Luku 7
7
Nwanwanendeɛ ngakyile nwiɔ
1Mɔɔ Gyisɛse wiele ye edwɛkpa ngilehilenu ne la, ɔziale ɔ nzi ɔhɔle Kapɛnayɛm.
2Mekɛ zɔhane anu ɛnee Wulomu sogya kpanyinli bie akɛlɛ mɔɔ sɔ ɔ nye kpole kpalɛ la ɛnde kpɔkɛ fee mɔɔ ɔdie adenle yeawu a. 3Mɔɔ sogya kpanyinli ne dele Gyisɛse nganeɛ la, ɔzoanle Dwuuma mgbanyima bie mɔɔ lɛ duma na eza bɛdi bɛ nwo eni la kɛ bɛhɔze ye kɛ ɔrayɛ ye akɛlɛ ne ayile. 4Ɔti bɛrale bɛrabodole Gyisɛse mɛlɛbɛnwoaze nu ala kɛ ɔ nee bɛ ɛhɔ na ɔhɔboa nrenyia ne. Bɛhanle sogya kpanyinli ne ye mɔdenle mɔɔ ɔbɔ ɔmaa bɛ la bɛhilele ye.
Bɛzele kɛ, “Saa awie ko hyia wɔ moalɛ a, ɛnee ɔdaye ɔ, 5ɔluakɛ ɔkulo Dwuuma ne mɔ, na eza yebɔ kakɛ yezi ayiasua yemaa yɛ bɔbɔ!”
6-7Gyisɛse nee bɛ hɔle. Na mɔɔ ɔka ekyii na bɛawole aako ne anu la, sogya kpanyinli ne zoanle ɔ gɔnwo mɔ kɛ bɛraha bɛhile ye kɛ, “Yɛmenle, mmafonla ɛ nwo kɛ ɛkɛra me aako ye anu, ɔluakɛ memfɛta. Emomu wɔmɔ gyinla ɛleka mɔɔ ɛgyi ala la na ka edwɛkɛ ne, na me akɛlɛ kakula nrenyia ne anwo kɛza. 8Meze, ɔluakɛ mewɔ me mgbanyima bo, yɛɛ medame noko melɛ tumi wɔ me azogya nwo zo. Saa mese ko kɛ, ‘Kɔ!’ a, ɔkɔ; yɛɛ mese bieko noko kɛ, ‘Bɛla!’ a, ɔba; saa mese me akɛlɛ ne kɛ, ‘Yɛ ɛhye!’ a, ɔyɛ. Ɔti wɔmɔ ka kɛ, ‘Te kpɔkɛ!’ na me akɛlɛ ne bade kpɔkɛ bieko!”
9Gyisɛse dele ɛhye la, ɔyɛle ye azibɛnwo. Ɔhakyile ɔ nye wɔ menli ekpunli ne anwo na ɔzele kɛ, “Metɛnwunle awie ko mɔɔ lɛ diedi kɛ nrenyia ɛhye la bie ɛlɛ wɔ Dwuuma mɔɔ wɔ Yizilayɛ la anu kɛ nrenyia ɛhye.”
10Na mɔɔ sogya kpanyinli ne agɔnwo mɔ ziale bɛ nzi hɔle sua nu la, bɛnwunle kɛ akɛlɛ ne ɛde kpɔkɛ bɔkɔɔ.
11Na ɔrale ye kɛ, yeangyɛ dɔɔnwo biala, Gyisɛse nee ye ɛdoavolɛma ne mɔ hɔle namule bie mɔɔ bɛfɛlɛ ye Neeyen, la azo. Na kɛmɔ ɔde ala la, menli dɔɔnwo ne ala doale ye. 12Na mɔɔ ɔbikyele namule ne anlenkɛ kpole ne anloa la, ɔnwunle kɛ bɛzo awie bie mɔɔ ɛwu, na ɔle ɔ nli ara nrenyia kotokokye la bɛlɛkɔ bɛahɔzie ye; na ɛnee raalɛ ne le kunlavolɛ. Ɛhye ati ɛnee namule ne azo amra dɔɔnwo boka ɔ nwo.
13Mɔɔ Awulae nwunle ye la, ɔlile nyane kpole wɔ ye ahonle nu ɔmaanle ye, na ɔzele raalɛ ne kɛ, “Mmasu!” 14Ɔhɔle funli ɛlɛka ne anwo na ɔhɔzɔle nu, na menli mɔɔ ɛnee zo ye la gyinlanle. Ɔhanle kɛ, “Kpavolɛ, mese wɔ kɛ, Dwazo!”
15Ɛkɛ ne ala, kpavolɛ ne dwazole dɛnlanle aze na ɔbɔle ɔ bo kɛ ɔtendɛ. Akee Gyisɛse ziale vale ye maanle ɔ nli.
16Ɛzulolɛ kpole hanle menli ne mɔ kpokpoti; na bɛdeɛdeanle nu bɛyele Nyamenle ayɛlɛ bɛzele kɛ, “Kapezonli kpole bie ɛra yɛ avinli,” yɛɛ “Ɛnɛ Nana Nyamenle anye ɛra ye menli anwo zo.”
17Nyɛleɛ zɔhane mɔɔ ɔyɛle ye kenle ko demua ne la nganeɛ pɛle nu Dwudiya maanle ti nee ɔ bo.
Gyisɛse nee Dwɔn
18Yeangyɛ biala Dwɔn Sɔnevolɛ ne ɛdoavolɛma ne mɔ dele mɔɔ ɛnee Gyisɛse ɛlɛyɛ la amuala. Mɔɔ bɛhanle bɛhilele Dwɔn la, 19ɔzoanle ye ɛdoavolɛma ne mɔ anu nwiɔ wɔ Gyisɛse anwo lɔ kɛ bɛhɔbiza ye kɛ, “Ɛnee wɔmɔ a ɛle sonla holɛ ko ne mɔɔ ɛlɛba la anzɛɛ? Anzɛɛ yɛhɔ zo yɛhendɛ ye ɔ?”
20-22Ɛdoavolɛma nwiɔ ne hɔnwunle kɛ Gyisɛse ɛlɛyɛ wuliravolɛma dɔɔnwo ayile mɔɔ bie mɔ le abuburavoma, bie mɔ le anyenzinliravolɛma, na eza ɔlɛtu sunsum evinli evinli yeavi bie mɔ nu a. Mɔɔ bɛvale Dwɔn kpuyia ne bɛbizale ye la, ɔbuale bɛ ɔzele kɛ: “Bɛzia bɛhɔ Dwɔn anwo lɔ na bɛhɔha mɔɔ bɛnwu ye bɛ nye zo, ɔ nee mɔɔ bɛde ye ɛke ɛnɛ la bɛhile ye kɛsi mɔɔ anyezinliravolɛma ɛnɛ kola nwu debie la; abuburavoma ɛnɛ kola tia bɛ gyakɛ anu mɔɔ bɛnzi ndɛnye a; ahohobɛvolɛ anwo ɛza bɔkɔɔ; anzodiliravolɛma kola te edwɛkɛ bieko; mɔwuamra ɛzia ɛra ngoane nu bieko na ehyiavolɛma ɛlɛtie Nyamenle Edwɛkpa ne. 23Na bɛha bɛhile ye kɛ, Nyilalɛ ɛha bɛdabɛ mɔɔ bɛlɛ diedi wɔ me nu la.”
24Mɔɔ Dwɔn soavolɛma ne mɔ hɔle la, Gyisɛse hanle Dwɔn anwo edwɛkɛ hilele menli ɛwolaa ne. Ɔbizale bɛ kɛ, “Duzu a bɛhɔle Dwudiya fiemgbole ne azo kɛ bɛkanlea la? Ɛhonle mɔɔ anwoma ɛlɛbɔ ye amaa yeadeda la: anzɛɛ? 25Na duzu ati bɔbɔ a bɛvindele a, kɛ bɛkanlea sonla mɔɔ heda selekye la anzɛɛ? Nea, bɛdabɛ mɔɔ bɛheda selekye la wɔ arelemgbunli aako nu. 26Ɛnee duzu ati bɔbɔ a bɛhɔle a? Kɛ bɛkanlea Awulae Nyamenle kapezonli anzɛɛ? Nɔhalɛ, mese bɛ kɛ, ɔle kpole ɔtɛla kapezonli bɔbɔ. 27Ɔluakɛ Dwɔn a le nrenyia ne mɔɔ bɛha ɔ nwo edwɛkɛ dɛba wɔ Nyamedwɛkɛ Buluku ne anu la ‘Ɛzoavolɛ mɔɔ balumua me nyunlu, na yeabɔ me maleɛ ne anwo nolo, na yeaziezie adenle ne anu yeamaa bɛalie me la.’ 28Wɔ aleɛabo amuala, awie ko biala ɛndɛla Dwɔn kpole. Noko akee wɔ Nyamenle anwuma maanle ne anu sonla ne mɔɔ ye dibilɛ le ekyii kpalɛ la le kpole tɛla ye.”
29Na bɛdabɛ kpokpoti mɔɔ bɛdele kɛ Dwɔn ɛlɛka Nyamenle edwɛkɛ ne, bɔbɔ adwuledievolɛma ne mɔ liele dole nu kɛ Nyamenle edwɛkɛ ne le nɔhalɛ, ɔboalekɛ bɛvale Dwɔn ye ɛzɔnenlɛ deɛ ne a bɛzɔnenle bɛ a. 30Na Falasiima ne mɔ nee kilehilevolɛma mɔɔ kile Mosisi mɛla ne la anlie Nyamenle ngyehyɛlɛ ne ando nu, ɛhye ati bɛamkponle zo bɛammaa Dwɔn anzɔne bɛ.
31Gyisɛse bizale kɛ, “Duzu a menva adwuliso amra mendo nwo a? Yɛɛ duzu bɔbɔ a bɛzɔho ye a? 32Bɛle kɛ ngakula ngyikyi mɔɔ ɛlɛdi nwɔhoa wɔ gua zo, na bɛse bɛ gɔnwo mɔ kɛ, ‘Yɛliele “atɔfolɛ,” na bɛannyia nwolɛ ahomeka; ɔti yɛyɛle “ɛzɛne,” noko akee bɛ rɛle ambɔ.’ 33Kɛmɔ Dwɔn Sɔnevolɛ ne ɛnno nwanye, na mekɛ dɔɔnwo ne ala ɔkye ɛhɔne la ati, bɛse ‘Ɔle abɔnsam!’ 34Na mame Sonla Ra ne noko, meto ɛkponle na meno nza, noko bɛse me kɛ, ‘Mele adidikpokuvolɛ! Eza mele nzanovolɛ! Na me nee ɛtanevolɛma yɛɛ atu a.’ 35Noko akee nrɛlɛbɛvolɛ biala nyɛleɛ a maa bɛkola bɛnwu ye sonla holɛ a.”
Ɛkponledolɛ ngakyile
36Akee Falasiima ne mɔ anu ko zele Gyisɛse kɛ ɔrɛla ye sua nu ɔmaa bɛdo ɛsalɛ, na Gyisɛse noko kponlenle zo. Mɔɔ bɛdɛnlanle aze kɛ bɛdi debie la, 37raalɛ ɛtanevolɛ bie dele kɛ Gyisɛse wɔ ɛkɛ ne, ɔti ɔhɔvale alufuanlɛ toba ko ɔrale. 38Ɔvale ɛzunlɛ ɔhotole ɔ gyakɛ abonyi zo wɔ Gyisɛse anzi, na ɔvale ɔ nye monle ɔloale Gyisɛse agyakɛ babonle ne anwo; ɔvale ɔ ti enrinli ɔkyikyile na ɔtafele ɔ gyakɛ anwo; akee ɔvale alufuanlɛ ne ɔvɔle ɔ gyakɛ ne mɔ anwo.
39Mɔɔ nrenyia Falasiinli ne mɔɔ dole ɛkponle ne maanle Gyisɛse la nwunle ɛhye, na ɔze raalɛ ne subane la, ɔhanle kɛ, “Ɛhye kile kɛ Gyisɛse ɛnle kapezonli, ɔluakɛ saa amgba ala Nana Nyamenle yɛɛ azoanle ye a, anrɛɛ ɔbahola yeanwu raalɛ ɛhye sonla holɛ ko!”
40Gyisɛse buale Falasiinli ne zele ye kɛ, “Saemɔn, melɛ edwɛkɛ bie mefa meado ɛ nyunlu.”
Saemɔn noko yele ɔ nloa kɛ, “Wioo, Kilehilevolɛ duzu edwɛkɛ ɔ? Ka kile me.”
41Akee Gyisɛse bɔle adawu ɛhye kɛ: “Nrenyia bie bɔle menli nwiɔ bosea; ɔmaanle ko menli ɛya nnu kenle ko ahatualɛ ezukoa, na ɔmaanle ko ne noko menli abulanlu kenle ko ahatualɛ ezukoa. 42Na menli nwiɔ ɛhye anu ko bɔbɔ angola andua bosea ne ammaa ye, ɔti ɔvale bɛ mu nwiɔ bɛ nwo ɔhyɛle bɛ! Menli nwiɔ ɛhye boni yɛɛ ɔnea a ɔbanyia nrenyia ne anwo ɛhulolɛ kpole a?”
43Saemɔn buale zele kɛ, “Medie medi kɛ nuhua ne mɔɔ tua ye ezukoa dɔɔnwo ne la ɔ.”
Gyisɛse liele dole nu na ɔzele kɛ, “Mo! Wɔbua boɛ bɔkɔɔ.”
44Akee ɔhakyile ɔ nye wɔ raalɛ ne anwo, na ɔzele Saemɔn kɛ, “Nea! Se wɔnwu raalɛ ɛhye mɔɔ hoto ɛke la! Mɔɔ membale wɔ sua nu la, yeanvale ɛ nwo bɔbɔ kɛ ɛkɛmaa me nzule ɛkɛmaa menwɔnrinzi me gyakɛ anwo munlutu ne; na yemɔ yeva ɔ nye monle yenrinzi me gyakɛ anwo, na eza yeva ɔ ti enrinli yekyikyi. 45Ɛkpole kɛ ɛkɛyɛ ɛhulolɛ nwo nyɛleɛ ne ɛkɛmaa me kɛmɔ amaamuo ne se la, na yemɔ sumunli kɛ membale aako ye anu la, ɔtɛgyakyile me gyakɛ taboa ne anwo ɛvolɛ. 46Wɔmɔ ɛkpole kɛ ɛkɛva ɔlivi nwole ɛkɛkpokpa me ti avinli ɛkɛli me eni, na yemɔ yewola alufuanlɛ yegua me gyakɛ babonle ne mɔ anwo bɔbɔ. 47Ɛhye ati mese wɔ kɛ, bɛva ye ɛtane ɛwolaa ne amuala bɛhyɛ ye, ɔboalekɛ ye ɛhulolɛ ne le kpole kpalɛ; na mɔɔ ye ɛhulolɛ le ekyii la, ye ɛtane ekyii bie ala a bɛfa bɛkyɛ ye a.”
48Na ɔhanle ɔhilele raalɛ ne kɛ, “Bɛva wɔ ɛtane bɛhyɛ wɔ.”
49Akee menli mɔɔ nee ye dede ɛkponle ne anwo la bizebizale bɛ nwo ngoko ngoko kɛ, “Kɛ nrenyia ɛhye bu ɔ nwo ɛ, mɔɔ ɔkola ɔfa menli ɛtane ɔkyɛ bɛ a?”
50Na Gyisɛse zele raalɛ ne kɛ, “Wɔ diedi ɛlie wɔ ngoane; kɔ anzondwolɛ nu.”
ទើបបានជ្រើសរើសហើយ៖
Luku 7: ONEN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblica® Open Nzema Word of Life Gospels and Psalms™
Copyright © 1984 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
