Dwɔn 12
12
Me nee bɛ ɛnrɛdɛnla ɛnrɛhyɛ
1Ɔhale kenle nsia na bɛabɔ Akpabɛnwo Ɛvoyialilɛ ne abo la, Gyisɛse hɔle Bɛtani; ɛkɛ ne a ɔdwazole Lazalɛse mɔɔ wule la ɔvile ewule nu a. 2Na bɛdole ɛkponle bɛmaanle Gyisɛse. Maata a hyɛle aleɛ ne a, yɛɛ Lazalɛse noko nee ye a kpulale bɛ sa a. 3Akee Male vale anatele evuanlɛ bie mɔɔ bɛtɛtule zo la ɔradule ɔ muala ɔguale Gyisɛse agyakɛ azo na ɔvale ɔ ti enrinli ɔkyikyile ye bɔkɔɔ. Ɛhye maanle sua ne anu bɔnle evuanlɛ mukuu zɛhae.
4Na Dwudase Yesekaleɔto, ye ɛdoavolɛma ne mɔ ko, nuhua ne mɔɔ baye ye amaa la, zele kɛ, 5“Duzu ati a bɛandɔne anatele evuanlɛ ɛhye bɛanlie menli ɛya nsa kenle ko ahatualɛ na bɛanva bɛammaa ehyiavolɛma a?” 6Tɛ mɔɔ asɛɛ ehyiavolɛma anwo hyia ye la ati a maa ɔhanle ɛhye a; na ɔle awule; yemɔ yɛɛ ɔnea ɛdoavolɛma ne mɔ ezukoa zo a, na mekɛ dɔɔnwo ne ala ɔwua bie ɔyɛ ɔ nwo boɛ.
7Gyisɛse buale ye kɛ, “Bɛgyakyi ye, ɔluakɛ yeyɛ ɛhye yezie me azieleɛ. 8Bɛkola bɛboa ehyiavolɛma melɛ biala, na mame noko me nee bɛ ɛnde dahuu.”
9Mɔɔ Gyɛlusalɛm amra ne dele kɛ yera la, bɛdule twi bɛrale kɛ bɛbanlea ye, na eza noko bɛanlea Lazalɛse, nrenyia ne mɔɔ ɔdwazole ye ɔvile ewule nu la. 10Azɛlɛvolɛ mgbanyima ne mɔ yɛle bɛ adwenle kɛ bɛku Lazalɛse ɔdaye noko, 11ɔluakɛ, ɔlua yemɔ ɔ nwo zo a ɛmaa Dwuuma mgbanyima ne mɔ dɔɔnwo liele Gyisɛse lile kɛ yemɔ a le Ngoanedievolɛ ne la.
Bɛyɛ Gyisɛse akoaba
12Aleɛ hyenle la, Gyisɛse Gyɛlusalɛm ɛhɔlɛ ne anwo adawu zandele sua ne azo amuala, 13na nyɛvolɛ dɔɔnwo mɔɔ rale Akpabɛnwo ɛvoyia ne abo la vale arɛlɛ mrɛlakɛ hɔyiale ye, na bɛvale fɛlɛko bɛdeɛdeanle nu bɛbɔle osee-yie bɛzele kɛ: “Nyilalɛ ɛha mɔɔ ɔlua Awulae duma nu ɔlɛba la.”
14Ɛnee ɛkpɔnwɔ ralɛ nwo zo a Gyisɛse de a, amaa kapezo edwɛkɛ ne mɔɔ se: 15“Yizilayɛma, bɛmmasulo, ɔluakɛ bɛ Belemgbunli ne le mɛlɛbɛnwoaze sonla mɔɔ ɛkpɔnwɔ ralɛ ala a ɔde zo a” la ali munli.
16Ye ɛdoavolɛma ne mɔ ande ɛhye abo alumua ne, na nzinlii mɔɔ bɛwulale Gyisɛse anyunlunyia la, yɛɛ akee bɛhakyele kɛ bɛhɛlɛle ɛhye mɔ wɔ ɔ nwo na bɛyɛ bɛmaa ye a.
17Bɛdabɛ mɔɔ ɛnee bɛwɔ ɛkɛ ne, wɔ mekɛ mɔɔ ɔdunwuele Lazalɛse ɔvile ewule nu la, hanle nwolɛ edwɛkɛ hilele bɛ gɔnwo mɔ. 18Na ɛhye ala ati noko a menli dɔɔnwo ne ala hɔle hɔyiale ye a, ɔluakɛ ɛnee zɛhae nwanwanedeɛ ne anwo edwɛkɛ ɛkpudwu totohyia.
19Akee Falasiima ne mɔ zele bɛ nwo ngoko ngoko kɛ, “Ayi mɔ, bɛnlea kɛ yɛvɛ mgbane a; akee yɛngola yɛnyɛ ɛhwee bieko. Ewiade amuala ɛdu ɛdoa ye!”
20Bie mɔ noko mɔɔ ɛnee bɛra Gyɛlusalɛm kɛ bɛbali Akpabɛnwo ɛvoyia ne bie la, 21hɔle Felepe mɔɔ vi Bɛteseeyeda la anwo ɛkɛ, na bɛzele ye kɛ, “Yɛmenle, yɛkulo kɛ yɛkɛnwu Gyisɛse.” 22Felepe noko bɔle Andelu amaneɛ, na akee bɛ mu nwiɔ bɛhɔhanle bɛhilele Gyisɛse.
23-24Gyisɛse zele bɛ kɛ, “Mekɛ ne mɔɔ ɔwɔ kɛ Sonla Ra ne kɔ ye anyunlunyia nu wɔ Anwuma belemgbunli maanle ne anu la akee ɛdwu zo.” Eza ɔvale ɔzɔle zo kɛ, “Kɛmɔ abɛlɛ ma ko tɔ aze a yɛɛ ɔso la, zɔhane ala yɛɛ ɔwɔ kɛ metɔ aze a. Na ɔlua me ɛwulɛ ne azo yɛɛ ndwoba dɔɔnwo akee bara ɛya ne anu a.
25“Mɔɔ kpondɛ ye ngoane wɔ azɛlɛ ye azo la baminli ye; na mɔɔ kɛminli ye ngoane wɔ azɛlɛ ye azo la, yemɔ a banyia ngoane mɔɔ ɔnlɛ awieleɛ a.
26“Saa awie biala kulo kɛ ɔyɛ me ɛdoavolɛ a, ɛleka biala mɔɔ mewɔ la ɔbali me nzi, ɔluakɛ ɛleka mɔɔ mewɔ la, ɛkɛ ne a ɔwɔ kɛ me ɛdoavolɛma ne mɔ noko boa a. Na saa bɛtoa me noko a yemɔ Selɛ ne bawula bɛ anyunlunyia. 27Kɛkala mɔ akee me ɛkɛla ɛlɛdi nyane kpole. Duzu edwɛkɛ a menga a? ‘Egya, die me fi munzule mɔɔ ɛlɛba me nwo zo la anu.’ Na ɔlua ɛhye noko ati a membale a. 28Egya, kile wɔ tumi ɛ.”
Akee ɛnelɛ bie vi anwuma maanle ne anu zele kɛ, “Meye ɛhye dɛbadɛba, eza noko mebaye ye bieko.” 29Mɔɔ menli ɛwolaa ne dele ɛnelɛ ne la, bɛ nuhua bie mɔ dwenlenle kɛ ezule ɛhululɛ ɔ, yɛɛ bie mɔ noko zele kɛ anwumabɔvolɛ a dendɛle hilele ye a. 30Akee Gyisɛse zele bɛ kɛ, “Ɔlua bɛ ti a ɛnelɛ ye rale a, na tɛ mame ti ɔ. 31Mekɛ mɔɔ ɔwɔ kɛ bɛfa bɛbua ewiade amra ndɛne la ɛdwu, na mekɛ ɛhye anu yɛɛ bɛbalie Abɔnsam mɔɔ le ewiade anu belemgbunli ne la tumi bɛavi ɔ sa nu a. 32Na mame mɔ saa bɛbɔ me meanubaka nu a, mebahwe ewiade amra amuala meabeta me nwo.” 33Ɔhanle ɛhye ɔvale ɔhilele ewule holɛ ko mɔɔ ɔbawu la.
34Menli dɔɔnwo ne bizale ye kɛ, “Yɛmɛ yɛde yɛvi mɛla ne anu kɛ Sonla Ra ne ɛnrɛwu ɛlɛ. Kɛ ɔsi mɔɔ akee ɛse bɛbabɔ ye meanubaka nu ɛ? Ɛnee Ngoanedievolɛ ne boni a wɔmɔ ɛlɛka ye edwɛkɛ a?”
35Gyisɛse buale kɛ, “Mekɛ ekyii bie ala yɛ ɛha mɔɔ bɛbanwu wienyi ne a. Kɛkala mɔɔ kɛnlaneɛ ne wɔ ɛkɛ la, bɛva bɛdia, ammaa awozinli anva bɛ aze. Ɔluakɛ awozinli ne ba a bɛnrɛnwu aze bieko. 36Bɛlua wienyi ne anu wɔ mekɛ mɔɔ ɔlɛta la, na bɛlie wienyi ne bɛli amaa bɛayɛ wienyi ne anu amra.” Gyisɛse hanle ɛhye mɔ wiele la, ɔvile ɛkɛ ɔhɔle, na bɛannwu ye bieko.
37Wɔ ye nwanwanendeɛ ɛyɛlɛ ɛhye mɔ amuala anzi bɔbɔ, menli ne dɔɔnwo ne ala anlie ye anli kɛ yemɔ a le Sonla Ra ne a. 38Ɛhye noko a le nɔhalɛ ne mɔɔ kapezonli Ayezaya hanle la, kɛ: “Awulae, nwane a balie ye ali a? Nwane a bali Nana Nyamenle nwanwanendeɛ ne mɔ mɔɔ yeyɛ la anwo daselɛ a?” 39Noko akee bɛanlie bɛanli, kɛmɔ amgba Ayezaya edwɛkɛ ne ka ye bieko la. Ɔse: 40“Nana Nyamenle ɛzi bɛ nye na eza yeyɛ bɛ anyetelema ammaa bɛannwu debie, na eza bɛannyia ndelebɛbo ammaa bɛanzia bɛamba ɔ nwo kɛ ɔyɛ bɛ ayile.” 41Gyisɛse anwo edwɛkɛ a ɛnee Ayezaya ɛlɛka la, ɔluakɛ ɛnee yenwu Sonla Ra ne anyunlunyia wɔ yekile nu.
42Dwuuma mgbanyima ne mɔ dɔɔnwo bɔbɔ liele ye lile ɛdeɛ kɛ, amgba yemɔ a le Ngoanedievolɛ ne a, noko bɛangulo kɛ bɛkɛha, ɔlua ɛzulolɛ mɔɔ bɛsulo kɛ Falasiima ne mɔ kɛye bɛ ali wɔ ayiasua ne anu la ati; 43ɔboalekɛ bɛkulo menli nganvolɛ ɛdeɛ ne bɛtɛla Nana Nyamenle ɛdeɛ ne.
44Gyisɛse deanle nu zele menli dɔɔnwo ne kɛ, “Mɔɔ die me di la ɛnlie me ngome ala ɛnli, na ɔdie Egya ne mɔɔ zoanle me la ɔdi. 45Ɔluakɛ awie ko biala mɔɔ kɛnwu me la, ɛnee yenwu ahenle ne mɔɔ zoanle me la. 46Mera ewiade anu kɛ Kɛnlaneɛ la, amaa awie biala mɔɔ kɛlie me kɛli la yeanga awozinli nu. 47Saa awie biala tie me edwɛkɛ na yeanli zo a, membua ye ndɛne, ɔluakɛ meamba kɛ mebabua ewiade amra ndɛne, membale kɛ mebalie bɛ ngoane. 48Emomu bɛdabɛ mɔɔ bɛkpo me nee me edwɛkɛ ne la lɛ bɛ nwo zo ndɛnebuavolɛ; edwɛkɛ ne mɔɔ meha mehile bɛ la a bayɛ bɛ ndɛnebuavolɛ wɔ Awieleɛ Kenle ne anu a. 49Ɔluakɛ tɛ medame me tumi a menvale menganle edwɛkɛ ne a, na Egya ne mɔɔ zoanle me la mumua ne yɛɛ ahilele me mɔɔ menga ɔ nee mɔɔ menyɛ la a. 50Eza meze kɛ ye edwɛkɛ ne maa ngoane mɔɔ ɔnlɛ awieleɛ; ɔti mɔɔ ɔkɛze me biala la meka!”
ទើបបានជ្រើសរើសហើយ៖
Dwɔn 12: ONEN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblica® Open Nzema Word of Life Gospels and Psalms™
Copyright © 1984 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
Dwɔn 12
12
Me nee bɛ ɛnrɛdɛnla ɛnrɛhyɛ
1Ɔhale kenle nsia na bɛabɔ Akpabɛnwo Ɛvoyialilɛ ne abo la, Gyisɛse hɔle Bɛtani; ɛkɛ ne a ɔdwazole Lazalɛse mɔɔ wule la ɔvile ewule nu a. 2Na bɛdole ɛkponle bɛmaanle Gyisɛse. Maata a hyɛle aleɛ ne a, yɛɛ Lazalɛse noko nee ye a kpulale bɛ sa a. 3Akee Male vale anatele evuanlɛ bie mɔɔ bɛtɛtule zo la ɔradule ɔ muala ɔguale Gyisɛse agyakɛ azo na ɔvale ɔ ti enrinli ɔkyikyile ye bɔkɔɔ. Ɛhye maanle sua ne anu bɔnle evuanlɛ mukuu zɛhae.
4Na Dwudase Yesekaleɔto, ye ɛdoavolɛma ne mɔ ko, nuhua ne mɔɔ baye ye amaa la, zele kɛ, 5“Duzu ati a bɛandɔne anatele evuanlɛ ɛhye bɛanlie menli ɛya nsa kenle ko ahatualɛ na bɛanva bɛammaa ehyiavolɛma a?” 6Tɛ mɔɔ asɛɛ ehyiavolɛma anwo hyia ye la ati a maa ɔhanle ɛhye a; na ɔle awule; yemɔ yɛɛ ɔnea ɛdoavolɛma ne mɔ ezukoa zo a, na mekɛ dɔɔnwo ne ala ɔwua bie ɔyɛ ɔ nwo boɛ.
7Gyisɛse buale ye kɛ, “Bɛgyakyi ye, ɔluakɛ yeyɛ ɛhye yezie me azieleɛ. 8Bɛkola bɛboa ehyiavolɛma melɛ biala, na mame noko me nee bɛ ɛnde dahuu.”
9Mɔɔ Gyɛlusalɛm amra ne dele kɛ yera la, bɛdule twi bɛrale kɛ bɛbanlea ye, na eza noko bɛanlea Lazalɛse, nrenyia ne mɔɔ ɔdwazole ye ɔvile ewule nu la. 10Azɛlɛvolɛ mgbanyima ne mɔ yɛle bɛ adwenle kɛ bɛku Lazalɛse ɔdaye noko, 11ɔluakɛ, ɔlua yemɔ ɔ nwo zo a ɛmaa Dwuuma mgbanyima ne mɔ dɔɔnwo liele Gyisɛse lile kɛ yemɔ a le Ngoanedievolɛ ne la.
Bɛyɛ Gyisɛse akoaba
12Aleɛ hyenle la, Gyisɛse Gyɛlusalɛm ɛhɔlɛ ne anwo adawu zandele sua ne azo amuala, 13na nyɛvolɛ dɔɔnwo mɔɔ rale Akpabɛnwo ɛvoyia ne abo la vale arɛlɛ mrɛlakɛ hɔyiale ye, na bɛvale fɛlɛko bɛdeɛdeanle nu bɛbɔle osee-yie bɛzele kɛ: “Nyilalɛ ɛha mɔɔ ɔlua Awulae duma nu ɔlɛba la.”
14Ɛnee ɛkpɔnwɔ ralɛ nwo zo a Gyisɛse de a, amaa kapezo edwɛkɛ ne mɔɔ se: 15“Yizilayɛma, bɛmmasulo, ɔluakɛ bɛ Belemgbunli ne le mɛlɛbɛnwoaze sonla mɔɔ ɛkpɔnwɔ ralɛ ala a ɔde zo a” la ali munli.
16Ye ɛdoavolɛma ne mɔ ande ɛhye abo alumua ne, na nzinlii mɔɔ bɛwulale Gyisɛse anyunlunyia la, yɛɛ akee bɛhakyele kɛ bɛhɛlɛle ɛhye mɔ wɔ ɔ nwo na bɛyɛ bɛmaa ye a.
17Bɛdabɛ mɔɔ ɛnee bɛwɔ ɛkɛ ne, wɔ mekɛ mɔɔ ɔdunwuele Lazalɛse ɔvile ewule nu la, hanle nwolɛ edwɛkɛ hilele bɛ gɔnwo mɔ. 18Na ɛhye ala ati noko a menli dɔɔnwo ne ala hɔle hɔyiale ye a, ɔluakɛ ɛnee zɛhae nwanwanedeɛ ne anwo edwɛkɛ ɛkpudwu totohyia.
19Akee Falasiima ne mɔ zele bɛ nwo ngoko ngoko kɛ, “Ayi mɔ, bɛnlea kɛ yɛvɛ mgbane a; akee yɛngola yɛnyɛ ɛhwee bieko. Ewiade amuala ɛdu ɛdoa ye!”
20Bie mɔ noko mɔɔ ɛnee bɛra Gyɛlusalɛm kɛ bɛbali Akpabɛnwo ɛvoyia ne bie la, 21hɔle Felepe mɔɔ vi Bɛteseeyeda la anwo ɛkɛ, na bɛzele ye kɛ, “Yɛmenle, yɛkulo kɛ yɛkɛnwu Gyisɛse.” 22Felepe noko bɔle Andelu amaneɛ, na akee bɛ mu nwiɔ bɛhɔhanle bɛhilele Gyisɛse.
23-24Gyisɛse zele bɛ kɛ, “Mekɛ ne mɔɔ ɔwɔ kɛ Sonla Ra ne kɔ ye anyunlunyia nu wɔ Anwuma belemgbunli maanle ne anu la akee ɛdwu zo.” Eza ɔvale ɔzɔle zo kɛ, “Kɛmɔ abɛlɛ ma ko tɔ aze a yɛɛ ɔso la, zɔhane ala yɛɛ ɔwɔ kɛ metɔ aze a. Na ɔlua me ɛwulɛ ne azo yɛɛ ndwoba dɔɔnwo akee bara ɛya ne anu a.
25“Mɔɔ kpondɛ ye ngoane wɔ azɛlɛ ye azo la baminli ye; na mɔɔ kɛminli ye ngoane wɔ azɛlɛ ye azo la, yemɔ a banyia ngoane mɔɔ ɔnlɛ awieleɛ a.
26“Saa awie biala kulo kɛ ɔyɛ me ɛdoavolɛ a, ɛleka biala mɔɔ mewɔ la ɔbali me nzi, ɔluakɛ ɛleka mɔɔ mewɔ la, ɛkɛ ne a ɔwɔ kɛ me ɛdoavolɛma ne mɔ noko boa a. Na saa bɛtoa me noko a yemɔ Selɛ ne bawula bɛ anyunlunyia. 27Kɛkala mɔ akee me ɛkɛla ɛlɛdi nyane kpole. Duzu edwɛkɛ a menga a? ‘Egya, die me fi munzule mɔɔ ɛlɛba me nwo zo la anu.’ Na ɔlua ɛhye noko ati a membale a. 28Egya, kile wɔ tumi ɛ.”
Akee ɛnelɛ bie vi anwuma maanle ne anu zele kɛ, “Meye ɛhye dɛbadɛba, eza noko mebaye ye bieko.” 29Mɔɔ menli ɛwolaa ne dele ɛnelɛ ne la, bɛ nuhua bie mɔ dwenlenle kɛ ezule ɛhululɛ ɔ, yɛɛ bie mɔ noko zele kɛ anwumabɔvolɛ a dendɛle hilele ye a. 30Akee Gyisɛse zele bɛ kɛ, “Ɔlua bɛ ti a ɛnelɛ ye rale a, na tɛ mame ti ɔ. 31Mekɛ mɔɔ ɔwɔ kɛ bɛfa bɛbua ewiade amra ndɛne la ɛdwu, na mekɛ ɛhye anu yɛɛ bɛbalie Abɔnsam mɔɔ le ewiade anu belemgbunli ne la tumi bɛavi ɔ sa nu a. 32Na mame mɔ saa bɛbɔ me meanubaka nu a, mebahwe ewiade amra amuala meabeta me nwo.” 33Ɔhanle ɛhye ɔvale ɔhilele ewule holɛ ko mɔɔ ɔbawu la.
34Menli dɔɔnwo ne bizale ye kɛ, “Yɛmɛ yɛde yɛvi mɛla ne anu kɛ Sonla Ra ne ɛnrɛwu ɛlɛ. Kɛ ɔsi mɔɔ akee ɛse bɛbabɔ ye meanubaka nu ɛ? Ɛnee Ngoanedievolɛ ne boni a wɔmɔ ɛlɛka ye edwɛkɛ a?”
35Gyisɛse buale kɛ, “Mekɛ ekyii bie ala yɛ ɛha mɔɔ bɛbanwu wienyi ne a. Kɛkala mɔɔ kɛnlaneɛ ne wɔ ɛkɛ la, bɛva bɛdia, ammaa awozinli anva bɛ aze. Ɔluakɛ awozinli ne ba a bɛnrɛnwu aze bieko. 36Bɛlua wienyi ne anu wɔ mekɛ mɔɔ ɔlɛta la, na bɛlie wienyi ne bɛli amaa bɛayɛ wienyi ne anu amra.” Gyisɛse hanle ɛhye mɔ wiele la, ɔvile ɛkɛ ɔhɔle, na bɛannwu ye bieko.
37Wɔ ye nwanwanendeɛ ɛyɛlɛ ɛhye mɔ amuala anzi bɔbɔ, menli ne dɔɔnwo ne ala anlie ye anli kɛ yemɔ a le Sonla Ra ne a. 38Ɛhye noko a le nɔhalɛ ne mɔɔ kapezonli Ayezaya hanle la, kɛ: “Awulae, nwane a balie ye ali a? Nwane a bali Nana Nyamenle nwanwanendeɛ ne mɔ mɔɔ yeyɛ la anwo daselɛ a?” 39Noko akee bɛanlie bɛanli, kɛmɔ amgba Ayezaya edwɛkɛ ne ka ye bieko la. Ɔse: 40“Nana Nyamenle ɛzi bɛ nye na eza yeyɛ bɛ anyetelema ammaa bɛannwu debie, na eza bɛannyia ndelebɛbo ammaa bɛanzia bɛamba ɔ nwo kɛ ɔyɛ bɛ ayile.” 41Gyisɛse anwo edwɛkɛ a ɛnee Ayezaya ɛlɛka la, ɔluakɛ ɛnee yenwu Sonla Ra ne anyunlunyia wɔ yekile nu.
42Dwuuma mgbanyima ne mɔ dɔɔnwo bɔbɔ liele ye lile ɛdeɛ kɛ, amgba yemɔ a le Ngoanedievolɛ ne a, noko bɛangulo kɛ bɛkɛha, ɔlua ɛzulolɛ mɔɔ bɛsulo kɛ Falasiima ne mɔ kɛye bɛ ali wɔ ayiasua ne anu la ati; 43ɔboalekɛ bɛkulo menli nganvolɛ ɛdeɛ ne bɛtɛla Nana Nyamenle ɛdeɛ ne.
44Gyisɛse deanle nu zele menli dɔɔnwo ne kɛ, “Mɔɔ die me di la ɛnlie me ngome ala ɛnli, na ɔdie Egya ne mɔɔ zoanle me la ɔdi. 45Ɔluakɛ awie ko biala mɔɔ kɛnwu me la, ɛnee yenwu ahenle ne mɔɔ zoanle me la. 46Mera ewiade anu kɛ Kɛnlaneɛ la, amaa awie biala mɔɔ kɛlie me kɛli la yeanga awozinli nu. 47Saa awie biala tie me edwɛkɛ na yeanli zo a, membua ye ndɛne, ɔluakɛ meamba kɛ mebabua ewiade amra ndɛne, membale kɛ mebalie bɛ ngoane. 48Emomu bɛdabɛ mɔɔ bɛkpo me nee me edwɛkɛ ne la lɛ bɛ nwo zo ndɛnebuavolɛ; edwɛkɛ ne mɔɔ meha mehile bɛ la a bayɛ bɛ ndɛnebuavolɛ wɔ Awieleɛ Kenle ne anu a. 49Ɔluakɛ tɛ medame me tumi a menvale menganle edwɛkɛ ne a, na Egya ne mɔɔ zoanle me la mumua ne yɛɛ ahilele me mɔɔ menga ɔ nee mɔɔ menyɛ la a. 50Eza meze kɛ ye edwɛkɛ ne maa ngoane mɔɔ ɔnlɛ awieleɛ; ɔti mɔɔ ɔkɛze me biala la meka!”
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblica® Open Nzema Word of Life Gospels and Psalms™
Copyright © 1984 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.