Umak 4
4
Ityang gbe le undi angwu u wee bikwukwan
(Mat 13:1-9; Luk 8:4-8)
1Ujeso a maa hwọ bendi he ungwu kidyeshọ. Bendi be ma be sho ha gbam. He ashina a bo le ngwee he kinọng lishọ, bel kwu ha gye kushu hwọ abe. Kinọng ki ma yi he kudyan umbwo, bendi be shi sho he ugoigye. 2Ujeso a ma hwọ abe biwọm gbam gbe he ityang. He kunyọng ahwu a hwọ abe biwọm abina, a de le, 3“Ma dang kutyung, ki ma yi le ungikye ken angwu a ma gye itọng bikwukwan awee-ale. 4Nya ana a maa wee itọng ha utia, isuso i mbu wu le ubi-kukwo le ubi-kukwo. Linyun li be kpi angi mbel. 5Isuso i mbu pwọm he kukọ he kipi itang i yi gbung ye. I ma mbi akikye likọye itang i yi zang a. 6Ishu i bi gwu angi likọye idaa angi i gye he itang ye. 7Isuso i mbu wu he liwu ítọng. He kunyọng ahwu ítọng i mbi, i mbel nim bikwukwan ana, he ashina bi wum ye. 8Isuso i mbu wu he itang inunung. He kunyọng ahwu i mbi, i kaa shi itọng. Aten asuso a shi itọng lisi le ngi lihwo, asuso a shi itọng asi akie, asuso a shi itọng asi adyọng.”
9Ujeso a de le, “Undi angwu u yi le atyung kigyo, u gyo!”
10He kunyọng ahwu Ujeso a ma tem yi he liwu a ye, bendi besuso abe be ma gyo he, be be utung ha bendi-utung bema be hwaa le he bii he ashi ityang puu angi a bun i ze. 11Ujeso a de be le, “Men na Unim a tyung amen kundyel gbe le kiteng kusu kima. Ukpọ abe be yi bendi-utung begi a ye, mi bun biwọm da abe gba he ityang le he ki shi na undi angwu u tye ugie kisọm Unim a ma fee he kushia le-iti. 12A ma fee le,
“ ‘Be ba nda andele ufe-ufe, ki nung abe ye,
be gyo agyo-ale ufe-ufe,
be be ngye likpe ashi ye.
Be ngye likpe lima,
hang be bel hwaa le Unim,
he u tyang biban bibel ke be.’ ”#4:12 Azaya 6:9, 10
13Ujeso a bii abe le, “Gbe ma gyo likpe ityang anyin ye, ma ba sha na a, he men ma gyo angi i teng?” 14A ha de le, “Undi-utia angwu u wee itọng bikwukwan ana na u yi undi angwu u bun igie Unim. 15Bendi besuso be yi na itọng angi i mbu wu he ubi-kukwo. He kunyọng ahwu be gyo igie Unim gyo-gyo, Usu bibibi u ba kung igie angi undi a bun de be gba le ngi. 16Bendi besuso be yi na itọng angi i mbu pwọm he kukọ. Be gyo igie Unim gyo-gyo be kpa angi le igọ. 17Ukpọ i kwa ha abe atyam gba kigbe ye likọye be yi le idaa ye. Gbe be kpe kingie, bendi be ndu tel abe le gbe be bọng ha igie Unim, be tyang abwo nya kukwo-kukwo. 18Besuso be yi na itọng angi i ma mbu wu he kipi ítọng i yi. Bendi aben be gyo igie Unim, 19ukpọ be keb ufung awa-ale gbe le biwọm igye anyin, bingbeb igye bi mbee nyin abe hwo biwọm puu. Kigyọ biwọm gbam ki sha abe be naa lityam igie Unim, i tem kpel abe ye. 20Besuso be yi na itọng angi i ma mbu wu he itang inunung. Be gyo igie Unim, be kpe ngi. Be ba le lifem li kwa na aten angi a shi itọng lisi le ngi lihwo, asuso itọng asi akie, asuso asi adyọng.”
He kipi be ndọ kimọ-kinde
(Luk 8:16-18)
21Ujeso a mbee de be ityang isuso le, “Undi u gba kimọ-kinde kung ashi la ndọ he liten undọ, ọ he liten agodo a? U kung ashi ndọ he kugboo a ye a? 22Kiwọm kiyang-yang ashi ki yi he kundyel, be ba fem ashi he igye. Kiwọm kiyang-yang ashi be ndyel, be ba ba le shi he kugboo. 23Undi uyang-yang angwu u yi le atyung kigyo, u gyo!”
24Ujeso a mbee de be le, “Ma nde le ma shi ashi ma gyo, u kee angwu ma kee ke bendi, ufe na be be kee ke men gbe-gyọng ọ. 25Undi angwu u yi le kiwọm, Unim u fa shwa he ashi, ukpọ undi angwu u yi le shi ye, ake u yi le ke zang ọ, Unim u pan kpa kung he ake.”
Ityang gbe le utọng kikwukwan angwu u kaa
26Ujeso a ma gye kushu de be le, “Kitaa ashin na kiteng kusu Unim ki yi, ki yi na undi angwu u wee itọng bikwukwan he utia na. 27He kunyọng ahwu u wu i mbee, u tem gya he ushu la mbwa kunde. Gbe ashi a taa u shi aki asuso. Itọng bikwukwan angina i mbya, i kaa. Undi-utia u ngya na itọng imen ana i mbi ye. 28Itang na i shi bikwukwan bi kaa keb itọng awum-ale. I kpia-kikwu sha ashia, i shi azam hwan, i bi. 29He kunyọng ahwu i bi, u sọm bendi le kandii be keb angi atam-ale.”
Ityang gbe le utọng Umustad
(Mat 13:31-32, 34; Luk 13:18-19)
30Ujeso a mbee de bendi le, “Kibang li kung paa ha kiteng kusu Unim? Kibang ityang angi li kung tie ashi? 31Kiteng kusu Unim ki yi na utọng angwu be ko he igie Beke le umọstad. Utọng umen i a zen hwo itọng bikwukwan he igye anyin puu. Undi u kung he kwan he ikatang, 32utọng ana u mbya, u kaa dyam hwo bikwukwan puu, u yal ibubu kaang, le linyun li so ha he usi.”
33Ujeso a ma bun igie Unim gbe he ityang da be, a maa kọng ha abe kitaa ashi be nya gyo ki nung abe. 34U kọng ha abe he ityang-ityang. Ukpọ gbe bendi-utung bema befe-befe na be yi utung he ahe, u bun da abe ashi ityang angi ha i ze.
Ujeso a kwun kipupu kufem
(Mat 8:23-27; Luk 8:22-25)
35Le likwu-lukwu he liti limen ana Ujeso a de bendi-utung bema le, “Ma li gyọng gye he igbindi kidyeshọ ashel.” 36Be ha gbe tyang bendi abena ha. Bendi-utung bema be le ngwee he afee kinọng lishọ ashi Ujeso u yi kwu. Binọng bisuso bi ma yi ha. 37Kipupu kufem ki keb ashele kaang. Umbwo a maa fel tab fa he afee kinọng. Ki ma teng zang he umbwo u sho ha. 38Ujeso a ma yi nde he item kinọng, a ma mbu kunde pwọm lishi he ipilo. Bendi-utung bema be ma le wum he, bii he le, “Itisha, li nim inim dii! Ki tib a ye a?”
39Ujeso a bo kinaa, a kung gaa fe kufem le umbwo le, “Ma naa le kihwee! Ma kwu kpọ!” Bi kung kwun atyung shang, Umbwo u naa katia.
40Ujeso a ha kung bii abe le, “Kibang a, ma shel? Ma wa yi le abọng-ale ye a?”
41Be maa fel shel kaang. Be fel bii bende le kibang kitaa undi ashi u yi? Kufem ọ, umbwo ọ, bi ka he ife.
ទើបបានជ្រើសរើសហើយ៖
Umak 4: KUIL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.