Lúúkas 7
7
Pipíóndínyí ɔtɛ́m pí mɔnɔ́ lóma
(Mat 8.5-13; Isŋ 4.46-54)
1Yésus mɛɛlɛ́ úmáaman kuónyonyi pɛɛnd, waayɔɔk Kapɛlɛnawúum. 2Mɔnɔ́ Lóma omotí, ɔkɔ́n u ɔlɔŋ ú petííti etín átáán, mapá kɔ́ɔk; wɔ́ nɔ kiɔ́lí kíɛ́yɛ́, wɔɔyɔ kɛ́ɛ puólíkóoli, kípítáyan táásɛ mekúye ne niku. 3Umɛɛlɛ́ úmɔ́ɔ́p pɛ́tɛɛtɛn Yésuse, waatúmɛn wɔ́ posíósíó pómotí pɛ́ Pɛyúútɛn ó kuopísókólítí wɔ́ ɛ́ɛ́ wéésiéŋúkí kiɔ́lí kíɛ́yɛ́. 4Páásiámɛ́n Yésuse, pákanyɛɛ́ ɛpíyɛ́kɛlɛn wɔ́ ní imbísókólí, pɛ́ɛlɛ ɛ́ɛ́: «Mɔɔnd ukáánɛ́ ɛ́ɛ́kɛɛsikɛnɛn ɛ́ɛ́ ɔ́ɔk wɔ́, 5á kiákí ɛ́ɛ́ wɔɔ́túɔ́yɔ táásɛ pasɔ́ Pɛyúútɛn; wɔ́ unyɛɛ́ awááká kiansi kíásɔ́ kí imbísókólí.» 6Yésuse wɔɔŋ kɔ́ɔ́p. Pɛ́mɛɛlɛ́ pákanyi mekúye na nuyá, ɔkɔ́n u ɔlɔŋ ú petííti waatɔ́m pekúl pɛ́ɛ́yɛ́ ɛ́ɛ́ pɛ́ɛl é Yésus ɛ́ɛ́: «Ɔkɔ́n, ɔtikɔ́l mukáánɛ́ muyú ɛ́ɛ́ áasiám kuamɛ, á kiákí ɛ́ɛ́ indipá yɛɛsikɛnɛn ɛ́ɛ́, aŋúɛ, epíkin káámɛ á kiansi. 7Púupɔ́ imɛ́nyɛɛlɛ́ indiól ɛ́ kuɛsikuɛ́n iŋú muɛ́t; kúukɔ́ iŋupísókolonyée, síkoli kálɛ́t kukálɛt kipúk kímoómí, kiɔ́lí kiámɛ ééŋuk. 8Á kiákí ɛ́ɛ́, iŋúɛ inyɛ nɔ pɔkɔ́n yɔɔ́pinɔnɛ́ pɔ, inyɛ iŋú muɛ́t ɔkɔ́n u ɔlɔŋ ú petííti píŋɔ́pinɔnɛ́ɛ; aká imɛ́nyɛɛlɛ́ ɛ́ wɛɛ́tɛ ɛ́ɛ́: Apá, waáyuukan; aká imɛ́nyɛɛlɛ́ ó woolotí ɛ́ɛ́: Ólo, woókoólon; indían kiɔ́lí kíámɛ ɛ́ɛ́: Ɛlɛ́ pusɔ́m epue, kíɛ́kɛɛlɛ pɔ.» 9Úmáaman ɔpítɔ́likɔn tukál etue, Yésuse waayíkina ɔkɔ́n u petííti; wɛɛpíkɛkɛlɛt, wɔ́ ké embúl ú pɛɛnd pɔ́mɔɔ́ŋɔn kɛ́ɛ́yɛ́ ɛ́ɛ́: «Yɔɔ́núɔ́yɔn kémuémue ɛ́ɛ́ epié pipíóndinyi ɔtɛ́m imanyi indiɛ́n pɛ́ɛ tɛ ku mɔnɔ́ Yúútɛn omoómí.» 10Pekúl pɔ́ ɔkɔ́n u petííti póósiondó. Páásiámán á nuyá nú ekúl wɔɔpɔ́, póókóóki kiɔ́lí kíɛ́yɛ́ kilikil.
Yésus méényí muɔ́nɔ́ u kisík kí akáandɔ́ umeékú
11Kúépéli, Yésuse waayɔok á pálɛ́k omotí kisiɛ́n ɛ́ɛ́ Nayíin. Popíónyí pɛ́ɛ́yɛ́ ne embúl ú pɛɛnd ɔ́ɔ́ŋɔn kɛ́ɛ́yɛ́. 12Umɛɛlɛ́ úkanyɛɛ́ úpíkin á pálɛ́k, páyuukan ó kuonyoó kinɔ́k kímotí kímeékú, kinsuúŋulɛ kí muɔ́nɔ́ u kisík kí akáandɔ́. Pɛɛnd puólíkóoli pá pálɛ́k óól pétílíkén kísík kikáánɛ́. 13Ɔkɔ́n Yésus mɛɛlɛ́ wɛɛ́nɛn kisík kikáánɛ́, wɛɛ́n kɛ́ɛ ɔsɔk, wɔ́ kɛ́ɛ́yɛ́ ɛ́ɛ́: «Atiandá apaŋɛt.» 14Weepísíit, weekíik kiwɔ́lɔ; pɛɛnd pámaápá pápítúúkán kiku péétélimit; wɔ́ ɛ́ɛ́: «Muɔ́nɔ́, yɛɛ́pí kááwu ɛ́ɛ́: ɛnyɔk.» 15Kikú kíɛnyɔk, kíɔ́nyɔ́mbɛt, kíond á kukála. Yésus ɛ́ɛ́pí ó yóótí ɛ́ɛ́: «Akáandɔ, muɔ́nɔ́ ááwɔ ewe.» 16Puwaá púɛ́tikin pɛɛnd kitikit, péélémbesi Támbákɛ́ɛ, pɛɛlɛ ɛ́ɛ́: «Kiandá kí eŋémímekélíe má Támbák máám kuasɔ́, Támbák mápítáákɛ́t nisíp níɛ́yɛ́.» 17Puandá pukáánɛ́ Yésus mɛɛ́lɛ́ púásálamand Yuté nɔ pitɔŋ pí masia.
Isáaŋ Etuúsí mátɔ́m popíónyí pɛ́ɛ́yɛ́ ku Yésus
(Mat 11.2-6)
18Popíónyí pí Isáaŋ páátían wɔ́ maandá makáánɛ́ kitikit Yésus mɛɛ́lɛ. Kɔ́ ɔlɔŋ wɛ́ɛ́yɛ́ ú popíónyí, Isáaŋɛ waapílikɛn popíónyí páandɛ́, 19waatɔ́m pɔ́ ku Ɔkɔ́n ó kuówún wɔ́ «índɛ wɔ́ unyɛɛ́ Kilíise, wɛɛsikɛnɛnɛ́ kuól éyí, kúnyaánɛ tuɛ́kɛsikɛnɛn kupéétenyi sɔ́k olotí?» 20Pányaámin Yésuse, pɔ́ kɛ́ɛ́yɛ́ ɛ́ɛ́: «Isáaŋ Etuúsíe úmányitútɔ́m kuawɔ ó kuosikuówún ɛ́ɛ́: anyɛ Kilíise tupéétenyé éyí, kúnyaánɛ tuɛ́kɛsikɛnɛn kupéétenyi sɔ́k olotí?» 21Á kiátákáánɛ́ kisikɛl, Yésuse weéŋuki pɛɛnd puólíkóoli pámaánúmá á tunamá á tunamɛ́ɛ, pɔ́ pilɔk pí piliínditíe, woond ufuune eŋis yé pepútepute kutek póond ɛ́ kuɛ́nɛn. 22Woondinyi kɔk popíónyí pí Isáaŋ, wɔ́ kɔ́ɔ́p ɛ́ɛ́: «Ánuupɔ́, nútían Isáaŋɛ epú númɛ́nyɛɛ́n ne epú númɔ́nyɔɔ́p: pepútepute kanyɛɛ́ kuɛ́nɛn; pinsɛ́kɛlinɛ ɛ́ɛndɛ, pekúnukun ééŋuken iŋún sákinan, patúkúlútukɔl ɔ́ɔ́pɔn, pikú ɛ́ɛnyukɛn, pɔsúkɔsukɔ pítɔ́likɔn Insɔ́m Yi indámb; 23peseé ne ewú upíóndonyé ɔtɛ́m naamɛ siki puɔ́síɛ tɛ kupínanɛ.»
Epú Yésus pítáákanɛ́ kí Isáaŋ Etuúsí
(Mat 11.7-11)
24Pɛɛnd Isáaŋ maátɔm mɛɛlɛ́ pómóond, Yésuse woond ɔ́ kuɔyɔn embúl maandá mómoóyooson Isáaŋɛ, wɔ́ kɔ́ɔ́p ɛ́ɛ́: «Kiákí numányiipɛ́ kuoyoósón ɔ́ kiɔ́sɔ́kɔlíɔ? Nupal emfún sápanɛ́ nú á? 25Kiákí kɔk númɛ́nyɛɛ́nɛn? Mɔɔnd umɔɔ́pisɔnɔ́ indífɔnɔ́ yi efuŋ á? Epé pɛnyɛɛ́ pɔpísɔnɔ́ indífɔnɔ́ sí muenyí póond pɔ́sɔ́tɔn peseé nyɛ á tuyá tú pefuŋ. 26Kiákí kɔk númɛ́nyɛɛ́nɛn? Eŋémímekélíe má Támbák á? Ɛɛɛŋ, yɔɔ́núɔ́yɔn ɛ́ɛ́ tɛ eŋémímekélíe ukáánɛ́ waátápukan wɔ́. 27Á kiákí ɛ́ɛ́ Isáaŋ nyɛ ewú Mekélíe má Támbák ɔ́ɔ́yɔɔnɛ́ɛ kɛ́ɛ́yɛ́ ó pusíó ɛ́ɛ́: Ɔ́nupítɔ́líkɛn! Iŋúɛ Támbákɛ́ɛ, yoófookosi oŋoyí niɔy waamɛ kááwɔ ó pusíó, úkutɛ́fɛn iŋilí yaawɔ. 28Yésuse andíkɛ́k kɔ́ɔ́p ɛ́ɛ́: Yɛɛ́pí káánɔ́ ɛ́ɛ́, pámanyi pétipién mɔɔnd é kúúsí ekue utápukanɛ́ Isáaŋɛ; tɛ nɔ, weekétíkétie é Pufuŋ pú Támbák áátápukan wɔ́.»
Kikólio kí Isáaŋ ne kí Yésus
(Mat 11.16-19)
29Yésuse waasuŋɔn, wɔ́ ɛ́ɛ́: «Pɛɛnd kitikit ne petúúsi lemfúe pɔ́mɔɔ́pítɔ́líkɔ́n Isáaŋɛ, péétíínyi ɛ́ɛ́ Támbák nyɛ indɛ́ndɛ́nɛ, aná pámaáyɔɔ́k ku Isáaŋ weetu pɔ. 30Na Pafalisiɛ́ŋ ne pemenyí pikotí pɔ́ pééken nuketi nú Támbák kɔ́ɔ́p ó pusíó, aná péémeén ɛ́ɛ́ Isáaŋ tuu pɔ 31Íŋeti pɛɛnd pí inanɔ káányí? Pányɛ ɛlɛɛ́ ɛ́nyɛ́ɛ? 32Pányɛ asɛ paápayɔ́ pɛ́nyɛɛ́ pɔnyɔ́l kɔ́ ɔ́ɔ́nd ú nionyí pátúútaninɛ́ɛ tukál; epe ɔ́ɔ́yɔn pɔsɔ́k ɛ́ɛ́:
“Tumɔ́nútɔ́ŋɔ́n inselí, tɛ ɛ́ɛ́ núpínite;
Tumɔ́tɔ́ŋɔ́ isak sí ambaŋɔ́, tɛ ɛ́ɛ́ núpaŋitɛ.”»
33«Á kiákí ɛ́ɛ́, Isáaŋ Etuúsí óól, utinyáán múkunyá pɛɛnd nyáanɛ́ɛ, utipúwáán makɛp, nuɛl ɛ́ɛ́: “unyɛ nɔ kilɔk kí kiliínditíe.” 34Muɔ́nɔ́ u mɔɔnd óól, unyáan, upúwáan, nuɛl ɛ́ɛ́: “Mɔɔnd ukáánɛ́ nyɛ kupíyakɛɛ́ kupíyak, makípɛɛ́ makɛp, ekúl u petúúsí lemfúe na pafalfal.” 35Maná paán pá Támbák peem éémenyen ɛ́ɛ́ tutátɔ́ túɛ́yɛ́ nyɛ indɛ́ndɛ́nɛ.»
Ne Yésus na afalfál u akáandɔ́
36Epué puɔ́s, Falisiɛ́ŋ omotí waapílikɛn Yésuse ɛ́ɛ́ wáányá kuɛyɛ́. Yésuse waayɔɔk, weepíkin á kiansi kí Falisiɛ́ŋ ukáánɛ́, wɔɔnyɔ́mbɛt á kunyáan. 37Afalafál u akáandɔ́ omotí mapá á pálɛ́k ukáánɛ́. Umɛɛlɛ́ nɔ kuɔ́p ɛ́ɛ́ Yésus ápiyaka ku Falisiɛ́ŋ wɛɛ́tɛ, waanyatɔ́k, weepíkin; wɔ́ nɔ kinɔ́k kí indók i elepínde. 38Akáandɔ́ weetélimitin Yésuse é kélém no niónyi á masiá mɔ́ pikɔ́nd, weeyúpi pɛ́ɛ na andilɛ́ yɛ́ɛ́yɛ́; woond ó kuwóno pɛ́ɛ ne tuúnye túɛ́yɛ́, utúme pɛ́ɛ piɔ́lɔ́lí píɛ́yɛ́ pí niít woond uwéénen pɛ́ɛ elepínde.
39Falisiɛ́ŋ Yésus maápá kuɛyɛ́ mɛɛlɛ́ wɛɛ́nɛn nɔ, wɔ́ kɛ́ɛ́yɛ́ kɔ́ ɔtɛ́m ɛ́ɛ́: «Mɔɔnd ewe síákápá eŋémímekélíe má Támbák, usiémenyi nunamá nú akáandɔ́ núkííkené wɔ, ne epú unyɛɛ́: Afalafál u akáandɔ́.» 40Yésus ɛ́ɛ́pí á Falisiɛ́ŋ ɛ́ɛ́: «Símun, inyɛ no puónyi yaambanɛ́ɛ kukuɔyitɛn.» Símune woondinyi ɛ́ɛ́: «Oŋónyóonyi, kála yɔɔ́kupítɔ́likɔn.» 41Yésus ɛ́ɛ́pí kɛ́ɛ́yɛ́ ɛ́ɛ́: «Mɔɔnd omotí wookooli pɛɛnd páandɛ́ muenyí. Ɔɔlɔ́ ú mɔɔnd ukutúan mapá útápukan ú mɔɔnd ukandiɛ káát kaayɔ́. 42Aná pɛɛnd pakáánɛ́ mɛɛ́l pátipián puandá pú kusámb siɔlɔ́ síɔ́p, mɔɔnd umoólí pɔ́ waayapɛn pɔ́ siɔlɔ́ peem páandɛ́. Íŋɔyítɛn, ɛ́ pɛɛnd pakáánɛ́ páandɛ́, unín ukɔɔ́nyɔ́ɔyɔ mɔɔnd umoólí pɔ́ muenyí kutápɔk?» 43Símune woondinyi ɛ́ɛ́: «Yaápítááka ɛ́ɛ́ ewú ɔɔlɔ́ wɛ́ɛ́yɛ́ maápá kiandákáand.» Yésuse kɛ́ɛ́yɛ́ ɛ́ɛ́: «Amáánɔ́n peseé.»
44Yésuse wɛɛpíkɛkɛlɛt akáandɔ́, wɔ́ é Símun ɛ́ɛ́: «Ɛmɛ́ɛ́n akáandɔ́ ewe á? Insiepíkin kuawɔ tɛ ɛ́ɛ́ ímfá moomb má kupísukɛt pikɔ́nd, wɔ́, na andilɛ́ yɛ́ɛ́yɛ́ umínsukɛ́t pɛ́ɛ umóónd umówóónít pɛ́ɛ ne tuúnye túɛ́yɛ́. 45Etimíndúm piɔ́lɔ́lí píáwɔ pí niít á nuáyu ó kuŋóli aká insiákasiám, wɔ́, ekéné aká insiépíkin kuawɔ unyɛ kundúme éé kundúme piɔ́lɔ́lí píɛ́yɛ́ pí niít ɔ́ pikɔ́nd. 46Etimínwúú kisɛŋ kí niaŋɔ́ kɛ́ ɛ́tɔ, wɔ́, umínwúú elepínde ɔ́ pikɔ́nd. 47Kúúkɔ́ yɛɛlɛnɛ́ kááwɔ ɛ́ɛ́ imáyapɛ́n wɔ́ ɔ́ pulɔŋ kɔ́lɔŋ púɛ́yɛ́ pú pifal, aná uményindíínyí ɛ́ɛ́ wɔɔ́kiŋɔyɔ kutápɔk. Ewú pámányiyapɛ́n wɔ́ á pifal kati kúsólée ɔ́ɔ́kɔɔyɔ kɛ́kɛ́ɛ́yɛ́ kati kúsólée.» 48Yésus ɛ́ɛ́pí kɔk ká akáandɔ́ ɛ́ɛ́: «Imákuyapɛ́n á pifal píáwɔ.»
49Pɛɛnd pólotí pámaápíyaká ɔlɔŋ ne Yésus pɔ́ɔ́kɔɔ́p epú umɔɔ́yítɛ́n akáandɔ́; póond ɔ́ kuɔyɔ kɔ́ɔ́p kí itɛ́m ɛ́ɛ́: «Ɛ́nyɛ́ wɛɛ́tɛ ewe uyapaninɛ́ɛ pɛɛnd á pifal píɔ́p?» 50Yésus ɛ́ɛ́pí ká akáandɔ́ ɛ́ɛ́: «Pipíóndínyí ɔtɛ́m píáwɔ móókusóti. Tótó oó, kiyeéwe pá naawɔ.»
ទើបបានជ្រើសរើសហើយ៖
Lúúkas 7: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
Lúúkas 7
7
Pipíóndínyí ɔtɛ́m pí mɔnɔ́ lóma
(Mat 8.5-13; Isŋ 4.46-54)
1Yésus mɛɛlɛ́ úmáaman kuónyonyi pɛɛnd, waayɔɔk Kapɛlɛnawúum. 2Mɔnɔ́ Lóma omotí, ɔkɔ́n u ɔlɔŋ ú petííti etín átáán, mapá kɔ́ɔk; wɔ́ nɔ kiɔ́lí kíɛ́yɛ́, wɔɔyɔ kɛ́ɛ puólíkóoli, kípítáyan táásɛ mekúye ne niku. 3Umɛɛlɛ́ úmɔ́ɔ́p pɛ́tɛɛtɛn Yésuse, waatúmɛn wɔ́ posíósíó pómotí pɛ́ Pɛyúútɛn ó kuopísókólítí wɔ́ ɛ́ɛ́ wéésiéŋúkí kiɔ́lí kíɛ́yɛ́. 4Páásiámɛ́n Yésuse, pákanyɛɛ́ ɛpíyɛ́kɛlɛn wɔ́ ní imbísókólí, pɛ́ɛlɛ ɛ́ɛ́: «Mɔɔnd ukáánɛ́ ɛ́ɛ́kɛɛsikɛnɛn ɛ́ɛ́ ɔ́ɔk wɔ́, 5á kiákí ɛ́ɛ́ wɔɔ́túɔ́yɔ táásɛ pasɔ́ Pɛyúútɛn; wɔ́ unyɛɛ́ awááká kiansi kíásɔ́ kí imbísókólí.» 6Yésuse wɔɔŋ kɔ́ɔ́p. Pɛ́mɛɛlɛ́ pákanyi mekúye na nuyá, ɔkɔ́n u ɔlɔŋ ú petííti waatɔ́m pekúl pɛ́ɛ́yɛ́ ɛ́ɛ́ pɛ́ɛl é Yésus ɛ́ɛ́: «Ɔkɔ́n, ɔtikɔ́l mukáánɛ́ muyú ɛ́ɛ́ áasiám kuamɛ, á kiákí ɛ́ɛ́ indipá yɛɛsikɛnɛn ɛ́ɛ́, aŋúɛ, epíkin káámɛ á kiansi. 7Púupɔ́ imɛ́nyɛɛlɛ́ indiól ɛ́ kuɛsikuɛ́n iŋú muɛ́t; kúukɔ́ iŋupísókolonyée, síkoli kálɛ́t kukálɛt kipúk kímoómí, kiɔ́lí kiámɛ ééŋuk. 8Á kiákí ɛ́ɛ́, iŋúɛ inyɛ nɔ pɔkɔ́n yɔɔ́pinɔnɛ́ pɔ, inyɛ iŋú muɛ́t ɔkɔ́n u ɔlɔŋ ú petííti píŋɔ́pinɔnɛ́ɛ; aká imɛ́nyɛɛlɛ́ ɛ́ wɛɛ́tɛ ɛ́ɛ́: Apá, waáyuukan; aká imɛ́nyɛɛlɛ́ ó woolotí ɛ́ɛ́: Ólo, woókoólon; indían kiɔ́lí kíámɛ ɛ́ɛ́: Ɛlɛ́ pusɔ́m epue, kíɛ́kɛɛlɛ pɔ.» 9Úmáaman ɔpítɔ́likɔn tukál etue, Yésuse waayíkina ɔkɔ́n u petííti; wɛɛpíkɛkɛlɛt, wɔ́ ké embúl ú pɛɛnd pɔ́mɔɔ́ŋɔn kɛ́ɛ́yɛ́ ɛ́ɛ́: «Yɔɔ́núɔ́yɔn kémuémue ɛ́ɛ́ epié pipíóndinyi ɔtɛ́m imanyi indiɛ́n pɛ́ɛ tɛ ku mɔnɔ́ Yúútɛn omoómí.» 10Pekúl pɔ́ ɔkɔ́n u petííti póósiondó. Páásiámán á nuyá nú ekúl wɔɔpɔ́, póókóóki kiɔ́lí kíɛ́yɛ́ kilikil.
Yésus méényí muɔ́nɔ́ u kisík kí akáandɔ́ umeékú
11Kúépéli, Yésuse waayɔok á pálɛ́k omotí kisiɛ́n ɛ́ɛ́ Nayíin. Popíónyí pɛ́ɛ́yɛ́ ne embúl ú pɛɛnd ɔ́ɔ́ŋɔn kɛ́ɛ́yɛ́. 12Umɛɛlɛ́ úkanyɛɛ́ úpíkin á pálɛ́k, páyuukan ó kuonyoó kinɔ́k kímotí kímeékú, kinsuúŋulɛ kí muɔ́nɔ́ u kisík kí akáandɔ́. Pɛɛnd puólíkóoli pá pálɛ́k óól pétílíkén kísík kikáánɛ́. 13Ɔkɔ́n Yésus mɛɛlɛ́ wɛɛ́nɛn kisík kikáánɛ́, wɛɛ́n kɛ́ɛ ɔsɔk, wɔ́ kɛ́ɛ́yɛ́ ɛ́ɛ́: «Atiandá apaŋɛt.» 14Weepísíit, weekíik kiwɔ́lɔ; pɛɛnd pámaápá pápítúúkán kiku péétélimit; wɔ́ ɛ́ɛ́: «Muɔ́nɔ́, yɛɛ́pí kááwu ɛ́ɛ́: ɛnyɔk.» 15Kikú kíɛnyɔk, kíɔ́nyɔ́mbɛt, kíond á kukála. Yésus ɛ́ɛ́pí ó yóótí ɛ́ɛ́: «Akáandɔ, muɔ́nɔ́ ááwɔ ewe.» 16Puwaá púɛ́tikin pɛɛnd kitikit, péélémbesi Támbákɛ́ɛ, pɛɛlɛ ɛ́ɛ́: «Kiandá kí eŋémímekélíe má Támbák máám kuasɔ́, Támbák mápítáákɛ́t nisíp níɛ́yɛ́.» 17Puandá pukáánɛ́ Yésus mɛɛ́lɛ́ púásálamand Yuté nɔ pitɔŋ pí masia.
Isáaŋ Etuúsí mátɔ́m popíónyí pɛ́ɛ́yɛ́ ku Yésus
(Mat 11.2-6)
18Popíónyí pí Isáaŋ páátían wɔ́ maandá makáánɛ́ kitikit Yésus mɛɛ́lɛ. Kɔ́ ɔlɔŋ wɛ́ɛ́yɛ́ ú popíónyí, Isáaŋɛ waapílikɛn popíónyí páandɛ́, 19waatɔ́m pɔ́ ku Ɔkɔ́n ó kuówún wɔ́ «índɛ wɔ́ unyɛɛ́ Kilíise, wɛɛsikɛnɛnɛ́ kuól éyí, kúnyaánɛ tuɛ́kɛsikɛnɛn kupéétenyi sɔ́k olotí?» 20Pányaámin Yésuse, pɔ́ kɛ́ɛ́yɛ́ ɛ́ɛ́: «Isáaŋ Etuúsíe úmányitútɔ́m kuawɔ ó kuosikuówún ɛ́ɛ́: anyɛ Kilíise tupéétenyé éyí, kúnyaánɛ tuɛ́kɛsikɛnɛn kupéétenyi sɔ́k olotí?» 21Á kiátákáánɛ́ kisikɛl, Yésuse weéŋuki pɛɛnd puólíkóoli pámaánúmá á tunamá á tunamɛ́ɛ, pɔ́ pilɔk pí piliínditíe, woond ufuune eŋis yé pepútepute kutek póond ɛ́ kuɛ́nɛn. 22Woondinyi kɔk popíónyí pí Isáaŋ, wɔ́ kɔ́ɔ́p ɛ́ɛ́: «Ánuupɔ́, nútían Isáaŋɛ epú númɛ́nyɛɛ́n ne epú númɔ́nyɔɔ́p: pepútepute kanyɛɛ́ kuɛ́nɛn; pinsɛ́kɛlinɛ ɛ́ɛndɛ, pekúnukun ééŋuken iŋún sákinan, patúkúlútukɔl ɔ́ɔ́pɔn, pikú ɛ́ɛnyukɛn, pɔsúkɔsukɔ pítɔ́likɔn Insɔ́m Yi indámb; 23peseé ne ewú upíóndonyé ɔtɛ́m naamɛ siki puɔ́síɛ tɛ kupínanɛ.»
Epú Yésus pítáákanɛ́ kí Isáaŋ Etuúsí
(Mat 11.7-11)
24Pɛɛnd Isáaŋ maátɔm mɛɛlɛ́ pómóond, Yésuse woond ɔ́ kuɔyɔn embúl maandá mómoóyooson Isáaŋɛ, wɔ́ kɔ́ɔ́p ɛ́ɛ́: «Kiákí numányiipɛ́ kuoyoósón ɔ́ kiɔ́sɔ́kɔlíɔ? Nupal emfún sápanɛ́ nú á? 25Kiákí kɔk númɛ́nyɛɛ́nɛn? Mɔɔnd umɔɔ́pisɔnɔ́ indífɔnɔ́ yi efuŋ á? Epé pɛnyɛɛ́ pɔpísɔnɔ́ indífɔnɔ́ sí muenyí póond pɔ́sɔ́tɔn peseé nyɛ á tuyá tú pefuŋ. 26Kiákí kɔk númɛ́nyɛɛ́nɛn? Eŋémímekélíe má Támbák á? Ɛɛɛŋ, yɔɔ́núɔ́yɔn ɛ́ɛ́ tɛ eŋémímekélíe ukáánɛ́ waátápukan wɔ́. 27Á kiákí ɛ́ɛ́ Isáaŋ nyɛ ewú Mekélíe má Támbák ɔ́ɔ́yɔɔnɛ́ɛ kɛ́ɛ́yɛ́ ó pusíó ɛ́ɛ́: Ɔ́nupítɔ́líkɛn! Iŋúɛ Támbákɛ́ɛ, yoófookosi oŋoyí niɔy waamɛ kááwɔ ó pusíó, úkutɛ́fɛn iŋilí yaawɔ. 28Yésuse andíkɛ́k kɔ́ɔ́p ɛ́ɛ́: Yɛɛ́pí káánɔ́ ɛ́ɛ́, pámanyi pétipién mɔɔnd é kúúsí ekue utápukanɛ́ Isáaŋɛ; tɛ nɔ, weekétíkétie é Pufuŋ pú Támbák áátápukan wɔ́.»
Kikólio kí Isáaŋ ne kí Yésus
(Mat 11.16-19)
29Yésuse waasuŋɔn, wɔ́ ɛ́ɛ́: «Pɛɛnd kitikit ne petúúsi lemfúe pɔ́mɔɔ́pítɔ́líkɔ́n Isáaŋɛ, péétíínyi ɛ́ɛ́ Támbák nyɛ indɛ́ndɛ́nɛ, aná pámaáyɔɔ́k ku Isáaŋ weetu pɔ. 30Na Pafalisiɛ́ŋ ne pemenyí pikotí pɔ́ pééken nuketi nú Támbák kɔ́ɔ́p ó pusíó, aná péémeén ɛ́ɛ́ Isáaŋ tuu pɔ 31Íŋeti pɛɛnd pí inanɔ káányí? Pányɛ ɛlɛɛ́ ɛ́nyɛ́ɛ? 32Pányɛ asɛ paápayɔ́ pɛ́nyɛɛ́ pɔnyɔ́l kɔ́ ɔ́ɔ́nd ú nionyí pátúútaninɛ́ɛ tukál; epe ɔ́ɔ́yɔn pɔsɔ́k ɛ́ɛ́:
“Tumɔ́nútɔ́ŋɔ́n inselí, tɛ ɛ́ɛ́ núpínite;
Tumɔ́tɔ́ŋɔ́ isak sí ambaŋɔ́, tɛ ɛ́ɛ́ núpaŋitɛ.”»
33«Á kiákí ɛ́ɛ́, Isáaŋ Etuúsí óól, utinyáán múkunyá pɛɛnd nyáanɛ́ɛ, utipúwáán makɛp, nuɛl ɛ́ɛ́: “unyɛ nɔ kilɔk kí kiliínditíe.” 34Muɔ́nɔ́ u mɔɔnd óól, unyáan, upúwáan, nuɛl ɛ́ɛ́: “Mɔɔnd ukáánɛ́ nyɛ kupíyakɛɛ́ kupíyak, makípɛɛ́ makɛp, ekúl u petúúsí lemfúe na pafalfal.” 35Maná paán pá Támbák peem éémenyen ɛ́ɛ́ tutátɔ́ túɛ́yɛ́ nyɛ indɛ́ndɛ́nɛ.»
Ne Yésus na afalfál u akáandɔ́
36Epué puɔ́s, Falisiɛ́ŋ omotí waapílikɛn Yésuse ɛ́ɛ́ wáányá kuɛyɛ́. Yésuse waayɔɔk, weepíkin á kiansi kí Falisiɛ́ŋ ukáánɛ́, wɔɔnyɔ́mbɛt á kunyáan. 37Afalafál u akáandɔ́ omotí mapá á pálɛ́k ukáánɛ́. Umɛɛlɛ́ nɔ kuɔ́p ɛ́ɛ́ Yésus ápiyaka ku Falisiɛ́ŋ wɛɛ́tɛ, waanyatɔ́k, weepíkin; wɔ́ nɔ kinɔ́k kí indók i elepínde. 38Akáandɔ́ weetélimitin Yésuse é kélém no niónyi á masiá mɔ́ pikɔ́nd, weeyúpi pɛ́ɛ na andilɛ́ yɛ́ɛ́yɛ́; woond ó kuwóno pɛ́ɛ ne tuúnye túɛ́yɛ́, utúme pɛ́ɛ piɔ́lɔ́lí píɛ́yɛ́ pí niít woond uwéénen pɛ́ɛ elepínde.
39Falisiɛ́ŋ Yésus maápá kuɛyɛ́ mɛɛlɛ́ wɛɛ́nɛn nɔ, wɔ́ kɛ́ɛ́yɛ́ kɔ́ ɔtɛ́m ɛ́ɛ́: «Mɔɔnd ewe síákápá eŋémímekélíe má Támbák, usiémenyi nunamá nú akáandɔ́ núkííkené wɔ, ne epú unyɛɛ́: Afalafál u akáandɔ́.» 40Yésus ɛ́ɛ́pí á Falisiɛ́ŋ ɛ́ɛ́: «Símun, inyɛ no puónyi yaambanɛ́ɛ kukuɔyitɛn.» Símune woondinyi ɛ́ɛ́: «Oŋónyóonyi, kála yɔɔ́kupítɔ́likɔn.» 41Yésus ɛ́ɛ́pí kɛ́ɛ́yɛ́ ɛ́ɛ́: «Mɔɔnd omotí wookooli pɛɛnd páandɛ́ muenyí. Ɔɔlɔ́ ú mɔɔnd ukutúan mapá útápukan ú mɔɔnd ukandiɛ káát kaayɔ́. 42Aná pɛɛnd pakáánɛ́ mɛɛ́l pátipián puandá pú kusámb siɔlɔ́ síɔ́p, mɔɔnd umoólí pɔ́ waayapɛn pɔ́ siɔlɔ́ peem páandɛ́. Íŋɔyítɛn, ɛ́ pɛɛnd pakáánɛ́ páandɛ́, unín ukɔɔ́nyɔ́ɔyɔ mɔɔnd umoólí pɔ́ muenyí kutápɔk?» 43Símune woondinyi ɛ́ɛ́: «Yaápítááka ɛ́ɛ́ ewú ɔɔlɔ́ wɛ́ɛ́yɛ́ maápá kiandákáand.» Yésuse kɛ́ɛ́yɛ́ ɛ́ɛ́: «Amáánɔ́n peseé.»
44Yésuse wɛɛpíkɛkɛlɛt akáandɔ́, wɔ́ é Símun ɛ́ɛ́: «Ɛmɛ́ɛ́n akáandɔ́ ewe á? Insiepíkin kuawɔ tɛ ɛ́ɛ́ ímfá moomb má kupísukɛt pikɔ́nd, wɔ́, na andilɛ́ yɛ́ɛ́yɛ́ umínsukɛ́t pɛ́ɛ umóónd umówóónít pɛ́ɛ ne tuúnye túɛ́yɛ́. 45Etimíndúm piɔ́lɔ́lí píáwɔ pí niít á nuáyu ó kuŋóli aká insiákasiám, wɔ́, ekéné aká insiépíkin kuawɔ unyɛ kundúme éé kundúme piɔ́lɔ́lí píɛ́yɛ́ pí niít ɔ́ pikɔ́nd. 46Etimínwúú kisɛŋ kí niaŋɔ́ kɛ́ ɛ́tɔ, wɔ́, umínwúú elepínde ɔ́ pikɔ́nd. 47Kúúkɔ́ yɛɛlɛnɛ́ kááwɔ ɛ́ɛ́ imáyapɛ́n wɔ́ ɔ́ pulɔŋ kɔ́lɔŋ púɛ́yɛ́ pú pifal, aná uményindíínyí ɛ́ɛ́ wɔɔ́kiŋɔyɔ kutápɔk. Ewú pámányiyapɛ́n wɔ́ á pifal kati kúsólée ɔ́ɔ́kɔɔyɔ kɛ́kɛ́ɛ́yɛ́ kati kúsólée.» 48Yésus ɛ́ɛ́pí kɔk ká akáandɔ́ ɛ́ɛ́: «Imákuyapɛ́n á pifal píáwɔ.»
49Pɛɛnd pólotí pámaápíyaká ɔlɔŋ ne Yésus pɔ́ɔ́kɔɔ́p epú umɔɔ́yítɛ́n akáandɔ́; póond ɔ́ kuɔyɔ kɔ́ɔ́p kí itɛ́m ɛ́ɛ́: «Ɛ́nyɛ́ wɛɛ́tɛ ewe uyapaninɛ́ɛ pɛɛnd á pifal píɔ́p?» 50Yésus ɛ́ɛ́pí ká akáandɔ́ ɛ́ɛ́: «Pipíóndínyí ɔtɛ́m píáwɔ móókusóti. Tótó oó, kiyeéwe pá naawɔ.»
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL