Genesis 14
14
Ibulamu amyokola Lutu
1Mwo mazuwa yo kwikaila kwakwe seuta Amlafeli ywa Shinali, maseuta awa washano, Amlafeli seuta ywa isi ya Shinali na Alioko seuta ywa isi ya Elaza na seuta Kadolaoma ywa isi ya Asilia na Tidali seuta ywa isi ya Goimu, 2wagendaga kutowana nk'hondo na maseuta watuhu, wakina Bela seuta ywa Sodoma na Bilisha seuta ywa Gomola na Shinabi seuta ywa Adima na Shemebeli seuta ywa Zeboimu, hamwenga na seuta ywa Zoali. 3Maseuta awa washano walunganyaga mafyo yawe ya watowani niyo dyanda fyo dimwenga uko kwe dikolongo dya Sidimu, idyo kwaivi haluse dikwitangwa Bahali yo munyu. 4Kwa miaka mlongo na miidi wandaga wakamtegeleza seuta Kedolama, mna ize ibule mwo mwaka wa mlogo na mitatu wasagukaga. 5Mwo mwaka wa mlongo na kane, seuta Keodalama na wadya maseuta weyawe wezaga na watowani wawe niyo wawahuma want'hu wa Lefaimu uko Ashitelohi Kanaimu na Wazuzi wa uko Hamu, na wa Emimu mwe zint'hindiga za Kiliathaimu, 6na Waholi uko mwe milima ya Edomu, no kuwagulusa mpaka Elipalani mwo mhaka ne dijangwa. 7Niyo wauya kunyuma mpaka Eninishipati nuko kugamba Kadeshi, niyo waitowa isi yose ya Waamaleki, na kuwahuma Waamoli wandaga wakekala Hazazoni Tamali.
8Niho seuta ywa Sodoma na seuta ywa Gomola na seuta wa Adima na seuta ywa Seboimu na seuta ywa Bela wayaduganyaga mafyo ya watowani wawe kwa nk'hondo uko kwe dikolongo dya Sidimu. 9Watoane na seuta Elamu Goimu na Babelonia na Elasali, maseuta washano kuhigana na maseuta wane. 10Kolongo dya Sidimu dya memaga mabome ya lami, ivo seuta ywa sodoma na seuta ywa Gomola wakanyilika ink'hondo wakwamaga mwa mabome, mna maseuta watuhu wadya watatu wanyilikilaga kwe milima. 11Ivo wadya wahumi waguhaga kila kint'hu hamwenga na nk'hande uko Sodoma na Gomola, niyo wakeitila. 12Ivo wamtaha Lutu, mwana nduguye dya Ibulamu, uko andile akekala Sodoma hamwenga na ugoli wakwe no kuita kwawe.
13Mna mnt'hu yumwenga anyilikaga niyo akumgambila Ibulamu Muibulania andaga akekala hagihi ne miti mikulu ya muamoli ya Mamle. Mamle andaga na nduguye akwitangwa Eshikelo na Aneli wose awa walaganaga na Ibulamu. 14Ibulamu eze eve kugamba mwana nduguye katahigwa, awetangaga watowani wa mwe nyumba yakwe wabulaga magana matatu na mlongo na mnane niyo wawatimila wadya maseuta wane mpaka Dani. 15Nekilo iicho, Ibulamu awapangaga want'hu wakwe mwe mabunga bunga, niyo wawatowa wank'hondo wawe no kuwahuma. Awagulusaga mpaka Hoba mkoma mahanya mwa Damaska, 16niyo aukombola ugoli wose udya watahigwe na wank'hondo. Iviya iviya amvuzaga Lutu mwana nduguye ne vint'hu vakwe, hamwenga na wavele, na want'hu watuhu.
Melikezedeki amvikila Ibulamu
17Umwo Ibulamu andaga akauya kulawa kokumhuma Kedolama na maseuta watuhu, seuta ywa Sodoma agendaga kumsingila kwe dikolongo dya Shawe, idyo dikwitangwa iviya iviya Kolongo dya maseuta. 18Melekizedeki uyo andaga seuta ywa Salemu, uyo andaga mlava nt'hambiko ywa Mnungu ywo udahi wose naye egalaga mkate ne divai kwa Ibulamu, 19amvikilaga akamgamba, “Mnungu ywo udahi ywa yose aumbile mbingu ne isi naamvikile Ibulamu! 20Naatogolwe Mnungu ekwe mbingu, uyo akwambizaga kuwahuma wank'hondo wako!” Ibulamu niyo amwink'ha Melekizedeki hant'hu ha mlongo mwe vint'hu vakwe vose viya ananavo.
21Akajika ayo, seuta ywa Sodoma niyo amgamba Ibulamu. “Usigale ne vint'hu vose, mna univuzile want'hu wangu.”
22Ibulamu amhitulaga kugamba, “Nakelisa kwa Mnungu Mkulu, muumbi ywe mbingu ne isi, 23kugamba heniguhe chochose ichako, luzi hegu hata luzigi lwa vilatu vako, unase uketogole ugambe. Ni miye nimtendile Ibulamu kunda mgoli. 24Heniguhe chochose, mna neniguhe du viya vint'hu va wabwangwa wangu wadile na viya ivint'hu va want'hu wandile hamwenga na miye, nawo ni awa, Aneli na Eshikoli na Mamle, awo leka waguhe upasi wawe.”
ទើបបានជ្រើសរើសហើយ៖
Genesis 14: OTNguuBL
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Old Testament in Nguu @The Word for The World International and the Nguu Language translation, 2025. All rights reserved.