Luku 14
14
1-2Na ɔrale ye kɛ, wɔ Ɛnwomenlelielɛ Kenle ko bie, Gyisɛse hɔle Dwuuma Mɛlalilɛ Eku ne anu mgbanyima ne mɔ ko sua nu hɔkpulale ɔ sa. Na Falasiima ne mɔ ziale mgbumgboonwu kɛ ahɔleɛ la nleanle kɛ saa ɔkɛyɛ nrenyia bie mɔɔ mgbutike ɛpɛ ye la ayile a.
3Gyisɛse zele Falasiima nee mɛla kɛlɛvoma ne mɔ mɔɔ wɔ ɛkɛ ne la kɛ, “Asoo mɛla maa adenle kɛ bɛyɛ ayile wɔ Ɛnwomenlelielɛ Kenle ne, anzɛɛ ɔnle zɔ ɔ?”
4Bɛangola ɛhye anloa ye; ɔti Gyisɛse zɔle nrenyia ne mɔɔ ɛnde kpɔkɛ la asa yɛle ye ayile, na ɔmaanle ɔhɔle.
5Akee ɔdole ɔ nye wɔ bɛ nwo ɛkɛ ne na ɔbizale bɛ kɛ, “Bɛ nuhua ne boni yɛɛ saa ɔ ra nrenyia anzɛɛ ye ayɛmoa tɔ, kuma nu wɔ Ɛnwomenlelielɛ Kenle a ɔnrɛye ye ndɛndɛ zo a?”
6Bɛangola bɛanye ye ɔ nloa.
Mmapele gyinlabelɛ nwo
7Na mɔɔ ɔnwunle kɛ menli mɔɔ rale ɛkponledolɛ ne abo la anu ko biala kpondɛ enililɛ tɛnlabelɛ adɛnla la, ɔbule bɛ ɛrɛlɛ ɔzele bɛ kɛ: 8“Saa bɛfɛlɛ wɔ wɔ atɔfolɛ ɛkponledolɛ bo a, mmapele kɛ ɛkadɛnla ɛleka kpalɛ ne. Ɔboalekɛ, saa gyengyɛne nu bie ala awie mɔɔ tɛla wɔ gyinlabelɛ la ba a, 9mɔɔ liele atɔfolɛ ne la nee ye bara ɛleka mɔɔ ɛde la yearaze wɔ kɛ, ‘Dwazo maa nrenyia ɛhye ɛdɛnla ɛkɛ ne.’ Na saa ɔba ye zɛ noko a, ɛnee akee wɔmɔ ɛhye, mɔɔ nyiane ɛhu wɔ a!
10“Emomu saa bɛfɛlɛ wɔ wɔ atɔfolɛ ɛkponledolɛ bo a, wɔmɔ kɔdɛnla ahanle ɛleka bie koonwu, amaa saa atɔfolɛ menle ne ba a, yeaze wɔ kɛ, ‘Ayi, tɛ wɔ tɛnlabelɛ ɛne! Bɛla nehae!’ Ɛbanwu kɛ ɛnee wɔnyia anyunlunyia totohyia wɔ atɔfolɛ ne abo wɔ menli ne kpokpoti anyunlu. 11Ɔluakɛ awie biala mɔɔ kɛmaa ɔ nwo zo la bɛkɛbɛlɛ ye aze, yɛɛ awie biala noko mɔɔ kɛbɛlɛ ɔ nwo aze la, bɛkɛmaa ye zo.”
12Akee Gyisɛse zele nrenyia ne mɔɔ dole ɛkponle ne la kɛ, “Saa ɛto ɛkponle a; anrɛɛ mmafɛlɛvɛlɛ ɛ gɔnwo mɔ, anzɛɛ ɛ nwo amra, anzɛɛ azukoavolɛ mɔɔ zua wɔ la angomekye! Ɔluakɛ kɛ ɔkɛyɛ biala la bɛbayɛ bie bɛazie ɔ bo zo. 13Emomu, saa ɛto ɛkponle a, anrɛɛ fɛlɛvɛlɛ ehyiavolɛma; abuburavolɛma, ɔ nee anyezinliravolɛma. 14Ɛhye bamaa Nana Nyamenle ayila wɔ kpole. Ɛbanyia nwolɛ ahatualɛ wɔ Ewuledwazolɛ Mekɛ ne anu, ɔluakɛ bɛmɛ bɛnlɛ bie mɔɔ bɛbava bɛadua wɔ kakɛ bɛazie ɔ bo zo a.”
15Nrenyia ko bie mɔɔ ɛnee de Gyisɛse anwo ɛkɛ ne la deanle nu zele kɛ, “Nyilalɛ ɛha sonla ne mɔɔ banyia Nana Nyamenle Belemgbunli maanle ne anu ɛkponledolɛ bo ahɔ la!”
16Gyisɛse bule ɛrɛlɛ ɛhye vale buale ye zele kɛ: “Nrenyia sukoavolɛ bie dole ɛkponle totohyia bie na ɔdole ɛsalɛ ɔvɛlɛle menli dɔɔnwo. 17Mɔɔ bɛwiele aleɛ ne to la, ɔzoanle kɛ bɛhɔvɛlɛvɛlɛ menli mɔɔ ɔdole ɛsalɛ ɔvɛlɛle bɛ la kɛ bɛrɛla. 18Na bɛ muala bɛbɔle adwenle kɛ bɛsɛlɛzɛlɛ adenle. Nuhua ko zele kɛ, ‘Medɔ azɛlɛ, ɔti ɔhyia kɛ menwɔhɔ menwɔnlea. Mebodo wɔ, maa me adenle.’ 19Ko noko zele kɛ, ‘Medɔ nlankɛ nnu, mɔɔ ɔwɔ kɛ mekɔnea bɛ a. Mebodo mɛsɛlɛ wɔ, maa me adenle.’ 20Mɔɔ tɔ zo nsa ne la noko zele kɛ, ‘Melie atɔfolɛ. Zɔhane ati menrɛnyia adenle.’
21“Akɛlɛ ne ziale rahanle ɛhye mɔ amuala hilele ɔ menle ne. Nrenyia ne vale ɛya na ɔzele ye akɛlɛ ne kɛ, ‘Kɔ gua nee awɔndenle ne mɔ azo na fɛlɛ awie biala, abuburavolɛma, anyezinliravolɛma nee ehyiavolɛma kɛ bɛrɛla atɔfolɛ ne abo.’ 22Akɛlɛ ne buale zele kɛ, ‘Yɛmenle, meyɛ mɔɔ ɛhanle la mewie, noko akee ɛleka tɛbɔ ɛkɛ!’
23“Ɔ menle ne zele ye kɛ, ‘Mede, tɛla ɛweɛne, na kɔvɛlɛ awie biala mɔɔ ɛkɛnwu ye la kɛ ɔrɛla atɔfolɛ ne abo, amaa me aako ne ayi. 24Akee mese bɛ kɛ, menli mɔɔ menlumuale menvɛlɛle bɛ na bɛamba la nuhua kokye bɔbɔ ɛnrɛzɔ me aleɛ ne bie ɛnrɛnlea ɛlɛ.’ ”
25Menli dɔɔnwo ne ala dule wii doale ye. Na ɔdole ɔ nye ɔ nzi na ɔzele bɛ kɛ, 26“Awie biala mɔɔ kpondɛ kɛ ɔyɛ me ɛdoavolɛ la, ɔwɔ kɛ ɔkulo me ɔtɛla ɔ ze, ɔ nli, ɔ ye, ɔ mra, yɛɛ ɔ mediema, bɔbɔ ɔfa ɔdaye mumua ne ye ngoane ɔto aze, anrɛɛ yemɔ ɔnrɛhola ɔnrɛyɛ me ɛdoavolɛ. 27Yɛɛ mɔɔ anva ye meanubaka ne ando ɔ kɔme zo anli me nzi la, ɔdaye noko ɔnrɛhola ɔnrɛyɛ me ɛdoavolɛ.
28“Ɛhye ati dumua yɛ wɔ adwenle ngyehyɛleɛ kpalɛ kolaa na wɔabɔ ɔ bo. Ɔluakɛ awie biala ɛnle ɛkɛ ne mɔɔ ɔkazi sua a ɔnlumua ɔnsese nwolɛ kakɛ ne ɔnnea kɛ saa ɔlɛ nwolɛ ezukoa a. 29Yemɔ anrɛɛ ɔkawula bolɛ aze yeawie la, ɛnee yepɛ ɛhwɛ. Na ɔba ye zɛ noko a, ɛzelekɛ ala a bɛbazele ye a!
30“Bɛbazi ye amgbu bɛaze kɛ, ‘Bɛnnea asomasi. Ɔdaye sua ko mɔɔ ɔse ɔsi la, yemɔ a ɛkpo ɛhɛlɛ mɔɔ ɛha ndile ne anu lɔ la!’
31“Anzɛɛ belemgbunli ne boni yɛɛ kɛha ɛlalɛ kɛ ɔkɔ konle, na ɔnrɛlumua ɔ nee ye mgbanyima ɛnrɛhɔ agyinla ɛnrɛnwu ye kɛ saa ye azogya apenle bulu ne kɛhola apenle abulanwiɔ ne mɔɔ ɛlɛba ɔ nwo zo la a?
32“Saa ɔnea na ɔnrɛyɛ boɛ a, mɔɔ ɔyɛ la a le kɛ, ɔsoa menli ɔmaa bɛkɔyia ɛlɔne ne adenle nu, na bɛ nee bɛ siezie bɛ avinli bɛmaa anzondwolɛ ba.
33“Zɔhane ala noko yɛɛ awie biala mɔɔ amkpo ye agyapadeɛ nee ewiade fɛlɛkolilɛ la ɛnrɛhola ɛnrɛyɛ me ɛdoavolɛ a!
34“Ngyenle le kpalɛ; na saa ye menlemenle ne fi nu a, ɛnee duzu nvasoɛ bieko a wɔ zo a? 35Ngyenle mɔɔ nuhua fɛlɛko ne kɛdu la, ɛnee yeyɛ mgbane bɔkɔɔ, nwolɛ ɛnlɛ nvasoɛ biala bieko, ɛvuandinle ala a ɔwɔ kɛ bɛfuandi bɛgua ye lɔ a. Ɛhye ati mɔɔ lɛ ɛnzolɛ la ɛdie.”
ទើបបានជ្រើសរើសហើយ៖
Luku 14: ONEN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblica® Open Nzema Word of Life Gospels and Psalms™
Copyright © 1984 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
