Roma 6
6
Kəpɔŋ pó mbé tséʼé cyó tʉ̌ŋ mbəb ŋukristo ŋkʉrʉ́ pó
1Tɛɛmbɛ pé nsó nɛ́ pé ŋgâ kɔ́? Ŋgâ piŋi tsǒ ndzɔʼɔ kəpɔŋ, yânéré ŋgâ foʼndzəndzoʼ mêmě sóʼo mbəb piŋi? 2Ngáŋ! Tɛɛmbɛ a pé pé néré pó! Kəpɔŋ zé ŋgâ piŋi pumɔ́b ŋkʉ́rʉ́ pó, a mbó ŋgyɛ́ níŋ piŋi pó ntsǒ ndzɔʼɔ kəpɔŋ ŋkʉ́rʉ́? 3Kii ŋgâ, puŋ fwɔ́ ŋgâ, ŋkɔŋɔ wíŋi náá, piŋi kɛ kpéé nse ne tíí Yěsô Kristo, kɛ́ʼɛ́ piŋɛ vó yé kaa náá ntə́b mbé taʼ ye? 4Piŋi kɛ kpênse kɛ́ʼɛ́ piŋɛ pɔ́b kpaʼ pfó, pé cʉ́ wíŋi pɔ́b, kɛ́ʼɛ́ ŋgâ njʉ́ ghɛ́ɛ́ Tɛd kɛ zhyɛ́ Kristo zhʉyɛ́ ne vó nɛ́, kɔʼɔtómbəb yiŋi kémbó tséʼé mbziʼe tsómvé ffé. 5Ŋkye ŋgâ a pɛ́ɛ́ yɛ́ piŋi pɔ́b kpaʼ náá mbé taʼ yé, kpaʼ pfó náá nɛ́, mbǒ piŋi ke náʼá njʉyɛ ne vó njʉ́ a kɛ zhʉyɛ́ yé nɛ́. 6Piŋi zoʼ yɔŋ no kpaʼ sʉ́ʼʉ: ndzuŋ ŋɔŋ wɛ́ piŋi kɛ pě mbé nɛ́, pe kɛ kpii wé pú Yěsô ndúŋú ŋgʉŋʉ. Kɛ́ʼɛ́ ŋgâ ndzǎbmbəb yɔŋ yɛ́ a kʉyě no kəpɔŋ nɛ́, pfó, piŋi pó mbé pé mkpaŋ pwó no kəpɔŋ ŋkʉ́rʉ́ pó. 7Ŋkyé ŋgâ ŋɔŋ wɛ́ a pfó nɛ́, pú kəpɔŋ tséʼé cyó no ŋkʉ́rʉ́ pó. 8Njʉ́ piŋi zé kpaʼ sísíŋ ŋgâ piŋɛ Kristo kpaʼ náá pfó nɛ́, a ke mbé nɛ́ njʉ́, piŋi cʉ̌yi ndzé ŋgâ, piŋɛ pɔ́b ŋkʉ́yó kaa náá ntsó mvé nɛ́. 9Piŋi ze nɛ́ ŋgâ: njʉ́ Kristo kɛ zhʉyɛ́ ne vó nɛ́, a naʼ mbó mpfó ŋkʉ́rʉ́ pó, vó tséʼé cyó tʉ̌ŋ mbəb yé ŋkʉ́rʉ́ pó. 10Ŋkyé ŋgâ a kɛ pfɔ́ kɛ́ʼɛ́, pé ŋgâ, kii pú kəpɔŋ pó tséʼé cyó no. A kɛ pfó néré pe taʼ kɛɛ, ŋgɛ naʼ mbó pfó ŋkʉrʉ́ pó. Ŋkhoʼyɔŋ wɔŋ wɛ́ a tsó mvé nɛ́, a tsó ŋkyé Mboʼmvé. 11Mbɛ kɔʼɔtómbəb yuŋ, puŋ tiŋi mbəb yuŋ njʉ́ pɔŋ pɛ́, pwɛ kəpɔŋ tséʼé cyô no nɛ́ pó, mbó ntsó mvé ŋkyé Mboʼmvé, ŋgɛ́mbɛ́ puŋɛ Yěsô Kristo tə́b mbé taʼ yé.
12A ndɛ mbó nɛ́ sáʼá kəpɔŋ sáʼá mbəb yuŋ yɛ́ a ke náʼá mpfo pfó nɛ́, ŋgyɛ, puŋ zhyɛ́ meno pɛ a kʉyě nɛ́. 13Puŋ ndɛ mbó ntsé ntee kəpɔŋ yɔɔ ywoʼɔ́mbəb púŋ, faʼa meno pɛ a tsyɛ́ nɛ́ pó, núŋ. Tsʉ́ʼmbé, puŋ fɛ́ ywoʼɔ́mbəb puŋ pwó Mboʼmvé, pe njʉ́ pumɔ́b pɛ pɔ́b twɔ́ ndzɔʼɔ pfɔ̂pɔŋ nɛ́. Puŋ yɔ́ɔ́ ywoʼɔ́mbəb puŋ, pe njʉ́ khǔntsɔ ŋgerɛ́ŋged nɛ́, né fǎʼne núŋ, pwó Mboʼmvé. 14Ŋkyé ŋgâ kəpɔŋ pó mbé tséʼé cyó tʉ̌ŋ mbəb puŋ ŋkʉrʉ́ pó, ŋkyé ŋgâ a pó mbé sáʼá kaŋ sáʼá wuŋ ŋkʉ́rʉ́ pó, tsʉʼ mbé a pó tyáŋa foʼndzəndzoʼ Mboʼmvé tyáŋa wuŋ.
Faʼ ŋgerɛ́ŋged
15Kɔ́ nɛ́? Piŋi ke tsǒ ndzɔʼ kəpɔŋ ŋkyé no yɛ́, a pó mbé sáʼá kaŋ sáʼá wíŋi pó, a pó ntyaŋa foʼndzəndzoʼ ntyaŋa wíŋi nɛ́? Ngáŋ! Tɛɛmbɛ a pé pe néré pó. 16Puŋ zɛ́ yúŋ ŋgâ ŋkhoʼyɛ́ puŋ tsé faʼ pwó ŋɔŋ njʉ́ mkpaŋ nɛ́, puŋ zoʼo ntswee yé pɔɔ? Puŋ mkpaŋ ŋɔŋ wɛ́ nɛ́ puŋ tse ndzoʼo tswee ye nɛ́, kii a pɛ́ɛ́ pwó kəpɔŋ wɛ́ a fɛ vó nɛ́? Kii a pɛ́ɛ́ pwó zóʼntswee yɛ́ a tsyaŋa pɔŋ, pɔ́b zhyɛ́ no ŋgerɛ́ŋged siŋi Mboʼmvé nɛ́? 17Piŋi fɛ́ ŋgúʼune pwó Mboʼmvé, ŋkyé ŋgâ puŋ kɛ pé pɛ mkpaŋ ndúŋú ŋgyɛne no kəpɔŋ. Ntsʉ́ʼmbé, puŋ kɛ zoʼ ntʉ́ʉ́ yɛ́, pé kɛ fɛ́ pwó ŋkɔŋɔ pɔŋ náá nɛ́, ne taʼ ndzɔʼ, mbó nyí njʉ́ á kɛ zɔŋɔ nɛ́. 18Ŋkhoʼyɔŋ wɔŋ wɛ́ pé tubɔ wuŋ ne mkpaŋ pwó no kəpɔŋ nɛ́, puŋ tsʉʼ mkpaŋ ne fǎʼne no yɛ́ á ŋgerɛ́ŋged nɛ́. 19Mə ntsɔ̌ njʉ́ mbɛ wɛ́rɛ́ ŋumesɔŋ nɛ́, kɛ́ʼɛ́ ŋgâ mbziʼe njʉ́ puŋ ghû nɛ́, puŋ cʉ̌yi ndzóʼ. Ntsʉ́ŋtsʉ́ŋ njʉ́ puŋ kɛ tee mbəb yuŋ njʉ́ mkpaŋ nɛ́, a faʼa faʼ siŋɛ́ mbəb, pwɛ vaʼ, néré ntʉŋɔ́tó siŋ Mboʼmvé nɛ́, puŋ ké mbó ntee nɛ́ ŋkhoʼyɔŋ, a pe mkpaŋ faʼa faʼ ŋgerɛ́ŋged yɛ́ a tyáŋa pɔŋ ndzɔʼɔ tsómvé yáŋme nɛ́. 20Ŋkhoʼyɛ́ puŋ kɛ pé pɛ mkpaŋ pwó kəpɔŋ nɛ́, puŋɛ ŋgerɛ́ŋged pe tséʼé cyó no pó. 21Yɔ́b yɛ́ puŋ kɛ tséʼé nɛ́, kɛ pɛ kɔ́? Ndzebe kaʼa, pfɔ́shʉ́ŋ gháʼmbwó múŋ ndúŋú, ŋkyé ŋgâ puŋ zé ŋgâ a náʼá ke mee ne vó. 22Tsʉ́ʼmbɛ́ ne ŋkhoʼyɔŋ, mbziʼe njʉ́ pe tubɔ wuŋ ne mkpaŋ pwó kəpɔŋ nɛ́, puŋ pó ntsʉʼɔ mkpaŋ nɛ́ pwó Mboʼmvé. Puŋ zhyɛ́ no yɛ́ a fɛ tsómvé yáŋme nɛ́, ŋkyé ŋgâ, yéré naʼ mee ne tsómvé ŋeŋáŋ. 23Ŋkyé ŋgâ tsɔʼɔfaʼ kəpɔŋ a vó, tsʉʼ mbé yɔ́b yɛ́ Mboʼmvé fɛ ndzəndzoʼ nɛ́, a tsómvé ŋeŋáŋ, ŋkhoʼyɛ́ piŋɛ Yěsô Kristo Ntsɛɛpɔŋ wíŋi təb mbé taʼ yé nɛ́.
ទើបបានជ្រើសរើសហើយ៖
Roma 6: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
