JOHN 19
19
Jisu Kros Te Morabole Dise
1Tetiya Pilate pora Jisu ke loi jai kene pitibole dise. 2Aru sepahi khan pora kait laga mukut ekta bonai kene Tar matha te lagai dise aru bengonia rong kapoor ekta pindhai dise. 3Aru tarkhan ahhi kene koise, “Pornam Hei Jews laga Raja!” aru tarkhan laga haat pora Tar ke thapor marise. 4Pilate arubhi ulai kene tarkhan ke koise, “Sabi, tumikhan usor te moi Tar ulai kene ani di ase, aru tumikhan pora janibi, Tar logot te moi eku galti pua nai.” 5Tetiya kait laga mukut aru bengonia rong laga kapoor pindhi kene Jisu ulai ahhise. Pilate pora koise, “Eitu Manuh ke sabi!” 6Ketiya prodhan puruhit aru solaongta khan pora Jisu ke dekhise, tarkhan pora jur pora hala kori kene koise, “Tar kros te morai dibi, tar kros te morai dibi!” Pilate pora tarkhan ke koise, “Tumikhan nijor pora loi jabi aru kros te morai dibi, kilemane moi tu Tar logot te eku galti pua nai.” 7Jews khan pora tar ke jawab di koise, “Amikhan laga ekta kanoon ase, aru eitu kanoon hisap te Tar moribole he lagibo, kilemane Tar nijor pora Isor laga Putro ase eneka koise.” 8Ketiya Pilate pora eitu kotha tu hunise, tar arubhi besi bhoi korise. 9Arubhi ghor bhitor te tar humai jai kene Jisu ke hudise, “Tumi kot pora ahhise?” Kintu Jisu he tar ke eku jawab diya nai. 10Eitu karne Pilate pora Tar ke koise, “Tumi moi logot te kotha nakobo? Tumi jani ase na, moi logot te tumi shari dibole hole bhi nahole kros te morai dibole hole bhi odhikar ase?” 11Jisu he tar ke jawab dise, “Jodi eitu odhikar tu upor pora apuni ke nadile, apuni moi upor te eku odhikar nathakibole thakise. Eitu karne kon pora Moi apuni laga haat te dise, eitu he paap besi hobo.”
12Eitu homoi pora Pilate pora Tar ke shari dibole sesta korise, kintu Jews khan pora hala kori kene koise, “Jodi apuni eitu manuh ke shari dile, apuni Caesar laga saathi nahoi. Kon manuh pora nijor ke raja eneka koi, eitu Caesar ke birudhi kori ase.” 13Eitu karne ketiya Pilate pora eitu kotha hunise, tar pora Jisu ulai anise aru patla pathor pichai kene bona khula jaga te Pathor soki (Hebrew bhasa te Gabbatha eneka mate) kon tu tar bichar singsason thakise, tate bohise. 14Heitu Par-Hua porokh nimite jugar kora din thakise. Aru soi baji homoi#19:14 12:00 noon homoi nisna hobo nisna te tar pora Jews khan logot te koise, “Sabi, tumikhan laga Raja!” 15Tarkhan pora hala kori kene koise, “Hatai dibi, hatai dibi, kros te morai dibi!” Pilate pora tarkhan ke koise, “Moi tumikhan laga Raja ke morai dibo neki?” Prodhan puruhit khan pora jawab dise, “Amikhan raja nai, Caesar he ase.” 16Eitu karne tar pora Jisu ke kros te morai dibole tarkhan haat te di dise.
Kros Te Morai Diya
Eitu karne tarkhan pora Jisu ke loi jaise, 17aru Tar nijor laga kros bukhi kene ulaise aru matha hardi (Hebrew kotha te Golgotha) eneka mate, eitu jaga te ahhise. 18Tate tarkhan pora Tar kros te morai dise, aru Tar logot te dusera duijon, ekta daina ekta banya te, aru Jisu tarkhan majot te, eneka morai dise. 19Pilate pora ekta janoni likhise aru eitu kros te lagai dise. Eitu eneka thakise, “Nazareth laga Jisu, Jews laga Raja.” 20Jews manuh khan besi pora eitu janoni porhise, kilemane Jisu ke morai diya jaga tu Jerusalem sohor usor te thakise, aru eitu likha tu Aramaic, Latin, aru Greek te thakise. 21Eitu karne prodhan puruhit khan pora Pilate ke koise, “‘Jews laga Raja,’ eneka nalikhibi, kintu, ‘Eitu manuh pora, Moi Jews laga Raja ase eneka koise,’ eneka he likhibi.” 22Pilate pora uttar dise, “Ki moi likhise, eitu likhise.”
23Ketiya sepahi khan pora Jisu kros te morai dise, tarkhan pora Jisu laga kapoor tu loise aru charta bhag korise. Ekta bhag tu ekjon karne; aru tar laga kurta bhi loise, kintu eitu kurta tu niche pora upor tak nasilaai kene bona thakise, 24eitu karne tarkhan pora ekjon he ekjon ke koise, “Amikhan pora eitu napathabo, kintu shithi khel koribo aru kon laga hobo eitu lobo.” Eitu Hastro hidho hobole thakise, kot te eneka koi ase,
“Tarkhan pora Moi laga kapoor tarkhan majot te bhag korise,
aru Moi laga kurta karne tarkhan pora shithi-khel khelise.”
Eitu karne sepahi khan pora eitu korise, 25kintu Jisu laga kros usor te khara kori thaka khan Jisu laga amaa aru tai laga bhoni, Clopas laga patni Mary, aru Mary Magdalene thakise. 26Ketiya Jisu pora Tar laga amaa aru chella khan, kon ke tar pora prem korise usor te khara kori kene dekhise, Tar laga amaa ke koise, “Tiruta, tumi laga putro ke sabi!” 27Tetiya aru chella khan ke koise, “Sabi, tumikhan laga amaa!” Aru hei homoi pora chella khan pora Mary ke ghor te loi jaise.
Jisu Mora
28Eitu pasot te, sob khotom hoise (Hastro hidho hoise) eneka jani kene, Jisu he koise, “Moi piyas lagi ase.” 29Tate kolsi ekta tenga paani hali kene thakise, eitu karne tarkhan pora norom kapoor ekta tenga paani te bhijai kene hyssop laga nol ekta te bandhise aru eitu uthai kene Tar laga mukh te dise. 30Ketiya Jisu he tenga paani tu loise, Tar he koise, “Eitu khotom hoise,” tetiya Tar laga matha namise aru Tar laga atma shari dise.
Jisu Laga Panjar Te Jathi Ghusai Diya
31Eitu jugar kora din asile, aru bisram din te mora manuh gau tu kros te nathakibo lage (kilemane bisram din tu sonman din ase), eitu karne tarkhan laga theng tu bhangai dibole Jews khan pora Pilate ke hudise, tetiya tarkhan kros pora namai kene loi jabo paribo. 32Eitu karne sepahi khan ahhi kene prothom manuh laga theng bhangai dise, aru dusera ekjon kon Tar logot kros te morai dise eitu bhi eneka korise. 33Kintu ketiya tarkhan Jisu logot te ahhise aru Tar mori jai kene thakise, tarkhan pora Tar laga theng bhangai diya nai. 34Kintu sepahi khan majot te ekjon pora jathi ekta pora Tar laga panjar te ghusai dise, aru loge loge khoon aru paani mila-mili hoi kene boi ulaise. 35Kon pora eitu dekhise, tar pora sakhi di ase—tar laga sakhi tu thik ase, aru tar pora hosa kotha koi ase eneka tar pora jani ase—tetiya tumikhan pora bhi biswas koribo. 36Kilemane eitu khan sob tu Hastro te ki likhi kene ase eitu hidho hobo nimite te hoise: “Tar laga hardi khan ekta bhi nabhangibo.” 37Aru dusera Hastro ekta te koise, “Kon he jathi pora marise, tarkhan pora Tar ke dekhibo.”
Jisu Moidam Dise
38Etiya eitu khan sob hua pasot te, Arimathea laga Joseph, kon Jisu laga chella thakise, kintu Jews khan bhoi kora pora lukai kene he thakise, tar pora Jisu laga gau tu loi jabole Pilate pora mangise, aru Pilate pora tar ke odhikar dise. Eitu karne tar ahhi kene mora gau tu loi jaise. 39Nicodemus, kon aage te raati homoi Jisu logot te ahhise, tar bhi myrrh aru aloes milai kene, ujon te 30 kg nisna anise. 40Eitu karne tarkhan pora Jisu laga gau tu loise, aru Jews laga moidam diya niyom nisna, gundh laga dawai dise aru kumol norom kapoor loi kene bhall pora bandhise. 41Tetiya Tar kros te morai diya jaga te ekta bari thakise, aru tate manuh ketiya bhi narakha notun koborsthan ekta thakise. 42Etiya eitu Jews laga jugar din ase aru koborsthan tu usor te thakise, eitu karne tarkhan pora Jisu tate moidam dise.
ទើបបានជ្រើសរើសហើយ៖
JOHN 19: NagaMe
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2014, The Bible Society of India
All rights reserved.
