Luku 10
10
Gyisɛse ɛzoa ye boavolɛma
1Awulae akee yele ɛdoavolɛma abulasuu na ɔzoanle bɛ nwiɔ, nwiɔ wɔ azua ngyikyi nee mgbole mɔɔ yehyehyɛ kɛ ɔbahɔ zolɛ la azo.
2Akee Awulae zele bɛ kɛ: “Bɛzɛlɛ Awulae mɔɔ ye aleɛbulɛ mekɛ ne ɛdwu la kɛ aleɛ ne mɔɔ ɛra ɛya ne anu la zonle, na ɛkpavoma ne mɔ anzo. 3Bɛhɔ kɛkala, na emomu bɛhakye kɛ melɛsoa bɛ kɛ mboane wɔ mbɛdi avinli. 4Bɛmmafa ezukoa biala anzɛɛ koduku, anzɛɛ bɛ gyakɛ mgbɔlaboa mgbane bɔbɔ. Eza bɛmmabiza awie biala ahye wɔ adenle nu.
5“Aako biala mɔɔ bɛkɛwolo nuhua la, bɛze kɛ, ‘Anzondwolɛ ɛha aako ɛhye anu amra.’ 6Saa aako ne fɛta anzondwolɛ ne a, anzondwolɛ ne baha ɛkɛ ne; na saa ɔnfɛta ɛdeɛ a, yemɔ ɔbazia ɔ nzi yeara bɛ ɛkɛ ne bieko.
7“Saa bɛkɔ namule ko azo a, bɛmmafi aako ko anu bɛkɔ bieko anu, na emomu bɛdɛnla ɛleka ko, bɛli na eza bɛnlo debie biala mɔɔ bɛkɛva bɛkɛmaa bɛ la, na bɛmmabiza nwolɛ edwɛkɛ biala. Eza noko boɛ biala mɔɔ awie biala kɛyɛ bɛ la bɛmmakpokpo bɛ ti, ɔluakɛ awie biala didi ye gyima nwo.
8-9“Saa bɛkɔ sua bie azo na ɛkɛ ne amra die bɛ to nu a, bɛli mɛla ɛhye mɔ azo; (1) Aleɛ biala mɔɔ bɛkɛva bɛkɛmaa bɛ la bɛli. (2) Bɛyɛ wuliravolɛma ayile; na wɔ mekɛ ko ne ala anu mɔɔ bɛyɛ ayile la bɛha ye kɛ, ‘Nana Nyamenle Anwuma belemgbunli maanle ne ɛbikye wɔ.’
10“Na emomu sua biala mɔɔ bɛkɛhɔ zo na bɛanlie bɛ bɛando nu la, bɛhɔ ye awɔndenle ne mɔ azo na bɛha ye kɛ, 11‘Bɔbɔ bɛ sua ye azo munlutu ne mɔɔ ɛha yɛ gyakɛ anwo la, yɛkpokpo yɛgua bɛ ti zo. Bɛhakye kɛ Nana Nyamenle Anwuma belemgbunli maanle ne ɛbikye!’ 12Sodɔm sua ne mɔɔ azo menli ɛnee le atisesebɛvoma bɔbɔ la ɛnrɛnwu amaneɛ kɛ sua ɛhye la wɔ Ndɛnebualɛ Kenle ne. 13Munzule kpole ɛha Koleezen! Munzule kpole ɛha Bɛteseeyeda! Ɔluakɛ saa menyɛle nwanwanendeɛ ne mɔ mɔɔ menyɛle memaanle bɛ la wɔ azua Taya nee Saedɛn azo a, anrɛɛ zolɛ ezuavolɛ hedale ɛrele, na bɛvuandinle nzonle bɛguale bɛ ti zo bɛdɛnlanle aze koonwu bɛlile nyane bɛvale bɛhilele bɛ anlubɛnwo mɔɔ bɛnyia ye la. 14Nɔhalɛ nu, ɔbavuanyi Taya nee Saedɛn ɛtane ahatualɛ nwo ndeanlɛ ne yeadɛla bɛ deɛ ne wɔ Ndɛnebualɛ Kenle ne. 15Na bɛmɛ Kapɛnayɛm amra, bɛdwenle kɛ bɛbanyia gyinlabelɛ kpole ɔ? Kyɛkyɛ, bɛ nee bɛ bahɔ abɔnsam senle nu.”
16Akee ɔhanle ɔhilele ye ɛdoavolɛma ne mɔ kɛ, “Menli mɔɔ kɛlie bɛ kɛdo nu la ɛnee bɛlie medame noko bɛdo nu. Menli mɔɔ kɛkpo bɛ la ɛnee bɛkpo me. Menli mɔɔ kɛkpo me la ɛnee bɛkpo Nana Nyamenle mɔɔ zoanle me la.”
17Mɔɔ ɛdoavolɛma abulasuu ne ziale rale la, bɛrabɔle ye amaneɛ ahomeka nu ala kɛ, “Awulae, saa yɛbɔ wɔ duma na mbɔnsam bɔbɔ te a bɛngola ɛhwee yɛ.”
18Ɔzele bɛ kɛ, “Ɛhɛe, menwunle kɛ Abɔnsam vi anwuma ɛlɛba aradɔ aze kɛ ɛsɛlɛmanye! 19Eza noko memaa bɛ tumi wɔ kpɔvolɛma anwo zo, amaa bɛahola bɛatietia nwɔlɛ nee nyamenleakɛlɛ nwo zo bɛabɛtɛbɛtɛ bɛ, mɔɔ ɛhwee ɛnrɛyɛ bɛ a! 20Bɛmmadi fɛlɛko kɛ bɛlɛ tumi wɔ mbɔnsam nwo zo. Emomu bɛli fɛlɛko kɛ bɛhɛlɛ bɛ anluma kɛ bɛle anwuma maanle ne anu amra.”
21Ɛkɛ ne ala ɔlile fɛlɛko wɔ Sunsum Nwuanzanwuanza ne nu, na ɔzele kɛ, “Meyɛ wɔ mo, O Egya, Awulae mɔɔ bɔle anwuma nee aze, kɛ wɔye ninyɛne ɛhye mɔ wɔvea menli mɔɔ ze nwoma nee ewiade ye anu nrɛlɛbɛ kpole kpokpoti, na wɔye bɛ wɔhile menli mɔɔ ɛdie bɛ ɛdi kɛ ngakula ngyikyi ɛhye mɔ la a. Nɔhalɛ, Egya, yɛyɛ wɔ mo, ɔluakɛ kɛ ɛkulo ye la ɛne. 22Mame a megyi Egya agyakɛ anu wɔ debie biala anu a; na awie biala ɛnze Sonla Ra ne, kyesɛ Selɛ ne angomekye, yɛɛ awie biala noko ɛnze Selɛ ne kyesɛ Sonla Ra ne angomekye ala, ɔ nee bɛdabɛ mɔɔ Sonla Ra ne kulo kɛ bɛte ɔ nwo edwɛkɛ la.”
23Akee ɔguale ɔ nye aze bɛtɛɛ na ɔzele ye ɛdoavolɛma ne mɔ kɛ, “Bɛ ti ɛyɛ boɛ kpole kɛ bɛnwu mɔɔ bɛnwu ye la. 24Ngapezoma nee arelemgbunli dɛba dɔɔnwo ne ala hulole kɛ anrɛɛ bɛkɛnwu ye, na eza bɛkɛde mɔɔ bɛmɛ bɛnwu ye ɔ nee mɔɔ bɛde la!”
Samɛleanli atiakunlukɛnlɛma ne
25Na ɔrale kɛ, kenle ko bie Mosisi mɛla kɛlɛhɛlɛvolɛ benlera ko bie rale razɔle Gyisɛse ye nrɛlɛbɛ kpole ne nleanle, na ɔbizale ye kɛ, “Kilehilevolɛ, duzu a ɔhyia kɛ sonla yɛ amaa ɔlua zo yeanyia damɛnlangoate ngoane wɔ Anwuma belemgbunli maanle ne anu a?”
26Gyisɛse buale ye zele kɛ, “Duzu a Mosisi mɛla ne ka mɔɔ fale ɛhye anwo a?”
27Ɔbuale ɔzele Gyisɛse kɛ “Mɛla ne ka ye kɛ, Fa wɔ ahonle muala, ɔ nee wɔ ɛkɛla muala, ɔ nee wɔ anwosesebɛ muala, ɔ nee wɔ adwenle kɔsɔɔti kulo wɔ Awulae Nyamenle ne. Eza kulo ɛ gɔnwo kɛ ɛdawɔ ɛ nwo ala la pɛ.”
28Gyisɛse zele ye kɛ, “Wɔbua boɛ! Yɛ ɛhye na ɛbanyia ngoane mɔɔ ɔnlɛ awieleɛ!”
29Nrenyia ne, yemɔ ɔhulole kɛ ɔkɛbu ɔ nwo benle, ɔti ɔbizale Gyisɛse kɛ, “Na me gɔnwo mɔ a le nwane?”
30Gyisɛse bule ɛrɛlɛ vale yele ɛhye anloa ɔzele kɛ: “Kenle ko bie ɛnee Dwuunli bie ɛlɛtu adenle vi Gyɛlusalɛm yeahɔ Gyɛleko. Na ahodiawu bie tetale ye wɔ adevinli ne. Bɛkpolole ɔ nwo adɛladeɛ kosooti, bɛzale ye bɛliele ye ezukoa mɔɔ wɔ ɔ nwo la amuala, na bɛbole ye bɛbodɛbodale ye sesakaa ne ala, na akee bɛgyakyile ye wɔ ewule nee ngoane avinli wɔ adehanle ne.
31“Yeangyɛ biala, Dwuunli sɛlɛvolɛ bie ravale zɔhane adenle ne azo; na mɔɔ ɔnwunle nrenyia ne kɛ ɔla ye kagyaa la, ɔpɛle ɔlile adenle ne foa ko nehane na ɔzeanle ɔ nwo ɔhɔle ye ɛleka bie. 32Livaenli bie noko radwule ɛkɛ la, ɔdaye ɔnwunle ye; ɔbikyele nrenyia ne, na ɔnleanle ye koonwu na akee ɔbule adenle ne foa ko ɔhɔle.
33“Akee Samɛleanli bie mɔɔ ɔdaye ɔlua ye adenle la radwule ɛleka mɔɔ nrenyia ne la la; na mɔɔ ɔ nye bɔle ɔ nwo zo ala la, ɔ kunlu yelɛyelale ye somaa ne ala. 34Samɛleanli ne hotole ɔ nwo ɛkɛ, ɔmiemianle ɔ nwo nganle ne mɔ, na ɔvale ayile ɔguguale nu na ɔkyekyele ye gyɛlɛɛnye. Ɔvale ye ɔdɛnlanle ɔdaye ye afunlumu mɔɔ ɛnee ɔde zo la azo bɛdiale bɛtɛbɛtɛ kɔkpula kɛ bɛradwule sua mɔɔ nyɛvosua wɔ ɛkɛ ne a, na ɔnleanle ye. 35Aleɛ hyenle la, ɔyele menli nwiɔ kenle ko ahatualɛ ezukoa ɔmaanle nyɛvosua menle ne na ɔzele ye kɛ, ‘Nea nrenyia ye boɛ maa me. Saa ɔ nwo kakɛ bo mɔɔ meva megyakyi wɔ la azo a, kenle biala mɔɔ menwɔzia menwɔra la mebadua meamaa wɔ.’
36“Menli nsa ɛhye mɔ nuhua boni agɔnwo a le nrenyia ne mɔɔ dɔle ahodiawu sa nu la?”
37Nrenyia ne zele kɛ, “Nuhua ko ne mɔɔ zele nrenyia ne anwunvɔne la ɔ.”
Akee Gyisɛse zele ye kɛ, “Wioo, kɔ na ɛdawɔ noko kɔyɛ zɔhane ala.”
38Na ɔrale kɛ, mɔɔ Gyisɛse nee ye ɛdoavolɛma ne mɔ ɛlɛtu adenle ahɔ Gyɛlusalɛm la, bɛhɔdwule namule bie azo, na bɛlɛra bie mɔɔ bɛfɛlɛ ye Maata la liele bɛ na ɔ nee bɛ hɔle sua nu. 39Ɔ diema raalɛ, Male, dɛnlanle aze wɔ Gyisɛse agyakɛ anwo na ɔdiele ye ngilehile ne.
40Maata yelele ɔ nwo ɔzonlenle somaa ne ala, na eza ɔfonlanle ɔ nwo noko wɔ aleɛdonlɛ nu.
Akee ɔrale Gyisɛse ɛkɛ ɔrazele ye kɛ, “Yɛmenle, asoo ɛnea a ɔle kpalɛ kɛ me diema raalɛ ne kɛdɛnla ɛleka ko kɛnlea me ɔkɛmaa me ngome menwɔzonle ɔ? Se ye kɛ ɔrɛla ɔrazɔ me nu.”
41Awulae buale ye zele kɛ, “Maata, Maata, ɛdwenle na ɛfonla ɛ nwo wɔ debie ɛyɛlɛ nwo somaa! 42Debie titili kokye ala a hyia mɔɔ ɔwɔ kɛ ɛdwenle nwolɛ a, na Male, yemɔ yenwu deɛ holɛ ko ne, na menrɛlie menrɛvi ɔ sa nu ɛlɛ!”
ទើបបានជ្រើសរើសហើយ៖
Luku 10: ONEN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblica® Open Nzema Word of Life Gospels and Psalms™
Copyright © 1984 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
