Lúúkas 2
2
Malíá mépíén Yésuse
1Ɛ́ kiɛ́tɛ kisikɛl, efuŋ wɔɔkɔ́n, kisiɛ́n ɛ́ɛ́ Sesáali Ókuse, weeki pukaaka ɛ́ɛ́ páánan pɛɛnd pɔ́ pitɔŋ kitikit pimaápá kɛ́ɛ́yɛ́ á kipia. 2Kiana kiɛ́tɛ mapá kíkutúan á kisikɛl Kilíniyus maápá ɔŋgɔ́munɛ é kiénsi kí kúúsí kí Silí. 3Pɛɛnd peem mayuúkán ɔ́ kuɔpíɔ́ŋɔ, siki mɔɔndɛ á pálɛ́k pémeépién wɔ́. 4Yúsipɛ kɛ́kɛ́ɛ́yɛ́ waapúlɔk Násalɛt, pálɛ́k u kiénsi kí kúúsí kí Kalilée, ɛ́ɛ́ úyɔɔk á pálɛ́k u Tafíit kisiɛ́n ɛ́ɛ́ Pɛ́tilɛhɛ́ɛm, é kiénsi kí kúúsí kí Yuté, á kiákí ɛ́ɛ́ umapá indaandɔ́ i Táafit. 5Waayɔɔk nɔ kiɔŋinɔ kíɛ́yɛ́, Malíɛ, ɔ́ kuɔpíɔ́ŋ; Malíá mapá ne niim.
6Pɛ́mɛɛlɛ́ pámanyi Pɛ́tilɛhɛ́ɛm, muɔ́nɔ́ weepul Malíɛ́. 7Weepíen mɔnɔ́ ɛnúmɛndɔ́ wɛɛyɛ́ ukutúan, wɔɔnyɔ wɔ́ ni índífɔnɔ́ weepítikenyi wɔ́ á ninyá ní melúk á kiákí ɛ́ɛ́ pátimapia ninyɔ́l ɔ́ nipiɔ́yɛt ní peendí. 8Ɔ́ kitɔŋ kiɛ́tɛ, pekííkí melúk mapá pápítiman mɛtíɛ́púlɛ́ɛ á kukííka melúk mɔ́ɔ́p. 9Éŋele u Ɔkɔ́n Támbák waámɛn pɔ́ɔ, Nukanyi nú Ɔkɔ́n núɔ́pɔŋ pɔ́ɔ ne kisie, puwaá púɛ́tikɛn pɔ́ɔ táásɛ. 10Éŋele ɛ́ɛ́pí kɔ́ɔ́p ɛ́ɛ́: «Nutitíín, índɛ́, imónuólín na kiták kí niɔy, níkɛɛ́nyɛ́ɛl ɛ́ɛ́ pɛɛnd peem ɔ́ɔ́p peseé táásɛ, níi nínyɛɛ́ ɛ́ɛ́: 11é putúk pú ínanɔ, á pálɛ́k u Tafíit, péménúpíénín Osótí, wɔ́ unyɛɛ́ Kilíise, Ɔkɔ́n. 12Pulinsí epue púkaáná enútíínyi wɔ́: nukaná ekééki kiendine kiɔnyɔ́ ni indífɔnɔ́ á ninyá ní melúk.» 13Kɔ́ɔk nɔ kɔ́ɔk pulɔŋ kɔ́lɔŋ pú Peéŋele puólín mɛnɛ́mɛnɛ́ɛ pɔ́ɔ́siɔ́yíkínɛ́n wɔɔkúɔ́p póond ó kuómokosi Támbákɛ́ɛ, pɔ́ɔ́yɔ ɛ́ɛ́:
14«Nuúmu pá na Támbákɛ́ɛ unyɛɛ́ insaánupúlɛ́ɛ
kiyeéwe pá é kúúsí ɛ́ pɛɛnd wɔɔyɔɔnɛ́ɛ.»
Pekííkí melúk máyɔɔ́k Pɛ́tilɛhɛ́ɛm
15Pe Éŋele mɛɛlɛ́ póondon mɛnɛ́mɛnɛ́ɛ, pekííkí melúk kanyi pɔ́ɔ nɔ pɔ́ɔ ɛ́ɛ́: «Ɛ́nyɛɛ́ túyɔɔk Pɛ́tilɛhɛ́ɛm. Tuɛ́píɛ́nɛ́n puandá púmɛ́nyipíɛ́lɛ́, epú Ɔkɔ́n mɛ́nyɛɛlɛ́ ɛ́ɛ́ túmenyi.» 16Pɔ́ɔ́kɔ́l iŋilí pááyɔɔk pɛkɛtɛpɛkɛt. Páámána, póókóóki Malíɛ́ na Yúsɛp, ne kiendine kípítimán á ninyá ní melúk. 17Pɛ́mɛɛlɛ́ pɛ́ɛ́nɛn muɔ́nɔ́ apɛ́t á ninyá ní melúk, páátál kuɔyɔ aná Éŋele maátíánan pɔ́ɔ ó pusíó púɛ́yɛ́. 18Epé kitikit pɔ́mɔɔ́pɔn epú pekííkí melúk mɔɔ́yɔ́ símile táásɛ. 19Malíɛ, wɔ́, unɛkɛnɛ́ maandá makáánɛ́ kitikit, waanuna mɔ́ kɛ́ɛ́yɛ́ kɔ́ ɔtɛ́m. 20Pekííkí melúk péékúuk, póól pékúmésí Támbákɛ́ɛ, pɔ́tɔ́ŋɔn wɔ́ isak á puandá kitikit epú pɛ́mɛɛ́n ne epú pɔ́mɔɔ́p, á kiákí ɛ́ɛ́ ne emé pɔ́mɔɔ́p ne emé pɛ́mɛɛ́n mapá yá aná Éŋele mɔɔ́yɔ́n pɔ́ɔ. 21Muɔ́nɔ́ mɛɛlɛ́ ukanyi metúk mánamanɛ́, puɔ́s púɛ́yɛ́ pú puansá, pááluka wɔ́ kisiɛ́n ɛ́ɛ́: Yésuse, kisiɛ́n ekí Éŋele maátíán Malíɛ́ wɔ́ tɛ kukɔ́l niime.
Péékeetíínyényí Támbákɛ́ɛ Yésuse á kitamb
22Kisikɛl kíɛ́sikɛn, na Yúsɛp na Malíá páápísukɔn aná kikotí kí Moyíis mɔɔ́yɔ. É kélém kúɛ́yɛ́ pááyɔɔk nɔ muɔ́nɔ́ á kitamb kí Yelúsalɛm é kuetíínyí wɔ́ ké eŋis yi Ɔkɔ́n. 23Á kiákí ɛ́ɛ́ púnyɛ puɔ́ŋɔ́n ó kikotí kí Ɔkɔ́n Támbák ɛ́ɛ́: mɔnɔ́ ɛnúmɛndɔ́ ukutúan páányáŋɔn wɔ́ ó pusíó pú Ɔkɔ́n. 24Pamapá andíkɛ́k á kitamb ɛ́ɛ́ péékí kifunɔ́ ekí kikotí kí Ɔkɔ́n moówún: munúkupiɔ́n múandɛ́ púnyaánɛ paán pá pipa páandɛ́.
25Mɔɔnd omotí mapá Yelúsalɛm kisiɛ́n ɛ́ɛ́: Símiyone. Umapá indɛ́ndɛ́nɛ i mɔɔnd, ukɔ́lɔn Támbákɛ́ɛ ɔ́ niɔlɔ́ upéétenyi ewú ukoónyísóti Isilayɛ́ɛl. Emfúnukufúúmɛ mapá nɛɛyɛ́, 26úmɔɔyitɛ́n wɔ́ ɛ́ɛ́ utiényikú kati ɛ́ɛ́ umɛ́ɛ́n Kilíise, Osótí ewú Ɔkɔ́n Támbák maátán. 27Emfúnukufúúmɛ waanúŋɔn wɔ́ ɛ́ɛ́ úyɔɔk á kitamb ɔ́ puɔ́s epú pepíényí pe Yésus maápá ɛ́ kuɛlɛ́ kiémie ɛ́ɛ́ pówóónyi aná kikotí moówon. 28Símiyone wɛɛsɛmb Yésuse woond weelémbi Támbákɛ́ɛ, wɔ́ ɛ́ɛ́:
29«Nínúan, Ɔkɔ́n, omówóónyí indán yaawɔ, anyi kuyap eŋelímasɔ́m waawɔ úku é kiyeéwe.
30Á kiákí ɛ́ɛ́ eŋis yáámɛ mɛ́ɛ́n Osótí woólinoné kuáwɔ,
31Osótí ewú áányítɔ́m ó pusíó pú piɛ́nɛɛ́n kitikit:
32unyɛ kisie kíkɛɛ́nyɛl ɛ́ɛ́ piɛ́nɛ́n pí kúúsí kumenyi.
Kisie kikáánɛ́ kíkeényíkúmi nikúli níáwɔ Ísilayɛ́ɛl.»
Símiyon éékeémenyi Mekélíe má Támbák
33Pepíényi pé Yésus péésímile mekélíe mé Símiyon ó pusíó pú muɔ́nɔ́. 34Símiyone weepínúun pɔ́ɔ, wɛɛ́pí á Malíá yóótí Yésus ɛ́ɛ́: «Menyi ɛ́ɛ́ muɔ́nɔ́ ewe Támbák áátɔ́m wɔ́ é kúúsí ne kuetukenyi pɛɛnd kutek é nikúli ni Ísilayɛ́ɛl. Ukapá pulinsí pú Támbák epú pɛɛnd keényítúnune, 35yá anakáánɛ́ ukaányípaluna ímbítáákítɛ́n sínyɛɛ́ sinɛmbɛ́n kí itɛ́m sí pɛɛnd táásɛ. Á kiáwu kiáyí, Malíá, kutɛ́ɛ́ kekús ɔtɛ́m wááwɔ ɛlɛɛ́ yɔɔ́nɔnɔ́.»
Ánɛ, eŋémímekélíe
36Akáandɔ́ omotí, kisiɛ́n ɛ́ɛ́ Ánɛ, ɔmbúl u Fánuɛl, é nikúli ní Asɛɛl, mapá eŋémímekélíe má Támbák. Umapá ukanyi kilunúkélun; umɔ́nyɔ́mbɛ́t nɔ ɔnɛ́m tuɔŋ tútíndátɔ́ neémue, 37ɔnɛ́m weeku weesíen kisík. Umapá ukanyi tuɔŋ etín éni ne túni, unyɔ́mbitɔn yá á Kitamb, wɛɛlɛn Támbákɛ́ɛ masɔm ne neputúk nɔ nɔpuɔ́sí, upíkotosi múkunya, upísókolonyi. 38Wɔ́ kɛ́kɛ́ɛ́yɛ́ waasiám á kisikɛl kikáánɛ́, woond é kulémbesi Támbákɛ́ɛ. Pɛɛnd pémeépétényi ɛ́ɛ́ Támbák túkun Yelúsalɛm, wɔɔyɔn pɔ́ɔ moónyi mómoóyooson muɔ́nɔ́. 39Pepíényí pé Yésus mɛɛlɛ́ pámáaman owóónyosi puandá kitikit epú kikotí kí Ɔkɔ́n mɔɔ́yɔ, póókoond Kalilée, kɔ́ɔ́p á pálɛ́k, Násalɛt.
Puɔmfɔ́ pú Yésus
40Muɔ́nɔ́ kuman, upílúndanɛn. Umapá owóónón na tutátɔ́, imak í Támbák mapá nɛɛyɛ́.
Mekélíe mé Yésus mákutúan á kitamb
41Siki yɔɔŋɛ pepíényí pé Yésus mɛɛlɛ́ páyuukan Yelúsalɛm ɔ́ kuɔtɔyɔ́ putɔ́mbí pú pásíka u Pɛyúútɛn. 42Aká Yésus mɛɛlɛ́ waáman tuɔŋ tuát na túandɛ́, pááyɔɔk nɛɛyɛ́ á kitamb, Yelúsalɛm, puɔ́s pú putɔ́mbí é nuu pesíe. 43Putɔ́mbí mɛɛlɛ́ púmanan, péékúuk, muɔ́nɔ́ wɔɔpɔ́ Yésuse wɔɔlɔp Yelúsalɛm pepíényí pɛ́ɛ́yɛ́ tɛ ɛ́ɛ́ pémémenyée; 44pápítááka ɛ́ɛ́ unyɛ nɔ pɔ́kúɔ́p pɛ́ ɛŋɛnd. Pɛ́ɛkɛndɛ puɔ́súum puɔ́súum maná póond á kuamba wɔ́ ku pɛɛnd pé nikúli níɔ́p ne pekulíkuli pɔ́ɔ́p. 45Aná pɛ́mɛɛ́l pɛ́tiɛ́n wɔ́, péépítúnikin Yelúsalɛm, póól páambá wɔ́. 46Átátúɛ́ wɛɛyɛ́, póónyokóóki wɔ́ á kitamb, ɔnyɔ́l no poónyóonyi pɛ́ Pɛyúútɛn, upítɔ́likɔn pɔ́ɔ woond woówon pɔ́ɔ iŋówúnín. 47Pɛɛnd kitikit pɔ́mɔɔ́pítɔ́líkɔ́n wɔ́ táya tutátɔ́ túɛ́yɛ́ na aná umaápá wondinyonyi poónyóonyi. 48Pepíényí pɛ́ɛ́yɛ́ mɛɛlɛ́ pɛ́ɛ́nɛn wɔ́ péésímile táásɛ; yóótí ɛ́ɛ́pí kɛ́ɛ́yɛ́ ɛ́ɛ́: «Muɔ́nɔ́, ó pusíó pú kiákí ɛtúɛ́lɛnɛ́ anɛ? Ɛ́n ɛ́ɛ́ naamɛ nɔ tíɔ tuákuamba tutúmen.» 49Wɔ́ɔ kɔ́ɔ́p ɛ́ɛ́: «Ó pusíó pú kiákí nuŋambanɛ́ɛ? Nutipá numenyen ɛ́ɛ́ yɛɛ́kɛɛsikɛnɛn kupá á kiansi kí Taata á?» 50Pɔ́ɔ tɛ ɛ́ɛ́ pɔ́ɔ́p nuɛyɛ́ɛ. 51É kélém akáánɛ́, Yésuse wɔɔŋ é pepíényí pɛ́ɛ́yɛ́, póókond Násalɛt. Wɔɔ́pinɔn pɔ́ɔ á puandá kitikit. Yóótí nɛkɛn maandá makáánɛ́ meem kɔ́ ɔtɛ́m. 52Yésus kumana, tutátɔ́ túɛ́yɛ́ píɔ́yikɔnɛn. Pɛɛnd ɔ́ɔ́yɔ wɔ́, ɔmbɔ́k ú Támbák nɛɛyɛ́.
ទើបបានជ្រើសរើសហើយ៖
Lúúkas 2: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
