Lúúkas 8
8
Pɛɛndɔ pómoól pétílíkén Yésuse
1É kélém kúɛ́yɛ́, Yésuse woond ó kuól kukémé Insɔ́m yi indámb i Pufuŋ pú Támbák á papálɛ́k nɔ pitɔŋ; popíónyí peem páát na páandɛ́ óol pétílíkén wɔ, 2nɔ ɔlɔŋ ú pakáandɔ́: pómotí, Yésus meétúkúné pɔ́ ɔ́ pilɔk pí piliínditíe, pólotí manúma, weéŋuki pɔ; pɔ́ pámaápá ɛ́ɛ́: Malíɛ́ u kitɔŋ pámaápílán ɛ́ɛ́ Makatala, pilɔk pípiliínditié pítíndátɔ́ neémue maám kɛ́ɛ́yɛ́, 3Isáanɛ, akányi Súsa umaápá eŋelípuóli u efuŋ Élóot, Susánɛ na pakáandɔ́ pólotí puólikóoli. Na punɛ́m púɔ́p, pakáandɔ́ pakáánɛ́ mapá pɛ́kɛnɛkɛn ne Yésus no popíónyí pɛ́ɛ́yɛ́.
Insap yí embu
(Mat 13.1-9; Mál 4.1-9)
4Pɛɛnd óólinon á papálɛ́k kitikit ɔ́ kuɔsipítɔ́líkɔ́n Yésuse; pɛ́ɛ́kɛɛ́yɛ kiandákáand kí embul. Weetúmin pɔ́ insap, wɔ́ ɛ́ɛ́: 5«Mɔɔnd weesík é kuepuénén imbuu. Umɛɛlɛ́ úkakasán imbuu é kisíén, símotí síákɔɔn á masiá mí iŋilí; pɛɛnd páámatɛn sɛ́ɛ, munoní múányá sɛ́ɛ wɔ́ɔ́sí. 6Imbuu sílotí síakɔɔn á tusákáyí; síɛ́sɛnɔk, pisɔ́ɔ́kɔsɔ́ɔ́kɔ píɔ́yɔ́yitɛn píond píakɔt á kati moomb e. 7Imbuu símotí síakɔɔn ɛ́ kikɛtɛ́kɛtɛ́ɛ kí pikuti ni insɛ́ndí; imbuu síɛ́sɛnɔk, pisɔ́ɔ́kɔsɔ́ɔ́kɔ kuman, insɛ́ndí kuman síópo, síányɛ́n pisɔ́ɔ́kɔsɔ́ɔ́kɔ pí imbuu, síak moóko. 8Imbuu sílotí síakɔɔn ɔ́ nulɔp nuutámb; pisɔ́ɔ́kɔsɔ́ɔ́kɔ píópo, píómo insamɔ́; siki indínée insamɔ́ etín átáan.» Úmáamana, Yésuse wɔɔ́yikɛn ɛ́ɛ́: «Ewú unyɛɛ́ ní itú wɔɔ́p!»
Ó pusíó pú kiákí Yésus kálanɛ́ɛ pɛɛnd kí insap?
(Mat 13.10-13; Mál 4.10-12)
9Popíónyí pé Yésus póówun wɔ́ ɛ́ɛ́ wɔ́ɔ́yitɛn pɔ́ puandá epú insap ikáánɛ́ maámbá kuɔyɛt. 10wɔ́ kɔ́ɔ́p ɛ́ɛ́: «Káánɔ́ Támbák nyɛ eŋekényí pukaaka ɛ́ɛ́ númenyi insiípe sí Pufuŋ púɛ́yɛ́; ɔ́ pɔsɔ́k pólotí, yeétúmen pɔ́ insap ɛ́ɛ́ tɛ póyooson pɛ́tiɛ́n, tɛ pɔ́pítɔ́likɔn pɔ́tiɔ́p.»
Yésus ɛ́ɛsɛɛkunɛn popíónyí insap yi embuu
(Mat 13.18-23; Mál 4.13-20)
11Yésuse waasuŋɔn na nukál, wɔ́ ó popíónyí pɛ́ɛ́yɛ́ ɛ́ɛ́: «Yá anɛ insap eye áambanɛ́ɛ kuɔyɛt: embuu únyɛɛ́ Mekélíe má Támbák. 12Pɛɛnd pómotí nyɛ ɛlɛɛ́ masiá mí iŋilí emé embuu siákɔɔn á mɔ; pɔ́pítɔ́likɔn Mekélíe má Támbák, okóyikoyi óól ulákɔn mɔ́ kɔ́ɔ́p kí itɛ́m, emenyí páátap, Támbák sóti pɔ. 13Pólotí nyɛ ɛlɛɛ́ “Tusákáyí” embuu siákɔɔn á tɔ: pɔ́ nɔ kupítɔ́likɛn Mekélíe má Támbák, páátap mɔ́ na anyamɔ́. Pátipá kɔk páyapan Mekélíe málua iŋaŋá kɔ́ɔ́p kí itɛ́m; páákaátapan ɔ́ muɔ́nɔ́ u kisikɛl, yɔɔ́pítɛ́n na kuasiám, pétúm kuátap kélém. 14Embuu úsiákɔɔn é pikuti pí insɛ́ndí nyɛ pɛɛnd pɔ́pítɔ́likɔnɛ́ɛ Mekélíe má Támbák, maná, indúmútén sí kúúsí, pitɔ́ndɔ pí punɛ́m nɔ kilɔ́ŋɔ kí mayan mé kúúsí áásiákán moóko é Mekélíe kɔ́ɔ́p kí itɛ́m, meelíe mɔ́ɔ́p tinúki. 15Embuu úsiákɔɔn ɔ́ nulɔp nuutámb nyɛ pɛɛnd pɔ́pítɔ́likɔnɛ́ Mekélíe má Támbák nɔ ɔtɛ́m peseé, nɔ ɔtɛ́m ú indɛ́ndɛ́nɛ, pɛ́nɛk mɔ, péésepenyi, meelíe mɔ́ɔ́p oond ménúki.
Kisie ó pusíó pú mɔɔnd kitikit
(Mál 4.21-25)
16«Mɔɔnd tipá utúme ilámba é kukindikin yɛ́ɛ nɔ ɔluŋɔ́ púnyaánɛ á kuák yɛ́ɛ kɔ́ ɔtínyɔ́ɔ. Aákóo Waáfakikan yɛ́ɛ kɛ́ ɛŋúɛ́nyi é pukíti mɛnɛ́mɛnɛ́ɛ ɛ́ɛ́ mɔɔnd kitikit úményipíkín ɛ́ɛ́nɛn kisie. 17Á kiákí ɛ́ɛ́ insipit tipá kɔ́ɔk yɛɛ́nyɛ́ɛ́lɛɛ́ itiám nɔ ɔtɛ́m ú puɔ́s, puŋɔsíkɔ́n tipá pɛ́ɛ́nyɛ́ɛlɛɛ́ pétimenyí, póond pɔ́ɔ́sɔn puɔ nɔ ɔtɛ́m puɔ́s. 18Énupíkeŋényésí nunamá enú nupítɔ́likɔnɛ́. Á kiákí ɛ́ɛ́ pɔ́kɔɔ́yikinɛn ewú unyɛɛ́ na puandá; ewú utiányípá na puandá, pɔ́kɔkɔ́l kɛ́ɛ́yɛ́ tɛ epú upitáákanɛ́ ɛ́ɛ́ waápian.»
Nikúli ní Yésus ní kémuémue
(Mat 12.46-50; Mál 3.31-35)
19No yóótí na paandimán pé Yésus páásiám kɔɔ́mɔ umaápá, nipísíítínín wɔ́ tɛ níɛ; á kiákí ɛ́ɛ́ embúl mekéŋélítí Yésuse. 20Pɔ́ɔ́nyɔyítɛ́n wɔ́ ɛ́ɛ́: «Nikóótíe na paandimán pááwɔ nyɛ kɔ́ ɔɔ́nd; páákaamba kukuɛn.» 21Woondinyi pɔ́ ɛ́ɛ́: «Epé pɔ́pítɔ́likɔnɛ́ Mekélíe má Támbák póond páákan mɔ́ ɔ́ niɔlɔ́, pɔ́ pɛ́nyɛɛ́ iyɛɛ́ na paandimán páámɛ.»
Yésus mélúŋi emfún wɔɔkɔ́n
(Mat 8.18,23-27; Mál 4.35-41)
22Epué puɔ́s, Yésuse waamákat ó kitóóŋ no popíónyí pɛ́ɛ́yɛ́; wɔ́ kɔ́ɔ́p ɛ́ɛ́: «Ɛ́nyɛɛ́ tútápɔk nakúnɛ u asaá,» páápálɔk. 23Pɛ́mɛɛlɛ́ pémeékendesi kitóóŋ ó moomb, tunɔ́ túɔ́kɔ́l Yésuse. Pɛ́mɛɛlɛ́ pɔ́ɔ́pinɛ emfún wɔɔkɔ́n kanyɛɛ́ éfúke ká asaá, wéétukenyenyi moomb, mópíóton ó kitóóŋ nɛkɛtɛ́ɛ, kíwóónon; kusɔ́t kú Yésus no popíónyí pɛ́ɛ́yɛ́ mapá kuɛlíkɛ́n. 24Popíónyí péépísíítin Yésuse, péékeenyi wɔ, pɔ́ɔ́yɔn wɔ́ ɛ́ɛ́: «Oŋónyóonyi, oŋónyóonyi, tumékú!» Wɛɛnyɔk, waánsitɛn emfún no moomb: meem mééluŋ, kɔɔ́mɔ kéésíen yeékúlúkút. 25wɔ́ kɔ́ɔ́p ɛ́ɛ́: «Pipíóndinyi ɔtɛ́m píánɔ́ naánɛ́?» Puwaá púɛ́tikɛn pɔ́, pésímile epú Yésus mɛɛ́lɛ́, popíówon pɔ́ɔ nɔ pɔ́ɔ ɛ́ɛ́: «Kasɛ púúndɛ unyɛɛ́? Waákálan emfún no moomb ni imɛny mɔ́ɔ́pɛn wɔ.»
Yésus métúkún mɔɔnd ɔ́ pilɔk pí piliínditíe
(Mat 8.28-34; Mál 5.1-20)
26Yésuse no popíónyí pɛ́ɛ́yɛ́ páányaám nakúnɛ u asaá, ɔ́ kitɔŋ kí pe Selaseniɛ́ŋ kíyoosoné kiénsi kí kúúsí kí Kalilée. 27Yésus mɛɛlɛ́ úkeeselén ó kitóóŋ, mɔɔnd omotí u pálɛ́k woólin wɔ, umapá nɔ pilɔk pí piliínditíe pímaápíányɛ́n wɔ. Tɔɔm kɔ́ tɔɔm umeésúkín kupíák indífɔnɔ́, utiandá ɔnyɔ́mbitɔn á kiansi, yá ó munyoó. 28Umɛɛlɛ́ wɛɛ́nɛn Yésuse, waánsɛt, waasikɔɔ́n wɔ́ ɔ́ pikɔ́nd, wɔ́ kɛ́ɛ́yɛ́ ne ekelú alúndán ɛ́ɛ́: «Yésus, Muɔ́nɔ́ u Támbákɛ́ɛ unyɛɛ́ kááyɛ mɛnɛ́mɛnɛ́ɛ, aákiŋamba kiákí? Yoókupísókólonyi, etinséésítenyi.» 29Púnyɛ ɛ́ɛ́ Yésus mapá wɔɔyɔn kilɔk kí kiliínditié ni imɛ́nyi ɛ́ɛ́ kíám á mɔɔnd ukáánɛ́. Á kiákí ɛ́ɛ́ pisikɛl kutek kilɔk kí kiliínditíe kikáánɛ́ mapá kíɛtikɛn wɔ; pákúta wɔ́ imbɔk na pikásúkásɔ́, páák wɔ́ pilu ɔ́ pikɔ́nd ɛ́ɛ́ úlɔp á nuyá utiyɔɔk kɔɔ́mɔ; tɛ nɔ́, waápíkása maandá makáánɛ́, kilɔk kí kiliínditié óól kíyuúkán nɛɛyɛ́ yá ɔ́ piɔ́sɔ́kɔlíɔ. 30Yésuse woówun wɔ́ ɛ́ɛ́: «Kisiɛ́n kíáwɔ kínyɛɛ́ ɛ́nyɛ?» kilɔk kí kiliínditié kíondinyi ɛ́ɛ́: «Kíámɛ kínyɛɛ́ Punya kuteke,» á kiákí ɛ́ɛ́ pilɔk pí piliínditíe kutek mapá á mɔɔnd ukáánɛ́. 31Píond ɛ́ kupíyɛ́kɛlɛn Yésuse ɛ́ɛ́ utitɔ́m pɛ́ɛ ké eŋulúm.
32Pulɔŋ kɔ́lɔŋ pú iŋunɛ́p mapá akáánɛ́ kɔ́ ɔkɛ́l púfile kúúsí á kuamba múkunya. Pilɔk pípiliínditié píond ó kupísókólonyi Yésuse ɛ́ɛ́ waátapɛn pɛ́ɛ ɛ́ɛ́ pípíkin kí iŋunɛ́p sikáánɛ́. Waátapɛn pɛ́ɛ ɛ́ɛ́ pípíken kí iŋunɛ́p. 33Píákaám á mɔɔnd, píényepíkén kí iŋunɛ́p, pulɔŋ pú iŋunɛ́p púényekútúk kɔ́ ɔkɛ́l púónyopíómbon ká asaá, siim síényim.
34Pekííkí iŋunɛ́p ɛ́ɛ́nɛn nɔ́, pumbú ni itɛ́t. Póond á mukɔndɔ na pálɛ́k, pɔ́ɔ́yɔn pɛɛnd. 35Póólon á kuasiyíkíná puandá púmányaámɛ́n pɔ. Páányaámɛ́n Yésuse; péékítikenyi mɔɔnd pilɔk pí piliínditíe maám kɛ́ɛ́yɛ́ ɔnyɔ́lí á masiá mɔ́ pikɔ́nd pí Yésus, ɛpílɛŋɛ́ peseé, ukanyi meéne mɛɛ́ndúkɛ́n. Púɛ́kɛl pɔ́ puwaá. 36Petétúnyi ɔ́ɔ́yɔn pɛɛnd aná Yésus meétúkún mɔɔnd pilɔk pí piliínditíe maápíányín wɔ.
37Pɛɛnd kitikit pɔ́mɔɔ́sɔ́tɔ́n é kúúsí kú pe Selaseniɛ́ŋ ɛ́ɛ́pí é Yésus ɛ́ɛ́ wáátɔk kɔ́ɔ́p é kúúsí, á kiákí ɛ́ɛ́ puwaá mapá nɔɔpɔ́ táásɛ. Yésuse waamákat ó kitóóŋ á kuyɔɔk.
38Mɔɔnd pilɔk pí piliínditíe maám kɛ́ɛ́yɛ́ písókolonyi Yésuse ɛ́ɛ́ úyap wɔ́ wɔ́ɔŋ kɛ́ɛ́yɛ́. Yésuse weekúúki wɔ, wɔɔyɔn wɔ́ ɛ́ɛ́: 39«Aákóo! Ondó kuawɔ, ɔɔyɔn pɛɛnd puandá kitikit Támbák mɛ́nyɛɛlɛ́ kááwɔ ó pusíó.» Mɔɔnd waayɔɔk, woól wɔ́ɔ́yɔn pɛɛnd kitikit á pálɛ́k puandá kitikit Yésus mɛɛ́lɛ́ kɛ́ɛ́yɛ́ ó pusíó.
Ɔmbúl u Sáyílos na akáandɔ́ umaápá nɔ kifɔ kí manɔ́ŋ
(Mat 9.18-26; Mál 5.21-43)
40Yésuse woond kɔɔ́mɔ umóólín, nakúnɛ u asaá; embúl wóókóli wɔ, á kiákí ɛ́ɛ́ peem mepéétényí wɔ. 41Mɔɔnd omotí, kisiɛ́n ɛ́ɛ́ Sáyílose waasiám kɔ́ɔk; umapá ɔkɔ́n u kiansi kí Pɛyúútɛn kí imbísókóli. Waakɔɔn Yésuse iŋɔlɔpɛ ɔ́ pikɔ́nd, upísókolonyi wɔ́ ɛ́ɛ́ wúup kuɛyɛ́, 42á kiákí ɛ́ɛ́ umapián muɔ́nɔ́ wɛɛyɛ́ táŋ omoómí, muúŋayɔ́ akáandɔ́ tuɔŋ tuát na tuándɛ́, unúma, mekúye ne niku. Yésuse wɔɔkɔŋ kɛ́ɛ́yɛ́. Kí iŋilí, pɛɛnd tááta wɔ́ piáyí piim.
43Akáandɔ́ omotí mapá ké embúl nɛkɛtɛ́ɛ. Tuɔŋ túát na túandɛ́ upian kifɔ kí manɔ́ŋ, kítisúmbusɔmb. Wɛɛndɛ pɔtɔ́pítɛ, muenyí múɛ́yi múáman, mɔɔnd ukuéŋuki wɔ́ tɛ ɛ́ɛ́ wɛ́ɛ́nɛk. 44Woólin Yésuse iŋélémée, Weepísíítin wɔ́, weepíkíik indífɔnɔ́ yɛɛyɛ́; kɔ́ɔk nɔ kɔ́ɔk, manɔ́ŋ mámaámán akáandɔ́ ukáánɛ́ máásúmbɛk. 45Yésuse woówun ɛ́ɛ́: «Ɛ́nyɛ́ úményimbíkíík?» Aná peem maápítáŋúna, Piɛ́l ɛ́ɛpí ɛ́ɛ́: «Oŋónyóonyi, pɛɛnd siekukéŋeliti póond pákutááta piáyí piim.» 46Yésuse kɛ́ɛ́yɛ́ ɛ́ɛ́: «Yeémenyen nɔ, maná mɔɔnd mímbíkíík; á kiákí ɛ́ɛ́ imɔ́ɔ́p pukaaka kuám káámɛ.» 47Akáandɔ́ mɛɛlɛ́ úmɛ́ɛ́n ɛ́ɛ́ Yésus mémenyí puandá úmɛ́nyɛɛlɛ́, weepísíítin wɔ́ nɛ nutɛɛtinɛ; waakɔɔn wɔ́ iŋɔlɔpɛ ɔ́ pikɔ́nd, woond ɔ́ kuɔyɔ, ké eŋis yɛ́ pɛɛnd kitikit, kiákí kímɛ́nyɛɛlɛ́ ɛ́ɛ́ úpíkíik wɔ́, na aná uményeéŋúk nɔ niɔ́kɔ́tɔ́n. 48Yésuse kɛ́ɛ́yɛ́ ɛ́ɛ́: «Ɔmbúl waamɛ, pipíóndínyí ɔtɛ́m píáwɔ mɔ́ɔ́kuɔkɔ́. Tóótó oó, apá, kiyeéwe pá naawɔ.»
49Umɛɛ́lɛ́ umaákála, mɔɔnd woonyoólín á nuyá nú Sáyílos; wɔ́ ɛ́ɛ́: «Sáyílos, muɔ́nɔ́ ááwɔ mékú. Atiandá afá Oŋónyóonyi muyu.» 50Yésuse wɔ́ɔ́p, wɔ́ á Sáyílos ɛ́ɛ́: «Otiotó nuɔ́l; píóndónyí kupíóndonyi ɔtɛ́m, Támbák kaná kuenyi muɔ́nɔ́ ááwɔ.» 51Yésuse waanyaám á nuyá nú Sáyílos. Tɛ ɛ́ɛ́ wáátap ɛ́ɛ́ mɔɔnd olotí píkin nɛɛyɛ́ á kiansi, ɛsiɛ́ Piɛ́lɛ ni Isáaŋ na Sáak, ne síí no yóótí muúŋayɔ́ akáandɔ́. 52Pɛɛnd kitikit paŋa, pɛ́píyɛ́kɛlɛ ó pusíó pú muúŋayɔ́ akáandɔ́. Yésus ɛ́ɛ́pí kɔ́ɔ́p ɛ́ɛ́: «Nutiandá apaŋɛt; utipá ekúén, unyi ɔ́ tunɔ.» 53Póond ɔ́ kuɔnɔ wɔ́, á kiákí ɛ́ɛ́ pɔ́, pémemenyén ɛ́ɛ́ muúŋayɔ́ akáandɔ́ nyɛ ekúén. 54Yésuse, wɔ́, wɛɛtikɛn muúŋayɔ́ akáandɔ́ kɔ́ ɔmbɔ́k, waapílikɛn wɔ́: «Muɔ́nɔ́, ɛnyɔk.» 55Kiliínditié kí muúŋayɔ́ kíond kɛ́ɛ́yɛ́, nɔ niɔ́kɔ́tɔ́n waatukɛn. Yésus ɛ́ɛ́pí kɔ́ɔ́p ɛ́ɛ́ pátáaŋ muúŋayɔ́ akáandɔ́. 56Pepíényí pɛ́ɛ́yɛ́ péésímile pú táásɛ; Yésuse waakány nɔɔpɔ́ ɛ́ɛ́ pɔ́tiɔyítɛ́n mɔɔnd epú púmɛ́nyipíɛ́lɛ́.
ទើបបានជ្រើសរើសហើយ៖
Lúúkas 8: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
