Roma 8
8
Ngʉŋine mɛ́ Zhʉye Mboʼmvé fɛ́ nɛ́
1A ne ŋkhoʼyɔŋ, pɔŋ pɛ pwɛ Yěsô Kristo təb mbé taʼ ye nɛ́, tɛɛmbɛ́ pe pó mbé fuŋɔ wɔ́b nɛ́ ŋkʉ́rʉ́ pó. 2Ŋkyé ŋgâ ŋkhoʼyɛ́ ŋɔŋ tə̌b pú Yěsô Kristo mbé taʼ yé nɛ́, Zhʉye Yáŋme fɛ́ tsómvé pwó yé. A kɛ túbú yéré tubu ya ne mkpaŋ ndzɔʼɔ meno pɛ́, a kɛ zhyɛ́ kəpɔŋ fɛ vó ne mo nɛ́. 3No yéré, kaŋ Musé kɛ pe kuʼɔ ne ŋgyɛne pó, ŋkyé ŋgâ mbəb yiŋi yɛ́ a tsiŋɛ wíŋi ŋgâ piŋi zhyɛ́ no kəpɔŋ nɛ́, kɛ tubu tʉ̌ŋ yɛ́, kaŋ kɛ tséʼé nɛ́. Tsʉʼmbé, Mboʼmvé kɛ́ zhyɛ́. Kəpɔŋ kɛ zhyɛ́, á twɔ́ kpáʼá Mɔ́ŋ yé, a pɛ́ njʉ́ ŋumesɔŋ wɛ́ a zhyɛ́ no kəpɔŋ nɛ́, a zhyɛ́ ne mbəb ye yéré, kəpɔŋ myé. 4Yânéré ŋgâ, ŋgerɛ́ŋged yɛ́ kaŋ psirɛ́ nɛ́, pɛ ndzó ŋkɔŋɔ tsómvé yiŋi náá, piŋi pó mbé nyí njʉ́ ndzǎbmbəb yiŋí tsɔ́ nɛ́ pó, ntsʉʼ mbé nyíí njʉ́ Zhʉye Yáŋme tsɔ́ nɛ́. 5Ŋkhoʼyɛ́ a sáʼá ndzǎbmbəb ŋɔŋ sáʼá wé nɛ́, kpaŋató ye ke mbɛ́ɛ́ ne meno pɛ ndzǎbmbəb ŋɔŋ zɔŋɔ nɛ́. Ntsʉʼ mbé ŋkhoʼyɛ́ a sáʼá Zhʉye Yáŋme sáʼá ŋɔŋ nɛ́, mbǒ kpaŋató ye ke mbɛ́ɛ́ ne meno pɛ Zhʉye Yáŋme zɔŋɔ nɛ́. 6Kpaŋató ndúŋú meno ndzǎbmbəb fɛ́ɛ́ vó, ntsʉʼmbé kpaŋató ndúŋú meno Zhʉye Yáŋme pó fɛ yé pe tsómvé pwɛ mbúru. 7Ŋkyé ŋgâ kpaŋató ndúŋú meno pɛ́ ndzǎbmbəb zɔŋɔ nɛ́, pɛɛ tʉŋɔ́tó pwó Mboʼmvé. A ndɛ mbé nyí njʉ́ kaŋ Mboʼmvé tsɔ nɛ́ pó, tɛɛmbɛ́ a pe mwɔ́ ŋkɔŋɔ pó. 8Ŋkhoʼyɛ́ a sáʼá ndzǎmbəb sáʼá ŋɔŋ nɛ́, tɛɛmbɛ́ a pe zhyɛ́ no yɛ́ a mbǔ Mboʼmvé nɛ́ pó. 9Tsʉ́ʼŋgɛmbɛ ne puŋ, a pó mbé sáʼá ndzǎmbəb sáʼá wuŋ pó. Ntsʉ́ʼmbé a sáʼá Zhʉye Yáŋme sáʼá wuŋ, ŋkyé ŋgâ zhʉye Mboʼmvé tsǒ mbəb puŋ. Ŋɔŋ tsɛʼɛ Zhʉye Kristo pó, mbǒ a ŋú yé pó. 10Kpaʼ sísíŋ, a pɛ́ɛ́ yɛ́ Kristo mbəb puŋ nɛ́, mbǒ ndzǎmbəb yuŋ tsɛʼɛ ne pfône ŋkyé kəpɔŋ. Ntsʉʼ mbé Zhʉye Yáŋme pe tsómvé yuŋ, ŋkyé ŋgâ Mboʼmvé zhʉ́ wuŋ njʉ́ puŋgerɛ́ŋged nɛ́. 11Mbó mbé yɛ́ Zhʉye Ŋɔŋ wɛ́ a kɛ zhʉyɛ́ Yěsô ne vó nɛ́, mbəb puŋ nɛ́, Ŋɔŋ wɛ́ a kɛ zhʉyɛ́ Yěsô Kristo ne vó nɛ́, ŋkʉ́yó ke fɛ́ tsómvé pwó ndzǎmbəb yuŋ yɛ́, a náʼá ke pfó pfó nɛ́, ŋgɛ́mbɛ́ ndáá ndúŋú Zhʉye yé wɛ́ a mbəb puŋ.
12Néré kɛ́ʼɛ́ kɛ pɔ́ŋmɛ́ páá, piŋi tséʼé kɛ́ɛ́, mbé pɛ́ɛ́ pú ndzǎbmbəb, ne ŋgyɛne no yɛ́ a kʉye nɛ́ pó. 13Ŋkye ŋgâ a pɛ́ɛ́ yɛ́ puŋ zhyɛ́ no yɛ́ ndzǎmbəb yuŋ zɔŋɔ nɛ́, mbǒ puŋ pfɔ. Ntsʉʼmbó mbé yɛ́ puŋ yɔ́ɔ́ Zhʉye Yáŋme nɔʼ meno pɛ á kʉyě ndzǎbmbəb yuŋ, puŋ zhyɛ́ nɛ́, mbǒ puŋ ntsó mvé. 14Néré kɛ́ʼɛ́ pɔŋ pɛ a tyáŋa Zhʉye Mboʼmvé tyáŋa wɔ́b náá nɛ́, pɔ́b pɔŋ Mboʼmvé. 15Zhʉye wɛ́ pe kɛ fɛ ne puŋ nɛ́, kɛ pe pɛ́ɛ́ taʼ Zhʉye wɛ́ a zhyɛ́ puŋ cʉ́ʼɔ́ pɛ mkpaŋ, kii ŋgâ tsɛʼɛ pɔ́ɔ́ nɛ́ pó. Ntsʉʼmbé, a taʼ Zhʉye wɛ́ a zhyɛ́ puŋ tsʉʼ pɔ́ŋ pé pe kpɛ́ɛ́ kpɛ́ɛ́ nɛ́. A Zhʉye wɛ́ a zhyɛ́ piŋi ghéʼe ŋgâ: «Aba» nɛ́. Kéétsi yé pɛ́ɛ́ ŋgâ «Tɛd ya.» 16Zhʉye Mboʼmvé wéré zhyɛ́, zhʉye wíŋi tsʉyǐ ndzwé ŋgâ piŋi pɔ́ŋ Mboʼmvé. 17Piŋi pɔŋ Mboʼmvé, yéré nyoʼo ŋgâ piŋi ke ntséʼé yiŋi mbɛd, ndúŋú mɔ́b pɛ́ a kɛ kaʼa pwó pú pe nɛ́. Piŋi náʼá mbɛ ndzɔʼɔ foʼ Mboʼmvé piŋɛ Kristo ŋkyé ŋgâ, mbziʼe njʉ́ piŋi pɔ́b kɛ zhʉ́ ŋgəʼo nɛ́, piŋi pɔ́b náʼá kaa náá mbɛ ndzɔʼɔ ghɛ́ɛ́ yé.
Ghɛ́ɛ́ wɛ́ a tse ŋkʉyó nɛ́
18Mə tsʉyǐ ndzé ŋgâ, ŋgəʼo yɛ́ piŋi zhʉ́ ŋkhoʼyɔŋ nɛ́, zyé kaʼa mbé kuʼu cyó yɔ́b ne ghɛ́ɛ́ Mboʼmvé wɛ́, a ŋkʉ́yó ŋgyɛ pe zhʉ́ mbəb piŋi nɛ́. 19Ŋkyé ŋgâ ŋkɔŋɔ yɔ́b yɛ́ Mboʼmvé kɛ́ téŋé náá nɛ́, tsé shʉrʉ kaʼatɛ ŋgâ Mboʼmvé nyoʼ pɔ́ŋ pé, pé zɛ́ wɔ́b. 20Ŋkyé ŋgâ a sáʼá tʉ̌ŋ mɛ a tséʼé cyó ghebe nɛ́ pó, sáʼá mɔ́b pɛ́ Mboʼmvé kɛ́ téŋé nɛ́, ŋkhoʼyɔŋ. Ntsʉʼ mbé pɛɛ ne ŋkʉyene me pó, mbɛɛ ne tʉ̌ŋ ŋɔŋ wɛ́, a kɛ́ fí wɔ́b pwó méré tʉ̌ŋ nɛ́. Mbɛ néré, a ke shʉrɛ shʉrɛ. 21Ŋkyé ŋgâ mɔ́b pɛ́ Mboʼmvé kɛ́ téŋé nɛ́, pe ŋkʉ́yó tubɔ wɔ́b ne mkpaŋ ndúŋ tʉ̌ŋ mɛ́, a pubɔ mɔ́b nɛ́. Néré kɛ́ʼɛ́, ne tséʼene yɔ́b mbɛd ndúŋú ŋgʉŋine pwɛ ghɛ́ɛ́ pɛ, pɔ́ŋ Mboʼmvé náʼá ntsɛʼɛ nɛ́.
22Piŋi tsʉyǐ ndzé náá ŋgâ, ne ŋkhoʼyɔŋ kaʼa, ŋkɔŋɔ mɔ́b pɛ́ Mboʼmvé kɛ́ téŋé náá nɛ́, tse ŋgɔɔ, njʉ́ ŋgəʼo njʉ́ məŋgʉ́yé wɛ́ mɔ́ŋ tsé nwɔ wé nɛ́ 23A ké mbé pe ndaʼ mɔ́b péré ne ndúŋú pɔ́b pó, mbɛ piŋi pɛ́ piŋi tséʼé ntɔ́ mɔ́b pɛ Zhʉye Yáŋme fɛ nɛ́, piŋi ke ntsé ŋgɔɔ yiŋi ndzó ndzɔʼ yiŋí, ndzwəʼɛ ŋgâ Mboʼmvé kpɛ́ɛ́ wíŋi ne pɔ́ŋ pe, mbəb yiŋi yǎ ndúŋú, ndzú. 24Ŋkyé ŋgâ piŋi kɛ tséʼé ndzǔne, tsʉʼ ke mbɛɛ ndaʼ ne shʉríne. Ntsʉʼŋgɛmbɛ́ a pɛ́ɛ́ yɛ́ wo kɛ tse njʉ́ yɔ́b yɛ́ wo shʉ́rɛ nɛ́, mbǒ wo pó mbé shʉ́rɛ shʉ́rɛ ŋkʉ́rʉ́ pó, ŋkyé ŋgâ yɔ́b yɛ́ ŋɔŋ zhʉ́ nɛ́, a pó shʉrʉ ŋkʉ́rʉ́ ŋkyé kɔ́? 25Ntsʉʼ mbé, shʉríne yɔ́b yɛ́ pe tse mbé zhʉ́ nɛ́ pó, a pɛ́ɛ́ ndzwə́ʼene ne ŋkɔŋɔ shʉ̌ndzɔʼ náá. 26A ke mbé nɛ́ njʉ́, Zhʉye Yáŋme ghebe wíŋi, ŋkhoʼyɛ́ piŋi pɔ́d nɛ́. Ŋkye ŋgâ, piŋi zé ntseʼéne Mboʼmvé njʉ́ a zɔŋɔ nɛ́ pó. Ntsʉʼ mbé Zhʉye Yáŋme ne tómbəb yé, tsé ntsɛ́ʼɛ́ Mboʼmvé ŋkyé wíŋi ne nsó ntsááŋkobe pɛ, ŋumesɔŋ kuʼɔ ne nsóne nɛ́ pó. 27Ŋɔŋ wɛ́ a kpɛʼɛ zyě ndzɔʼ ŋkɔŋɔ pumésɔŋ náá nɛ́, zɛ́ yɔ́b yɛ́ Zhʉye Yáŋme kpaŋa ne mbzirine nɛ́, ŋkyé ŋgâ Zhʉye Yáŋme tsɛʼɛ Mboʼmvé ŋkyé pǔkristo, pe njʉ́ Mboʼmvé zɔŋɔ nɛ́.
28Piŋi cʉ̌yi ndzé kpáʼá sʉ́ʼʉ ŋgâ, ŋkɔŋɔ no yɛ́ a kuŋɔ pɔŋ pɛ pɔ́b kʉyě Mboʼmvé náá nɛ́, pɛɛ no sʉ́ʼʉ ne pɔ́b, pɔ́b pɛ Mboʼmvé fú wɔ́b, pe njʉ́ a kɛ tíí nɛ́. 29Pɔŋ pɛ́ a kɛ pě ntsɔʼɔ wɔ́b, a kɛ kémbó ntii ŋgâ pɔ́b náʼá mbɛ njʉ́ fwɛ́ɛ́ Mɔ́ŋ yé nɛ́. Yânéré kɛ́ʼɛ́ ŋgâ, a pe sɔ́ Mɔ́ŋ ndzɔʼɔ pɔ́ŋmɛ́ pé, pé zááme. 30Pɔ́ŋ pé péré pɛ́ a kɛ tíí wɔ́b nɛ́, a ké mbó ntsɔʼɔ wɔ́b. Pɔŋ péré pɛ́ a kɛ kémbó ntsɔʼɔ wɔ́b nɛ́, a zhʉ́ wɔ́b njʉ́ puŋgerɛ́ŋged nɛ́. Pɔŋ péré pɛ a kɛ zhʉ́ wɔ́b njʉ́ puŋgerɛ́ŋged nɛ́, a ké mbó niŋɛ wɔ́b ndzɔʼɔ ghɛ́ɛ́ yé.
Mboʼmvé náʼá ke kʉ́yé wíŋi kʉyě
31Piŋi mbó ntsɔ̌ ŋgâ kɔ́? A pɛ́ɛ́ yɛ́ a piŋɛ Mboʼmvé nɛ́, mbǒ tɛɛmbɛ́ a pó mwɔ́ wɔ́ mwɔ̌ wíŋi? 32Yé wɛ́ a kɛ pé tee kpaʼ Mɔ́ŋ yé nɛ́ pó, mbó fɛ́ wé ŋkyé tó yiŋi náá nɛ́, a náʼá ŋgyɛ̌ níŋ mbé fɛ́ ŋkɔŋɔ yɔ́b náá pú Mɔ́ŋ yé, ne piŋi ndzəndzoʼ pɔɔ? 33Tɛɛmbɛ a sɔ́b wɔ́ sɔ́bɔ́ pɔŋ pɛ Mboʼmvé kɛ tsɔ́ʼɔ́ wɔ́b nɛ́? Ŋgâ á zhʉ́ Mboʼmvé njʉ́ pɔ́ŋ njʉ́ puŋgerɛ́ŋged nɛ́? 34Tɛɛmbɛ a fiʼ wɔ́ fiʼɛ wɔ́b fuŋɔ́? Ŋgâ, Yěsô Kristo kɛ pfó? Mbe pɛ́ɛ́ ndaʼ néré pó! A kɛ zhʉyɛ́ ne vó, ŋgɔrɔ ne ndzáʼa pwó Mboʼmvé ye maʼ, ntsɛʼɛ Mboʼmvé ne tó yiŋí. 35Tɛɛmbɛ a tubu kɔ́ tubɔ wíŋi ndzɔʼɔ kəŋe Kristo? A ŋgəʼo? A pɔ́ɔ́ zááme? A mkpeʼe? A ndzyekuʼu? A pɔ́ŋ? A mbéne ntswee vó? A vó? 36Mbziʼe njʉ́ a ŋweʼéme ŋgâ:
«Psi yâ ndâ wo ke ntsɛɛ mésɔ vó, ndzyěne ndzɔʼ wáá mbáŋ ne ŋkhoʼfwɔnáb nɛ́.
Pe yɔ́ɔ́ ywí njʉ́ mwɔ̌paʼ pɛ́, pe ghú ne wɔ́b ne nɔʼne nɛ́.»
37Mbɛ́ ndúŋú ŋkɔŋɔ meno péré pɛ, a kɛ́ kuŋɔ wíŋi nɛ́, piŋi kɛ́ ke maʼ ntsɛ̌ tsɛ̂ kaʼatɛ, ne ŋkɔŋɔ ndzáʼa náá, a zhyɛ́ Ŋɔŋ wɛ́ a kɛ kʉyě wíŋi nɛ́. 38Ɔ́ŋɔ́, mə cʉ̌yi ndzé kpaʼ sísíŋ ŋgâ, mbɛ vó kii ŋgâ tsómvé, mbɛ pɛ aŋgere kii ŋgâ pɛ zhʉye pɛ pɔ́b sáʼá pɔŋ nɛ́, mɔ́b pɛ a ŋkhoʼyɔŋ nɛ́, kii ŋgâ mɔ́b pɛ a náʼá ŋkʉyó nɛ́, kii ŋgâ pɛ tʉ̌ŋ, 39kii ŋgâ pɛ tʉ̌ŋ pɛ́ a pépéé nɛ́, kii mbɛ pɛ a ndzɔʼɔ tsetsáʼ nɛ́, mbɛ cyó yɔ́b yɛ́ Mboʼmvé kɛ téŋé téŋé nɛ́, cyó yɔ́b yóʼó yɛ́ tɛɛmbɛ́ a fáá wíŋi kəŋe Mboʼmvé yɛ́, a kɛ yǎ mbəb Yěsô Kristo Ntsɛɛpɔŋ wíŋi, nyóʼ nɛ́ pó.
ទើបបានជ្រើសរើសហើយ៖
Roma 8: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
