Lúúkas 13
13
Pɛkɛtɛ́ á kupíkúŋɔn
1Á kiátakáánɛ kisikɛl, pɛɛnd pɔ́ɔ́kɔsiɔyítɛ́n Yésuse aná Pílat maátɔ́m pɛɛnd ɔ́ kuɔ́n pɛɛnd pá Kalilée pámaápífuuná Támbákɛ́ɛ. 2Yésuse kɔ́ɔ́p ɛ́ɛ́: «Kúúkɔ́ nupítáákanɛ́ ɛ́ɛ́ pɛɛnd pá Kalilée pakáánɛ́ mekú nikáánɛ́ nikú á kiákí ɛ́ɛ́ pámapá pufal kutápɔk pɛɛnd pa Kalilée kitikit á? 3Yɛɛ́pí káánɔ́ ɛ́ɛ́ aákóo! Núen kuɛ́n ɛ́ɛ́ meelíe máánɔ́ nyɛ kilɔk ké eŋis yá Támbák, núpá kí imbúsúnáanɛ, núond nutúm mɔ́ kélém, panɔ́ peem nuékúén kákáánɔ́ ɛlɛɛ́ pɔ́ɔ.»
4Yésuse andíkɛ́k kɔ́ɔ́p ɛ́ɛ́: «Pɛɛnd punyo na pátátɔ́ kiansi kiikɔ́n maákɔɔ́n pɔ́ɔ kɔɔ́mɔ pápílanɛ́ ɛ́ɛ́ Silówe, pééku; nuápítááka ɛ́ɛ́ pamapá pufal kutápɔk pɛɛnd kitikit pɔ́nyɔ́mbitɔnɛ́ Yelúsalɛm á? 5Yɛɛ́pí káánɔ́ ɛ́ɛ́ aákóo! Núen kuɛ́n ɛ́ɛ́ meelíe máánɔ́ nyɛ kilɔk ké eŋis yá Támbák, núpá kí imbúsnanɛ, núond nutúm mɔ́ɔ kélém, panɔ́ peem nuékuén kákáánɔ́ ɛlɛɛ́ pɔ́ɔ.»
Insap é pufikié púmɛɛ́l pútiómo
6Yésuse weetúmin pɔ́ɔ insap eye: «Mɔɔnd omotí mapián indíni i pusamɔ́ pápílanɛ́ ɛ́ɛ́ pufikié kɛ́ɛ́yɛ́ é kisíén. Epué puɔ́s, waayɔɔk é kisíén ɛ́ kuɛkɛ́sɛ́ masamɔ́ é pufikié, tɛ ɛ́ɛ́ umókóókí pusamúɛ. 7Wɔ́ɔ ké eŋelípuólí umɔɔ́kɔtɔ́ é kisíén ɛ́ɛ́: Ɛ́ɛ́n ɛ́ɛ́ tuɔŋ tútátɔ́ etue inyɔlɔnɛ́ pufikié epue ɛ́ kukɛ́s insamɔ́ síɛ́yɛ́, kátíkátɛ́ yaasiáyɛ́n. Súmb pɔ́ɔ. Indipá yɛɛ́nɛn puandá púmfáánɛ́ɛ akɛ. 8Eŋelípuólí kɛ́ɛ́yɛ́ ɛ́ɛ́: Mása, yapá pɔ́ɔ andíkɛ́k yɔɔŋ eye. Iŋekule pɔ́ɔ nɔ tulɔp tú kindoóndó. 9Ɛɛlɛ púond ó kuómo. Índɛ kútipá nɔ, asúmb pɔ́ɔ.»
Kiéŋuke kí kikóndi kí akáandɔ́ puɔ́s pú sápat
10Epué puɔ́s pu sápat, Yésus mapá wónyonyi á kiansi kí Pɛyúútɛn kimotí kí imbísókóli. 11Akándu omotí mapá kɔ́ɔk nɔ kilɔk kí kiliínditie kimaáka wu pukóndi tuɔŋ punyonatútátɔ; umapá ekutimét, pikutúkin tɛ píɛ. 12Yésus mɛl wɛ́nɛn wu, wɛ́pí kɛ́ɛ́yɛ́ ɛ́ɛ́: «Íya, Támbák mékutúkunu káwu ákunúma.» 13Watál wu imbɔ́k, kɔ́ɔk nɔ kɔ́ɔk akáandɔ́ wekutuku, woond ékulémbesi Támbákɛ́ɛ.
14Ɔkɔ́n u kiansi kí imbísókólí wɔ́pin Yésuse kutɛɛ, akiáki ɛ́ɛ́ umeéŋuki akáandɔ́ ukáánɛ puɔ́s pu sápat. Wu ké embúlu ú pɛɛnd ɛ́ɛ́: «Metúku mɔmukɔt nyɛ mátíndatu. Onuólono á mɔ, á kuasiambá kiéŋuke, katiɛ́ puɔ́s pú sápat.» 15Ɔkɔ́n Yésuse woondinyi wɔ́ ɛ́ɛ́: «kiákí nunyɛ́ itim kilɔk anɛ! Nutipá nuoluno melúku mánɔ puɔ́s pú sápat ékuewúnsenyi mɔ moomb á? 16Akándɔ́ ewe, unyɛ́ é nikúli ní Ápilaháam, Sáátan meéyi wɔ́ kikondi ínanu tuɔŋ punyonatútátɔ, putimɛsikɛnɛn ɛ́ɛ́ yéŋuki wu puɔ́s pu sápat á?» 17Yésus mɛl wondinyonyi anakáánɛ, ɛtú kunuá wɛtikin pokóyikoy pɛ́ɛ́yɛ́; embúlu ɔ́ɔ́pɔn peseé na maandá matámbu umɛ́ɛlɛ.
Insap yi ansamɔ́ weekétíkétie ni i kinyútukie
(Mat 13.31-33; Mál 4.30-32)
18Yésuse kɔ́ɔ́p ɛ́ɛ́: «Pufuŋ pú Támbák nyɛ ɛlɛɛ́ kiákí? Íŋeti púu á kiákí? 19Púnyɛ ɛlɛɛ́ ansamɔ́ weekétíkétie mɔɔnd mányikɔ́n kɛ́ɛ́yɛ́ é kisíén. Úkuman, wɛ́ɛ́yi kiandákáanda kí putɛ́; munoní mú mɛnɛ́mɛnɛ́ɛ áásiwááká aŋana yɔ́ɔ́p kɛ́ɛ́yɛ́ á pikas.» 20Wɔ́ɔ andíkɛ́k ɛ́ɛ́: «Kiákí íŋetié Pufuŋ pú Támbák á kɛ́ɛ? 21Púnyɛ ɛlɛɛ́ kinyútukie akáandɔ́ ményipuéŋítényí ké ekuŋ ú pelé; úmááman ɔtɔ́pɔ wɔ́, wóond á kutúya.»
Ísilayɛ́l éényípíkin é Pufuŋ pú Támbák á?
22Yésus mayɔɔ́kán Yelúsalɛm. Woól wɛ́ndɛ́n á papálɛ́k nɔ pitɔŋ, woónyonyi pɛɛnd.
(Mat 7.13-14)
23Mɔɔnd omotí ɛ́ɛ́pí kɛ́ɛ́yɛ́ ɛ́ɛ́: «Ɔkɔ́n, nikál kɔ́ɔ́m ni pɛɛnd Támbák koónyísóóti á?» Wúu kɔk kɔ́ɔ́p ɛ́ɛ́: 24«Ánupíkányɛk é kupíkinin é nipíkínín niipɔ́ndíkɔ́nɔ́n, á kiákí ɛ́ɛ́ puólíkóoli, yɔɔ́núɔ́yɔn, kaamba ɛ́ɛ́ pépíkin, pátíákaámínɛ́n.
(Mat 25.10-12)
25«Aká muɛ́t nuyá kɛɛ́nyɛ́ɛl waatukan, ufɛl niíti ní kiansi ni itipek, panɔ́ pɔlɔpɔ́n kɔ́ ɔɔ́nd, nuond ɔ́ kutɔɔndɔn é nipíkínín, nuɔyɔ ɛ́ɛ́: Muɛ́t nuya, túfuúnin. Wɛɛ́nyɛ́ɛl káánɔ́ ɛ́ɛ́: Indipá imenyen kɔɔ́mɔ nuólinonée.
(Mat 7.22-23)
26«Kɔ́ɔ́kɔ́ nuónyóondeé ɔ́ kuɔyɔ ɛ́ɛ́: Tuɛ́l tunyáan tuokoond tuapúwá kááwɔ ké eŋis, oól óónyónyí káásɔ́ kí iŋilí; 27waányáand ɔnuɔ́yitɛn ɛ́ɛ́: Indipá imenyen kiáyí nunyɛɛ́. Panɔ́ peem nuɛlɛnɛ́ɛ kilɔk, ánupínyáŋɛt.
(Mat 8.11,12)
28«Nuɛ́nyɛ́ɛl númɛ́ɛn Ápilaháamɛ, Ísáakɛ na Yákɔp, ne peémímekélíé má Támbák kitikit é Pufuŋ pú Támbák, panɔ́ kɔ́ ɔɔ́nd, kɔ́ɔk nuányípaŋanɛ́ nuond nupípanda eŋiŋ. 29Pɛɛnd óónyólonin kiáyí kí nipálɛ́n nɛ nisɛ́ndɛ́n ní ɔɔ́ny, nɛ nɛmuɛnɛ́ na nimbátɛ́ɛ u kúúsí, pɔ́ɔ́sinyɔ́mbɛ́t á kunyáan ɔlɔŋ nɔ pɔsɔ́k é Pufuŋ pú Támbák.
(Mat 19.30; 20.16; Mál 10.31)
30«Akáánɛ́ kɔk pómotí pɛ́nyɛɛ́ pékusúkin áányípá pákutúan, pólotí pɛ́nyɛɛ́ pákutúan áányípá pékusúkin.»
Yésus ɛ́ɛ́kɛɛsikɛnɛn kukú Yelúsalɛm
31Á kiátakáánɛ́ kisikɛl, Pafalisiɛ́ŋ pómotí péépísíítin Yésuse, pɔ́ kɛ́ɛ́yɛ́ ɛ́ɛ́: «Atɔ́k akɛ, yɔɔ́k kúlotí, á kiákí ɛ́ɛ́ Élóot áákamba ɛ́ɛ́ pɔ́kuɔn.» 32Wɔ́ kɔ́ɔ́p ɛ́ɛ́: «Ánuupɔ́ kuatíán kisan kikáánɛ́ ɛ́ɛ́: Índɛ́, yaákúúŋa pilɔk pí piliínditíe yoond yeéŋukesi ínanɔ na nakinyámɔ́, kúpálán iyákɔn. 33Maná, yɛɛ́kɛsikɛnɛn kusuŋɔn nɛ ɛŋɛnd wáámɛ ínanɔ na nakinyámɔ́ na kúpálán, á kiákí ɛ́ɛ́ púɛ́kɛsikɛnɛn ɛ́ɛ́ eŋémímekélíe má Támbák kúunu Yelúsalɛm.
Ɛmbíyɛ́kɛ́l ó pusíó pú Yelúsalɛm
(Mat 23.37-39)
34«Yelúsalɛm, Yelúsalɛm, aŋúɛ ɔɔ́nɔnɛ́ peémímekélíé má Támbák, oond, epé Támbák kutúmaninɛ́ ɔɔ́nɔ pɔ́ɔ ná atányí, kánɛ́k yáányambɛ́t ɛ́ɛ́ íŋúsikan paán pááwɔ aná iŋɔɔ́ ɔ́yimɔtinɛ́ paán, tɛ ɛ́ɛ́ numáátápɛ́ɛ. 35Ooo! Támbák kɛnúyɛkɛn kiansi kiánɔ́. Yɔɔ́núɔ́yɔn ɛ́ɛ́: nutiányandá kuŋɛ́n kuák aká kisikɛl áányáásiámanɛ́ɛ ɛ́ɛ́ núɔyɛt ɛ́ɛ́: peseé ne ewú woóloné ɛ́ kisiɛ́n kí Ɔ́kɔ́n!»
ទើបបានជ្រើសរើសហើយ៖
Lúúkas 13: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
