Genesis 6
6
Obumayaanu bwabandu
1Ne olwa abandu bachaaka okhwinjiha khushibala, nibeebhia abaana abakhaana, 2abaana baNyasaye nibalola abakhaana babandu shinga olwa bakaasa likondo; nibaleera mubo abakhasi bosi aba bali nibaloboole. 3OMWAMI naboola ari Roho wanje shiyeetsa okhuyingananga nende abandu obushia nobushia tawe, okhuba bo nabomubili; kho tsindaalo tsiabwe tsilabeetsanga emiyika eshikhumi nende amakhumi kabili. 4Ne Abanefili balinjiho khushialo mundaalo tsienetsio khandi nende olunyumakhwo; buli olwa abaana baNyasaye beenjila nibaba nende abakhaana babandu, beebula ninabo abaana; abeenabo nibo abalulu bakhale, nabasaatsa abalinji abeifuma.
5OMWAMI nalola obumayaanu bwabandu shinga olwa buli obukhongo mushibala, kata buli buyililisii bwamapaaro akomumioyo chiabwe bwalinji obubii butswa tsindaalo tsiosi. 6OMWAMI naba neshibeela khulwa okhubalonga abandu khushibala, natsuunwa omwoyo. 7OMWAMI nasunga ari Nembamulule abandu aba ndalonga bahweho khushibala pe; biosi, mbu abandu nende tsisolo nende ebimoolanga hasi nende amanyonyi akokhwikulu; shichila enzuunwa omwoyo khulwa okhubalomba. 8Habula Noa yafuchiililwa mumoni tsiOMWAMI.
Noa yalomba isafina
9Tsino nitsio tsinzibulo tsiaNoa. Noa yali omulunji, khandi yali habwene mwikhulalie; Noa yali nachendelanga halala nende Nyasaye. 10Noa niyeebula abasiani bataru, mbu Shemu, nende Hamu, nende Yafetsi.
11Eshibala nashio shiali nishionoonekha imbeli waNyasaye, khandi eshibala shiali nishieetsulamwo amahababa. 12Nyasaye nalola eshibala, shinga olwa shiali nishionoonekha; shichila abandu bosi bali noboonoonia tsinjilatsie mushialo pe. 13Nyasaye naboolela Noa ari Okhwakama khwabandu bosi khunzitsiile mumoni mwanje; shichila eshialo shiitsuulemwo amahababa khulwabo; nasi enzitsa okhubamulula halala nende eshibala. 14Wilombele omwene isafina yomusaala kwomukoferi; okha lachemwo ebiko, nohomakhwo mukari nelwanyi nende ebia ho omela. 15Witsa okhukhola ori: mbu oburambi bweisafina bube emikhono ebikhumi bitaru, obuchiikha bwayo emikhono amakhumi karaano, oburambi bwahekulu emikhono amakhumi kataru. 16Musafina okholemwo litiang'a mana omalilisie nolekha oburambi bwomukhono hekulu; omuliango kweisafina nokura mumbafu wayo; nokhola nende obwelu bwahasi, nende obwakhabili hekulu, nende okhuula khubwakhataru. 17Nasi endeera omuyemboa kwamatsi khushialo okhumulula emibili chiosi echilimwo emiuya chiobulamu hasi welikulu; buli shindu eshiliho khushialo shilifwa. 18Nasi ndakhasinjisie indakano yanje ninawe; nawe wakheenjile musafina, iwe omwene, nende abaanabo, nende omukhasiwo, nende abakhasi babaanabo halala ninawe. 19Khandi khubuli shilamu shiosi eshili nomubili, wakhaleere musafina ebietsimbia tsiosi bibili bibili, okhubilinda bibeetsenje mwoyo halala ninawe. Bibe ebisaatsa nende ebikhasi. 20Khumanyonyi tsimbia tsiako shinga olwa tsili, nende khutsisolo tsimbia tsiatsio shinga olwa tsili, nende khubimoolanga khwiloba tsimbia tsiabio shinga olwa tsili, ebiabuli imbia bilakhwitsila bibili bibili, obilinde bibeetsenje mwoyo. 21Khandi nawibukulilekhwo omwene khubiokhulia biosi ebiliibungwa, niwikhung'aasilia; nabio bilaba ebiokhulia bibio nende biabio. 22Nolwa Noa yakhola ario; shinga olwa Nyasaye yamulaka, nolwa yakhola ario.
ទើបបានជ្រើសរើសហើយ៖
Genesis 6: OUV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Oluluyia Union Version © Bible Society of Kenya 1975