Roma 11
11
Mboʼmvé maʼa pɛ Issayɛ pó
1Mə mbzirɛ́ nɛ́ ŋgâ, Mboʼmvé kɛ́ʼɛ́ maʼ Issayɛ pú pe? Ngáŋ! tɛɛmbɛ́ no pé pe néré pó. Ŋkyé ŋgâ, tómbəb ya mə ké mbɛ ya pé ŋɔŋ Issayɛ, ne ndǎndáb Ábraham, ndzó pfii Bezhamɛŋ. 2Ngaŋ! Mboʼmvé máʼ pumésɔŋ pé pó, pɔ́b pɛ́ a kɛ pě ntsɔʼɔ wɔ́b nɛ́. Kii ŋgâ puŋ zɛ́ no yɛ́, Ŋweʼe yáŋme tsɔ́ nɛ́ pɔɔ, ndzó Ywoʼɔ́ ŋweʼe yɛ́ Elya sɔbɔ pɛ Issayɛ pwó Mboʼmvé, ntsɔ́ ŋgâ: 3«Ntsɛɛpɔŋ, pɔ́b kɛ nɔʼ ghaŋántɔ́b pó, mbǒ pɛ ywoʼɔ́shʉ́ pó, a ke tsʉʼ ndaʼ mo. Pɔ́b kiʼi ké mbó ndzɔŋɔ nɛ́ nɔʼ ya ŋkhoʼyɔŋ.» 4Ntsʉʼmbé, Mboʼmvé kɛ́ pó mbɔ́rɔ́ pwó yé pé ŋgâ kɔ́? A kɛ pó mbɔ́rɔ́ ŋgâ: «Mə ŋgʉ́ʼʉ́ ŋkáb mbziŋi yísambáá, pɛ́ pɔ́b féd kweʼé mɔ́b siŋ zaʼa yɛ́ pe fú ne Bal nɛ́ pó.» 5Ntsʉ́ŋtsʉ́ŋ njʉ́ ne zhyémve ndzebe nɛ́, cyó pfuʼyí yoʼo, a kʉye Mboʼmvé ntsɔ́ʼɔ wɔ́b, ne foʼndzəndzoʼ ye. 6Ntsʉʼ mbé, a pɛ́ɛ́ yɛ́ a pɛ̌ ne foʼndzəndzoʼ nɛ́, mbǒ a zhyɛ́ faʼ ŋɔŋ nɛ́ pó. A pɛ́ɛ́ néré, mbǒ foʼndzəndzoʼ pó nɛ́, mbé pe ndáá foʼndzəndzoʼ ŋkʉ́rʉ́ pó. 7Tɛɛmbɛ pe pó ntsɔ́ɔ́ ŋgâ kɔ? Yɔ́b yɛ́ Issayɛ taʼa nɛ́, a kɛ tsɛʼɛ po. A tséʼé pɔŋ pɛ́ pe kɛ tsɔ́ʼ wɔ́b nɛ́. Ŋgɛ khú ne pecyó pɔŋ, pɔ́b kɛ zhyɛ́ ndzɔʼ yɔ́b tʉ̌ŋ. 8Mbziʼe njʉ́ Ŋweʼe Yáŋme tsɔ́ ŋgâ: «Mboʼmvé kɛ zhyɛ́ ŋgâ, tɛɛmbɛ́ ŋɔŋ wɔ́b pe ŋɔʼ mbəb yé, tsə twɔ́ pó, mii mɔ́b ke mbé tsé njʉ́ ywoʼ pó, təŋé mɔ́b kébe tsé ndzoʼo no pó, kaʼatɛ mbáŋa ne ndzebe.» 9Fɔŋ Ndavíd kɛ kémbó ntsɔ́ yé ŋgâ: «Ndebéne pɔ́b cʉ́ʼɔ́ pɛ wě ne pɔ́b, mbó mbé pɛ ŋkɔʼ ne pɔ́b, mbó mbé yɔ́b yɛ́ a ŋgyɛ pɔ́b vó nɛ́, mbó tséʼé ŋgəʼo yɛ́ pɔ́b kɛ taʼa nɛ́ kpaʼ sʉ́ʼʉ. 10Á mii mɔ́b siŋ, kaʼatɛ pɔ́b pe tse njʉ́ ywoʼ pó, ŋgyɛ pfúŋ yɔ́b ke mbɛ́ɛ́ ŋwɔ́me.»
11Mə mbzírɛ́ nɛ́ ŋgâ, njʉ́ pɔ́b kɛ shaŋa néré nɛ́, pɔ́b náʼá ke cʉ́ʼɔ́ záŋ? Ngáŋ, tɛɛmbɛ́ a pó pé néré pó! Ntsʉʼmbé vɔ̌no yɔ́b kɛ zhyɛ́, pɔŋ pɛ́ pɔ́b pɛ Yúda nɛ́ pó tséʼé ndzǔne, yânéré ŋgâ pɛ Issayɛ náá tséʼé sháŋá. 12A pɛ́ɛ́ yɛ́ shǎŋane mɔ́b méré fɛ foʼ pwó mvémvé, ŋkɔ̌ne mɔ́b pó fɛ́ foʼ pwó pɔŋ pɛ pɔ́b pɛ Yúda nɛ́ pó, mbǒ mbéne mɔ́b náá ndzɔʼɔ ndzǔne yɛ́ Mboʼmvé fɛ́ nɛ́, náʼá ŋgyɛ̌ kɔ́ pɔɔ?
13Mə tsɔ́ nɛ́ ne puŋ, puŋ pɛ pǔŋ pɛ Yúda nɛ́ pó ŋgâ, mbziʼe njʉ́ a mo mbé ŋgaŋantɔ́b Yěsô Kristo tsetsɛrɛ pɔŋ pɛ pɔ́b pɛ Yúda nɛ́ pó, mə tsé ndɛ́bɛ ndúŋú faʼ yɛ́ Mboʼmvé fɛ ne mo nɛ́. 14Yânéré ŋgâ pɔ́ŋmɛ́ páá pɛ́ psí pɔ́b tséʼé taʼ tsə nɛ́, tséʼé sháŋá, ŋkhoʼtsyó pecyó pɔŋ yǎ tsetsɛrɛ pɔ́b tséʼé ndzǔne. 15A pɛ́ɛ́ yɛ́, ŋkhoʼyɛ́ Mboʼmvé kɛ sǔʼɔ wɔ́b fɛ́ ndzəb, a zhʉyí sáʼá mvémvé nɛ́, mbǒ ŋkhoʼyɛ́ pɔ́b náʼa mbɔ́rɔ́ ndzəb ndáb nɛ́, náʼá mbɛɛ niŋ yɔ́ɔ́? A náʼá mbé pɛ́ɛ́ njʉ́ njʉyɛ́ne ne vó pɔɔ?
16A pɛ́ɛ́ yɛ́ pe tee sɔ́ mbré pwó Mboʼmvé nɛ́, mbǒ ŋkɔŋɔ pfuʼɔ fɛlɛwa náá ke mbɛɛ pwó ye. Mbó mbé yɛ́ pe tee nyí nsó pwó Mboʼmvé nɛ́, mbǒ ntâmbwó mé ke mbɛɛ pwó ye. 17Pɔŋ Issayɛ pe nɛ́ pe njʉ́, tsitsəhó vód Oliivə yɛ́ pe pfé, ntséé pecyó tâmbwó me nɛ́. Wo wɛ́ wo ŋɔŋ Yúda nɛ́ pó, wo pɛ́ɛ́ njʉ́ ntâmbwó nsó vód Oliivə yɛ́ a sáʼá ndzɔ́ʼɔ́kaʼ, pe tséé ŋkʉyó nʉ̌ ndúŋú tsó vód Oliivə yɛ́ pe kɛ pfé nɛ́, kɛ́ʼɛ́ ŋgâ wo tsɔʼ yo pfiŋi ndúŋú mwɔ̌zó pɛ́, nyǐme tubɔ sye nɛ́. 18Ndɛ mbó ŋgú nɛ́ tse tiʼe siŋ ntâmbwó nsó méré mɛ, a tsééme nɛ́. Tɛ wo tiʼe niŋ? Wo ndɛ ŋgiyí nɛ́ ŋgâ, a kyɛ wo ŋkyɛ nyǐme pó, ntsʉʼ mbé a kyɛ nyíme ŋkyɛ wo. 19Wo ntsɔ́ nɛ́ ne mo ŋgâ: «Pe kɛ tséé ntâmbwó mé kɛ́ʼɛ́, pe ne nʉ́ne ya yoʼo.» 20A kpaʼ sísíŋ. Pe kɛ tséé wɔ́b kɛ́ʼɛ́, ŋkyé ŋgâ pɔ́b kɛ pé tséʼé psyɛ́ndzɔʼ pó. Tsʉ́ʼmbɛ́ ne wo, a zhyɛ́ psyɛ́ndzɔʼ wo tsɛ́ yoʼo. Ntətoʼ ndɛ ŋgaʼmbwo mo nɛ́, maʼ fí ndzó təŋé wo. 21Ŋkyé ŋgâ, a pɛ́ɛ́ yɛ́ Mboʼmvé kɛ pe tee kii tséé ntâmbwó mé mɛ, a kɛ pě mbɛ ndúŋú nɛ́ pó, wo maʼ fǐ ndzó ntə́ŋé wo, ŋkyé ŋgâ, a ŋkʉyó ntee yo ywoʼ pó. 22A pó nɛ́ mbúú ŋgâ, wo tséʼé kpaŋató ndúŋú pǔpfob pwɛ ncʉ́yône mɛ Mboʼmvé tséʼé nɛ́. A kɛ tséʼé ncʉ́yône ŋkyé pɛ a tsééme nɛ́, tséʼé pǔfob ŋkyé wo, mbɛ́ɛ́ yɛ́ nɛ́, wo ke nyí ndzɔʼɔ pǔpfob yéré nɛ́. Ké mbé pé néré pó, mbǒ pe ŋkʉyo ke ntséé yo ywoʼ tséé. 23Ŋgɛ ŋkhú ne pɔ́b pɛ́ Yúda, a pɛ́ɛ́ yɛ́ pɔ́b séd ndzɔʼ yɔ́b, ntseʼe psyɛ́ndzɔʼ nɛ́, mbǒ pe nʉ́ wɔ́b ndzó ywó yɛ́ pɔ́b kɛ pě mbé nɛ́. Ŋkyé ŋgâ Mboʼmvé kuʼɔ ne mbone nʉ́ʉ́ wɔ́b ne nʉ̌ne fé. 24A pɛ́ɛ́ yɛ́ wo wɛ́, pe kɛ tséé wo ndúŋú nsó vód Oliivə yɛ́ a kɛ sáʼá ndzɔ́ʼɔ́kaʼ ne ndúŋ ye nɛ́, mbó sed ywoʼ nuŋ, nʉ̌ ndúŋú yɛ́ pe kɛ pfépfé, a séʼé nɛ́, tɛ kɛɛ yikɔ ne pɔ́b pɛ pe mbɔ́rɔ́ nʉ́ʉ́ wɔ́b, pe ndúŋú nsó yɛ́ a yɔ́b nɛ́.
Ndzǔne mɛ́ pɛ Issayɛ kʉ́yó ntsɛʼɛ nɛ́
25Pɔ́ŋmɛ́ páá, mə tse nɛ́ mbé zɔŋɔ ŋgâ puŋ tsó kii zé no ywʉ̂me yɛ́, a ne no Mboʼmvé nɛ́ pó. Mbɔ́ɔ́ kɛ́ʼɛ́ ŋgâ puŋ ndɛ fú mbəb yuŋ ne ghaŋázé. Tʉŋɔ́ndzɔʼ pecyó pɔ́ŋ Issayɛ kyáŋá kaʼatɛ, mbáŋa ŋkhoʼyɛ́ ŋkɔŋɔ pɔŋ pɛ́ pɔ́b pɛ Yúda náá pó nɛ́, ndzú nɛ́. 26A mbziʼe yɛ́ nɛ́, ŋkɔŋɔ pɔ́ŋ Issayɛ náá ŋkʉ́yó náʼá tsɛʼɛ ndzǔne nɛ́, mbziʼe njʉ́ a ŋwéʼéme nɛ́ ŋgâ: «Ŋgaŋakpee pɔŋ ŋkʉ́yó twɔ́ Syɔŋ, tubɔ pɔŋ pɛ́ pɔ́b zhyɛ́ no kəpɔŋ nɛ́, ndáb Yakɔb. 27Ŋkhoʼyɛ́ mə ŋkʉ́yó ntubɔ vɔ̌no yɔ́b nɛ́, a pe kaŋ mé psi pɔ́b gbɛ́rɛ́ nɛ́.» 28Ŋgɛ ŋkhú ne no Ŋkəŋ sʉ́ʼʉ, pɔ́b pɛ yɔ́b pé ghaŋákepeŋe Mboʼmvé. Yéré pé néré mbé no sʉ́ʼʉ ne puŋ. Ntsʉʼ mbɛ njʉ́, pe náá njʉ́ Mboʼmvé tsɔ́ʼɔ́ pɔŋ nɛ́, a kʉyě wɔ́b, ŋkyé tɛd tɛd pɔ́b. 29Ŋkyé ŋgâ, Mboʼmvé ndɛ mbé kpee yɔ́b yɛ́, a kɛ fɛ́ pwó ŋɔŋ nɛ́ pó, ke mbé nuʼɔ ŋɔŋ wɛ́ a kɛ fú wé nɛ́ pó. 30A kɛ pɛ səssó, puŋ pe zoʼo ntswee Mboʼmvé pó. A kiʼi ŋgɛ́ mbɛ ne ŋkhoʼyɔŋ, njʉ́ pɔ́b tsé mbé zoʼ ntswee yé nɛ́ pó, Mboʼmvé tséʼé tsaaghəghəŋ ŋkyé wúŋ. 31Ntsʉ́ŋtsʉ́ŋ njʉ́ kɔʼɔtómbəb yɔ́b tse mbé zoʼo tswee ŋkhoʼyɔŋ, wɛ́ Mboʼmvé ntseʼe tsaaghəghəŋ ŋkyé wúŋ nɛ́ pó. Yânéré ŋgâ Mboʼmvé tséʼé tsaaghəghəŋ ŋkyé wɔ́b. 32Ŋkye ŋgâ, Mboʼmvé kɛ zhyɛ́ ŋgâ kii ntsyé ŋumesɔŋ zoʼ ntswee yé, kɛ́ʼɛ́ pé ne ntseʼene tsaaghəghəŋ ŋkyé ŋkɔŋɔ pɔŋ náá.
33Yê! Foʼ Mboʼmvé, zé ye pwɛ zɛ́no ye záá kaʼatɛ. Tɛɛmbɛ a zé wɔ́ ndzé no yɛ́ a tíí nɛ́? Tɛɛmbɛ a zé wɔ́b ndzé kpaŋató ye? 34A wɔ́ wɛ́ a kɛrɛ zé kpaŋató Ntsɛɛpɔŋ nɛ́? A wɔ́ mbé ŋɔŋ wɛ́ a kɛrɛ tʉ́ʉ́ wé nɛ́? 35Kii ŋgâ á wɔ́ wɛ́, a kɛ fɛ́ yɔ́b pwó yé ne sɔ́ yé, yânéré ntsé ndzwəʼɛ ŋgâ a pó nuʼɔ pwó yé nɛ́? 36Ŋkɔŋɔ yɔ́b náá twɔ́ pwó Mboʼmvé, a kémbó téŋé ye téŋé ŋkɔŋɔ yɔ́b náá, ŋkɔŋɔ yɔ́b náá kémbó mbɛɛ pwó yé. Ŋgúʼune pɛ́ pwó yé ne ŋgǒʼ ne ŋgôʼ! Á pé néré!
ទើបបានជ្រើសរើសហើយ៖
Roma 11: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Roma 11
11
Mboʼmvé maʼa pɛ Issayɛ pó
1Mə mbzirɛ́ nɛ́ ŋgâ, Mboʼmvé kɛ́ʼɛ́ maʼ Issayɛ pú pe? Ngáŋ! tɛɛmbɛ́ no pé pe néré pó. Ŋkyé ŋgâ, tómbəb ya mə ké mbɛ ya pé ŋɔŋ Issayɛ, ne ndǎndáb Ábraham, ndzó pfii Bezhamɛŋ. 2Ngaŋ! Mboʼmvé máʼ pumésɔŋ pé pó, pɔ́b pɛ́ a kɛ pě ntsɔʼɔ wɔ́b nɛ́. Kii ŋgâ puŋ zɛ́ no yɛ́, Ŋweʼe yáŋme tsɔ́ nɛ́ pɔɔ, ndzó Ywoʼɔ́ ŋweʼe yɛ́ Elya sɔbɔ pɛ Issayɛ pwó Mboʼmvé, ntsɔ́ ŋgâ: 3«Ntsɛɛpɔŋ, pɔ́b kɛ nɔʼ ghaŋántɔ́b pó, mbǒ pɛ ywoʼɔ́shʉ́ pó, a ke tsʉʼ ndaʼ mo. Pɔ́b kiʼi ké mbó ndzɔŋɔ nɛ́ nɔʼ ya ŋkhoʼyɔŋ.» 4Ntsʉʼmbé, Mboʼmvé kɛ́ pó mbɔ́rɔ́ pwó yé pé ŋgâ kɔ́? A kɛ pó mbɔ́rɔ́ ŋgâ: «Mə ŋgʉ́ʼʉ́ ŋkáb mbziŋi yísambáá, pɛ́ pɔ́b féd kweʼé mɔ́b siŋ zaʼa yɛ́ pe fú ne Bal nɛ́ pó.» 5Ntsʉ́ŋtsʉ́ŋ njʉ́ ne zhyémve ndzebe nɛ́, cyó pfuʼyí yoʼo, a kʉye Mboʼmvé ntsɔ́ʼɔ wɔ́b, ne foʼndzəndzoʼ ye. 6Ntsʉʼ mbé, a pɛ́ɛ́ yɛ́ a pɛ̌ ne foʼndzəndzoʼ nɛ́, mbǒ a zhyɛ́ faʼ ŋɔŋ nɛ́ pó. A pɛ́ɛ́ néré, mbǒ foʼndzəndzoʼ pó nɛ́, mbé pe ndáá foʼndzəndzoʼ ŋkʉ́rʉ́ pó. 7Tɛɛmbɛ pe pó ntsɔ́ɔ́ ŋgâ kɔ? Yɔ́b yɛ́ Issayɛ taʼa nɛ́, a kɛ tsɛʼɛ po. A tséʼé pɔŋ pɛ́ pe kɛ tsɔ́ʼ wɔ́b nɛ́. Ŋgɛ khú ne pecyó pɔŋ, pɔ́b kɛ zhyɛ́ ndzɔʼ yɔ́b tʉ̌ŋ. 8Mbziʼe njʉ́ Ŋweʼe Yáŋme tsɔ́ ŋgâ: «Mboʼmvé kɛ zhyɛ́ ŋgâ, tɛɛmbɛ́ ŋɔŋ wɔ́b pe ŋɔʼ mbəb yé, tsə twɔ́ pó, mii mɔ́b ke mbé tsé njʉ́ ywoʼ pó, təŋé mɔ́b kébe tsé ndzoʼo no pó, kaʼatɛ mbáŋa ne ndzebe.» 9Fɔŋ Ndavíd kɛ kémbó ntsɔ́ yé ŋgâ: «Ndebéne pɔ́b cʉ́ʼɔ́ pɛ wě ne pɔ́b, mbó mbé pɛ ŋkɔʼ ne pɔ́b, mbó mbé yɔ́b yɛ́ a ŋgyɛ pɔ́b vó nɛ́, mbó tséʼé ŋgəʼo yɛ́ pɔ́b kɛ taʼa nɛ́ kpaʼ sʉ́ʼʉ. 10Á mii mɔ́b siŋ, kaʼatɛ pɔ́b pe tse njʉ́ ywoʼ pó, ŋgyɛ pfúŋ yɔ́b ke mbɛ́ɛ́ ŋwɔ́me.»
11Mə mbzírɛ́ nɛ́ ŋgâ, njʉ́ pɔ́b kɛ shaŋa néré nɛ́, pɔ́b náʼá ke cʉ́ʼɔ́ záŋ? Ngáŋ, tɛɛmbɛ́ a pó pé néré pó! Ntsʉʼmbé vɔ̌no yɔ́b kɛ zhyɛ́, pɔŋ pɛ́ pɔ́b pɛ Yúda nɛ́ pó tséʼé ndzǔne, yânéré ŋgâ pɛ Issayɛ náá tséʼé sháŋá. 12A pɛ́ɛ́ yɛ́ shǎŋane mɔ́b méré fɛ foʼ pwó mvémvé, ŋkɔ̌ne mɔ́b pó fɛ́ foʼ pwó pɔŋ pɛ pɔ́b pɛ Yúda nɛ́ pó, mbǒ mbéne mɔ́b náá ndzɔʼɔ ndzǔne yɛ́ Mboʼmvé fɛ́ nɛ́, náʼá ŋgyɛ̌ kɔ́ pɔɔ?
13Mə tsɔ́ nɛ́ ne puŋ, puŋ pɛ pǔŋ pɛ Yúda nɛ́ pó ŋgâ, mbziʼe njʉ́ a mo mbé ŋgaŋantɔ́b Yěsô Kristo tsetsɛrɛ pɔŋ pɛ pɔ́b pɛ Yúda nɛ́ pó, mə tsé ndɛ́bɛ ndúŋú faʼ yɛ́ Mboʼmvé fɛ ne mo nɛ́. 14Yânéré ŋgâ pɔ́ŋmɛ́ páá pɛ́ psí pɔ́b tséʼé taʼ tsə nɛ́, tséʼé sháŋá, ŋkhoʼtsyó pecyó pɔŋ yǎ tsetsɛrɛ pɔ́b tséʼé ndzǔne. 15A pɛ́ɛ́ yɛ́, ŋkhoʼyɛ́ Mboʼmvé kɛ sǔʼɔ wɔ́b fɛ́ ndzəb, a zhʉyí sáʼá mvémvé nɛ́, mbǒ ŋkhoʼyɛ́ pɔ́b náʼa mbɔ́rɔ́ ndzəb ndáb nɛ́, náʼá mbɛɛ niŋ yɔ́ɔ́? A náʼá mbé pɛ́ɛ́ njʉ́ njʉyɛ́ne ne vó pɔɔ?
16A pɛ́ɛ́ yɛ́ pe tee sɔ́ mbré pwó Mboʼmvé nɛ́, mbǒ ŋkɔŋɔ pfuʼɔ fɛlɛwa náá ke mbɛɛ pwó ye. Mbó mbé yɛ́ pe tee nyí nsó pwó Mboʼmvé nɛ́, mbǒ ntâmbwó mé ke mbɛɛ pwó ye. 17Pɔŋ Issayɛ pe nɛ́ pe njʉ́, tsitsəhó vód Oliivə yɛ́ pe pfé, ntséé pecyó tâmbwó me nɛ́. Wo wɛ́ wo ŋɔŋ Yúda nɛ́ pó, wo pɛ́ɛ́ njʉ́ ntâmbwó nsó vód Oliivə yɛ́ a sáʼá ndzɔ́ʼɔ́kaʼ, pe tséé ŋkʉyó nʉ̌ ndúŋú tsó vód Oliivə yɛ́ pe kɛ pfé nɛ́, kɛ́ʼɛ́ ŋgâ wo tsɔʼ yo pfiŋi ndúŋú mwɔ̌zó pɛ́, nyǐme tubɔ sye nɛ́. 18Ndɛ mbó ŋgú nɛ́ tse tiʼe siŋ ntâmbwó nsó méré mɛ, a tsééme nɛ́. Tɛ wo tiʼe niŋ? Wo ndɛ ŋgiyí nɛ́ ŋgâ, a kyɛ wo ŋkyɛ nyǐme pó, ntsʉʼ mbé a kyɛ nyíme ŋkyɛ wo. 19Wo ntsɔ́ nɛ́ ne mo ŋgâ: «Pe kɛ tséé ntâmbwó mé kɛ́ʼɛ́, pe ne nʉ́ne ya yoʼo.» 20A kpaʼ sísíŋ. Pe kɛ tséé wɔ́b kɛ́ʼɛ́, ŋkyé ŋgâ pɔ́b kɛ pé tséʼé psyɛ́ndzɔʼ pó. Tsʉ́ʼmbɛ́ ne wo, a zhyɛ́ psyɛ́ndzɔʼ wo tsɛ́ yoʼo. Ntətoʼ ndɛ ŋgaʼmbwo mo nɛ́, maʼ fí ndzó təŋé wo. 21Ŋkyé ŋgâ, a pɛ́ɛ́ yɛ́ Mboʼmvé kɛ pe tee kii tséé ntâmbwó mé mɛ, a kɛ pě mbɛ ndúŋú nɛ́ pó, wo maʼ fǐ ndzó ntə́ŋé wo, ŋkyé ŋgâ, a ŋkʉyó ntee yo ywoʼ pó. 22A pó nɛ́ mbúú ŋgâ, wo tséʼé kpaŋató ndúŋú pǔpfob pwɛ ncʉ́yône mɛ Mboʼmvé tséʼé nɛ́. A kɛ tséʼé ncʉ́yône ŋkyé pɛ a tsééme nɛ́, tséʼé pǔfob ŋkyé wo, mbɛ́ɛ́ yɛ́ nɛ́, wo ke nyí ndzɔʼɔ pǔpfob yéré nɛ́. Ké mbé pé néré pó, mbǒ pe ŋkʉyo ke ntséé yo ywoʼ tséé. 23Ŋgɛ ŋkhú ne pɔ́b pɛ́ Yúda, a pɛ́ɛ́ yɛ́ pɔ́b séd ndzɔʼ yɔ́b, ntseʼe psyɛ́ndzɔʼ nɛ́, mbǒ pe nʉ́ wɔ́b ndzó ywó yɛ́ pɔ́b kɛ pě mbé nɛ́. Ŋkyé ŋgâ Mboʼmvé kuʼɔ ne mbone nʉ́ʉ́ wɔ́b ne nʉ̌ne fé. 24A pɛ́ɛ́ yɛ́ wo wɛ́, pe kɛ tséé wo ndúŋú nsó vód Oliivə yɛ́ a kɛ sáʼá ndzɔ́ʼɔ́kaʼ ne ndúŋ ye nɛ́, mbó sed ywoʼ nuŋ, nʉ̌ ndúŋú yɛ́ pe kɛ pfépfé, a séʼé nɛ́, tɛ kɛɛ yikɔ ne pɔ́b pɛ pe mbɔ́rɔ́ nʉ́ʉ́ wɔ́b, pe ndúŋú nsó yɛ́ a yɔ́b nɛ́.
Ndzǔne mɛ́ pɛ Issayɛ kʉ́yó ntsɛʼɛ nɛ́
25Pɔ́ŋmɛ́ páá, mə tse nɛ́ mbé zɔŋɔ ŋgâ puŋ tsó kii zé no ywʉ̂me yɛ́, a ne no Mboʼmvé nɛ́ pó. Mbɔ́ɔ́ kɛ́ʼɛ́ ŋgâ puŋ ndɛ fú mbəb yuŋ ne ghaŋázé. Tʉŋɔ́ndzɔʼ pecyó pɔ́ŋ Issayɛ kyáŋá kaʼatɛ, mbáŋa ŋkhoʼyɛ́ ŋkɔŋɔ pɔŋ pɛ́ pɔ́b pɛ Yúda náá pó nɛ́, ndzú nɛ́. 26A mbziʼe yɛ́ nɛ́, ŋkɔŋɔ pɔ́ŋ Issayɛ náá ŋkʉ́yó náʼá tsɛʼɛ ndzǔne nɛ́, mbziʼe njʉ́ a ŋwéʼéme nɛ́ ŋgâ: «Ŋgaŋakpee pɔŋ ŋkʉ́yó twɔ́ Syɔŋ, tubɔ pɔŋ pɛ́ pɔ́b zhyɛ́ no kəpɔŋ nɛ́, ndáb Yakɔb. 27Ŋkhoʼyɛ́ mə ŋkʉ́yó ntubɔ vɔ̌no yɔ́b nɛ́, a pe kaŋ mé psi pɔ́b gbɛ́rɛ́ nɛ́.» 28Ŋgɛ ŋkhú ne no Ŋkəŋ sʉ́ʼʉ, pɔ́b pɛ yɔ́b pé ghaŋákepeŋe Mboʼmvé. Yéré pé néré mbé no sʉ́ʼʉ ne puŋ. Ntsʉʼ mbɛ njʉ́, pe náá njʉ́ Mboʼmvé tsɔ́ʼɔ́ pɔŋ nɛ́, a kʉyě wɔ́b, ŋkyé tɛd tɛd pɔ́b. 29Ŋkyé ŋgâ, Mboʼmvé ndɛ mbé kpee yɔ́b yɛ́, a kɛ fɛ́ pwó ŋɔŋ nɛ́ pó, ke mbé nuʼɔ ŋɔŋ wɛ́ a kɛ fú wé nɛ́ pó. 30A kɛ pɛ səssó, puŋ pe zoʼo ntswee Mboʼmvé pó. A kiʼi ŋgɛ́ mbɛ ne ŋkhoʼyɔŋ, njʉ́ pɔ́b tsé mbé zoʼ ntswee yé nɛ́ pó, Mboʼmvé tséʼé tsaaghəghəŋ ŋkyé wúŋ. 31Ntsʉ́ŋtsʉ́ŋ njʉ́ kɔʼɔtómbəb yɔ́b tse mbé zoʼo tswee ŋkhoʼyɔŋ, wɛ́ Mboʼmvé ntseʼe tsaaghəghəŋ ŋkyé wúŋ nɛ́ pó. Yânéré ŋgâ Mboʼmvé tséʼé tsaaghəghəŋ ŋkyé wɔ́b. 32Ŋkye ŋgâ, Mboʼmvé kɛ zhyɛ́ ŋgâ kii ntsyé ŋumesɔŋ zoʼ ntswee yé, kɛ́ʼɛ́ pé ne ntseʼene tsaaghəghəŋ ŋkyé ŋkɔŋɔ pɔŋ náá.
33Yê! Foʼ Mboʼmvé, zé ye pwɛ zɛ́no ye záá kaʼatɛ. Tɛɛmbɛ a zé wɔ́ ndzé no yɛ́ a tíí nɛ́? Tɛɛmbɛ a zé wɔ́b ndzé kpaŋató ye? 34A wɔ́ wɛ́ a kɛrɛ zé kpaŋató Ntsɛɛpɔŋ nɛ́? A wɔ́ mbé ŋɔŋ wɛ́ a kɛrɛ tʉ́ʉ́ wé nɛ́? 35Kii ŋgâ á wɔ́ wɛ́, a kɛ fɛ́ yɔ́b pwó yé ne sɔ́ yé, yânéré ntsé ndzwəʼɛ ŋgâ a pó nuʼɔ pwó yé nɛ́? 36Ŋkɔŋɔ yɔ́b náá twɔ́ pwó Mboʼmvé, a kémbó téŋé ye téŋé ŋkɔŋɔ yɔ́b náá, ŋkɔŋɔ yɔ́b náá kémbó mbɛɛ pwó yé. Ŋgúʼune pɛ́ pwó yé ne ŋgǒʼ ne ŋgôʼ! Á pé néré!
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល