Isáaŋ 8
8
1Yésuse waayɔɔk kɔ́ ɔkɛ́l ú poolifíé. 2Kiɛmɛ́ɛm tútútú, woond á kitamb kí Támbák; aná pɛɛnd peem meépísííténín wɔ́, wɔnyɔ́mbɛt, woond ó kuónyonyi. 3Pemenyí pikotí na Pafalisiɛ́ŋ póokoólin wɔ́ na akáandɔ́ pemeékeŋínyí mɔɔnd upítiman nɛɛyɛ́; péeténikenyi wɔ́ ó pusíó pú kiɔp. 4pákanyi é Yésus ɛ́ɛ́: «Oŋónyóonyi, tumékeŋínyí akáandɔ́ ewe mɔɔnd pítiman nɛɛyɛ́. 5Kikotí kí Moyíis ɔ́ɔ́kɔɔyɔ ɛ́ɛ́ pilɔŋ pí pakáandɔ́ epie tuɔ́nɔ pɛ́ɛ na atányí. Aŋúɛ ɔɔ́kɔɔyɔ ɛ́ɛ́ kiákí?» 6Pákála nɔ́ ɔ́ kutɔ́lɛk wɔ́, maná pémenyi kuɔsɔ́mɛ́n wɔ́. Yésuse wɔlɔŋimɛt, woond ɔ́ kuɔ́ŋɔ e kúúsí ni inɛɛ́. 7Aná pémeétuútényí wɔ́ ni iŋówúnín, Yésuse weetukenyi ɛtɔ́, ukanyi kɔ́ɔ́p ɛ́ɛ́: «Ɛ́nyɛɛ́ ewú unyɛɛ́ kati kifalɛ káánɔ́ kɔ́ ɔlɔŋ útɔ́ɔt wɔ́ nitányí níkutúan.» 8Waand ɔlɔŋimɛt, waand kuond ɔ́ kuɔ́ŋɔ e kúúsí. 9Pɛmɛɛlɛ́ pɔ́ɔ́pɔn nɔ́, póond á kuatukan omoómí omoómíe, kuetúmín ɔ́ pɔɔkɔ́n; Yésuse weesíen wéeŋényí na akáandɔ́ umaápá pɔkɔ́ yá akáánɛ́ kɛ́ɛ́yɛ́ ó pusíó. 10Yésuse wɛɛmɛlimɛt wɔ́ kɛ́ɛ́yɛ́ ɛ́ɛ́: «Akáandɔ́, páanaánɛ́ kɔk? Mɔɔnd timɛ́kupɛnɛ́ á?» 11Wɔ́ kɛ́ɛ́yɛ́ ɛ́ɛ́: «Ɔkɔ́n, tɛ mɔɔnd.» Yésuse kɛ́ɛ́yɛ́ ɛ́ɛ́: «Niŋúɛ kákáámɛ indiɛ́kupɛnɛ́: apá, nínúan atiandá kuɛl kifal.»
Yésuse, kisie kíteekenyé pɛɛnd
12Yésuse waand akálɛt ké embúl; wɔ́ ɛ́ɛ́: «Inyɛ kisie kíteekenyé pɛɛnd. Ewú wɔɔŋɔnɛ́ káámɛ tiɛ́nyɛndɛ́t kí imbíne; waányípá ne kisie kíendesié wɔ́ ɔ́ kusɔ́t.» 13Pafalisiɛ́ŋ kanyi kɛ́ɛ́yɛ́ kɔk ɛ́ɛ́: «Anyɛ etétúnyí waawɔ aŋúɛ muɛ́t! Epú ɔɔyɔnɛ́ kááwɔ ó pusíó nyɛ sɛ́kísɛ́k!» 14Yésuse woondinyi pɔ́ ɛ́ɛ́: «Tɛ imbá etétúnyí waamɛ niŋú muɛ́t, maná kɔk kutétunyi kúámɛ nyɛ kémuémue, á kiákí ɛ́ɛ́ yeémenyen no niólín no niondín níámɛ; panɔ́ kɔk nuéleeme no niólín no niondín níámɛ. 15Panɔ́ nuósóósosi asi pɛɛnd. Niŋúɛ indipá insóósosi mɔɔnd; 16maná índɛ púsiám ɛ́ɛ́ yééki imbakɛ́, imbakɛ́ yaamɛ nyɛ kémuémue á kiákí ɛ́ɛ́ indipá niŋúéŋényi: Taatɛ́ɛ umiíndɔ́m nyɛ kɛ́kɛ́ɛ́yɛ́ kɔ́ɔk. 17Káánɔ́ ó pikotí púnyɛ puɔ́ŋɔ́n ɛ́ɛ́ kutétunyi kú pɛɛnd páandɛ́ nyɛ kémuémue. 18Iŋú muɛ́t inyɛ etétúnyí waamɛ, Taatɛ́ɛ ewú umiíndɔ́m nyɛ etétúnyí waamɛ kɛ́kɛ́ɛ́yɛ́.» 19Pɔ́ kɔk kɛ́ɛ́yɛ́ ɛ́ɛ́: «Tiɔ́, wɔ́ unyɛ naánɛ́?» Yésuse kɔ́ɔ́p ɛ́ɛ́: «Nutipá nuumenyen, tɛ taatɛ́ɛ nutipá numenyen wɔ́; nusɔ́tɔ nuumenyi, nusiémenyi kɛ́kɛ́ɛ́yɛ́ Taatɛ́ɛ.» 20Yésus makálá nɔ́ aká umoónyónyí á kitamb kí Támbák, kɔɔ́mɔ pákúsanɛ́ tupoo. Tɛ mɔɔnd ukutál wɔ́ ɔmbɔ́k, á kiákí ɛ́ɛ́ kikulɛ́ kíɛ́yɛ́ mapá kímanyi kítiasíám.
Kupálɔk kú Yésus
21Yésuse andá kɔ́ɔ́p ɛ́ɛ́: «Kuyɔɔk kúámɛ ekue, nukiŋambɛt, maná nukekúen káánɔ́ á pifal. Kɔɔ́m yiipanɛ́ɛ, nutipá pákɔɔp.» 22Pɛyúútɛn kanyi kɔk pɔ́ɔ nɔ pɔ́ɔ ɛ́ɛ́: «Púnyakɛɛ́ waákamba kupíɔ́neé, aná wɔɔyɔɔnɛ́ɛ ɛ́ɛ́: “Kɔɔ́m iyuukanɛ́ɛ, nutipá pákuyɔɔk”?» 23Yésuse woondinyi pɔ́ ɛ́ɛ́: «Panɔ́ nunyɛ pé kúúsí, niŋúɛ inyɛ u muɛnɛ́; panɔ́ nunyɛ pé kúúsí ekue, niŋúɛ indipá u kúúsí ekue. 24Púúpɔ́ yɛɛlɛnɛ́ɛ káánɔ́ ɛ́ɛ́ nukekúen káánɔ́ á pifal. Á kiákí ɛ́ɛ́ índɛ nutipá nuátapan ɛ́ɛ́ “Inyɛ”, nukekúen káánɔ́ á pifal.» 25Pɔ́ kuówun wɔ́ ɛ́ɛ́: «Aŋúɛ anyɛ ɛ́nyɛ?» Yésuse kɔ́ɔ́p ɛ́ɛ́: «Ewú inúɔ́yɔnɛ́ɛ kisikɛl kitikit kuetúm é nitúmín. 26É méémé mónúyoosonée, inyɛ nɔ mɔ́kuɔyɔ na mákusúmba táásɛ; sɔ́k umiíndɔ́m ɔ́ɔ́kɔɔyɔ kémuémue, epú imɔɔ́p wɔɔyɔ, púúpɔ́ yɔɔyɔnɛ́ɛ pɛɛnd.» 27Tɛ ɛ́ɛ́ pɔ́ɔ́p ɛ́ɛ́ umɔɔyɔ́n pɔ́ Síí. 28Yésus kanyi kɔk kɔ́ɔ́p ɛ́ɛ́: «Nukɛɛl núméméketi Muɔ́nɔ́ u mɔɔnd, kááká nukeényímenyi ɛ́ɛ́ “Inyɛ” na andíkɛ́k ɛ́ɛ́ indipá imbiɛ́lɛn tɛ puandá: epú Taatá miíŋónyonyi púúpɔ́ púámanɛ́ɛ káámɛ é niít. 29Sɔ́k ewú umiíndɔ́m nyɛ naamɛ: utimiyap iŋúéŋényí, á kiákí ɛ́ɛ́ á kisikɛl kitikit yɛɛ́kɛɛlɛ yá epú upílɔ́ŋɔnɛ́ɛ.» 30Pɛɛnd puólíkóoli póopíóndí ɔtɛ́m nɛɛyɛ́ aká pɔ́mɔɔ́p aná umaákála.
Nikúl ní Ápilahám ní kémuémue
31Yésus kanyi kɔk ɛ́ Pɛyúútɛn pómoópíóndónyí ɔ́tɛm kɛ́ɛ́yɛ́ ɛ́ɛ́: «Índɛ nusiapílúndɛn é mekélíe máámɛ, nunyɛ kémuémue popíónyí páámɛ, 32nukemenyi kémuémue, kémuémue óond únúáŋɔn ɔ́ puɔ́l.» 33Pɔ́ kɛ́ɛ́yɛ́ ɛ́ɛ́: «Tunyɛ nikúli ní Ápilaháam, mɔɔnd mapása utituéyí piɔ́lí. Tiɛkíɛ́ ɛnyɛɛ́ ukutásɔn ɛ́ɛ́ tukaám ɔ́ puɔ́l?» 34Yésuse kɔ́ɔ́p ɛ́ɛ́: «Kémuémue, kémuémue, yɛɛ́pí káánɔ́ ɛ́ɛ́ ewú wɛɛlɛnɛ́ kilɔk nyɛ kiɔ́lí kí kilɔk. 35Kiɔ́l tipá kínyɔ́mbitɔn tɛ níík ne níík á kiansi, muɔ́nɔ́, wɔ́, unyɛ kisikɛl kitikit kɔ́ɔk. 36Índɛ kɔk Muɔ́nɔ́ sianúáŋɔn, nukanyi kémuémue pɛɛnd pé weéŋelí. 37Yeémenyen ɛ́ɛ́ nunyɛ nindaanda ní Ápilaháam; nuákamba kipán kí kuɛl ɛ́ɛ́ píiŋɔ́n, ó pusíó ɛ́ɛ́ nutipá nuátapan mekélíe máámɛ. 38Iŋúɛ yɔɔ́kɔyɔ epú ímɛ́nyɛɛ́n ku Taatá, panɔ́ nuɛlɛ emé númɔ́nyiɔ́p ku síí waanɔ́!» 39pákanyi kɛ́ɛ́yɛ́ ɛ́ɛ́: «Ápilaháamɛ unyɛɛ́ síí waasɔ́!» Yésuse kɔ́ɔ́p ɛ́ɛ́: «Índɛ nunyɛ paán pá Ápilaháam, ɛ́nuɛlɛ́ niaŋ níɛ́yɛ́. 40Nuákamba kuuŋɔ́n, Niŋúɛ ewú inúɔ́yɔnɛ́ɛ kémuémue imɔɔ́p ku Támbák; pukáánɛ́ Ápilaháam timɛɛl pɔ́. 41Panɔ́, nuɔ́kɔŋɔn ɔ́ kikɔ́nd kí síí waanɔ́.» Pɔ́ kɛ́ɛ́yɛ́ ɛ́ɛ́: «Tutipá paán pí isɔm! Tunyɛ ne sí táŋ omoómí, Támbákɛ́ɛ» 42Yésus kanyi kɔ́ɔ́p ɛ́ɛ́: «Támbák sɔ́tɔ upá síí waanɔ́, nusíŋɔyɔ, á kiákí ɛ́ɛ́ ku Támbák imaányáátɔ́k ó kuol; indimopíólin, wɔ́ umiíndɔ́m. 43kiákí nutiányípá nuɔ́pɔn puandá inúɔ́yɔnɛ́ɛ? Ó pusíó ɛ́ɛ́ nutipá pɔ́kupítɔ́likɛn mekélíe máámɛ. 44Sátanɛ unyɛɛ́ síí waanɔ́, nuambanɛ́ɛ ɛ́ɛ́ insí numówóónyí kilɔ́ɔ́ŋɛ́t kíɛ́yɛ́. Kuetúm é nitúmín, unyɛ oŋónónín; utipá etényí é kémuémue, ɛ́ kuɛl ɛ́ɛ́ kémuémue tipá kɛ́ɛ́yɛ́. Aká upátanɛ́ kisupɔ́, wɔɔ́kɔ́lɔn kɔ́ ɔtɛ́m wɛ́ɛ́yɛ́ ú kisupɔ́ á kiákí ɛ́ɛ́ unyɛ asupúsɔp wɔ́ andá síí u kisupɔ́. 45Maná, iŋúɛ yɔɔ́núɔ́yɔn kémuémue púúpɔ́ nutiányípá nupíóndonyi ɔtɛ́m naamɛ. 46Unín káánɔ́ kɔ́ ɔlɔŋ unyɛɛ́ kutíínyi kifal kíámɛ? Índɛ yɔɔ́kɔyɔ kémuémue, kiákí kɔk nutiányípá nuátapan? 47Ewú unyɛɛ́ u Támbák, ɔ́ɔ́pítɔ́likɔn mekélíe má Támbák. Aná nutiányípá pá Támbák nutipá numbítɔ́likɔn.» 48Pɛyúútɛn kanyi kɛ́ɛ́yɛ́ ɛ́ɛ́: «Tunyɛ ni iŋál ɛ́ túɔyɛt ɛ́ɛ́ anyɛ mɔnɔ́ pásamalí aŋúɛ andíkɛ́k nɔ kilɔk kí kiliínditíe.» 49Yésuse kɔ́ɔ́p ɛ́ɛ́: «Indipá nɔ kilɔk kí kiliínditíe, maná yeékeekenyi Taatɛ́ɛ nukany, panɔ́ nuuyɛnɛ. 50Indipá yamba nuúmu núámɛ, sɔ́k nyɛ kɔ́ɔk waambanɛ́ɛ nɔ́ káámɛ ó pusíó, woond usóósosi. 51Kémuémue, kémuémue, yɔɔ́núɔ́yɔn ɛ́ɛ́: índɛ mɔɔnd siɛnɛk mekélíe máámɛ, utiɛ́nyɛɛ́n nikú tɛ puɔ́s.» 52Pɛyúútɛn kanyi kɔk kɛ́ɛ́yɛ́ ɛ́ɛ́: «Tuémenyen nínúan ɛ́ɛ́ anyɛ nɔ kilɔk kí kiliínditíe! Ápilaháam mekú, peémímekélíé má Támbák kɔ́kɔɔ́p, aŋúɛ aasitásɔ́n ɛ́ɛ́: Índɛ mɔɔnd siɛnɛk mekélíe máámɛ, utiɛ́nyɛɛ́n nikú. 53Púnyakɛɛ́ aŋúɛ aátápukan síí waasɔ́ Ápilaháamɛ umeékú á? Ne peémímekélíé má Támbák pémekú kɔ́kɔɔ́p. Aákamba kuɔyɛt ɛ́ɛ́ aŋúɛ anyɛ ɛnyɛ́?» 54Yésuse kɔ́ɔ́p ɛ́ɛ́: «Insɔ́tɔ imbífáan nuúmu iŋú muɛ́t, nuúmu núámɛ siápá nánáanɛ. Taatɛ́ɛ wuŋgúmesié, Wɔ́ éwú nukémené ɛ́ɛ́ unyɛ Támbákɛ́ɛ waanɔ́. 55Numapása nutimenyí wɔ́, niŋúɛ yeémenyen wɔ́. Insɔ́tɔ yɛɛl ɛ́ɛ́ indipá imenyen wɔ́, insíápá asupúsɔp niaŋ níánɔ́; iŋúɛ yeémenyen wɔ́ yoond iŋííka mekélíe mɛ́ɛ́yɛ́. 56Ápilaháamɛ, síí waanɔ́, mayayápá kí imbítáákítɛn i kuɛ́n puɔ́s púámɛ pú kuól: wɛɛ́n pú waayayapa.» 57Pɔ́ɔ́pɔn nɔ́, Pɛyúútɛn ɛ́ɛ́pí kɛ́ɛ́yɛ́ ɛ́ɛ́: «Amanyi atiám tuɔŋ etín áandɛ́ na túát, ɔɔyɔ ɛ́ɛ́ ɛmɛɛ́n Ápilaháam á?» 58Yésuse woondinyi pɔ́ ɛ́ɛ́: «Kémuémue, kémuémue, yɔɔ́núɔ́yɔn ɛ́ɛ́ Ápilaháam mɛɛlɛ́ umanyi utipá, “Inyɛ”.» 59Póond á kupáta atányí á kutúútan wɔ́, Yésuse wɛɛpínɛmbin pɔ́, waakaám á kitamb kí Támbák.
ទើបបានជ្រើសរើសហើយ៖
Isáaŋ 8: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
