Umak 16
16
Ujeso a wum le he lihwu
(Mat 28:1-8; Luk 24:1-12; Jọn 20:1-10)
1Liti-uwel Ijuus li gbe. Umeri Magdalen le Usalomi le Umeri, anam Ujems, be ndyeb behwu le be la gbaa likwọm Ujeso. 2He ukpi-kikwu liti utyọng, he kunyọng ahwu libwee li ndu fem, be bo be gya ha he likwun Ujeso. 3Be fel bii bende le kukwo le, “Ayang nyin u mung li kukọ le he ungwu likwun?”
4Ukpọ nyọng be ma nde a shi gye he kushu, be nde kukọ ku tọ mung gbe le ha likwun. 5Be gbe gye he afee likwun le nde ushọmate a shi kihwọm kifung kwu ha he kigie likwun ashi he kubwo lizen, ki ma ndii abe he kuhwo.
6Ushọmate angwuna a de be le, “Ma ndii ye. Mi ngye le ma kee Ujeso angwu Unazaret angwu be ma maa bee he kikpakpa a. U yi nyin ye. A wum le he lihwu ma. Ma nde he kipi be ma kie he. 7Ma te le ashin le de Ipita le bendi-utung bema abe be teng le, a gbe he Ugalili u ta amen le he kushu. Ha na be le nde-e nya ana a ma de be.”
8Be buu fem le ha afee, be buu gbe le ha likwun, likọye biwọm abin puu bi kwu abe he kuhwo, bi shi abe kushel, be fel tung fọfọ. Be bun de undi ye, likọye be maa shel.
[9He kunyọng ahwu Ujeso a ma wum le he lihwu, he ukpi-kikwu liti utyọng le-iti-le-iti, a ma kpi-kikwu le kpee ha Umeri Magdalen, angwu a ma ndo ikeb ibibi idyọng-ifee le he ahe. 10A te le de abe be ma yi utung ha Ujeso abe be ma sho le kimbwee le akye he ashi. 11He kunyọng Umeri a de be le Ujeso u yi uwum, u fe a nde-e, be ma bọng ashi a de be ye.
12He kanwaa kunyọng zang, kunyọng ahwu bendi-utung Ujeso bendi befee be ma ndọ ashi be gya he ushu, Ujeso a ma fem kpee ha abe nya he kukwo. Kunyọng ahwun a ma fem he kukwo atyetye. 13Be tem le de bendi-utung bema abe be teng. Be mbee bọng ashi befe ọ be kọng ye.
14He umbee-likel Ujeso a le hwaa le bendi-utung bema abe lihwo le undi ken he kunyọng ahwu be maa zi lizi. A ma ben abe likọye be yi le abọng-ale ye, be teb atyam angwu ki shi abe be bọng ashi bendi abe be nde-e u yi uwum be de be ye.
15Ujeso a kung de be le, “Ma gye mbee igye puu le bun kisọm kinunung de bendi puu. 16Undi angwu a bọng ha ami, ma wu-e umbwo, u kwa le likpan kunyọng. Ukpọ undi angwu a bọng ha ami ye, ha a nim. 17Bendi abe be bọng ha ami, be ba kwa le ikeb Unim angi be shi biwọm abi bi kwu he kuhwo. Be ba ndo ikeb ibibi he lizen ligi. Be ba kọng igie isuso angi be ngye ngi ye. 18Gbe be kwu ushii he abwo, u sha abe kiwọm ye, be ngwo bezu abe be gwu undi ọ, be do abe ye. Be kung abwo pwọm bendi-angbam, be mbee.”
19He kunyọng ahwu Ada Ujeso a kọng ha bendi-utung bema puu, Unim a kpe-e gye le he he lifung-atabe le kwu he kubwo lizen kuma. 20Bendi-utung Ujeso be le bun kisọm kinunung mbee bipi puu. Ada Ujeso a maa kpel abe, sha aki utung ha abe, u shi biwọm abi bi tyung bendi le kisọm ashi be bun ki yi kigyang a.]
ទើបបានជ្រើសរើសហើយ៖
Umak 16: KUIL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.