Isáaŋ 13
13
Yésus ásuka popíónyí pɛ́ɛ́yɛ́ pikɔ́nd
1Putɔ́mbí pú Pásíka u Pɛyúútɛn mapá púkanyí mekúye. Yésus menyen ɛ́ɛ́ kisikɛl kíɛ́yɛ́ kí kuatɔk e kúúsí ekue ó kuond ku Síí mɛ́ɛsikɛn; wɔ́ ewú umɔɔ́yɔ́ pekúl pɛ́ɛ́yɛ́ pɛ́nyɛɛ́ e kúúsí, wɔɔyɛt pɔ́ kuám ɔ́ puɔ́s púkusúkin. 2Kɔ́ɔk ɛ́ɛ́ putɔ́mbí nyɛ kúpálɛ, Yésuse no popíónyí pɛ́ɛ́yɛ́ nyáan, okóyikoyi mapá umámaná epíkínyi Yútas Isikaliyóote, kinɔ́k kí Símun, imbítáákítɛ́n i kusɛm Yésuse. 3Yésus memenyen ɛ́ɛ́ Síí matál wɔ́ puandá kitikit kí imbɔ́k, woond umenyen ɛ́ɛ́ umoólín ku Támbák, wáand kuondo ku Tambák. 4Waatukɛn, weepíéŋi kinyuŋa kíɛ́yɛ́, wɔɔkɔ́l insunú waapíkútikan á nitál. 5Weesukun moomb á kinabɛn woond á kusuka popíónyí pɛ́ɛ́yɛ́ pikɔ́nd, uwóno pɛ́ɛ ni insunú umaápísɔɔ́k á nitál. 6Waasiámán ku Símun Píɛ́l, ewe kɛ́ɛ́yɛ́ ɛ́ɛ́: «Ɔkɔ́n, aŋúɛ ínsuka pikɔ́nd!» 7Yésuse woondinyi wɔ́ ɛ́ɛ́: «Atipá emenyen puandá yɛɛlɛnɛ́ɛ nínúan, maná aányáambal kuɔ́p pɔ.» 8Píɛ́lɛ kɛ́ɛ́yɛ́ ɛ́ɛ́: «Aákóo atiákinsukɛ́t pikɔ́nd!» Yésuse kɛ́ɛ́yɛ́ ɛ́ɛ́: «Índɛ insiɛl indikusukɛ́t píkɔ́nd, atiányipá naamɛ.» 9Símun Píɛ́lɛ kɛ́ɛ́yɛ́ ɛ́ɛ́: «Índɛ anakáánɛ́ púnyɛɛ́, Ɔkɔ́n, atisukɛ́t pikɔ́nd pɛ́ɛ na pɛ́ɛ, maná ni imbɔ́k nɛ ɛtɔ́!» 10Yésuse kɛ́ɛ́yɛ́ ɛ́ɛ́: «Ewú usiépítumb tipá insaná ɛ́ɛ́ páand etumb wɔ́, ɛ́siɛ́ kupísukɛt pikɔ́nd. Á kiákí ɛ́ɛ́ waáfúúma, panɔ́ nunyɛ pafúúmán, maná nutipá panɔ́ peem.» 11Yésus mɛɛlɛ́ ɛ́ɛ́: «Nutipá pafúúmán panɔ́ peem.» Á kiákí ɛ́ɛ́ umemenyén ewú ukɛɛ́nyísɛm wɔ. 12Umɛɛlɛ́ úmáaman asuka pɔ́ pikɔ́nd woopíondi kinyuŋa kíɛ́yɛ́ waand ɔnyɔ́mbɛt; wɔ́ kɔ́ɔ́p ɛ́ɛ́: «Nuɔ́kɔɔ́pɔn epú ímɛ́nyinúɛl á? 13Nuákimbílan ɛ́ɛ́ Oŋónyóonyi, Ɔkɔ́n, nuápian ipán á kumbílan nɔ, á kiákí ɛ́ɛ́ inyɛ Oŋónyóonyi niŋúɛ Ɔkɔ́n. 14Índɛ kɔk niŋúɛ, Ɔkɔ́n no Oŋónyóonyi, imánúsukɛ́t pikɔ́nd, panɔ́ kákáánɔ́ ánusukánín pikɔ́nd panúɛ na panúɛ. 15Á kiákí ɛ́ɛ́ pulinsí íményinúeki: epú ímɛ́nyɛɛlɛ́ káánɔ́ ó pusíó, panɔ́ kákáánɔ́ ɛ́nuɛlɛ́ pɔ. 16Yɔɔ́núɔ́yɔn kémuémue ɛ́ɛ́ eŋelípuólí tipá utápukan másɛ wɛɛyɛ́, tɛ eŋelípusɔ́m utipá utápukan ewú utúmanɛ́ wɔ́. 17Nínúan nukanyɛɛ́ emenyen pɔ, nukapá é peseé índɛ nusiɛlɛ pɔ. 18Indipá yɔɔyɔ nɔ́ á panɔ́ peem, yeémenyen epé imaáyɔ́ɔ́n. Púɛ́kɛɛsikɛnɛn ɛ́ɛ́ mekélíe mɔ́ ɔmfíɔŋ píwóónyi. Púnyɛ puɔ́ŋɔ́n ɛ́ɛ́: “Ewú umaányáán kilɛ́ɛt naamɛ mɛ́ɛ́yɛ́ okóyikoyi waamɛ.” 19Yɔɔ́núɔ́yɔn púú nínuan kɔ́ɔk púmanyi pútiasíám, ɛ́ɛ́ aká púányáasiámánɛ́ núátap ɛ́ɛ́ “niŋúɛ inyɛ ewú inyɛɛ́”. 20Ɛ́ɛ́ɛ, yɔɔ́núɔ́yɔn kémuémue ɛ́ɛ́: ewú úmónyikólí ewú ímányitɔ́m míŋgólí, ewú úmónyiŋgólí mókólí ewú umiíndɔ́m.»
Yútas mɛ́sɛ́m Yésuse
21Yésus manan akála nɔ́ɔ, insíkíl yɛɛtikin wɔ́, waatían pɔ́ paásí paásí ɛ́ɛ́: «Yɔɔ́núɔ́yɔn kémuémue ɛ́ɛ́: sɔ́k omotí káánɔ́ kɔ́ ɔlɔŋ kana kuusɛm.» 22Popíónyí póond ó kuyoosinon pɔ́ɔ nɔ pɔ́ɔ, pópíówon ɛ́ɛ́ ɛ́nyɛ́ wɛɛ́tɛ ewe Yésus ɔ́ɔ́yɔɔnɛ́ɛ. 23Opíónyí omotí, ewú Yésus moósol kuɔyɔ, mapá á masíá mɛ́ɛ́yɛ́. 24Símun Píɛ́lɛ wɛɛkɛl opíónyí ukáánɛ́ pulinsí ɛ́ɛ́: «wóówun Yésuse wɛɛ́tɛ sɔ́k.» 25Opíónyí wɛɛ́tɛ weepísíítin Yésuse ké etú, woówun wɔ́ imbásimbásiɛ ɛ́ɛ́: «Ɔkɔ́n, ɛ́nyɛ́ wɔ́?» 26Yésuse woondinyi ɛ́ɛ́: «Iŋaná eyuukinyi kiénsi kí kilɛ́ɛt á kisúá, sɔ́k ewú iŋaná kuekenyé wɔ́, wɔ́ ukáánɛ́.» Yésuse wɔɔkɔ́l kɔk kiénsi kí kilɛ́ɛt weeyuukinyi kɛ́ɛ á kisúá weeki Yútas Isikaliyóote muɔ́nɔ́ u Símun. 27Yútas mɛɛlɛ́ ukɔ́lɔn kiénsi kí kilɛ́ɛt kikáánɛ́ Yésus meékí wɔ́, Sátanɛ weepíkin wɔ́ kɔ́ ɔtɛ́m. Yésus kanyi kɛ́ɛ́yɛ́ ɛ́ɛ́: «Epú aambanɛ́ɛ ɛ́ɛ́ ɛ́ɛl, ɛlɛ́ púú pɛkɛtɛpɛkɛt.» 28É péépé pámaápá kɔ́ɔk, tɛ mɔɔnd utimɔɔ́p ó pusíó pú kiákí umɔɔ́yɔn wɔ́ anakáanɛ́. 29Aná Yútas maápá unɛkɛn nukólópóŋ, puólíkóoli mapítááká ɛ́ɛ́ Yésus mátɔ́m wɔ́ ɔ́ kuɔ́nd epú pumoówón ɔ́ putɔ́mbí, kúnyaánɛ ɛ́ɛ́ weeki pɔsúkɔsukɔ́ pipíɔ́kɛ́n. 30Yútas mɛɛlɛ́ na kunyá kiénsi kí kilɛ́ɛt, waakaám nɔ niɔ́kɔ́tɔ́n. Putúk mapá púmámaná akua.
Kikotí kiikɔ́sikɔ́siɛ
31Yútas mɛɛ́lɛ́ waáman, Yésus kanyi ɛ́ɛ́: «Nínúan nuúmu nú Muɔ́nɔ́ u mɔɔnd mépitíínyí, nuúmu nú Támbák építíínyenyi kɛ́ɛ́yɛ́. 32Támbákɛ́ɛ wɔ́ muɛ́t ketíínyi nuúmu nú Muɔ́nɔ́, kuup ekue útíínyi núú. 33Paán páámɛ, imanyi naanɔ́ ɔ́ muɔ́nɔ́ u kisikɛl. Nukiŋamba, maná, yá aná imɔɔ́yɔn pɔkɔ́n pɛ́ Pɛyúútɛn, panɔ́ kákáánɔ́ yɛɛ́pí káánɔ́ ɛ́ɛ́: nutipá pókuól kɔɔ́mɔ yiipanɛ́ɛ.» 34«Kikotí kiikɔ́siɔkɔ́siɛ ekie inúfáanɛ́ɛ: Ɔ́nuɔyɔ́nɛ́n panúɛ na panúɛ. Yá aná yɔ́ɔ́nyínúɔ́yɔ, ɔ́nuɔyɔ́nɛ́n kákáánɔ́ panúɛ na panúɛ. 35Índɛ nuɔ́kɔɔyɔnɛn panúɛ na panúɛ, káakáánɛ pɛɛnd peem éényímenyée ɛ́ɛ́ nunyɛ popíónyí páámɛ.» 36Símun Píɛ́l kanyi é Yésus ɛ́ɛ́: «Ɔkɔ́n, naánɛ́ ayuukanɛ́ɛ?» Yésuse kɛ́ɛ́yɛ́ ɛ́ɛ́: «Atipá ukuɔŋ káamɛ nínúan ɔ́ kɔɔ́mɔ iyuukanɛ́ɛ, maná eényísíen ɔ́ɔŋɔ́ káámɛ é kélém.» 37Píɛ́lɛ kɛ́ɛ́yɛ́ ɛ́ɛ́: «Ɔkɔ́n, á kiákí indiányípá ukuɔŋ kááwɔ nínúan? Inyɛ ɛpíɛ́yɛ́n é kueki kusɔ́t kúámɛ kááwɔ ó pusíó!» 38Yésuse woondinyi ɛ́ɛ́: «Anyɛ ɛpíɛ́yɛ́n é kueki kusɔ́t kúáwɔ káamɛ ó pusíó á? Yɔɔ́kuɔyɔn kémuémue ɛ́ɛ́, kitétí kaná kuɛl kímanyi kítipíliá, akaná kumbísáŋɔn kátátɔ́ ɛ́ɛ́ atipá imenyen.»
ទើបបានជ្រើសរើសហើយ៖
Isáaŋ 13: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
