Umatiu 28
28
Ujeso a wum le he lihwu
(Mak 16:1-10; Luk 24:1-12; Jọn 20:1-10)
1Liti-uwel Ijuus li gbe. He ukpi-kikwu liti utyọng le-iti-le-iti, Umeri Magdalen befe le Umeri angwu ken be ngyu le nde likwun Ujeso.
2Isun i kwuo ha kaang, likọye udengel Ada a shul le he lifung-atabe be ha. A mung kukọ kukandi le he ungwu likwun ndọ gye he ufaa, u bel kwu ha he kukọ kumen ana. 3A maa taa na kindeb-nwaa. Bihwọm bima bi ma yi bifung-bifung kpela-dada. 4Ishogya angi i maa kang likwun, i nde-e, i fel he kushel kaang. Kushel ku shi abe be fel tung fọfọ. Be kung fel na akwọm.
5Udengel Unim a ha kung de bengingye ana le, “Ma shel ye. Mi ngye le ma kee Ujeso angwu be ma maa bee he kikpakpa a. 6U yi nyin ye. A wum le he lihwu nya ana a ma kọng. Ma be nde kiteng ashi be ma kie he. 7Ma ndu te akikye le de bendi-utung bema le a wum le he lihwu ma. Ma de be le a tọ gbe he Ugalili u ta men le he kushu, ha na ma le nde-e. Mi de men ma.”
8Ma na bengingye aben be ma yi le kushel ọ, nya kukwo-kukwo be gbe le ha le igọ le be la bun abin puu da bendi-utung Ujeso. 9Nya ana be maa buu gye le akwo, Ujeso a kpee le be, u kọng le be le, “Ikwun i kwu amen he kuhwo.” Be die gwaa le he shib abwo kwu-e he abee, be fe-e. 10Ujeso a de be le, “Ma shel ye. Ma te le de bebwaa-ndagi le be gye he Ugalili, ha na be le nde-m.”
Kisọm Ishogya angi i kang likwun
11Nya ana bengingye abena be ma so he kukwo, ishogya angi i kang likwun i wu he lifung-ushu le bun de bekandi bishang Unim biwọm puu abi bi shi. 12Nyọng bekandi bishang Unim le bekandi kubọng be shi ugim, be ndyeb abwo le ishogya le unde kaang. 13Be de ngi le, “Ma de bendi le, bendi-utung bema na be be zi fem likwọm lima le kusu he kunyọng ahwu ma ma yi he kunde. 14Gbe Ufaa-ukwob a gyo ashin, li la kọng ka amen, ma ma mbwa he linaa ye.” 15Ishogya i kpe unde, i fel kọng da bendi le he kunyọng ahwu befe be yi he kunde na bendi-utung bema be zi fem he le he likwun. Kitaa ashina na Ijuus puu i fel kọng kpam be kunyin nyin.
Kisọm kikandi
(Mak 16:14-18; Luk 24:36-49; Jọn 20:19-23; Aki 1:6-8)
16Bendi-utung Ujeso abe lihwo le undi ken be gye he ukwel Ugalili angwu Ujeso a ma de be le be le kpee he ahe. 17He kunyọng be ma nde-e, bendi besuso be keb fe-e, besuso be fung. 18Ujeso a ha die gwaa ha abe kpee-kpee, u de be le, “Unim a kung ikeb puu angi he lifung-atabe ọ, angi he igye anyin ọ ke-m. 19Ma gye mbee abọng igye puu le hwọ bendi na be kwu bendi-utung begi, ma wu abe umbwo he lizen angi Atya-tyan, le angi Unwaa, le angi Ukatia Kunyọng. 20Ma hwọ abe na be shi biwọm puu abi mi de men. Faale ifung mi kwa utung ha amen mbee kunyọng kpam igye i gbe mbee.”
ទើបបានជ្រើសរើសហើយ៖
Umatiu 28: KUIL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Igie Likpan™ Kushia azu Unim afufe
© 1982, 2025 Biblica, Inc.
Be kpe ikeb be ha shi kushia ahwun.
Ikeb puu gbe le kushia ahwun he igye i puu, i yi angi Biblica, Inc. a.
Bette Contemporary Version™ New Testament
Copyright © 1982, 2025 by Biblica, Inc.
Used with permission.
All rights reserved worldwide.
