Isáaŋ 7
7
Paandimán pé Yésus tipá pópíóndonyi ɔtɛ́m kɛ́ɛ́yɛ́
(Isŋ 5.44; 15.18-19; Mat 10.16)
1É kélém kúɛ́yɛ́, Yésuse waasuŋɔn nɛ ɛŋɛnd ɔ́ kitɔŋ kí Kalilée, utimaand kuɔyɔ ɛŋɛnd ɔ́ kitɔŋ kí Yuté, á kiákí ɛ́ɛ́ Pɛyúútɛn maambá kuɔ́n wɔ́. 2Putɔ́mbí pú Pɛyúútɛn pú Pilik mapá púkanyí mekúye#7.2 Pamapap pɔtɔyɔ putɔmbi papitaka kunyɔmbiti kuɔpɔ e kúúsí ku kiandɔl.. 3Paandimán pɛ́ɛ́yɛ́ kanyi kɛ́ɛ́yɛ́ ɛ́ɛ́: «Atɔ́k akɛ yɔɔ́k Yuté ɛ́ɛ́ popíónyí pááwɔ kɔ́kɔ́ɔ́p ɛ́ɛ́n puólí ɛɛlɛnɛ́ɛ. 4Mɔɔnd wambanɛ́ ɛ́ɛ́ pémenyi wɔ́ tipá upínɛmbɛn. Aná ɛɛlɛnɛ́ pilɔŋ pí moólí pikáánɛ́, pítíínyí ɛ́ pɛɛnd!» 5Á kiákí ɛ́ɛ́ tɛ paandimán pɛ́ɛ́yɛ́ timopíóndonyi ɔtɛ́m nɛɛyɛ́. 6Yésuse kɔ́ɔ́p ɛ́ɛ́: «Kíámɛ kisikɛl manyi kítiɛsikɛn, káánɔ́ ó pusíó, kisikɛl kitikit nyɛ peseé. 7Pɛɛnd tipá pɛ́kunúfɛmɛt, niŋúɛ pɛ́ɛ́kimfɛmɛ ɛ́ɛ́ yeétíínyenyi ɛ́ɛ́ meelíe mɔ́ɔ́p nyɛ kilɔk. 8Panɔ́ ánuupɔ́ ɔ́ putɔ́mbí. Á kíámɛ kiáyí indipá yiipan ɔ́ putɔ́mbí pukáánɛ́, kisikɛl kíámɛ manyi kítiɛsikɛn.» 9Umɛɛlɛ́ na kutían pɔ́ nɔ́, wɔɔlɔp Kalilée. 10Paandimán pɛ́ɛ́yɛ́ mɛɛlɛ́ na kuyɔɔk ɔ́ putɔ́mbí, weesíen wɔ́ɔ́ŋɔ́ insunse, tɛ kupítíínyi.
Yésus óókoónyonyi ɔ́ putɔ́mbí
11Putɔ́mbí tɔkɔtɔ, pɔkɔ́n pɛ́ Pɛyúútɛn ámba wɔ́, póówon: «Naánɛ́ akɛ unyɛɛ́?» 12Pɛɛnd kutek pííŋunye kɛ́ɛ́yɛ́ ó pusíó; epe ɔ́ɔ́yɔ ɛ́ɛ́: «Mɔɔnd u ɔtɛ́m peseé wɔ́.» Pómotí ɔ́ɔ́yɔ ɛ́ɛ́: «Aákóo weépúmbesi pɛɛnd.» 13Tɛ mɔɔnd ukukálɛt faátífaát kɛ́ɛ́yɛ́ ó pusíó á kiákí ɛ́ɛ́ pemetííne pɔkɔ́n pɛ́ Pɛyúútɛn. 14Putɔ́mbí mapá púkanyí ɛ́ kikɛtɛ́kɛtɛ́ɛ, aká Yésus maámákát á kitamb kí Támbák woond ó kuónyonyi. 15Pɛyúútɛn símile pɔ́ɔ́yɔ ɛ́ɛ́: «Tiɛkíɛ́ unyɛɛ́ emenyí, wɔ́ ewú umɛɛ́lɛ́ utipíkín ɔ́ kɔɔ́mɔ póónyonyée?» 16Yésuse woondinyi pɔ́ ɛ́ɛ́: «Iŋónyítónyí yaamɛ tipá yoólinon káámɛ, inyɛ i sɔ́k umiíndɔ́m. 17Índɛ mɔɔnd ɔ́ɔ́kɔɔyɔ kuɛl epú Támbák ɔ́ɔ́yɔɔnɛ́ɛ, ukemenyi índɛ iŋónyítónyí eye óókoólinon ku Támbák púnyaánɛ mekélíe máámɛ óókoólinon káámɛ. 18Ewú mekélíe mɛ́ɛ́yɛ́ óólinonée kɛ́ɛ́yɛ́ ákaamba nuúmu núɛ́yɛ́ núpímuɛ́t; ewú waambanɛ́ nuúmu nú sɔ́k umaátɔ́m wɔ́ mekélíe mɛ́ɛ́yɛ́ nyɛ kémuémue, ambákál tipá kɛ́ɛ́yɛ́. 19Utipá Moyíise umaánúfá pikotí á? Tɛ mɔɔnd kɔk káánɔ́ kɔ́ ɔlɔŋ utipá uwónyosi pɛ́ɛ. kiákí nuambanɛ́ɛ ɛ́ɛ́ núúŋɔn?» 20Pɛɛnd ké embúl póondinyi wɔ́ ɛ́ɛ́: «Anyɛ nɔ kilɔk kí kiliínditíe! Ɛ́nyɛ́ waambanɛ́ɛ kukuɔ́n?» 21Yésus kanyi kɔ́ɔ́p ɛ́ɛ́: «Imɛ́ɛ́lɛ́ puólí táŋ púmoómí, panɔ́ peem nukanyɛɛ́ esímile! 22Moyíis manúfá puansá (púókoólinon é pesíí páásɔ́ pákutúan kati kɛ́ɛ́yɛ́) nuansanɛn tɛ puɔ́s pú sápat. 23Índɛ pásians mɔɔnd puɔ́s pú sápat, ɛ́ɛ́ nutikuá kikotí kí Moyíis, kiákí kɔk nuuŋɔ́pɔninɛ́ kutɛ́ɛ́ ɛ́ɛ́ imééŋúkí iŋgúme i mɔɔnd puɔ́s pú sápat? 24Ánuyapá kusúmba moónyi ɛ́ kuɛ́n kú eŋís, ánusúmbá moónyi kí indɛ́ndɛ́nɛ!» 25Pɛɛnd pé Yelúsalɛm pómotí píówon ɛ́ɛ́: «Utipá mɔɔnd owúnó páambanɛ́ kuɔ́n wɔ́ á? 26Wɔ́ ewe ukálanɛ́ faátífaát mɔɔnd tipíákɔ́n kɛ́ɛ́yɛ́! Púnyɛ akɛ pɔkɔ́n páásɔ́ áátáp ɛ́ɛ́ kémuémue wɔ́ unyɛɛ́ Kilíise á? 27Maná sɔ́k ewe, tuémenyen níólín níɛ́yɛ́, Kilíise kɔk aká woónyóólé mɔɔnd tiényimenyí níólín níɛ́yɛ́.» 28Yésus óónyonyi á kitamb kí Támbák, weefeti ekelú, wɔ́ ɛ́ɛ́: «Nuékimenyen! Numenyen kɔɔ́mɔ yoólinonée! Naánɛ́ kɔk ɛ́ɛ́ indimopíólin, sɔ́k umiíndɔ́m nyɛ kémuémue, nutipá numenyen wɔ́. 29Niŋúɛ yeémenyen wɔ́, yoókoólinon kuɛyɛ́, wɔ́ wáányíndɔ́m.» 30Poond á kuamba kuɛtikɛn wɔ́, maná, tɛ ɛ́ɛ́ mɔɔnd píkíík wɔ́, á kiákí ɛ́ɛ́ kisikɛl kíɛ́yɛ́ mapá kímanyi kítiɛsikɛn. 31Pɛɛnd puólíkóoli ké embúl pópíóndonyi ɔtɛ́m kɛ́ɛ́yɛ́ póond pɔ́ɔ́yɔ ɛ́ɛ́: «Aká Kilíis óónyóólée púnyakɛɛ́ wɛɛ́nyɛ́ɛl pisey kutápɔ́k epí sɔ́k ewe ɛ́ɛ́lɛnɛ́ɛ á?»
32Embííŋuny ú embúl wɔ́ɔ́nyɔɔ́pɛ́k kí itú sí Pafalisiɛ́ŋ: pɔkɔ́n pá pafunɔ́fɔn na Pafalisiɛ́ŋ páátɔ́m pisimb ɛ́ kuɛtíkɛ́n wɔ́. 33Yésus kanyi ɛ́ɛ́: «Imanyi naanɔ́ isikɛlɛsíkɛ́l, é kélém akáánɛ́ íyɔɔk ku sɔ́k umiíndɔ́m. 34Nuányíŋamba nutiɛ́nyiŋɛ́n; á kiákí ɛ́ɛ́ kɔɔ́mɔ iyuukanɛ́ nutipá na niasíámɛ́n.» 35Pɛyúútɛn póond ó kupíówon pɔ́ɔ nɔ pɔ́ɔ: «Naánɛ́ unyɛɛ́ kuondón ɛ́ɛ́ tutiɛ́n wɔ́? Ukɔnyɔwɔɔ́kɛ́n Pɛyúútɛn pɛ́nyɛɛ́ pasálámándán ɛ́ kikɛtɛ́kɛtɛ́ɛ kí Pɛ́kilɛ́k eéy? Ukoónyonyi Pɛ́kilɛ́k? 36kiákí waambanɛ́ɛ kuɔyɛt aná wɛɛlɛnɛ́ ɛ́ɛ́: “Nukiŋamba nutiŋɛ́n, kɔɔ́mɔ inyɛɛ́ nutipá na niasíámɛ́n?”»
Puɔ́sí púkusúkin pú putɔ́mbí
37Puɔ́sí púkusúkin pú putɔ́mbí, punyɛɛ́ kiandá kí puɔ́s kí niɔlɔ́. Puɔ́sí pukáánɛ, Yésuse, etényí, woond é kukéme: «Ewú unyɛɛ́ na niíta, woól kuamɛ waasipúwá.» 38Ewú upíóndonyée ɔtɛ́m káámɛ, aná Ɔmfiɔ́ŋ ɔ́ɔ́yɔɔnɛ́ɛ: «Isaá sí moomb mɔ́ kusɔ́t áányífúla kuólín kɛ́ɛ́yɛ́ kɔ́ ɔtɛ́m.» 39Anakáánɛ́ umeétéékí Efúnukufúúmɛ ewú epé póónyípíóndonyée ɔ́tɛ́m kɛ́ɛ́yɛ́ áányítáŋapɛ́ɛ; á kiákí ɛ́ɛ́ Efúnukufúúmɛ mapá umanyi utiól, ó pusíó ɛ́ɛ́ Támbák mapá umanyi utiekí Yésuse nuúmu núɛ́yɛ́.
40Ké embúl ú pɛɛnd pɔ́mɔɔ́pítɔ́líkɛ́n tukál tukáánɛ́, pɛɛnd pómotí pɔ́ɔ́yɛt ɛ́ɛ́: «Kémuémue Eŋémímekélíé má Támbák ewú tupéétenyée wɔ́!» 41Pólotí ɔ́ɔ́yɔ ɛ́ɛ́: «Kilíise wɔ́.» Pɔsɔ́k pólotí andíkɛ́k ɔ́ɔ́yɔ ɛ́ɛ́: «Kilíis tipá ukuólin Kalilée. 42Yeémenyí Ɔmfiɔ́ŋ ɔ́ɔ́kɔɔyɔ ɛ́ɛ́ waányípá u nikúli ní Tafíit, woond woólinon Pɛ́tilɛhɛ́ɛm, unyɛɛ́ kitɔŋ kí Tááfit á?» 43Ó pusíó pú Yésus, embúl wáapísal. 44Pɔsɔ́k pómotí ké embúl maambá kuɛtikɛn wɔ́, tɛ mɔɔnd ukutál wɔ́ ɔmbɔk.
45Pekííkí péetúm indil, póond ku pafunɔ́fɔn pɔɔkɔ́n na Pafalisiɛ́ŋ póokoówun pekííkí ɛ́ɛ́: «kiákí númɛ́nyɛɛlɛ́ nutiól nɛɛyɛ́?» 46Pekííkí kanyi ɛ́ɛ́: «Mɔɔnd ukáánɛ́ áákála, ukupíketi wɔ́ tipá.» 47Pafalisiɛ́ŋ kɔ́ɔ́p ɛ́ɛ́: «Panɔ́ kákáánɔ́ numákɔɔ́n kɛ́ɛ́yɛ́ á tukál á? 48Unín ɛ́ kikɛtɛ́kɛtɛ́ɛ kí pɔkɔ́n na kí Pafalisiɛ́ŋ, upíóndonyée ɔtɛ́m kɛ́ɛ́yɛ́? 49Yá embúl ne embúl ukáánɛ́ útiányípá úmenyen pikotí, pányɛ pɔnyɔmɔ́n!» 50Falisiɛ́ŋ omotí kɔ́ɔ́p kɔ́ ɔlɔŋ kisiɛ́n ɛ́ɛ́ Nikotɛ́mɛ umaányápítá Yésuse kanyi ɛ́ɛ́: 51«Kikotí kíásɔ́ ɛ́ɛ́pɛnɛn mɔɔnd kati ɛ́ɛ́ umépíséékí tumenyi puandá úmɛ́nyɛɛlɛ́ á?» 52Pɔ́ɔpíkɔ́l wɔ́ pákanyi kɛ́ɛ́yɛ́ ɛ́ɛ́: «Anyɛ mɔnɔ́ Pákalilée kákááwɔ á? Ambá peseéképese akaná kuɛ́n ɛ́ɛ́ eŋémímekélíe mapása utiámɛ́n Kalilée.»
Akáandɔ́ u puamba
53Páasálamand, nɔmuɔ́nɛ́ɛ woond kuɛyɛ́#7.53 Kiensi ekie tipá kí imbɔpu siloti si insúá..
ទើបបានជ្រើសរើសហើយ៖
Isáaŋ 7: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
