Piiluu 11
11
A Babɛl Kyoglokolo
1A tendaa noba zaa da yele la kɔkɔ-yeni, ka a ba yelbie meŋ e yeni. 2Ba naŋ da iri yi a sapare seŋ gɛrɛ, ba da te nyɛ la zigbaŋgbalaa kaŋ a Sina paaloŋ poɔ, a da zeŋ a be. 3Ba da yeli ko la taa, “Yɛ wa ka te ŋma tɛmbie a nyoɔ a velaa.” Ba da de la a tɛmbie ka a leɛre kubo zu kyɛ ka kootaare leɛre a tɛmbuuri ba naŋ de meɛrɛ ne zu. 4Ba pãã da yelee la, “Yɛ wa ka te mɛ teŋkpoŋ ko temenne; a mɛ kyoglokolo ka o do tɔ a saluoni a bɔ yuori ko temenne. Ka lɛ naane te na yaare be la a tendaa zaa zu.” 5#Piil 18:21; Yiel 18:9; 14:2 A DAANA da sigi waɛ la ka O nyɛ a teŋkpoŋ ane a kyoglokolo a nensaalba naŋ da mɛ. 6A DAANA da yelee la, “Nyɛ, ba e la nemboor-yeni, ka ba zaa taa kɔkɔ-yeni. A yɛlɛ ba naŋ na e piiluu yoŋ naŋ la ŋa. Ka ba naŋ boɔrɔ ka ba e yelzaa, bonzaa kyebe a na pigi ba sori. 7Yɛ wa ka te sigi te gyɛre a ba kɔkɔre ka ba ta la wono taa yelyelii.” 8#Luk 1:51 A lɛ zuiŋ, a DAANA pãã da ŋmɛ ba la yaare a tendaa zaa zu, ka ba da bare a teŋkpoŋ meɛbo. 9A ŋaa zuiŋ, ba da boɔlɔ la a zie ka Babɛl, bonso, a be la ka a DAANA da gyɛre a tendaa zaa kɔkɔre. A be la ka a DAANA da ŋmɛ ba yaare a tendaa zaa zu.
A Sɛmm Pare Boorɔ Yɛlɛ
(1 Teŋkoreŋ Yɛlɛ 1:24-27)
10 #
1 Teŋ 1:24-27; Piil 10:22; Luk 3:36 A Sɛmm pare boorɔ noba la bama. A Sɛmm naŋ da wa nyɛ yuomo kɔɔ, a kɔmpiiri yuomo ayi puoriŋ, o da dɔge la Arepasad. 11A Arepasad dɔgebo puoriŋ, a Sɛmm da nyɛ la yuomo kɔɔraanuu. O da la dɔge la bidɔbɔ ane pɔgeyaare mine meŋ poɔ.
12A Arepasad naŋ da wa nyɛ yuomo lezare ne pie ane anuu o da dɔge la Sela. 13A Sela dɔgebo puoriŋ, a Arepasad da nyɛ la yuomo kɔɔraanaare ne ata. O da la dɔge la bidɔbɔ ane pɔgeyaare.
14A Sela naŋ da wa nyɛ yuomo lezare ne pie, o da dɔge la Ɛba 15A Ɛba dɔgebo puoriŋ, a Sela da nyɛ la yuomo kɔɔraanaare ne ata. O da la dɔge la bidɔbɔ ane pɔgeyaare.
16A Ɛba naŋ da wa nyɛ yuomo lezare ne pie ane anaare, o da dɔge la Pɛlɛg. 17A Pɛlɛg dɔgebo puoriŋ, a Ɛba da nyɛ la yuomo kɔɔraanaare ne lezare ane pie. O da la dɔge la bidɔbɔ ane pɔgeyaare.
18A Pɛlɛg naŋ da wa nyɛ yuomo lezare ne pie, o da dɔge la Rewu. 19A Pɛlɛg naŋ da wa dɔge a Rewu puoriŋ, o da nyɛ la yuomo kɔɔraayi ne awae. O da la dɔge la bidɔbɔ ane pɔgeyaare.
20A Rewu naŋ da wa nyɛ yuomo lezare ne pie ane ayi, o da dɔge la Sɛrug. 21A Sɛrug dɔgebo puoriŋ, a Rewu da nyɛ la yuomo kɔɔraayi ne ayopoĩ. O da la dɔge la bidɔbɔ ane pɔgeyaare.
22A Sɛrug naŋ da wa nyɛ yuomo lezare ne pie, o da dɔge la Nahɔ. 23A Nahɔ dɔgebo puoriŋ, a Sɛrug da nyɛ la yuomo kɔɔraayi. O da la dɔge la bidɔbɔ ane pɔgeyaare.
24A Nahɔ naŋ da wa nyɛ yuomo lezare ne awae, o da dɔge la Tɛɛra. 25A Tɛɛra dɔgebo puoriŋ, a Nahɔ da la nyɛ la yuomo kɔɔ ne pie ane awae. O da la dɔge la bidɔbɔ ane pɔgeyaare.
26A Tɛɛra naŋ da wa nyɛ yuomo lezaata ne pie, o da dɔge la Aboram, Nahɔ ane Haran.
A Tɛɛra Boorɔ Noba
27A Tɛɛra pare boorɔ noba la bama. A Tɛɛra da dɔge la Aboram, Nahɔ ane Haran; ka Haran dɔge Lɔt. 28A Haran da daŋ la a o saa Tɛɛra kpi a o tendɔgraa poɔ, a Uur teŋɛ naŋ be a Kyaldiya paaloŋ poɔ. 29#Piil 22:20 A Aboram ane Nahɔ da de la pɔgeba. A Aboram pɔge yuori da la Saarae kyɛ ka a Nahɔ pɔge yuori da di Milka. A Milka da waa la Haran pɔgeyaa. A Milka ane Iseka saa da la a Haran. 30A Saarae da e la pɔg-ɔre; o da ba taa bie.
31 #
Gyos 24:2; Nɛh 9:7 A Tɛɛra da de la a o bidɔɔ Aboram ane o yaŋaa Lɔt, a Haran bidɔɔ ane o naapɔge#11:31 Naapɔge: A Dagaaba mine maŋ yeli ka Bie pɔg Saarae, a o bidɔɔ Aboram pɔge a yi a Uur teŋɛ naŋ be a Kyaldiya paaloŋ a na gaa a Keeina teŋɛ; kyɛ ba naŋ da wa ta a Haran teŋɛ, ba da zeŋ la a be. 32A Tɛɛra da nyɛ la yuomo kɔɔraayi ne anuu kyɛ da kpi a Haran teŋɛ poɔ.
ទើបបានជ្រើសរើសហើយ៖
Piiluu 11: DGA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Dagaare First Bible © The Bible Society of Ghana, 2025.