Dwɔn 16
16
Nyane nee fɛlɛko tɛbɔ amozi
1“Meha ɛhye mɔ amuala mehile bɛ, amaa bɛ diedi ne agyinla kpundii. 2Ɔluakɛ bɛbaye bɛ bɛavi ayialeka ne mɔ; na nɔhalɛ nu, melɛ bie bara mɔɔ bɛdabɛ mɔɔ bɛbahye bɛ bɛahu bɛ la badwenle kɛ bɛlɛyɛ gyima kpalɛ bɛamaa Nana Nyamenle a. 3Bɛbayɛ ɛhye, ɔboalekɛ, bɛnze Egya ne, yɛɛ bɛnze medame noko. 4Bɛnlea, melɛka ɛhye mɔ meahile bɛ kɛkala, amaa saa mekɛ ne dwu zo a, bɛahakye kɛ mebɔ bɛ kɔkɔ dɛba. Deɛmɔti meanga ye alumua ne meangile bɛ la a le kɛ, ɛnee me nee bɛ de.
5“Kɛkala yemɔ melɛkɔ mɔɔ zoanle me la anwo lɔ; noko akee bɛ nuhua ko biala ɛtɛkolale ɛtɛbizale me ɛleka mɔɔ mebahɔ a. 6Emomu ɛhye mɔɔ meha mehile bɛ la ɛmaa bɛlɛdi nyane wɔ bɛ ahonle nu. 7Nɔhalɛ ne a le kɛ, ɔlua bɛ boɛyɛlɛ ti a melɛkɔ a, ɔluakɛ saa meangɔ a, Arɛlekyekyevolɛ ne ɛnrɛra. Kyesɛ mekɔ na meazoa ye wɔ bɛ nwo.
8“Na saa ɔba a, ɔbamaa ewiade amra anwu ngakyile mɔɔ wɔ ɛtaneyɛlɛ, tenleneyɛlɛ, ɔ nee ndɛnebualɛ avinli a. 9Ewiade ɛtane ne a le kɛ yeanlie me yeanli; 10mɔɔ fale tenleneyɛlɛ nwo la, ɔluakɛ melɛkɔ Egya ne anwo lɔ, na bɛnrɛnwu me bieko; 11mɔɔ fale ndɛnebualɛ nwo noko la a le kɛ, bɛbua Sonla Ra ne ndɛne dɛbadɛba.
12“Melɛ edwɛkɛ dɔɔnwo meka mekile bɛ, noko akee saa meka mekile bɛ kɛkala a, ɔbayɛ adesoa kpole yeamaa bɛ. 13Saa nɔhalɛ Sunsum ne ba a ɔbahilehile bɛ nɔhalɛ ne; ɔluakɛ ɔnrɛva ɔdaye ɔ ti anwo tumi ɔnrɛdendɛ, na emomu mɔɔ ɔbade la yɛɛ ɔbaha a; na eza noko yeaha mɔɔ bazi la amuala yeahile bɛ. 14Ɔbawula me anyunlunyia, ɔluakɛ ɔnrɛhoati edwɛkɛ ne mɔɔ meha mehile bɛ dɛbadɛba la ɔnrɛha fofolɛ. 15Egya agyapadeɛ biala le me deɛ, zɔhane ati a ɔnrɛhoati edwɛkɛ ne mɔɔ meha mehile bɛ dɛba la na ɔnrɛha fofolɛ a. 16Ɔnrɛhyɛ biala bɛnrɛnwu me; eza ɔnrɛhyɛ biala, bɛbanwu me bieko!”
17-18Ye ɛdoavolɛma ne bie mɔ bizebizale bɛ nwo ngoko ngoko kɛ, “Duzu edwɛkɛ a ɔkpondɛ yeaha a, ‘Ɔnrɛhyɛ biala bɛnrɛnwu me, eza ɔnrɛhyɛ biala bɛbanwu me, ɔluakɛ mebahɔ Egya anwo lɔ? Ɔnrɛhyɛ biala ne abo a le duzu? Yɛnde mɔɔ ɔka la abo.’”
19Gyisɛse nwunle kɛ bɛkpondɛ kɛ bɛbiza ye ɛhye anwo edwɛkɛ la ati, ɔzele bɛ kɛ, “Ɛnee mɔɔ menganle kɛ, Ɔnrɛhyɛ biala bɛnrɛnwu me; eza ɔnrɛhyɛ biala bɛbanwu me bieko la ati a bɛlɛbizebiza bɛ nwo edwɛkɛ ɛhye anzɛɛ? 20Nɔhalɛ nu meka meahile bɛ kɛ, bɛmɛ bɛbazu, na eza bɛaye awolɛ, na ewiade amra anye balie; bɛmɛ mɔ bɛbali nyane, na bɛ nyanelilɛ ne bahakyi fɛlɛkolilɛ. 21Saa raalɛ fo awolɛ zo a, ɔnwu nyane, ɔluakɛ ye awolɛ mekɛ ɛdwu; na saa ɔwo ɔwie a, ɔ rɛle fi ye nyanelilɛ ne, na ɔdi fɛlɛko kɛ yewo sonla yedo ewiade anu. 22Zɔhane ala yɛɛ kɛkala bɛlɛdi nyane a, noko mebanwu bɛ bieko na akee bɛ nye alie, yɛɛ awie biala noko ɛnrɛhola zɛhae fɛlɛkolilɛ ne die fi bɛ sa nu ɛlɛ. 23Zɔhane mekɛ ne anu, bɛnrɛbiza me debie biala. Nɔhalɛ nu meka meahile bɛ kɛ, debie biala mɔɔ bɛkɛbiza bɛkɛvi Egya ne lɔ wɔ me duma nu la, ɔbava yeamaa bɛ. 24Sumunli kɛ de la, bɛtɛbizale debie biala wɔ me duma nu; bɛbiza na bɛ sa kɛha ye, amaa bɛ fɛlɛkolilɛ ne ali munli.
25“Medendɛ mehile bɛ wɔ mrɛlɛbulɛ nu dɛba, na mekɛ ne ɛlɛba aradwu mɔɔ menrɛdendɛ menrɛhile bɛ wɔ mrɛlɛ nu a, na mebaha Egya anwo edwɛkɛ ne wienyi meahile bɛ. 26Mekɛ ne anu, bɛbalua me duma nu bɛabiza, mɔɔ ɔnrɛhyia kɛ menwɔbɔ bɛ ti menwɔzɛlɛ Egya ne menwɔmaa bɛ a, 27ɔluakɛ Egya ne ɔdaye mumua ne ɔkulo bɛ, ɔlua ɛhulolɛ ne mɔɔ bɛlɛ ye wɔ me nwo la ati, na eza bɛdie bɛdi kɛ mevi Egya ne ɛkɛ ne a membale a. 28Nɔhalɛ nu, mevi Selɛ ne lɔ a membale ewiade anu a, yɛɛ eza mebagyakyi ewiade ne na meazia meahɔ ɔ nwo lɔ bieko.”
29Ye ɛdoavolɛma ne mɔ zele ye kɛ, “Bɔ zo mɔɔ akee ɛtendɛ nɔhalɛ bɔkɔɔ, na ɛmbu mrɛlɛ bieko a. 30Kɛkala mɔ, akee yɛde ɔ bo kɛ amgba ɛze debie biala, na ɔngyia kɛ awie bɔbɔ nee wɔ kɛdwudwu. Ɔlua ɛhye azo yɛdie yɛdi kɛ amgba ɛvi Nana Nyamenle lɔ a ɛrale a.”
31Gyisɛse bizale bɛ kɛ, “Akee bɛdie bɛdi ɔ? 32Melɛ ne ɛlɛba, yɛɛ yera yewie bɔbɔ, mɔɔ bɛbabɔ asande, na bɛ nuhua ko biala anriandi ahɔ ye sua nu agyakyi me ngome a. Noko akee ɔnrɛha me ngome ala, ɔluakɛ Egya ne nee me a wɔ ɛkɛ a. 33Meha ɛhye mɔ amuala mehile bɛ, amaa bɛanyia anzondwolɛ wɔ bɛ ahonle nee bɛ adwenle nu. Bɛbanwu amaneɛ nee alɔbɔlɛ dɔɔnwo wɔ ewiade ɛhye anu; noko bɛgyinla kpundii, ɔluakɛ mehomo ewiade anwo zo bɔkɔɔ.”
ទើបបានជ្រើសរើសហើយ៖
Dwɔn 16: ONEN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblica® Open Nzema Word of Life Gospels and Psalms™
Copyright © 1984 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
