Genesis 16
16
Hagari naIshimaeli
1Ne Sarai, omukhasi waAburamu, shiyali niyamwibulilakhwo omwana ta; ne yali nende omukholiwe omukhaana omuMisiri, oweliiralie mbu Hagari. 2Sarai namusunjila Aburamu ari Lola, OMWAMI yanzikaliile obureebula omwana ta; kho chama winjile omuteeshie omukholi wanje omukhaana uno; haundi alinyumbashila. Aburamu narechelesia okhusunga khwaSarai. 3Mana Sarai, mukha Aburamu, nabukula Hagari omuMisiri, owali omukholiwe, Aburamu olwa yali namalile okhumenya emiyika ekhumi mushibala shiaKanaani, namuheelesia Aburamu omusaatsawe mbu abe omukhasiwe. 4Naba nende Hagari, naye nahela inda; mana olwa yalola mbu uhelile inda, yaleka omukhaye omwenenzu. 5Sarai namusunjila Aburamu mbu Obubii obwa ekholelungwa bube khwiwe; ndakhuheelesia omukholi wanje mushilifushio; mana olwa aluutsi shinga Olwa amalile okhuhela inda, mana niyandeka isie mumoni. OMWAMI akabukhasie hakari wanje ninawe. 6Ne Aburamu yamuboolela Sarai ari Lola, omukholiwo ali mumukhonokwo omwene; omukholele shinga olwa oluutsi mbu nobulayi. Kho Sarai namusandia, naye namwilukha.
7Malaika wOMWAMI namumyoola ahambi khusebele mushitsiimi, ahambi khusebele yamatsi eyili khunjila eyitsiitsanga eShuri, 8namusunjila mbu Hagari, omukholi waSarai, orula heena? Khandi otsia heena? Naye naboola ari Isie emwilukhanga Sarai omukhaye owa ekholelanga. 9Malaika wOMWAMI namuboolela mbu Kalukha ewomukhaye omwenoyo, omwongolele mumikhonochie. 10Malaika wOMWAMI namuboolela ari Olwibulolwo ndalalwinjiyia muno, mbu shilulibalikha tawe, khulwa obunji bwalwo. 11Malaika wOMWAMI namusunjila mbu Lola, oli inda, ne oliibula omwana omusiani; ne olimukulikha eliiralie mbu Ishimaeli, shichila OMWAMI yahuliile obusandibwibwo. 12Aliba shinga isishili eyanabulimo hakari wabandu; omukhonokwe kulayingananga nende buli mundu, nomukhono kwabuli mundu kulayingananga ninaye; ne alimenyanga imbeli wabaana babwe bosi.
13Kho yalanga eliira liOMWAMI owasungana ninaye mbu Niwe Nyasaye oulolanga; okhuba yasunga ari Ne kata hano shimuluutsi omwenoyo oundolanga? 14Khulwako liyabo elo lialangwa mbu Beeri-lahai-roi; nalio lili hakari waKadeshi nende Beredi. 15Mana Hagari niyeebula omwana omusiani; Aburamu nakulikha eliira liomwanawe owa Hagari yeebula mbu Ishimaeli. 16Ne Aburamu yali owemiyika amakhumi munaane nende chisasaba olwa Hagari yeebula Ishimaeli.
ទើបបានជ្រើសរើសហើយ៖
Genesis 16: OUV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Oluluyia Union Version © Bible Society of Kenya 1975