Luk 21
21
Pɔgekoɔre Kaŋ Kyɔɔtaa Teroo Yɛlɛ
(Mak 12:41-44)
1A Yeezu da zɛge la O zu a nyɛ bondaanema naŋ eŋnɛ ba kyɔɔtaare a kyɔɔtaare daga poɔ. 2O da nyɛ la pɔgekɔ-nandaana kaŋ meŋ ka o taa neeneene ayi wa eŋ a kyɔɔtaa daga poɔ. 3#2 Kor 8:12 Ka a Yeezu yeli, “Yelmeŋɛ zaa ka N yele korɔ yɛ, a pɔgekɔ-nandaana ŋa tere gaŋ la a noba zaa, 4bonso, a bama zaa, a ba bon-yaga ba naŋ taa poɔ la ka ba iri mine tere, kyɛ a pɔgekoɔre ŋa ne o nandaanoŋ zaa tere la bonna zaa o naŋ taa.”
Yeezu Naŋ Yeli A Ŋmendie Saamo Yɛlɛ
(Matio 24:1-2; Mak 13:1-2)
5A noba mine naŋ da yele a Naaŋmen die yɛlɛ, a manna lɛ ba naŋ mɛ a o dankyime ne kuveɛle, ane a kyɔɔtaare ba naŋ maŋ korɔ Naaŋmen la ka Yeezu da yeli: 6#Luk 19:44 “A boma ama zaa yɛ naŋ nyɛrɛ, bebiri kaŋ waana la ka a kuuri kanzaa koŋ la dɔgle o tɔ zu. A zaa pabo ka ba na daalɔɔ.”
Yelwulii Ane Dɔgroŋ Yɛlɛ
(Matio 24:3-14; Mak 13:3-13)
7Ba da soore la a Yeezu, “Wulwullo, boŋ saŋ la ka a yɛlɛ ama na e? Boŋ la na wuli ka a yɛlɛ ama eebo saŋ tara la?” 8Ka O yeli, “Yɛ gu yɛmenne velaa ka ba ta wa bɛlle yɛ. Bonso, noba yaga na wa la N yuori eŋɛ, a wa yeli, ‘Maa la o!’ Kyɛ la yeli, ‘A saŋ peɛlɛɛ la!’ Yɛ ta wa tuuro ba.”
9“Ka yɛnee wa woŋ zɔɔre ane zie naŋ dɔɔnɔ yɛlɛ, yɛ ta zoro dabeɛ̃. Bonso, a ama zaa seŋ ka a daŋ e, kyɛ a teŋɛ baaroo koŋ ta a daadaalɛ.” 10Lɛ la ka O da yeli ko ba, “Paaloŋ na iri zɔɔrɔ ne la o tɔ paaloŋ, ka naaloŋ ŋa noba iri zɔɔrɔ ne naaloŋ kaŋ noba. 11A teŋɛ na gbigre la yaga, kyɛ ka kɔŋkpoŋ ane baaloŋ faa le a tendaa ziiri yaga. Pɔlteɛ yɛlɛ na e la kyɛ ka yelwulii sãã a sazu poɔ.”
12 #
Luk 12:11
“A yɛlɛ ama zaa koŋ e sɛre, kyɛ ka ba nyɔgre yɛ, a dɔgre yɛ yaga. Ba na de yɛ la eŋ a puoruuderi ane a nempagederi poore. Ba na taa yɛ la wa ne a namine ane a gɔbena mine zie a N yuori zuiŋ. 13A ŋaa na ko yɛ la vuo ka yɛ toɔ̃ di N danseɛ. 14#Mat 10:19 Azuiŋ, yɛ ta nare a yɛ teɛroŋ poɔ bonna yɛ naŋ na yeli faa yɛmenne; 15#Tom 6:10 bonso, maa la na ko yɛ a yelbie ane a yɛŋ ka a yɛ dɔndɔnne kanzaa koŋ baŋ yeli lɔɔ yɛ. 16Haali gba, yɛ dɔgrebɔ ane yɛ yɔɔmine, yɛ noba ane yɛ bamine na nyɔge yɛ la eŋ dɔndɔnne nuuriŋ, kyɛ ko yɛ mine. 17#Mat 10:21-22 A noba zaa na kyiire yɛ la a N yuori zuiŋ. 18Kyɛ yɛ zukɔɔloŋ kanzaa koŋ wɛ. 19#2 Teŋ 15:7; Hib 10:36 A yɛ kannyiri diibu zuiŋ, yɛ na nyɛ la nyɔvore.”
Yeezu Naŋ Yeli A Gyeruzɛlɛm Saamo Yɛlɛ
(Matio 24:15-21; Mak 13:14-19)
20“Ka yɛnee wa nyɛ noba ka ba yi tammo a lɔɔ gyili a Gyeruzɛlɛm, yɛ baŋ ka o leebu saŋ taɛ la. 21A saŋ na poɔ, a ferɛɛ la ka banaŋ naŋ be Gyudiya paaloŋ zo kpɛ a tanne poore, ka banaŋ naŋ be a teŋkpoŋ poɔ zo yi o poɔ, kyɛ banaŋ naŋ be wɛre poore ta wa leɛrɛ kulo. 22#Gyɛ 5:29 Bonso, a bebie ama na waa la woore bebie, ka a yɛlɛ na zaa ba naŋ da sɛge eŋ a Ŋmen gane poɔ na tu a tuubu. 23Pɔgpoore ane banaŋ naŋ taa bilɛɛre ka ba ɛnnɛ a bebie na poɔ yuori la we! Bonso, dɔgɛɛ kpoŋ na wa la a teŋɛzu, kyɛ ka Naaŋmen suuri iri ne a noba ŋa. 24#Rom 11:25; Yuo 11:2 Ba na ko ba la ne zɔɔzɔɔ-soɔ, kyɛ nyɔge ba gaa ne tatenne ka ba te leɛ gbaŋgbaare. Ka Nemboore-yobo di kpeɛ̃õ a Gyeruzɛlɛm noba zu a te ta saŋ na a Nemboore-yobo naaloŋ naŋ na baare.”
A Nensaala Bie Waabo Yɛlɛ
(Matio 24:29-31; Mak 13:24-27)
25“Yelwulii na be la a ŋmenaa, a kyuu ane a ŋmarbie poore, kyɛ ka dɔgɛɛ page a nemboorɔ zaa, ka buriburi kpɛ ba, a mane ane a kɔmmie naŋ hoorɔ erɛ gɔmɔ zuiŋ. 26Noba na yĩĩe la ne dabeɛ̃, kyɛ pɔnne poore ne yɛlɛ naŋ waana ka a e a teŋɛzu, bonso, ba na zɛŋ la a sazu boŋkpeɛne zaa. 27#Dan 7:13 Ba pãã na nyɛ la ‘a Nensaala Bie ka O yi a sagama poɔ waana’ ne kpeɛ̃õ ane puubu. 28#Fil 4:4-5 Ka a yɛlɛ ama wa piili erɛ, yɛ iri are, a zɛge yɛ zuri, bonso, a yɛ faabo saŋ tara la.”
A Kaŋkanteɛ Yelwulaa
(Matio 24:32-35; Mak 13:28-31)
29A Yeezu pãã da lɔɔ la sekpɔgre ko ba, “Yɛ leɛ kaa a kaŋkanteɛ ane a teere zaa nyɛ; 30ka anaŋ wa te bɔrɔ vapaala, yɛ maŋ baŋ ka sẽɛ kpeɛrɛ la. 31A lɛ meŋ la, ka yɛnee wa nyɛ a yɛlɛ ama ka a erɛ, yɛ baŋ ka a Naaŋmen naaloŋ peɛlɛɛ la. 32Serɛzaa ka N yele korɔ yɛ, a zenɛ noba ŋa koŋ kpi baare sɛre kyɛ ka a yɛlɛ ama zaa e. 33#Luk 16:17 A sazu ne teŋɛ na wa tɔle gaa la, kyɛ a N yelbie koŋ baŋ tɔle gaa togitogi.”
Meŋɛ Guubu Yɛlɛ
34 #
Mak 4:19; 1 Tɛs 5:3 “Yɛ gu yɛmenne velaa, a ta wa vɛŋ ka yɛ teɛroŋ zaa kyaare ne tige diibu ane dããnyu-kuoli, kyɛ bee a vɛŋ ka a teŋɛzu nyɔvore yɛlɛ dɔɔnɔ yɛ, ka a bebiri ta wa uri yɛ aŋa bɛraa. 35Bonso, a yɛlɛ ama na page la a noba zaa naŋ be a tendaa zaa zu. 36#Mak 13:33 Yɛ gu yɛmenne wagre zaa, a puoro ka ka yɛ na taa faŋ a muri yi a yɛlɛ ama zaa naŋ na wa e poɔ, a kyɛ are a Nensaala Bie niŋesogɔ.”
37A Yeezu da maŋ kanna la a noba a Naaŋmen die poɔ bebiri zaa, kyɛ ka tensogɔ saŋ ka O yi gaa a zie na ba naŋ boɔlɔ Oliva Taŋ a te bebe a tensogɔ zaa. 38A noba zaa da maŋ daŋ iri la baguo saŋ a gaa a Naaŋmen die ka ba te woŋ a O kannoo.
ទើបបានជ្រើសរើសហើយ៖
Luk 21: DGA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Dagaare First Bible © The Bible Society of Ghana, 2025.
