laga mahima sob phale ulaise, aru tarkhan sob bhoi pora mon bhorta hoise. 10Aru sorgo dut he tarkhan ke koise, “Bhoi nakoribi; kilemane sabi, dangor khushi laga susamachar, kon tu manuh khan sob laga upor te ahhibo, eitu ani ase; 11kilemane tumi khan karne aji David laga sohor te Trankorta ekjon jonom hoise, eitu Prabhu Khrista ase. 12Aru tumi khan karne sign eitu hobo: tumi khan pora bacha ekjon gorom kapoor pora merai kene goru ghor te pabo.” 13Aru achanak eitu sorgot dut ekjon logot te sorgot te thaka dut besi ulai kene Isor ke stuti kori koise,
14“Sob pora uncha te thaka Isor ke mahima hobi,
aru prithibi te kon logot Tar khushi pai taikhan majot te shanti!”
15Ketiya tarkhan ke shari kene sorgo dut jaise, mer roikhya khan ekjon pora ekjon ke koise, “Amikhan Bethlehem te jabo aru Prabhu pora amikhan logot te ki janai dise, eitu sabo.” 16Tetiya tarkhan joldi jaise, aru Mary aru Joseph ke log paise, tate bacha bhi danapatro te ghumai thakise. 17Aru ketiya tarkhan pora dekhise, bacha nimite ki koise, eitu sob koi dise; 18aru kiman jon pora eitu hunise, taikhan sob bhi mer roikhya khan pora ki koise tate asorit lagise. 19Kintu Mary pora eitu sob tai laga mon te rakhi kene bhabi thakise. 20Aru sorgo dut he tarkhan logot te koi diya nisna, ketiya mer roikhya khan pora eitu dekhise, Isor ke mahima aru stuti di kene ghurai jaise.
21Aru ath din pura hua homoi te, ketiya Tar sonot koribole homoi ahhise, Tar laga nam Jisu eneka matise, kon tu nam sorgo dut darai tar pet te gorbho dharan nakora aage te dise.
Jisu Girja Ghor Te Ani Kene Dekhai Diya
22Aru Moses laga kanoon te thaka niyom hisap te, ketiya safa kora din ahhise, Prabhu usor te di dibole taikhan pora Tar ke Jerusalem te loi ahhise. 23(Prabhu laga hukum te eneka likhi thaka nisna, “Amaa pet pora jonom kora mota sob tu Prabhu karne pobitro eneka matibo”) 24aru Prabhu laga hukum kitab te bolidaan dibo karne koi thaka nisna, “ek jura kobutor puali nahole duita kobutor dibo lage.” 25Eitu homoi, Jerusalem te Simeon koi kene ekjon asile, tar dharmik manuh aru kanoon sob thik mani kene, Israel zati karne anando homoi ketiya ahhibo eitu rukhi thakise. Aru tar logot te Pobitro Atma thakise. 26Aru Prabhu laga Khrista nadekha tak tar namoribo eneka Pobitro Atma darai tar ke prokahit kori kene thakise. 27Aru Atma te tar girja ghor te ahhise; aru ketiya amaa baba pora Jisu bacha tu Judah laga niyom mani bole girja ghor te anise, 28tar pora Jisu tu nijor haat te dhori kene Isor ke stuti kori kene koise,
29“Prabhu, etiya Apuni protigya kora nisna,
Apunar daas ke shanti te jabole dibi;
30kilemane moi nijor soku pora tumar poritran dekhi loise,
31kon tu manuh khan sob aage te tumi jugar kori loise,
32porjati khan karne prokahit laga puhor ekta,
aru tumar laga zati Israel karne mahima ekta hoise.”
33Aru Tar laga amaa baba pora Tar nimite ki kotha koise, eitu kotha te asorit paise; 34aru Simeon pora taikhan ke ashish dise, aru Tar laga amaa Mary logot te koise, “Sabi, Israel te besi manuh uthai dibo nahole girai dibole Isor he eitu bacha abishek kori loise, aru manuh khan pora apoti kora sign ekta ase, 35(aru taruwal ekta pora tumi nijor laga atma bhi kati dibo), tetiya besi manuh laga mon pora bhabna janai di dibo.”
36Aru tate Anna koi kene Phanuel laga putri bhavobadi ekjoni thakise, kon Asher laga khandan pora Phanuel laga sowali asile, tai umor besi hoi kene thakise, aru tai laga pati logot te sat saal he thakise, 37eitu pasot te chorasi saal tak bidhova hoi kene thakise. Tai mondoli nashari kene raati din logun aru aradhana kori kene thakise. 38Eitu homoi thik te tai ahhi kene Isor ke dhanyabad dibole shuru hoise, aru Jerusalem mukti nimite kiman jon pora akha kori rukhi thakise taikhan sob logot te eitu bacha nimite kotha koise.
Nazareth Te Ghurai Ahha
39Aru ketiya taikhan pora Prabhu laga hukum te thaka sob thik kore loise, taikhan ghurai kene Galilee te, nijor laga sohor Nazareth te jaise. 40Aru bacha tu tagot thik pai kene bhall pora dangor hoi kene uthise, gyan pora bhorta hoi kene; Isor usor te bhall pai kene thakise.
Lora Jisu Girja Ghor Te
41Eitu homoi te, Tar amaa baba he pora hodai saal Par-Hua porokh homoi Jerusalem te jai thakise. 42Aru ketiya Tar baroh saal thakise, zati laga niyom nisna Jerusalem te jaise; 43aru ketiya porokh tu khotom hoise, taikhan sob ghurai kene jaise, kintu putro Jisu tu amaa baba logot te najani kene Jerusalem te he thaki jaise, 44tetiya saathi khan majot te ase hobola eneka bhabna kori kene taikhan ek din jatra jaise, eitu pasot te taikhan khandan majot te aru saathi khan majot te bisarise; 45kintu ketiya pua nai, Tar ke bisare kene taikhan Jerusalem te ghurai ahhise. 46Tin din pasot te taikhan pora Tar ke girja ghor te paise, guru khan majot te bohi kene tar khan kotha huni asile aru kotha hudi thakise. 47Aru kiman jon pora Tar laga kotha hunise, tar pora jawab diya aru bujibo para gyan te asorit paise. 48Aru ketiya amaa baba pora Tar ke dekhise asorit lagise; aru amaa pora Tar ke koise, “Beta, tumi kile eneka korise? Sabi, tumi laga baba aru moi, amar duijon mon besi dukh hoi kene tumi ke bisari ase.” 49Aru Tar pora taikhan ke koise, “Apunikhan pora moi ke kile bisari ase? Moi nijor Pitri laga ghor te thakibo lage eneka apunikhan pora na-jani neki?” 50Aru Tar pora ki kotha taikhan logot te koise, eitu kotha taikhan pora buja nai. 51Tetiya Jisu he taikhan logot te nami jai kene Nazareth te ahhise, aru amaa baba ke sonman kori kene thakise; aru tar laga amaa pora eitu kotha khan sob tai laga mon te rakhise.
52Tetiya Jisu gyan aru gau te thik pora dangor hoi kene Isor aru manuh khan aage te bhall pai kene uthise.
ទើបបានជ្រើសរើសហើយ៖
LUKE 2: NagaMe
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2014, The Bible Society of India
All rights reserved.
