Meelie mé Petúmí 13
13
Pusɔ́m pú Sóol na palanapas
1Peémímekélíe ma Támbák no póónyóonyi mapá kɔ́ ɔlɔŋ u peétépí ú Antíos. Pɔ́ pámaápá ɛ́ɛ́: Palanápasɛ, Simiyone ewu pápílanɛ́ɛ ɛ́ɛ́ eŋénépénée, Lisiyuse mɔnɔ́ Silene, Manáyɛnɛ ekúl ú puúpayɔ́ u efuŋ Elot, no Sóol. 2Puɔ́sí púlotí epú pémeékúmésí Ɔkɔn kí imbísókólí, páápísɔ́mba pilɔ́ɔ́ŋɛt Emfúnukufúúmɛ kanyi kɔ́ɔ́p ɛ́ɛ́: «Ánunyáŋɛ́k Palanápasɛ no Sóol ó pusío pu pusɔ́m epú yáányípílíkɛ́n pɔ.» 3Pɛ́mɛɛlɛ́ pámáaman apsɔ́mba pilɔ́ɔ́ŋɛ́t na kuman opísóykoloni, páátál pɔ imbɔk pááyap pɔ pááyɔɔk.
Palanápasɛ no Sóol é Sipilɛ
4Yá anakáánɛ́ Emfúnukufúúmɛ maátɔ́m palanapasɛ no Sóol á pusɔ́m. Páayɔɔk Silesi, kɔ́ɔk pɔ́ɔ́kɔ́l kitóóŋ Pááyɔɔk kí ilua í Sipilɛ. 5Páámán Salaminɛ, póókoond ó kuól kúkémé nukál nú Támbák á piansi pi imbísókólí pi Pɛyúútɛn. Isáaŋ malakuse mapá kɔ́ɔk wɔɔ́yikɔnɛn pɔ. 6Pɛ́mɛɛlɛ́ pásaapan ilua kitikit kuám Pafoso, péélumen ne eŋelímaanyɛ́, upíɔ́yɔnɛ́ɛ unyi eŋémímekélíe má Támbák: Umapá mɔnɔ́ Yúútɛn kisiɛ́n ɛ́ɛ́ páál yésuse. 7Umapá eŋelípuólí á masiá mɔ Ɔŋgɔmunɛ u ilua ikáánɛ́, kisiɛ́n ɛ́ɛ́ Selisiyus payulus, mɔɔnd u insiŋí. Ɔŋgɔmunɛ ukáánɛ́ waapílíkɛn Palanápasɛ nɛɛyɛ́ no Sóol, á kiákí ɛ́ɛ́ umɔpílɔ́ɔ́ŋɔ kupítɔ́likɛn nukál nú Támbák. 8Wɛɛ́tɛ eŋelimanyɛ́, kisiɛ́n kíɛ́yɛ́ kinyɛ́ Elimasɛ, nɛ nukɛlɛkɛ, utimaamba ɛ́ɛ́ papilikinɛ pɔ, emenyi iŋgɔmunɛ ɛ́ɛ́yɛ eŋétépí. 9Maná, Sóole, ewu paandá apílánɛ́ ɛ́ɛ́ Póole, owóónón ne Emfúnukufúúmɛ waatámb eŋelímaanyɛ́ eŋis sóóóŋ 10ukanyi kɛ́ɛ́yɛ́ ɛɛ: «aŋúɛ ɛnyɛɛ́ owóónón na kisupɔ́ ni ifili, muɔnɔ́ u okóyikoyi, okóyikoy u kémuémue, atíákaánd kutɔ́lɔ epú púnyɛɛ́ indɛ́ndɛ́nɛ kí iŋilí sí Ɔkɔ́n a? 11Nínúan pítɔ́likɛn, ɔmbɔk u Ɔkɔ́n mɛ́ɛ́kuɛtikɛ́n: Aákuan pipúte kuám ɔ́ mɔnɔ́ kisikɛl, atíákandá kuɛ́n tɛ ɔɔ́nyi. Nɔ niɔ́kɔ́tɔ́n woól pipúte, woond ó kufíólolo á kuamba mɔɔnd u kuendesi wɔ.» 12Umɛɛlɛ́ wɛɛ́nɛn epú púmaápítápɔ́k, Ɔŋgɔmunɛ ewe wɛ́ɛ́yɛ́ eŋétépí; Á kiákí ɛ́ɛ́ iŋónyí ó pusíó pú Ɔkɔ́n mekííki wɔ́ peseé kɛ́ɛ́yɛ́ kɔ́ ɔtɛ́m.
Póole na Palanápas Antiós u Pisití
13Póole nɔ pɔ́kúɔ́p pɔ́ɔ́kɔ́l kitóóŋ Pafos pááyɔɔk Pɛlɛsɛ pálɛ́k u kitɔŋ kí pamifili. Isáaŋɛ waapíátɔn nɔɔpɔ́ ó kuond Yelúsalɛm. 14Póole na Palanapasa páátɔk pɛlɛsɛ páányaám Antíos ɔ́ kitɔŋ kí pisiti. Puɔ́sí pú sapata péépíkin á kiansi kí imbísókólí kí Pɛyúútɛn, pɔ́ɔ́nyɔ́mbɛt. 15Pɛ́mɛɛlɛ́ pámáaman kuanuna kɔ́ ɔmbɔp ú pikotí ne u peémímekélíe má Támbák, pɔɔkɔ́n pá kiansi kí imbísókólí póówun ɛ́ɛ́ páátíán Póole nɛɛyɛ́ na Palanapas ɛ́ɛ́: «paandimán indɛ nuápian puónyi pú kuák embúl ú pɛɛnd ilúndɛ, á nukál nukáánɛ́.» 16Póole kɔk waatukɛn, wɛɛlɛ pulinsí nɔ ɔmbɔk ukáánɛ́ ɛ́ɛ́: «Panɔ́ punya isilayɛl, na panúɛ nutíínenée Támbákɛ́ɛ, ɔ́numbítɔ́líkɛn. 17Támbákɛ́ɛ u nikúli níásɔ́ Ísilayɛl mayɔ́ɔ́n pesíí páásɔ́. Wɛɛkɛlɛ ɛ́ɛ́ nikúli teke aká pámaápá ɔ́ kitɔŋ kí Esípit; Maná Támbákɛ́ɛ weemí pɔ na pukaaka púɛ́yɛ́. 18Ɔ tuɔŋ etin áandɛ́ wooyosi pɔ e kúúsí kú kiándɔ́l. 19É kélém akáánɛ́, wɛɛsɛ́lɔn esipi átíndátɔ́ neémue ɔ́ kitɔŋ kí kanáan, weekeeki nikúli níɛ́yɛ́ kúúsí kúɔ́p: 20Pukáánɛ́ kitikit mɔtɔ́p puandá pu kuáman tuɔŋ imbak íni ne etin áandɛ́ na túát. É kélém akáánɛ́, Támbákɛ́ɛ weeki pesíí pɔkúnɛ́ɛ páásɔ́ pesúmbí pisɛn é kuendesi pɔ kuám á kisikɛl kí eŋémímekélíe má Támbák Samuɛl. 21Póókoówun wu efuŋ, Támbákɛ́ɛ weeki pɔ Sawule, muɔnɔ́ u Kís, u nisipi ni Pinsamin, umɔɔ́tɔ́p á kipia tuɔŋ etin áandɛ́. 22Támbák mɛɛ́lɛ́ weélenyi sawule efuŋ, wɛɛtɛ́k Tafite. Wu Támbák mɔɔ́yɔ kɛ́ɛ́yɛ́ ó pusíó ɛ́ɛ́: Imɛ́ɛ́n Tafíite, muɔnɔ́ u yese, mɔɔnd aná ɔtɛ́m wáámɛ ɔ́ɔ́yɔɔnɛ́ɛ, wɔ ukoónyíwóónyosi pilɔ́ɔ́ŋɛ́t píámɛ. 23kɛ́ɛ́yɛ́ á nindaanda Támbák meémí Yésuse kɛ́ɛ́yɛ́ kí indan, etúkún wu isiyaɛl.» 24Yésus mɛɛlɛ́ umanyi utiasíám, Isáaŋ mapá umámaná ekéme na kupílan kitɔŋ kí Ísiyaɛl kitikit ɛ́ɛ́ kisendi pilɔŋ kiondo kípítuu. 25Umɛɛlɛ́ úkamanan pusɔ́m púɛ́yɛ́, wu Isáaŋɛ ukáánɛ́ ɛ́ɛ́: «nuéketesi ɛ́ɛ́ inyɛ ɛ́nyɛ? Indipá ewu nupéétenyée! Maná ɔnupítɔ́líkɛ́n woókoólon káámɛ é kélém ewu indiányípá ké etényí ú kuolun tuolí tú pipɔ́kɔ́tɔ píɛ́yɛ́.» 26Paandimán tɛ nupá é nisípi ni Ápilaháam kúnyáánɛ é péépi káánɔ́ ɛ́ kikɛtɛ́kɛtɛ́ɛ pétíínené Támbákɛ́ɛ, káásɔ́ ó pusíó Támbák maátɔ́m insɔ́m i kisótio eye. 27Púnyɛ ɛ́ɛ́ pɛɛnd pe Yelúsalɛm ne pefuŋ pɔ́ɔ́p mapísáŋúnɔ́ Yésuse póókoond pɛpɛ́n wɔ, póówóónyi tuká tú peémímekélíe ma Támbák túánunanɛ́ siki puɔ́s pú sapat. 28Póókoówun Pilatus ɛ́ɛ́ wɔ́ɔ́yɛt ɛ́ɛ́ pɔ́ɔ́n wɔ, pɔ́ Kati kupia ipán í kusɛm wɔ́ é niku. 29É kélém kú kuman owóónyosi epú imfíɔ́ŋ mɔɔ́yɔ́ kɛ́ɛ́yɛ́ ó pusíó, pééseli wɔ́ ó kolóse, póónyo wɔ. 30Maná Támbákɛ́ɛ weenyi wɔ ɛ́ kikɛtɛ́kɛtɛ́ɛ kí piku, 31é metúk kutek, weepitíínyenyi é péépi pámaápá nɛɛyɛ́, kuatál kalilé kuám Yelúsalɛm, pɔ́ pɛ́nyɛɛ́ nínúan petétúnyí pɛ́ɛ́yɛ́ ke eŋis yɔ́ kitɔŋ kí Ísiyaɛl. 32Pasɔ́ kákáásɔ́, tuɔ́núɔ́yɔn insɔ́m yi indámb eye ɛ́ɛ́: Indán eyí Támbák maákɛ́n pesíí pɔkúnɛ́ɛ páásɔ́, 33umówóónyi yɛ́ɛ nínúan káásɔ́ ó pusíó, pasúɛ nindaanda níɔ́p, aká umeényí Yésuse, yá aná púnyɛɛ́ puɔ́ŋɔ́n á kilɛ́l kíkáandíɛ ɛ́ɛ́: Anyɛ muɔ́nɔ́ áámɛ, niŋúɛ, ínanɔ, imeékupíén. 34Támbák mɛɛlɛ́ úkeenyí wɔ é piku ɛ́ɛ́ utiyikɛ́. Umɔɔyɛ́t ɛ́ɛ́: Yaányínúfá kipínúún kí kati kipalalá, ekí imaákɛ́n Tafíite indan. 35Puátákáánɛ́ puandá waandɛɛ́ kuɔyɔ é kiénsi kimoti ɛ́ɛ́: Atiányiyapá ewú amaáyɔ́ɔ́n ɛ́ɛ́ úyika á kipɛ́l. 36«Kúúkɔ Tafíite, é kélém kú kuman kuɛlɛ pusɔ́m pú Támbák, ɛ́ kíɛ́yɛ́ kisikɛl weeku, póónyo wu á masia me pesíí pɔkúnɛ́ɛ pɛ́ɛ́yɛ́, waaman ayika. 37Maná, ewú Támbák meényi ɛ́ kikɛtɛ́kɛtɛ́ɛ kí piku timayɛk. 38Énumenyi pú kɔk paandimán, ɛ́ kisiɛ́n kí Yésus Támbák núyapɛn á pifal; Pukáánɛ́ kikotí kí Moyíis timɔɔ́tɔ kunúáŋɔn káánɔ́ á pifal. 39Maná epé páátapanɛ́ɛ Yésuse pátáŋapanɛ́ɛ kiɛ́tɛ kiyapina. 40Énupíkeŋényesi ɛ́ɛ́ epú peémímekélíe ma Támbák mɔɔ́ŋ tinúámɛ́n. 41Pɔ́mɔyɛ́t ɛ́ɛ́: pɛɛnd pɛ́pímɛlɛnɛ́ɛ, ónuyoósin! Énusímile, maná núku! Kúúkɔ́, nukɛlɛ numɔɔ́sɔ́tɔn, iŋɛl maándá mɛ́nyɛɛ́ ɛ́ɛ́, índɛ mɔɔnd sianútían mɔ nutiányaátáp.» 42Póole na Palanápas mɛɛlɛ́ pákanyɛɛ́ páám á kiansi kí imbísókólí kí Pɛyúútɛn, póókoówun pɔ ɛ́ɛ́ páand kuond puɔ́s pú sapat woólonée á kuand kuesiekí yɛɛ́tɛ iŋónyítónyí. 43Pɛɛnd mɛɛlɛ́ nakusálamanda, Pɛyúútɛn kusol nɔ pɔsɔ́k pólotí pɛ́mɛɛ́nɛkɛ́n pikotí pí Moyíis, pɔ́ɔŋ ó Póol na Palanápas pémekenyí ilúndɛ ɛ́ɛ́ pátipíátɔ́n ɔtɛ́m peseé ú Támbák.
Póole na palanápas ku péépé pátiányipá Pɛyúútɛn
44Puɔ́sí pú sapat púmɔɔ́ŋɔn, pálɛ́k kitikit waapíkúsíkan ɔ́ɔ́kupítɔ́likɔn nukál nú Ɔkɔ́n. 45Pɛ́ɛ́nɛn embul u pɛɛnd ukáánɛ́, Pɛyúútɛn páápuluŋɔnd, póond á kusúmba piansɛ́ pásikan Póole. 46Póole na Palanápasɛ páátían pɔ́ no pipíóndínyí ɔtɛ́m ɛ́ɛ́: Púmɛ́ɛ́síkɛ́nɛ́n ɛ́ɛ́ tútúan kuɔyɛ́t nukál nú Támbák kuanɔ́! Ana núményené nuɔ, numɛ́píɛ́nin panú muɛt ɛ́ɛ́ nutipá ké etényí u kusɔ́t kú teeníík, páásɔ́ kɔk, ninúan túyɔɔk ku péépé pátiányípá Pɛyúútɛn. 47Indɛ́ epú Ɔkɔ́n maátútíánan: imɛ́kutɛ́k aná kisie kí piɛ́nɛ́ɛ́n ɛ́ɛ́ óólo ne nitúkúnin kuám kí insúkie í kúúsí. 48Á tukál tukáánɛ́, epé pátiányípá Pɛyúútɛn pekumesi nukál nú Ɔkɔ́n na anyamɔ́ kitikit, ne epi kitikit Támbák maáyɔ́ɔ́n ó pusíó pu kusɔ́t kú teeníík pɛ́ɛ́yɛ́ peétépí. 49Nukál nú Ɔkɔ́n nuasálamand ɔ́ kitɔŋ kitikit. 50Maná Pɛyúútɛn póókoond é kuliikesi piandá pí pakáandɔ́ pémeékúmésí Támbákɛ́ɛ ɛ́ nuu Pɛyúútɛn nɔ pɔkɔ́n pa pálɛ́k; ɛ́ɛ́ Póond é kunuenesi Póole nɛɛyɛ́ na Palanápasɛ póond pákuŋɛt pɔ́ kɔ́ɔ́p ɔ́ kitɔŋ. 51Póole na palanapasɛ pékiteni pɔ́ kinée kí ambana yɔ́ɔ́p, Pááyɔɔk ɔ́ kitɔŋ kí Ikonium. 52Popíónyí pá Antiós pó pɔ́ɔ́lɔp pówóónón na anyamɔ́ ne Emfúnukufúúmɛ.
ទើបបានជ្រើសរើសហើយ៖
Meelie mé Petúmí 13: yav
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2026, CABTAL
