Dwɔn 7
7
Gyisɛse anwo kpolerazulɛ ɛdwu ye kpɔmgbɔse
1Ɛhye anzi, Gyisɛse hɔle Galeli namunamu ne mɔ azo; na ɔlua kɛ ɛnee Dwuuma mgbanyima ne mɔ ɛlɛfa ɔ nwo akpame kɛ ɔkɛyɛ na bɛ sa aha ye bɛahu ye la ati, yeangulo kɛ ɔkɛdɛnla Dwudiya ɛkɛ. 2Yeangyɛ biala yɛɛ Dwuuma ɛvoyia mgbole ne mɔ ko mɔɔ bɛdi ye wɔ Ebuo bo la dwule zo a; 3ɛhye ati Gyisɛse amediema ne mɔ zele ye kɛ ɔhɔ ɛvoyialilɛ ne abo bie wɔ Dwudiya.
Bɛzuzule bɛhilele ye bɛzele kɛ, “Ɛvi ɛke kɔ Dwudiya, amaa wɔ ɛdoavolɛma ne mɔ anwu wɔ nwanwane gyima ne mɔ mɔɔ ɛlɛdi la. 4Ɔluakɛ awie ko biala ɛnyɛ nwanwanedeɛ wɔ fealera nu wɔ mekɛ mɔɔ ɔkpondɛ kɛ ɔdie duma la. Saa amgba noko ɛle sonlakpole a ɛnee ye ɛ nwo kile ewiade amra!” 5Ɔluakɛ ɛnee ɔ mediema ne mɔ bɔbɔ ɛnlie ye ɛnli.
6Gyisɛse buale kɛ, “Bɛmɛ bɛ mekɛ ne wɔ ɛkɛ ne maa bɛ dahuu biala, na mame, me mekɛ ɛdeɛ ne ɛtɛdwule mɔɔ mefa mekɔ a, 7ɔluakɛ ewiade amra ɛmkpɔ bɛ; emomu mame a bɛkpɔ me a, ɔboalekɛ metendɛ metia bɛ ninyɛndane ne mɔ. 8Bɛmɛ bɛlumua wɔ ɛvoyia ne abo, na mame menrɛhɔ ɛkɛ ne kɛkala ɔluakɛ me mekɛ mɔɔ mefa mekɔ la ɛtɛdwule.” 9Ɔti ɔhale Galeli.
10Na mɔɔ ɔ mediema ne mɔ hɔle ɛvoyia ne abo la, akee ɔdaye ɔveale ɔ nwo ɔhɔle ɛkɛ ne bie. 11Ɛnee Dwuuma mgbanyima ne mɔ ɛlɛkpondɛ ye, ɔti ɛnee bɛlɛbizebiza wɔ ɛvoyia ne abo kɛ saa ngyengyenenu biala awie ɛnwu ye a. Bɛbizale kɛ, “Ɔwɔ nienwu?” 12Ɛnee menli ekpunli ekpunli dɔɔnwo ne ɛlɛsu ɔ nwo kpolera kpalɛ. Bie mɔ zele kɛ, “Ɔ nwo yɛ ɛzulolɛ kpalɛ,” yɛɛ bie mɔ noko zele kɛ, “Kyɛkyɛ, koasea a ɔlɛyɛ menli a.” 13Awie biala angola ɔ nwo daselɛ di wɔ bagua nu, ɔluakɛ ɛnee bɛsulo Dwuuma mgbanyima ne mɔ.
14Mekɛ mɔɔ ɛvoyia ne gyinlanle nu kpole kpalɛ la, akee Gyisɛse hɔle Asɔne Sua Kpole ne anu na ɔhanle edwɛkpa ne wɔ bagua nu. 15Ɛhye zinle Dwuuma mgbanyima ne mɔ anwo, ɔti bɛzele kɛ, “Kɛ ɔsi mɔɔ ɔze nwoma totohyia zɛhae wɔ mekɛ mɔɔ ɔtɛkɔle sukulu ɛlɛ la ɛ?”
16Gyisɛse zele bɛ kɛ, “Tɛ medame me adwenle a melɛfa meahilehile bɛ a, na emomu mɔɔ Egya vale zoanle me la ɔ. 17Awie biala mɔɔ nɔhalɛ nu ɔlɛyɛ Nyamenle ɛhulolɛdeɛ la banwu ye wienyi kɛ saa mɔɔ mekilehile la vi Nana Nyamenle ɛkɛ, anzɛɛ medame me tumi a melɛfa meahilehile bɛ a. 18Awie biala mɔɔ kpondɛ ɔdaye ye anyunlunyia la fa ye tumi a tendɛ a, na awie biala mɔɔ kpondɛ ahenle mɔɔ zoanle me la anyunlunyia la le nɔhalɛdivo, ɔmbɔ adalɛ. 19Tɛ bɛmɛ a Mosisi vale mɛla ne maanle bɛ la ɔ? Noko akee bɛ nuhua biala ɛnli mɛla ne azo. Duzu ati a akee bɛkpondɛ kɛ bɛku mame wɔ ɛhye ati ɛ?” 20Menli dɔɔnwo ne buale ye kɛ, “Ɛdawɔ mumua ne ɛlɛ sunsum ɛtane wɔ wɔ nu! Nwane a kpondɛ kɛ ɔku wɔ a?”
21-23Gyisɛse buale bɛ kɛ, “Menyɛle gyima wɔ Ɛnwomenlelielɛ Kenle ne, wɔ nrenyia wuliravolɛ bie mɔɔ menyɛle ye ayile la ati, na ɛhye yɛle bɛ nwanwane. Na bɛdabɛ noko, bɛyɛ gyima wɔ Ɛnwomenlelielɛ Kenle ne, wɔ mekɛ biala mɔɔ bɛkɛli Mosisi ye mrenyiazopɛlɛ mɛla ne, mɔɔ le tete amaamuo kpanyinli ɔtɛla ɔdaye mumua ne la azo la; ɔluakɛ saa mekɛ kpalɛ ne mɔɔ bɛfa bɛpɛ bɛ mra mrenyia zo la dwu, na ɔle Ɛnwomenlelielɛ Kenle a, bɛkɔ zo bɛyɛ kɛmɔ ɔse la. Saa ye zɔhane a, ɛnee akee kɛmɔti a saa mame medie awie ngoane wɔ Ɛnwomenlelielɛ Kenle ne a, ɛnee bɛse me kɛ mebɔ munzule ɛ? 24Bɛmmanea sonla nyunlu bɛbua ndɛne, na emomu bɛva nɔhalɛ fɔɔnwo adenle ne azo bɛbua.”
25Gyɛlusalɛm ezuavolɛ ne bie mɔ zele kɛ, “Tɛ nrenyia ɛhye a bɛkpondɛ ye bɛahu ye la ɔ? 26Noko akee ɔgyi bagua nu ɔlɛkilehile mɔɔ bɛnyɛ ye ɛhwee a. Anzɛɛ akee mgbanyima ne ɛlie ɛdo nu kɛ yemɔ a le Sonla Ra ne ɔ? 27Asoo ɛhye kola yɛ zɔ ɔ? Ɔluakɛ yɛze ɔ bo; na saa Kelaese ne yemɔ ɔba a, ɔbavinde arɛlevilɛ nu wɔ melɛ mɔɔ awie biala ɛnrɛnwu ɛleka bɔbɔ mɔɔ ɔbavi yeara la.”
28Ɔti Gyisɛse hanle edwɛkpa ne wɔ Asɔne Sua Kpole ne anu ɔzele bɛ kɛ, “Ɛhɛe! Ɔle zɔ kɛ bɛze me bo, na asoo bɛze ɛleka holɛ ko mɔɔ mevi a? Tɛ medame me tumi a menvale membale a. Awie a zoanle me a, na mɔɔ zoanle me noko la a le Nɔhalɛ. 29Mame meze ye, ɔluakɛ me nee ye a wɔ ɛkɛ a, yɛɛ yemɔ noko a zoanle me wɔ bɛ nwo a.”
30Ɔ nloa dɔle la Dwuuma mgbanyima ne mɔ hulole kɛ bɛkɛhye ye; noko awie biala angola anva ɔ sa anga ye, ɔluakɛ ɛnee Awulae mekɛ ne ɛtɛdwule.
31Menli ekpunli ne mɔɔ wɔ Asɔne Sua Kpole ne anu la dɔɔnwo liele ye lile, na bɛzele kɛ, “Duzu nwanwanendeɛ bɔbɔ a saa Sonla Ra ne ba a ɔkɛyɛ mɔɔ nrenyia ɛhye ɛtɛyɛle a?”
32Mɔɔ Falasiima ne mɔ dele ɛhye la, bɛmɛ nee azɛlɛvolɛ mgbanyima ne mɔ zoanle menli kɛ bɛhɔ bɛhɔhye Gyisɛse.
33Na Gyisɛse noko zele bɛ kɛ “Ɔnrɛhyɛ biala mebazia meahɔ mɔɔ zoanle me la ɛkɛ. 34Bɛbakpondɛ me, noko akee bɛnrɛnwu me, ɔboalekɛ ɛleka mɔɔ mebahɔ la bɛnrɛhola ɛkɛ ne ba!”
35Edwɛkɛ ɛhye zinle Dwuuma mgbanyima ne mɔ anwo totohyia, na bɛbizebizale bɛ nwo kɛ, “Ɛnee nienwu bɔbɔ a ɔbahɔ mɔɔ yɛnrɛnwu ye a? Ɛnee ɔkpondɛ yeadoa Dwuuma mɔɔ wɔ ngameɛ ngameɛ la yeahɔha Nyamedwɛkɛ ne yeahile ewiade amra mɔɔ ɛnle Dwuuma fee la ɔ? 36Saa ɔka kɛ ‘Bɛnrɛhola ɛleka mɔɔ mewɔ la ba’ yɛɛ ‘Bɛbakpondɛ me na bɛnrɛnwu me’ a, ɛnee duzu a ɔkpondɛ yeahile a?”
37Kenle ne mɔɔ li awieleɛ wɔ ɛvoyia ne anu, wɔ mekɛ mɔɔ ɛnee ɛvoyia ne ɛlo kɛ foanlɛ la, Gyisɛse vale ɛnelɛ kpole bie deanle nu zele menli dɔɔnwo ne kɛ, “Awie biala mɔɔ nzuhɔne ku ye la ɔrɛla me nwo. 38Ɔluakɛ Ngɛlɛlera ne se kɛ awie biala mɔɔ die me di la ngoane nzule bavi ye nu adenrɛ kɛ azudenle la.”
39Ɛhye mɔɔ ɔhanle la fale Sunsum Nwuanzanwuanza ne mɔɔ menli mɔɔ die ye di la banyia ye na ɔtɛbale awie biala anwo zo la anwo; ɔluakɛ ɛnee bɛtɛwulale Gyisɛse anyunlunyia wɔ Anwuma belemgbunli maanle ne anu.
40Mɔɔ menli ɛwolaa ne dele kɛ ɔlɛka ɛhye la, bɛ nuhua bie mɔ deanle nu zele kɛ, “Nɔhalɛ nu, nrenyia ɛhye a le kapezonli ne mɔɔ lumua Ngoanedievolɛ ne anyunlu la.” 41-42Bie mɔ noko zele kɛ, “Ɔdaye mumua ne a ɔle Ngoanedievolɛ ne a.” Eza bie mɔ noko hɔle zo zele kɛ, “Tɛ ye ɔ! Kɛ ɔsi mɔɔ Ngoanedievolɛ ne kola fi Galeli ɛ? Bɛnze kɛ Ngɛlɛlera mumua ne ka ye wienyi kɛ bɛbawo Ngoanedievolɛ ne wɔ Devidi abusua nu wɔ Bɛtelɛhɛm, ɛleka mɔɔ bɛwole belemgbunli Devidi mumua ne la ɔ?” 43Ɔti menli ɛwolaa ne anloa anzɛ wɔ ɔ nwo. 44Bɛ nuhua bie mɔ hulole kɛ bɛkɛhye ye, noko awie biala anva ɔ sa anga ye.
45Mɔɔ menli mɔɔ rale ye ɛhyelɛ la ziale hɔle azɛlɛvolɛ mgbanyinli ne nee Falasiima ne mɔ anwo lɔ la, bɛbizale bɛ kɛ, “Duzu ati a bɛ nee ye amba a?”
46Bɛbuale bɛ kɛ, “Awie biala ɛnle ɛkɛ ne mɔɔ ɔtendɛ ɔkile ye a ye adwenle ɛnrɛla fɔɔnwo a!”
47Falasiima ne mɔ noko zile ɛzoavolɛma ne amgbu zele kɛ, “Ɔti bɛmaa yebɛlɛbɛla bɛdabɛ noko ɔ? 48Ɔti yɛ eku ye anu bie mɔ noko ɛlie ye ɛli kɛ yemɔ a le Ngoanedievolɛ ne ɔ? 49Saa menli ekpunli ekpunli ahoasea ɛhye mɔ ala na alie ye ali; na duzu bɔbɔ a bɛze ye wɔ nwolɛ a? Abule kpalɛ a ɛbu bɛ a!”
50Akee Nekɔdimɛse, Falasiima ne mɔ anu ko, mɔɔ mekɛ bie ɔhɔle Gyisɛse anwo nɔɔzo la dwazole dendɛle. 51Ɔbizale bɛ kɛ, “Asoo ɔfa mɛla nu kɛ bɛkɛbua awie ndɛne wɔ mekɛ mɔɔ bɛtɛdile ye edwɛkɛ la ɔ?”
52Bɛbuale ye kɛ, “Ɛdawɔ noko ɛle Galelinli ɔ? Ɛdawɔ kpondɛ ye wɔ Ngɛlɛlera ne anu na ɛbanwu kɛ kapezoma biala ɛnrɛvi Galeli ɛnrɛvinde ɛlɛ!” 53Akee ayiama ne bɔle asande na awie biala hɔle ye sua nu.
ទើបបានជ្រើសរើសហើយ៖
Dwɔn 7: ONEN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblica® Open Nzema Word of Life Gospels and Psalms™
Copyright © 1984 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
