Luka 21
21
Eshia omukhasi omulekhwa yahaana
(Mk. 12.41-44)
1Ne yachinguula tsimoni nalola abayinda abali nibareetsanga ebihaanwa biabwe mwisanduku. 2Nalola omukhasi omulekhwa omumanani undi nara mubwenomwo ebiheela bibili. 3Naboola mbu Emuboolela tieeli mbu omukhasi uno omulekhwa omumanani areelemwo amanji okhushila abo bosi; 4okhuba abo bosi bareele mubihaanwa ebiokhumiandu chiabwe echiabashilaanila, ne ye khubutakhabwe areelemwo kosi aka yakheekhoonyeele.
Yesu yaboola akokhukwisibwa khweihekalu
(Mat. 24.1-2; Mk. 13.1-2)
5Ne olwa abandi bali nibaboolanga akeihekalu shinga olwa yang'oonelwa amachina amalayi nende ebihaanwa, yaboola mbu 6Ebindu bino ebia mulolanga, tsindaalo tsiliula olwa shililitong'aho lichina elala hekulu khulindi, eliralisukunwa hasi ta.
Eminyakhano nende obusandibwi
(Mat. 24.3-14; Mk. 13.3-13)
7Nibamureeba bari Omwechesia, kho amakhuwa ako kaliikhola liina? Kata neshilolelo shiina eshilibaho ako olwa kaliba nikali okhwikhola? 8Naye naboola ari Mwirecheshe, muleshe okhushiamibwa; okhuba abanji bakheetsenje muliira lianje, nibaboola bari Isie nisie; khandi bari Induukho yisitile ahambi; murabalondakhwo ta. 9Ne olwa mulahulilanga khukobusoolo nende obukoyaani, ikholo yiramurimukha ta; ako kakhoyeele karanjilile okhwikhola; ne obumaliilishi shibuli habwenaho ta.
10Mana nababoolela ari Lihanga lilabuushila khwihanga lindi, khandi oburuchi khuburuchi bundi; 11ne khulabaho okhurenga khweshialo okhukali, nende inzala noluumbe eyi nende eyi; khandi amariisia kalabaho, nende ebilolelo ebikali ebirula mwikulu. 12Ne ako kosi nikarashieekhola ta, balamukwakhwo nibamusakania, nibamuyila mutsisinagogi nende mumbohe, nibamuleera imbeli wabaruchi nabaami khukva eliira lianje. 13Ne ako kalalolosia obuloli bweenywe. 14Kho mutinyie emioyo khwikhuwa lino, mbu oburayililisia mbeli shinga olwa mulakalusia tawe; 15shichila ndalamuheelesia omunwa nende obuchesi, ebia abamayinje beenywe bosi shibalanyala okhukhaya kata okhushila ta. 16Ne mulakhobwa kata nende abeebuli beenywe, nabaana beenywe, nabeekho, nabeetsa; ne balachila abandi khwinywe nimwirwa. 17Ne mulakiywa nabandu bosi khulwa eliira lianje. 18Ne kata olwoya lulala Iweliswi liokhumirwe chieenywe shilulakora ta. 19Mukhwifwila khweenywe muleenyoolela obulamu bweenywe.
Akamasila amakali
(Mat. 24.15-28; Mk. 13.14-23)
20Ne olwa mulalola Yerusalemu nilibotokhanwa namahe, kho mumanye mbu obwonooneshi bwalio busitile ahambi. 21Mana abali mubuYahudi beelushile mubikulu; nabo abali hakari mushio barulemwo; kata abali elwanyi welitookho baleshe okhwinjilamwo. 22Shichila tsienetsio nitsio tsindaalo tsiobukuumwi; mbu amakhuwa kosi akahandiikwa koosibwe. 23Wowe khubaliba nibabeleeshe nende khubaliba nibanuuninjia mundaalo etsio! Shichila amasila amakali kalibaho khushialo, nende oburima khwihanga lino. 24Ne balikwa khulwa olukanga, khandi baliyilwa mububohe mumahanga kosi; Yerusalemu nalio liliseenwa nAbamahanga, okhuula tsinduukho tsiAbamahanga olwa tsiliba nitsiusibwa.
Okhwitsa khwOmwana womundu
(Mat. 24.29-31; Mk. 13.24-27)
25Ne bilibaho ebilolelo muliuba nomwesi nomutsinyininyini; nomushialo, amasila kamahanga nikakoyaanile khulwa okhuhoola khweinyanza namarunda kayo; 26abandu nibafwa emioyo khulwa oburii, khandi khulwa okhulindiiila amakhuwa ako akali okhwitsila eshialo; okhuba ebietsingufu ebiomwikulu bilitechesibwa. 27Habwenaho balilola Omwana wOmundu niyeetsa mwileesi nende obunyali noluyali olukhongo. 28Ne amakhuwa kano olwa kachaaka okhwikhola, sakulushe, nimuchinguula emirwe okhuba obununulwi bweenywe busitanga ahambi.
Eliechesio liomukhuyu
(Mat. 24.32-35; Mk. 13.28-31)
29Ne nababoolela oluchelo lundi; ari Lolele khumukhuyu, nende emisaala chiosii 30olwa chibeetsanga nichisebukha, mulolanga, abeene nimumanya mbu tsindaalo tsiomubasu omunji tsili ahambi. 31Nineenywe mwesi olwa mulola amakhuwa kano nikeekhola, mumanye murio mbu obwami bwaNyasaye buli ahambi.
32Emuboolela toto mbu olwibulo luno shilulihwaho ta okhuula olwa kosi kaliba nikamalile okhuusibwa. 33Likulu nende eshibala bilihwaho; ne amasungo kanje shikalihwaho ta.
Mubeetsenje meeso!
34Ne mwiyile kahala, emioyo chieenywe chileshe okhusitohelwa nobulangu nobumeesi nende obuhendi bweshialo shino, induukho eyo niyimusundusia shinga omubero; 35shichila nilwo olwa yilabasundusia bosi abamenyanga mushibala shiosi. 36Ne mubeetsenje meeso buli shise, nimusaaya, mbu muhule nimwihonokokha mumakhuwa ako kosi akaliikhola, nimusinjila imbeli wOmwana wOmundu.
37Ne buli nyanga yeechesinjia muhekalu; ne buli shilo yarulanga nakona mushikulu eshilangwa mbu eshikulu shiEmitseituni. 38Ne abandu bosi bali nibahuunanga muhekalu okhumuhulila.
ទើបបានជ្រើសរើសហើយ៖
Luka 21: OUV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Oluluyia Union Version © Bible Society of Kenya 1975
