Lúúkas 24
24
1Kuépéli, puɔ́s sɔ́ɔ́nndiɛ tálanɛ, kiɛmɛ́ɛm túú, pɛɛ́tɛ pakáandu póond á kipɛ́l nɛ pisɛŋ ne peelepínde pámaánambuna. 2Pookóóki nitányí pemeéfuuk kipɛ́l nani nitíŋílényí ámasia. 3Peepíkin, tɛ ɛ́ɛ́ pomókóóki kikú kí Ɔkunu Yésus. 4Aná pɛmɛɛlɛ́ petimenyen epú pɔɔyitɛ́, pɛɛnd páandɛ́ paámini pɔ wa, ni insunú símuɛnyɛ. 5Puwaá puɛtikɛn pɔ, pɔɔlɔŋɛk mosio poyooson kúúsí, pɛɛnd pakáánɛ kɔ́ɔpɔ́ ɛ́ɛ́: «Kiákɛ́ nuambanɛ́ɛ wɔɔkɔ́siɛ ɛ́ kikɛtɛ́kɛtɛ́ɛ kí peekúén á? 6Utipa akɛ, usiɛnyɔk á pilɔ́ŋ. Anupítáákɛ́t aná umɔɔ́núɔyɔn umanyi Kalilée; 7umaápá wɔyɔ ɛ́ɛ́: “Púɛkɛsikɛnɛn ɛ́ɛ́ pɛsɛm Muɔ́nu u mɔɔnd á pafalfal pɛ́ pɛɛnd, pɔtɔɔndɛn wu ókolóse, kátátúɛ́ wɛɛyɛ́ wɛ́nyɔk á pilɔ́ŋ.”» 8Pɔ́ kuasipítáákɛt kɔk tukál tú Yésus; 9paniatɔ́k ákipɛ́l, pɔsiɔyitɛn Páátanoomoómí, nɔ pɔsɔ́k pólotí peem. 10Pakándu pakáánɛ pamaápá ɛ́ɛ́: Maalíɛ ú Makatala, Isáanɛ, na Malíɛ, yóótí Sáak. Pɔkuɔ́p pomotí pamaápa ɔlɔŋ nɔɔpɔ́, pɔ́kɔ́kɔɔ́p pátíánan petúmí niɔy niɛ́tɛ táŋ nimoómí. 11Kéŋis yépetúmi pakáandu pakáánɛ mapá pepítémbélenyi, tɛ ɛ́ɛ́ páátap epú pɔmɔ́ɔyɔ. 12Tɛ nɔ, Píɛlɛ waayuuku nɔ ɔtit ákipɛ́l; wáman, úkutumite, wɛ́nin é piénsi pí papándásiɛ pɛ́ na pɛ, woond kuɛyɛ́ wól úsímilé puandá epú púmɛɛ́piɛ́l.
Yésus má ámin Popíónyí páandɛ́
13Puɔ́si nɔ puɔ́s puɛ́tɛ, popióny páandɛ́ mayuukan ɔ́kitɔŋ papílanɛ́ ɛ́ɛ́ Emayúus; kuatɔk Yelúsalɛm kuám kɔ́ɔk nyɛ pikulɛ́ píándɛ́ pí ɛŋɛnd nɔpikɔ́nd. 14Póól pɔ́ɔ́yɔ maandá makáánɛ kitikit mɛ́mɛɛ́píɛ́lɛ́. 15Pɛmɛɛlɛ́ panyɛ á kukála pond pepekenyipekenyi, Yésuse walát kɔ́ɔ́p, póond ɛ́kuɛndɛ ɔlɔŋ. 16Pamapá pɛɛ́nɛn wɔ, maná puandá pumotí sésenyi pɔ ɛ́ɛ́ petimenyi wɔ.
17Wɔ́ kɔ́ɔ́p ɛ́ɛ́: «Kiákɛ́ kikáánɛ nuóle nukála iŋilí kitikit?» Peetélimit, tuɔ́l tuotíkón. 18Épeem páándɛ, ewú umaápá kisiɛ́n ɛ́ɛ́ Kiliópasɛ kanyɛ kɛ́ɛ́yɛ́ ɛ́ɛ́: «Aŋúɛ na aŋu, ɛ́pɛɛnd pɔnyɔ́mbitɔnɛ́ Yelúsalɛm, eleemené puandá pú ɛnipíɛ́lɛ kɔ́ɔk metúk eme á?» 19wɔ́ kɔ́ɔpu ɛ́ɛ́: «Kiákí kɛ́ɛ?» Poondinyi wɔ́ ɛ́ɛ́: «Puandá pú ɛ́niɛ́l Yésuse u Nasalɛt! Wápá kikaaka kí eŋémímekélíe má Támbák; wétíínyi pukaaka puɛ́yɛ kɛ́ɛ́yɛ́ é meelíe ne mekélíe mɛ́yɛ́ ké eŋís yá Támbák nɔ yɔ́kitɔŋ kitikit. 20Pɔɔfunúfɔn pásu pɔ́ɔkɔ́n nɔ pɔkɔ́n pɔ́kitɔŋ ɛ́sɛm wɔ, pɛɛpɛn wɔ ɛ́ɛ́ wɛ́kɛsikɛnɛn kuku; pond pɔɔtɔɔndɛn wu ó kolóse. 21Pasu tuópíóndónyí itim ɛ́ɛ́ wɔ́ ukaániáŋun Isilayɛ́ɛl. Maná, ɔ́kuɔ́yikɛn ámaandá makáánɛ kitikit, índɛ atátúɛ́ wɛɛyɛ́ ewe maandá makáanɛ́ ɛ́nipíɛ́lɛ. 22Tɛ nɔ, pakáandu pomotí kásɔ́ kɔ́ɔlɔŋ métupuéŋitenyi meéne; aná pasia áyuuku kiɛmɛ́ɛm kiɛmɛ́ɛm túú ákipɛ́l, 23tɛ ɛ́ɛ́ pomókóóki kikú kí Yésus, pɔmɔ́ɔsiɔyɛt ɛ́ɛ́ Peéŋele siámín pɔ, pɔ́ kɔ́ɔ́p ɛ́ɛ́ Yésus nyɛ ɔkɔ́si. 24Pakuásɔ́ pómotí máyuuku ákipɛ́l, epú posioókóóki puandá pú moómi neepú pakáandu siɔ́kɔyɔ; wɔ́ kɔk, pɛtimɛ́ɛ́n wɔ.»
25Yésuse kɔ́ɔpɔ́ ɛ́ɛ́: «Pɛɛnd pákatɛ meéne, itim siánu tipá síátapan kuɛ́kɛt maandá kitikit peémímekélíé má Támbák mɔ́ɔyɔ! 26Pútiɛ́ɛsikɛnɛn ɛ́ɛ́ Kilíis ɛ́n iŋɛ́n anakáánɛ́ maná wɔ́pɔkimɛt kɛ́ɛ́yɛ́ é nuúmu á?» 27Waaman ɛsɛkunɛn pɔ́ kí Imfiɔ́ŋ kitikit epú púmoóyooson wɔ, kuetúmín ésí Moyíis kuák ésí peémímekélíé má Támbák kitikit.
28Pɛmɛɛlɛ́ pakanyɛ mekúye nɔ kitɔŋ pamaáyuukan, Yésuse wɛɛl asɛ umaásuŋuna nɛ ɛŋɛnd. 29Pakanyɛ́ ɔnɔtɔ kunɔtɔ kɛ́ɛ́yɛ́ ɛ́ɛ́: «Lɔpɔ́ naasɔ́ á kiákí ɛ́ɛ́ putúku tikápá kaáyɛ, puɔ́s mámaná kuɛsɛndimɛt.» Wepíkini ɔ́kulɔp nɔɔpɔ́. 30Umɛɛl úmɔ́nyɔmbɛt ɔlɔŋ nɔɔpɔ́ ákupíyaka, wɔɔkɔ́l kilɛ́ɛt, welémbi Támbákɛ́ɛ, wɛɛ́ns kɛ́ɛ, weeki pɔ. 31Kákáanɛ́ eŋis yɔ́ɔ́p mɛɛ́siɛ́ndɔk, peemeny wɔ, wasákinɛn pɔ. 32Pakanyɛ pɔ́ nɔ pɔ ɛ́ɛ́: «Pútimáapá ɛlɛɛ́ pétúseŋule aká umánipá utúkálan kí iŋilí, utúsɛkunɛn Imfiɔŋ á?» 33Kɔ́ɔk nɔ kɔ́ɔk, paatukɛn, póond Yelúsalɛm; pookóóki pá Páátanoomoómi nɔ pɔkuɔ́p pómoti papíkúsá; 34pɔsɔ́k pomoókóóki ɛ́pi kɔ́ɔpɔ́ ɛ́ɛ́: «Kémuémue wu! Ɔkunu siɛɛnyɔk ápilɔ́ŋu, usiaámin Símune.»
35Pɔ́ kɔ́kɔ́ɔp paatían pɔ́ epú púmɛ́nipiɛ́l kíŋilí aká pamániyuukan ɔ́kitɔŋ na aná peménimenyin wɔ kɛ́ɛ́yɛ́ ɛ́kuɛ́ns kúkilɛ́ɛt.
Yésus máámin Páátanoomoómi
36Pɛmɛɛlɛ́ pamaákála, Yésuse wɔ́ muɛ́t wa! kɔ́ɔ́p ɛ́ kikɛtɛ́kɛtɛ́ɛ, wɔ́ kɔ́ɔ́p ɛ́ɛ́: «Kiyeéwe pá naanɔ́!» 37Púakaŋɛt pɔ, puwaá puɛtikɛn pɔ, papítááka ɛ́ɛ́ pɛmɛ́ɛ́n inyɔl. 38wɔ́ kɔ́ɔpɔ́ ɛ́ɛ́: «Kiákɛ́ meéne mánɔ nyɛ́ mepuéŋenyi, kiákɛ́ sikáánɛ imfɛ́lɔ́ nyɛ́ kánɔ́ kí itim? 39Ónuyoosín ímbɔk siámɛ nɔ pikɔ́nd piámɛ, iŋúɛ wɔ. Énuŋíik, ɛ́nuɛ́nɛ, inyɔl tipá ne emekú tɛ kikóókó aná nuŋɛ́nɛnɛ́ nɔ mɔ.» 40Umɛɛl úmɔ́ɔyɛt nɔ, wetíínyi pɔ́ imbɔku síɛ́yi nɔ pikɔ́ndu píɛ́yi. 41Aná anyamɔ́ wɔ́ɔp maápá kiandákáand, pamany pátiátáp pond pesímile, wɔ́ kɔ́ɔpɔ́ ɛ́ɛ́: «Nunyɛ na púkunyá akɛ á?» 42Patáaŋ wɔ kiénsi kíyɔɔpɔ́ pamaáwaanan. 43Wɔkɔ́l kɛ́ɛ, wanyá kɔ́ɔ́p ké eŋis.
44É kélém kuɛ́yɛ́, wɔ́ kɔ́ɔpu ɛ́ɛ́: «Índɛ́ tukál etue imɔɔ́núɔyɔn aká imaápá imanyɛ naanɔ́: púɛkɛsikɛnɛn ɛ́ɛ́ epú kitikit pú yoosoné pɔmɔɔŋ kɔ́ ɔmbɔp ú Kikotí kí Moyíis, ne sí Peémímekélíé má Támbák na ú Pilɛ́l píwónyi.» 45wɔ́ kɔk kufuun pɔ́ meéne ɛ́ɛ́ pɔ́ɔ́p Imfiɔ́ŋu, 46woond wɔ́ kɔ́ɔpɔ́ ɛ́ɛ́: «Púnyɛ yáana pɔmɔ́ɔŋ ɛ́ɛ́: Kilíis ɛ́niɛ́n iŋɛ́n, ukú woond wɛnyɔk á pilɔ́ŋ átátúɛ wɛɛyɛ́, 47poól pekémé ɔ́ pitɔŋ kitikit píkúsi kinúkie na kiyapina kí pifal kɛ́ɛ́yɛ́ ɛ́kisiɛ́n, kú etúmín Yelúsalɛm. 48Panɔ́ nunyɛ́ petétúny pámaandá makáánɛ kitikit. 49Niŋúɛ, yánutúmanɛn epú Taatá maátán káanu ó pusío. Páánɔ, ánupáapá á paliki kuám aká pukaaka púóninuóline muɛnɛ́ ánipáanɛ́ káanɔ.»
50É kélém kuɛ́yɛ́ Yésuse wayuuku nɔɔpɔ́ kɔɔ́mɔ kómotí kiáyí kí Petaní, weetukenyi imbɔ́ku, woond ékupínúune pɔ. 51Umɛɛlɛ́ umeépínúne pɔ, waátukan nɔɔpɔ́, Támbákɛ́ɛ wɛnyɛ́lɔn wu, weméketi wu mɛnɛ́mɛnɛ́ɛ. 52Pɔ́, pɛmɛɛlɛ́ na kuman kuómokosi wu, póond Yelúsalɛm anyamu ɔtim táásɛ; 53Petisúkén á kitamb kí Támbák é kulémbesi wɔ.
ទើបបានជ្រើសរើសហើយ៖
Lúúkas 24: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
