Roma 1
1
Pɔ́lə fɛ́ tseʼe pwó ndáméted yɛ́ a Roma nɛ́
1A mo Pɔ́lə, ŋgaŋafaʼ Yěsô Kristo, wɛ́ Mboʼmvé kɛ fú wé ne mbéne ŋgaŋantɔ́b Yěsô, mbó tíí wé ne ntswʉrine Ŋkəŋ sʉ́ʼʉ ye nɛ́. 2Ŋkəŋ sʉ́ʼʉ wéré wɛ́ a kɛ ghɛmbɛ, a yǎ mbəb pɛ ghaŋátsɔ́kpaŋató ye, ŋkaʼa ndzó Ŋweʼe Yáŋme nɛ́. 3Ɔ́ŋɔ́! Ŋkəŋ sʉ́ʼʉ wéré kɛ tsiŋɛ Mɔ́ŋ ye wɛ́, pe kɛ pfɛ́ wé njʉ́ ŋumesɔŋ ndzó ndǎ ndáb Ndavíd nɛ́. 4Mɔ́ŋ ye wéré, a Yěsô Kristo Ntsɛɛpɔŋ wíŋi, Zhʉye Yáŋme pó ŋgyɛ́ ne tʉ̌ŋ mé, a njʉyɛ́ ne vó, nyoʼ ŋgâ a Mɔ́ŋ Mboʼmvé. 5A zhyɛ́ ye mə tséʼé foʼndzəndzoʼ ne mbéne ŋgaŋantɔ́b, mbó ŋgyɛ́ ŋkɔŋɔ pɔŋ pɛ pɔ́b pɛ Yúda nɛ́ pó, tséʼé psyɛ́ndzɔʼ mbó ndzoʼ ntswee ye, mbó ŋgyɛ́ ŋgâ pe ghuʼɔ wé. 6Mbɛ puŋ, puŋ ke mbɛ yuŋ ndzɔʼɔ pɔŋ péré, puŋ pɛ́, Mboʼmvé ke fú wuŋ ŋgâ puŋ pé mbǔ Yěsô Kristo nɛ́. 7Mə ŋwɛʼɛ nɛ́ kɛ́ʼɛ́ pe pwó ŋkɔŋɔ pɔ́ŋmɛ́ pɛ́ pɔ́b Roma, Mboʼmvé kʉyě wɔ́b kaʼatɛ nɛ́, puŋ pɛ́ a kɛ fú Mboʼmvé fú wuŋ ŋgâ puŋ pe pǔkristo nɛ́, á foʼndzəndzoʼ ne mbúru, twɔ́ pwó Mboʼmvé, ye wɛ́ a Tɛd wíŋi nɛ́, pú Ntsɛɛpɔŋ Yěsô Kristo, mbɛ ne puŋ!
Pɔ́lə kɛ zɔŋɔ ŋgú njʉ́ pǔkristo Roma
8Mə ŋgɛ́ ndzye, mbě ndǎ mbəb Yěsô Kristo, fɛ́ ŋgúʼune pwó Mboʼmvé ya, ŋkyé ŋkɔŋɔ wúŋ náá. Ŋkyé ŋgâ pe tsɔ́ ndzó ŋkɔŋɔ mvémvé náá, mbziʼe yɛ́ psyɛ́ndzɔʼ yuŋ ghú nɛ́. 9Mboʼmvé zé ŋgâ mə ntsɔ́ɔ́ no sísíŋ, ye wɛ́ mə faʼa pwó ye ne ŋkɔŋɔ ndzɔʼ ya náá, cʉ́rɛ ŋkəŋ sʉ́ʼʉ Mɔ́ŋ ye nɛ́. A zé ŋgâ mə tsé mbé tsó kii kpaŋa wuŋ pó, 10ndɔŋɔ kii kaŋ ŋkɔŋɔ ŋkhoʼ yɛ́ mə tse ntsɛ́ʼɛ́ Mboʼmvé náá nɛ́, ŋgâ a zhyɛ́ ne nkʉyéne mé, mə tséʼé mɔ́ŋ saŋ, ne ŋkʉyóne yoʼo puŋ. 11Ŋkye ŋgâ, ndzye njʉ̌ne wúŋ tsé ndzí ya kaʼatɛ, kɛ́ʼɛ́ ne fɛ́ne fɛ́ Zhʉye Yáŋme ne puŋ, á zhyɛ́ ŋgâ psyɛ́ndzɔʼ yuŋ tʉ̌ŋ. 12Kii ŋgâ Mboʼmvé kaa náá, niŋi ndzɔʼ yiŋi a yoʼ puŋ ndzaʼ ndúŋú psyɛ́ndzɔʼ yɛ piŋi kaa náá ntséʼé nɛ́, psyɛ́ndzɔʼ yuŋ ghɛ̂ ntuʼ ya, ya ke mbó ntúʼɔ yuŋ. 13Pɔ́ŋmɛ́ páá, mə tsé mbé zɔŋɔ ŋgâ puŋ tsó kii zé ŋgâ, mə kɛ kaʼ kɛɛ zááme ne ŋkʉyone yoʼo puŋ pó, néré kɛ́ʼɛ́ ŋgâ faʼ ya zwɔ́ táá yoʼo puŋ, njʉ́ a zwɔ́ yoʼo pecyó pɔŋ pɛ pɔ́b pɛ Yúda nɛ́ pó. Ntsʉʼmbé saŋ pé tsé mbɛ pó. 14Mə ntsɛʼɛ ne nááne pɔŋ Gerɛʼ ntsʉ́ŋtsʉ́ŋ njʉ́ pɔŋ ndzɔ́ʼɔ́kaʼ nɛ́, mbɛ ghaŋázé njʉ́ pɔŋ fwɔ́me nɛ́. 15A zhyɛ́ yéré mə ke tséʼé ndzyé zááme ne ncʉríne Ŋkəŋ sʉ́ʼʉ ne puŋ, puŋ pɛ́ puŋ ndzó mbɛ́lʉ́ŋ Roma nɛ́.
A zhyɛ́ psyɛ́ndzɔʼ, ŋɔŋ pɛ́ ŋgerɛ́ŋged
16Ŋkyé ŋgâ mə tséʼé pfɔ́shʉ́ŋ ne ntswʉ́rine Ŋkəŋ sʉ́ʼʉ pó, a taʼ tʉ̌ŋ Mboʼmvé yɛ́ a kpee ntsyé ŋɔŋ wɛ́ a tséʼé psyɛ́ndzɔʼ nɛ́, ndzyé mbəb pɛ Yúda ŋkɔŋ, njʉ́bɛ́ mbəb pɛ Gerɛʼ. 17Mboʼmvé yǎ mbəb ye, nyóʼó njʉ́, a zhyɛ́, njʉ́ pɔŋ njʉ́ pɔŋ ŋgerɛ́ŋged nɛ́, ndzáʼa ndúŋú psyɛ́ndzɔʼ mbó mbé ŋkyé psyɛ́ndzɔʼ, mbziʼe njʉ́ a ŋweʼéme ŋgâ: «Ŋɔŋ wɛ́, a zhyɛ́ psyɛ́ndzɔʼ a pɛ́ ŋgerɛ́ŋged nɛ́, a ntsó mvé.»
Ŋkɔŋɔ pɔŋ náá ghaŋávɔno
18Mboʼmvé, ye wɛ́ a pépéé nɛ́, nyoʼ pʉ̌ŋgye yé mbəb ghaŋázhyɛ́ meno kəpɔŋ, pɔ́b pɛ́ pɔ́b zhyɛ́ meno pɛ́, a ŋgerɛ́ŋged siŋi yé nɛ́ pó, pɔ́b pɛ́ pɔ́b fɛrɛ no ŋgerɛ́ŋged ne mbwɔ́ nɛ́. 19Ŋkyé ŋgâ meno pɛ́ tɛɛmbɛ́ pe zɛ mbəb Mboʼmvé nɛ́, kɛ mbɛɛ yáŋme ne pɔ́b, ŋkyé ŋgâ Mboʼmvé kɛrɛ nyoʼo ne pɔ́b kpaʼ sʉ́ʼʉ́. 20A kpaʼ sísíŋ ŋgâ, féré njʉ́ Mboʼmvé kɛ pǒʼ mvé nɛ́, mbziʼe yé sʉ́ʼʉ yɛ́, pe tse mbé zhʉ́ nɛ́ pó, tʉ̌ŋ mé mɛ́ a naʼ myě nɛ́ pó, mbɛ mbziʼe njʉ́ a Mboʼmvé nɛ́, pe zhʉ́ ŋkoŋe wéré náá, pe ndzɔʼɔ faʼ pé pɛ́ a faʼa nɛ́, kɛ́ʼɛ́ ŋgâ pe yǎ ndúŋú ntséʼé zɛ́no. Néré, tɛɛmbɛ́ pɔ́b pó mbé tséʼé cyó nsó, ne mkpééne mbəb yɔ́b nuŋ pó. 21Ɔ́ŋɔ́! Mbɛ njʉ́ pɔ́b kɛ zɛ́ Mboʼmvé nɛ́, pɔ́b kɛ pé fɛ́ ghɛ́ɛ́ kii ŋgâ khǐŋgóʼ yɛ́ a zɔŋɔ nɛ́, pwó ye pó. Ntsʉʼmbé, meno ndzəndzoʼ pɛ́ á kɛ́ pɛ́ tó pɔ́b nɛ́, pó tɛbɛ tó yɔ́b tebe. Kpaŋató ghəghəŋ yɛ́, á kɛ́ pɛ ndzó ndzɔʼ yɔ́b nɛ́, pó tsiŋa wɔ́b pe ndzɔʼɔ ndzə́ndzə́b. 22Pɔ́b kpaŋa ŋgâ, pɔ́b ghaŋá zé tsʉ́ʼŋgɛmbɛ, ntsʉʼɔ́, mbɛɛmbɛɛ. 23Pɔ́b sed ghɛ́ɛ́ Mboʼmvé, yɛ́ wɛ́ a naʼ ŋgǔ ndzó cyó ywoʼ nɛ́ pó, mbó ntsʉʼ ŋkhoʼyɔŋ, ŋguʼɔ pɛ fwɛ́ɛ́ pumésɔŋ, pɔ́b pɛ́ pɔ́b ŋkʉyó ndúbɔ taʼ zhyémve nɛ́, ŋguʼɔ fwɛ́ɛ́ péshʉŋ, mwɔ̂paʼ kpee me ŋkwa, ne pɛ mwɔ́ yɛ̂yɛ̌.
24A zhyɛ́ yéré nɛ́ kɛ́ʼɛ́, Mboʼmvé tee wɔ́b pwó pɛ́ ndzye kəpɔŋ pɛ́ a twɔ́ ndzó ndzɔʼ yɔ́b nɛ́, meno pfɔ́shʉ́ŋ pɛ́ pɔ́b zhyɛ́ siŋɛ́ mbəb yɔ́b, nuŋ ne tó mbəb yɔ́b nɛ́. 25Pɔ́b sed no sísíŋ Mboʼmvé a tsʉʼ mbwɔ́, mbó ntee ne ŋgúʼune mbó faʼa pwó Ŋɔŋ wɛ́ a kɛ poʼ ŋkɔŋɔ yɔ́b náá nɛ́, ye wɛ́ pe ŋgɛ ke ŋguʼɔ ndaʼ pe ye nɛ́, á pé néré! Mbó ŋguʼɔ yɔ́b yɛ́ a kɛ téŋé nɛ́, mbó faʼ pwó ye. 26A zhyɛ́ yéré kɛ́ʼɛ́ Mboʼmvé tee wɔ́b pwó meno pɛ́, pɔ́b kʉyě ne ŋgyɛne a fɛ́ pfɔ́shʉ́ŋ tó pɔ́b nɛ́. Meno péré pe nɔŋ: ŋgʉyé pɔ́b tee ne nǔne pwɛ ndwɔ́ pɔ́b, tsʉʼ ŋgyɛ̌ njʉ́ Mboʼmvé kɛ pe tíí nɛ́ pó. 27Ntsʉ́ŋtsʉ́ŋ njʉ́ mbziŋi nɛ́. Pɔ́b tee nǔne ne ŋgʉyé pɔ́b syɛ nǔ tsetsɛrɛ pɔ́b, tsʉʼ ŋkhoʼyɔŋ ke náá ŋumbzí njʉ́ ye nɛ́, mɛ́ʼ ntə́, ŋgyɛ meno ghóʼotóʼ ŋumbzí ne ŋumbzí. Pɔ́b kɛ tse ndzoʼo ndáá tsɔʼfaʼ no kəpɔŋ yéré yɛ́ pɔ́b zhyɛ ndúŋú mɛndɔ́b pwó nɛ́, mbəb pɔ́b. 28Njʉ́ pɔ́b kpeʼe náá njʉ́ ŋgâ tɛɛmbɛ́ pɔ́b pe nyi njʉ́ zɛ́no Mboʼmvé tsɔ́ nɛ́ pó, Mboʼmvé tee ŋgâ pɔ́b zhyɛ no ne zɛ́no yɔ́b ye kəpɔŋ yéré. A zhyɛ yéré nɛ́ pɔ́b zhyɛ meno pɛ́ pɔ́b ŋgɛ mbé zhyɛ nɛ́ pó. 29Mbziʼe mbziʼe meno pɔŋ yuŋɔ ndzó ndzɔʼ yɔ́b: mbwɔ̂, meno ghoʼotó, mii sesɛ ne no mbób, pʉ́ʉ́pfob. Pɛ ndzye meno pɔŋ, pó mbɛ ndzó ndzɔʼ yɔ́b: nɔʼne pɔŋ, pɛ fiʼ, pɛ ŋgɔb, ne ŋgyɛne no yɛ́ a pú nɛ́ pó. Pɔ́b púbɔ tíí pɔŋ, 30ntsɔ́ kəpɔŋ kyé pɔŋ, ntsʉʼ ghaŋákepeŋe Mboʼmvé, ghaŋátaʼáfiʼ, ghaŋa ntetoʼ, pɔŋ ŋéʼéme, tséʼé zé ne ŋgyɛne no kəpɔŋ kaʼatɛ, mbé ghaŋátʉŋɔtó pwó tɛd pɔ́b. 31Kii zɛ no, kii tsɔ́ no tíí kpee ndúŋú, ndzɔʼ yɔ́b tʉ̌ŋ ŋgaʼ, mbé tséʼé tsaaghəghəŋ pó. 32Mbɛ njʉ́ pɔ́b zé ŋgâ Mboʼmvé kɛrɛ tíí ŋgâ pɔŋ pɛ́ pɔ́b zhyɛ́ ŋkɔrɔ meno péré, náʼá ke mě ne vó nɛ́, pɔ́b ke mbé tsɛ́bɛ ndaʼ ŋgyɛne pó, tsʉʼ mbé pɔ́b ké mbó ntuʼɔ pɔŋ pɛ pɔ́b zhyɛ néré nɛ́, tuʼu.
ទើបបានជ្រើសរើសហើយ៖
Roma 1: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
