Luka 23
23
Yesu yaleerwa imbeli waPilato
(Mat. 27.1-2,11-14; Mk. 15.1-5; Yoh. 18.28-38)
1Mana omukhung'aano kwabo kwosi nikurula, nibamuyila imbeli waPilam. 2Nibachaaka okhumwinjilila, bari Khwanyoolile omundu uno nakosinjia lihanga lieefwe, nabakaaninjia oburamurunjila Kaisari obushuru ta, nasunganga shinga omwene olwa ali Kristo, omuruchi. 3Naye Pilato namureeba mbu Niwe Omuruchi wabaYahudi? Naye nakalusia namusunjila mbu Nolwa oboola iwe. 4Mana Pilato nasunjila abakuhani abakhulundu nende abemikanda ari Shinduutsi eshikha shiosi mumundu uno ta. 5Nabo nibameeta okhumuluunyia, bari Ayakulanga abandu, niyeechesia mubuYahudi mwosi, okhurula eGalilaya kata okhuula hano.
Yesu yaleerwa imbeli waHerode
6Ne olwa Pilato yahulila ario, yareeba akomundu oyo, mbu yakhaba omuGalilaya noho? 7Mana olwa yahulila mbu nowomuburuchi bwaHerode, yamuruma ewaHerode, shichila ye yesi yali nali eYerusalemu mundaalo tsienetsio. 8Haho olwa Herode yalola Yesu, yatsatsahala muno; okhuba neshise eshirambi eshia yali niyeekombanga okhumulola, shichila yali niyahulila amakhuwa khuye; khandi yasuubila mbu yakhalola eshilolelo shiamakana nishikholwa ninaye. 9Nachaaka okhumureebelesia amakhuwa amanji; nayenalamukalusialikhuwata. 10Nabo abakuhani abakhulundu nabahandiichi nibasinjilaho nibamwimaalila butinyu. 11Mana Herode halala nende abasikaribe nibamulechela elala, nibamunyokhoosia, nibamufwala ebiifwalo ebing'inang'inu; namukalusia ewaPilato. 12Ne Herode nende Pilato nibahambana obwitsa inyanga yeneyo; okhuba balinji nibahambana obusuku.
Yesu yakhalachilwa eshiina shiokhufwa
(Mat. 27.15-26; Mk. 15.6-15; Yoh. 18.39—19.16)
13Mana Pilato nakhung'aasia halala abakuhani abakhulundu nende abaami nende abandu, 14nabasunjila ari Mumwinjiliile omundu uno ewanje, mbu noukosinjia abandu; nasi, lole, enoonelesiye akeke imbeli weenywe, nindanyoola eshikha shiosi mumundu uno khumakhuwa ako aka mumwinjiliile ninako ta; 15kata Herode yesi ta; shichila ye amukalusiye eweefwe; ne lole, libulaho likhuwa liosi elia yakholile elichila nakwanile okhwirwa. 16Khulwako nemunyweshe, nimulekhuula. [17Ne yalinji nakhoyile okhubalekhuulila omubohe mulala mwisabo elo.] 18Nebutswa bosi halala nibayiiba, bari Rusia omundu oyo; okhulekhuulile Baraba; 19naye nomundu owabohwa mumbohe khulwa induli eyeekhola mwitookho halala nende obwiri. 20Ne Pilato nasungana ninabo khandi, niyeenys okhulekhuula Yesu; 21nabo nibayochela, bari Omubambe, omubambe khumusalaba. 22Nabasunjila olwakhataru, ari Ne nibii shiina elia omundu uno akholile? Shinyoolile likhuwa muye elichila yeerwe ta; ndalamunywekha, nimulekhuula. 23Ne bachinga olukhu, nibamuluunyia, nibasaba mbu abambwe khumusalaba. Okhuyochela khwabwe nikhuhula. 24Mana Pilato nakhalaka eshiina, mbu bakholelwe aka basabile. 25Nalekhuula omwenoyo owali naboyilwe mumbohe khulwa induli nende obwiri, omwenoyo owa basaba; ne yamuhaana Yesu mbu bamukholele aka beenya.
Yesu yabambwa khumusalaba
(Mat. 27.32-44; Mk. 15.21-32; Yoh. 19.17-27)
26Ne olwa bali nibashimurusia batiila omundu mbu Simoni, omuKirene, owali narulanga mumikunda, nibamutuukha omusalaba, akuchinje namulondakhwo Yesu.
27Omukanda omukhongo kwabandu nikumulondakhwo, nende okwabakhasi abamulilila nibakhupa tsimbungu. 28Ne Yesu nabashiukhanila, nasunga mbu Inywe abakhasi beYerusalemu, murandilila isie ta, ne mwililile abeene, nende abaana beenywe. 29Okhuba lole, tsindaalo tsili okhwitsa, olwa baliboola mbu Nabeikhabi abakumba, nende tsinda etsirayeebulakhwo, nende tsimbeele etsiranuunia tawe. 30Mana balichaaka okhusunjila tsingulu bari Khukwile; nende ebikulu, bari Khufwimbe. 31Okhuba nibaba nibakholela bario omusaala omubisi, ne balakukholela barie okuli omuumu?
32Khandi bali nibaliho abandi babili, abakhayi bamalako, abarusibwa ninaye halala khukhwirwa.
33Ne olwa boola ahalangwa mbu Eshihanganga, niho aha bamubambila khumusalaba, nende abakhayi bamalako abo, mulala khumukhono musaatsa, noundi khumukhono mukhasi. 34Yesu naboola mbu Papa, obaleshele; shichila shibamanya eshia bakhola shinga olwa shili ta. Nibakabana ebiifwalobie, nibabiupila ikha. 35Abandu nabo nibasinjilaho nibahenga. Abakhulundu nabo nibamuchaya, nibasunga bari Yahonia abandi; yeehonie omwene, uno naba naliye Kristo waNyasaye, omulobolewe. 36Abasikari nabo nibamunyokhoosia, nibamutsiila, nibamuheelesia idivai eyiraanyile, 37nibasunga bari Noba noli iwe Omuruchi wabaYahudi, wihonie omwene. 38Khandi lihandiiko lialiho hekuluwe, mbu UNO NIYE OMURUCHI WABAYAHUDI.
39Ne mulala khubakhayi abafungwahol namumyeka, ari Shioli iwe Kristo watsana? Wihonie omwene nende ifwe. 40Ne oundi naye nakalusia namuhalabila, nasunga ari Kata shioria Nyasaye ta, olwa oli mushiina shilala shieneshio? 41Neefu, eshiina shikhufwiliile habwene; okhuba khunyoola omurungo okuhela ebikhole bieefwe; ne omundu uno shiyakholile likhuwa liosi elirakhoyeele ta. 42Nasunga mbu Yesu, unzitsulile olwa oleetsa mubwamibwo. 43Naye namukalusia mbu Ekhuboolela toto mbu leelo khulaba ninawe muParadiso.
Okhufwa khwaYesu
(Mat. 27.45-56; Mk. 15.33-41; Yoh. 19.28-30)
44Ne yali niyulile khusaa yakhasasaba, eshialo shiosi nishiikhola eshiilima okhuula khusaa yashienda, 45omubasu nikuhweelela obulafu bwakwo; ingubo ishinga eyomuhekalu niyirandushila hakari wayo. 46Ne olwa Yesu yali nayiibile nomwoyo omukhongo, yaboola ari Papa, ehaana omwoyo kwanje mumakhonoko; ne olwa yali niyakhaboola ario, yakhalikha omwoyo. 47Ne omuseesia olwa yalola akakholekha, yaheelesia Nyasaye oluyali, naboola mbu Nitoto, uno abeele omundu omulunjishi. 48Abemikanda chiosi echiali nichikhung'aanile okhulola amakhuwa ako, olwa balola akeekholekha, bakalukha nibeekhong'onda butswa khubilifu. 49Nabo abamanyana ninaye, halala nende abakhasi balia abali nibalondaanenje ninaye okhurula eGalilaya, nibasinjila ehalekhwo nibahenga amakhuwa ako.
Yesu yaalisibwa mung'ani
(Mat. 27.57-61; Mk. 15.42-47; Yoh. 19.38-42)
50Ne lola, yaliho omundu oweliiralie mbu Yusufu, owali omukofu owomushiina, omundu omulayi khandi omulunjishi; 51shiyali nafuchiiliile eshiina eshia bakhalaka, kata eshikhole shiabwe ta; nomundu weArimatsaya, litookho lindi liabaYahudi, owali nalindiililanga obwami bwaNyasaye; 52omundu uno natsia ewaPilato, namusaba omulambo kwaYesu. 53Mana nakwakula, nakufwimba mungubo yeikitani, namwalisia mung'ani eyayabwa mulwanda, eya omundu arashiaalisibwamwo ta. 54Ne yali inyanga eyokhwikhwanilia, khandi Sabato yali niyili ahambi. 55Nabo abakhasi abali nibarulile ninaye eGalilaya nibalondakhwo inyuma, nibalola ing'ani, nende omulambokwe shinga olwa kwaalisibwa. 56Nibakalukha, nibakasia emisaala chieshing'aari nende amafura. Ne khuSabato nibahuluukha, lilako shinga olwa liali.
ទើបបានជ្រើសរើសហើយ៖
Luka 23: OUV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Oluluyia Union Version © Bible Society of Kenya 1975
