Luk 12
12
Yeezu Naŋ Kpãã Bampuori-kombampoɔ Mine
(Matio 10:26-27)
1 #
Mat 16:6; Mak 8:15 A noba naŋ da wa lantaa a te ta ŋa turi ne dɔglɔ, a neɛrɛ taa gbɛɛ la ka a Yeezu da piili yele korɔ a O potuuribo, “Yɛ gu yɛmenne velaa yi a Faraziimine gagarre yɛlɛ poɔ. A ba bampuori-kombampoɔ yɛlɛ la ka N yele. 2#Luk 8:17 Bonzaa ba kyebe naŋ pɔge a koŋ yuo, ka yelsɔglaa zaa meŋ ba kyebe ka noba koŋ baŋ. 3Azuiŋ yelzaa fo naŋ yeli ligruŋ poɔ na yi la kyaane poɔ ka ba woŋ, ka yelzaa fo naŋ waale yeli die poɔ, noba na moɔle a la piiri zu.
Neɛ Na A Naŋ Seŋ Ka Yɛ Zoro
(Matio 10:28-31)
4“N bamine, maa yele korɔ yɛ, yɛ ta zoro banaŋ naŋ maŋ ko a eŋɛ kyɛ ba la taa faŋ na e bonzaa a puoriŋ. 5Ka N wuli yɛ neɛ na a naŋ seŋ ka yɛ zoro: Yɛ zoro a neɛ naŋ maŋ wa ko baare kyɛ la taa a faŋ a na eŋ o soba dazugovũũ poɔ. Yelmeŋɛ zaa, yɛ zoro a neɛ ŋa! 6Warbie ayi naane ka ba maŋ koɔre daviime anuu be? Kyɛ Naaŋmen ba inne a kanzaa yɛlɛ. 7#Luk 21:18 A yɛ zukɔɔloŋ zaa gba noɔre ka ba sɔre. Yɛ ta zoro dabeɛ̃, bonso, yɛ gaŋ la a daviime.
8“Maa yeli ko yɛ! Neɛzaa naŋ sage de N yɛlɛ noba niŋesogɔ, a Nensaala Bie meŋ na sage de o la a Naaŋmen malekere niŋesogɔ. 9#Luk 9:26 Kyɛ soba na zaa naŋ zagre ma bare noba niŋesogɔ, N meŋ na zagre o la bare Naaŋmen malekere niŋesogɔ. 10#Mat 12:32; Mak 3:28-29 Neɛ na zaa naŋ yeli yelfaa zaa kyaare ne a Nensaala Bie, ba na di la suuri ko o. Kyɛ neɛ na zaa naŋ yeli yelfaa zaa kyaare ne a Vooroŋ Soŋ ba koŋ di suuri ko o. 11#Luk 21:14-15; Mat 10:19-20 Ka ba naŋ wa taa yɛ kpɛ ne a puoruuderi ka ba di yɛ sɛrɛɛ, bee a gaa ne yɛ a namine ane a teŋɛ nembɛrɛ zie, yɛ ta miine ne lɛ yɛ naŋ na yeli faa yɛmenne, bee bon yɛ naŋ na yelsɔge ba. 12Bonso, a Vooroŋ Soŋ na wuli yɛ la bonna yɛ naŋ na yeli a saŋ na poɔ.”
A Bondãã-damboli Sekpɔgre
13Neɛ kaŋ naŋ da be a noba poɔ da yeli ko la a Yeezu, “Wulwullo, vɛŋ ka N yɔɔ e ka te poŋ a te gbandi-boma.” 14Ka a Yeezu yeli ko o, “N ba, aŋ la biŋ ma ka N e a yɛ sɛredire bee a yɛ bompono?” 15#1 Tim 6:9-10 Ka O yeli ko ba, “Yɛ gu yɛmenne velaa a yi bombɔ yaga eŋɛ, bonso, nensaala nyɔvore ba kye o bontaa yaga poɔ.” 16Lɛ la ka a Yeezu pãã da lɔɔ sekpɔgre ko ba, “Bondaana kaŋ weɛ boma da maale la yaga. 17Ka o pãã teɛre o poɔŋ, ‘Boŋ ka N na e, N naŋ ba taa zie a na biŋ a weɛ boma?’ 18Lɛ la ka o pãã da yeli, ‘Ŋaa ka N na e. N na ŋmɛre la N bugri ane katanne bare kyɛ leɛ mɛ bonkponni a de a bombie ane n boma eŋ. 19N pãã na yeli ko la N meŋɛ, “ ‘Fo nyɛ la boma yaga naŋ na ta yuomo korɔ korɔ. Ta ferɛ fo meŋɛ, dire kyɛ nyuuro a kyɛ taa popeɛloŋ.’ ” 20#Hib 9:27 Kyɛ ka Naaŋmen yeli ko a dɔɔ, ‘Damboli ŋa! A tensogɔ ŋa zaa ka N na de a fo nyɔvore. Ka a boma fo naŋ nare biŋ, aŋ pãã na so a?’ 21#Mat 6:20 Lɛ ka a na waa ko banaŋ naŋ boɔrɔ a teŋɛzu naboma korɔ bamenne, kyɛ ka a bontaa ba kyaare ne Naaŋmen.”
Yɛ Ta Kyerɛ
22A Yeezu da yeli ko la O potuuribo, “Azuiŋ N yele korɔ yɛ la, yɛ ta vɛŋ ka yɛ nyɔvore yɛlɛ dɔɔnɔ yɛ, bon yɛ naŋ na di, bee ka bonsuuri yɛlɛ dɔɔnɔ yɛ. 23Bonso, nyɔvore gaŋ la bondiraa, ka a eŋɛ meŋ gaŋ bonsuuraa. 24#Yiel 147:9 Yɛ leɛ kaa nyɛ a galeŋgaare, a ba maŋ bore bee a kyɛ boma, a ba taa boma bimmu zie bee bugri, kyɛ Naaŋmen maŋ guoli a la. Yɛ ba taa tɔnɔ gaŋ a nuuli yaga zaa! 25A yɛ buo soba la na kyerɛ, ka a lɛ vɛŋ ka gogo yeni la dɔgle a o yuomo zu? 26Ka yɛnee koŋ baŋ e a yeli fẽẽ ŋa, bonso ka yɛ kyerɛ a anaŋ naŋ kyɛre eŋɛ? 27Yɛ nyɛ a baa pɛmpɛllɛ naŋ maŋ baara lɛ, a ba tonɔ toma bee a wuoro pɛmɛ, kyɛ anealɛzaa, N yele korɔ yɛ la, haali gba Solomɔn ne o naaloŋ veɛloŋ zaa, o daŋ ba su bonsuuri ka a veɛlɛ seŋ ama kanzaa. 28Kyɛ ka Naaŋmen pãã kaara a weɛ moɔ zu seŋ ŋaa, anaŋ are zenɛ, ka zie wa nyaana ka a kpɛ vũũ, bonso, ka O koŋ kaara yɛ zu gaŋ lɛ, yɛnee yelde-fẽẽ deme! 29Yɛ ta dɔɔnɔ yɛmenne, bee a kyerɛ bon yɛ naŋ na di bee a nyu. 30Bonso a teŋɛzu noba la maŋ yɔ zoro boɔrɔ a boma ama zaa, kyɛ a yɛ Saa Naaŋmen baŋ ka yɛ boɔrɔ la a boma ama. 31Yɛ moɔ nimiri boɔrɔ a Naaŋmen naaloŋ, kyɛ O na ko yɛ la a boma na zaa yɛ naŋ boɔrɔ.”
32 #
Luk 22:29; Aza 41:14 “N noba, yɛ ta zoro dabeɛ̃, bonso, a yɛ Saa Naaŋmen poboɔbo la ka O ko yɛ a O naaloŋ. 33#Luk 18:22 Yɛ koɔre yɛ boma a de a libie ko nembaalba. Yɛ maale libi-woore na naŋ koŋ sãã ko yɛmenne, a boɔrɔ tenvelaa naboma naŋ ba baara, be ka nannyige zaa kontoɔ̃ wa zu a, ka danduli zaa kontoɔ̃ di a. 34Bonso, zie na fo naboma naŋ be, be ka fo sukyiri meŋ na be.”
Gbaŋgbaare Naŋ Kyɛllɛ
35 #
Yiib 12:11; 1 Pit 1:13; Mat 25:1-13 “Yɛ nare gu a toma, kyɛ kyɔŋ yɛ fentelɛ. 36Yɛ waa ŋa noba naŋ kyɛllɛ ba daana ka o leɛ yi pɔgebeɛle zie wa, ka ba na yuo a dendɔre wieũ lɛ ko o, ka o naŋ deɛ wa kpaare a pane. 37Zunoɔdeme la tontonema na ba daana naŋ wa nyɛ ba ka ba ba gbiri. Yelmeŋɛ ka N yele korɔ yɛ, o na nare la o meŋɛ, a e ka ba zeŋ ka o ko ba bondirii. 38Ka o naŋ wa tensogpozentaa bee zinyaane saŋ a wa nyɛ a tontonema ka ba be nimiri, ba zu noma la.
39 #
1 Tɛs 5:2
“Kyɛ yɛ baŋ ka, ka a yidaandɔɔ da baŋ saŋ na a nannyige naŋ na wa o yiri, o da koŋ sage ka ba kɔɔ a o yiri kpɛ. 40Yɛ meŋ nare yɛmenne, bonso, a Nensaala Bie na wa la a saŋ na yɛ naŋ ba teɛre ka O na wa la.”
Gbaŋgba-bivelaa Bee Gbaŋgba-bifaa Yɛlɛ
(Matio 24:45-51)
41Piita da soore la a Yeezu, “Daana, fo lɔɔ la a sekpɔgre ŋa ko te bee neɛzaa la ka fo lɔɔ tere?” 42Ka a Daana yelsɔge, “Aŋ pãã la a tontonɔ na naŋ waa meŋɛ kyɛ baŋ yɛŋ, ka a o neŋkpoŋ na e ka o kaara o yiri zu, a na maŋ korɔ o yideme bondirii a terebo saŋ? 43Zunoɔ soba la a tontonɔ na o neŋkpoŋ naŋ na leɛ kulo waana a wa nyɛ o ka o tonɔ. 44#Mat 25:21 Serɛzaa ka N yele korɔ yɛ, a o daana na e la ka o kaara o boma zaa zu. 45Kyɛ ka a tontonɔ wa yeli ko o meŋɛ, ‘N neŋkpoŋ kɔɔrɔ la waabo’, kyɛ pãã piili ŋmeɛrɛ a o tontombi-taaba, a dɔbɔ ane a pɔgeba zaa, kyɛ di boma a nyu dãã te kuoli. 46A tontonɔ ŋa neŋkpoŋ na wa uri o la a daare na o naŋ ba nare ane gogo na o naŋ ba baŋ. A tontonɔ ŋa neŋkpoŋ na wa kyɛ o la ŋmaare puropuro kyɛ de o eŋ a nenfaare poɔ. 47#Gye 4:17 A tontonɔ na naŋ baŋ bonna a o neŋkpoŋ naŋ boɔrɔ, kyɛ ba nare o meŋɛ bee a e a lɛ naŋ seŋ, na nyɛ la ŋmeɛroŋ yaga. 48Kyɛ a tontonɔ na naŋ ba baŋ a kyɛ e yɛlɛ naŋ seŋ ka ba ŋmɛ o, na nyɛ la ŋmeɛroŋ belãã lɛ. Neɛzaa ba naŋ ko bon-yaga, ba na boɔrɔ la bon-yaga yi o zie. Neɛzaa ba naŋ de yɛlɛ yaga eŋ o nuuriŋ, ba na boɔrɔ la eroŋ yaga yi o zie.”
Yeezu Naŋ Wa Ne Kyataa
(Matio 10:34-36)
49“N waɛ la ka N mare vũũ eŋ a teŋɛzu, a da berɛ ŋa a vũũ da nyɔge dire la. 50#Mat 20:22; 26:38; Gyn 12:27 N taa la suobu a na so N meŋɛ, kyɛ N be la toɔrɔ poɔ ka anaŋ ba wa te e baare! 51Yɛ teɛre ka maaroŋ la ka N wa ne a teŋɛzu be? Ai, maa yeli yɛ, kyataa la ka N wa ne! 52A yi ŋaa gɛrɛ noba banuu naŋ kpeɛrɛ yi-yeni poɔ na kya la taa ziiri ayi, ka ba bata laŋ noɔre a zɔɔrɔ ne a ba bayi, ka a ba bayi meŋ zɔɔrɔ ne a ba bata. 53Ba na kya la taa:
Saa na zɔɔrɔ ne la o bie
ka bie meŋ zɔɔrɔ ne o saa,
ma na zɔɔrɔ ne la o pɔgeyaa
ka pɔgeyaa meŋ zɔɔrɔ ne o ma,
pɔge na zɔɔrɔ ne la o naapɔge
ka naapɔge zɔɔrɔ ne o serɛ ma.”
Yɛ Baŋ A Saŋ
(Matio 16:2-3)
54 #
Mat 16:2-3
A Yeezu da la yeli ko la a noba, “Ka yɛnee wa nyɛ zunzugri ka o wa iri a gɛrɛ sapare, yɛ maŋ yeli la daadaalɛ, ‘Saa na wa la’; ka a sereŋ e a lɛ. 55Ka yɛnee wa nyɛ saseɛ ka o fuuro a yi sapare nudoloŋ seŋ waana, yɛ maŋ yeli la, ‘A zie na tole la, a donɔ’; ka a sereŋ waa a lɛ. 56Yɛnee bampuori-kombampoɔ mine! Yɛ maŋ toɔ̃ kaa la a teŋɛ ane a saluoni kyɛ baŋ lɛ a zie naŋ na waa, kyɛ bonso ka yɛ ba toɔ̃ baŋ a zenɛ bebie yɛlɛ eŋ?”
Leɛ Maale Taa Yɛlɛ
(Matio 5:25-26)
57“Ka boŋ la so ka yɛ kontoɔ̃ gyɛle yɛmenne nyɛ lɛ a naŋ seŋ ne? 58#Mat 5:25-26 Ka neɛ wa taa fo gɛrɛ ne sɛrɛɛdiibu zie, e aneɛ ka yɛ leɛ maale a yɛlɛ a sobiriŋ. Ka lɛ naane, o na tage fo la gaa ne a sɛredire zie, ka a sɛredire de fo ko a polisiri ka ba page fo. 59Maa yele korɔ fo, fo koŋ yi a nempagdie poɔ a te ta lɛ saŋ fo naŋ yɔɔ a sane zaa baare.”
ទើបបានជ្រើសរើសហើយ៖
Luk 12: DGA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Dagaare First Bible © The Bible Society of Ghana, 2025.
