Máákuusə 9
9
1Yěsô ké mbó ntsɔ́ ne pɔ́b ŋgâ: «Kpaʼ sísíŋ, mə ntsɔ́ nɛ́ ne puŋ ŋgâ, tɛɛmbɛ pecyó pɔŋ pɛ́ pɔ́b ghaŋ nɛ́ pé pfó kii zhʉ́ Nofɔŋ Mboʼmvé ŋkʉ́yó ndzɔ́ʼɔ́ ghɛ́ɛ́ ye pó.»
Pětro, Zhakə pú Zhâŋ zhʉ́ Yěsô ndzɔ́ʼɔ́ ghɛ́ɛ́ Mboʼmvé
(Mat 17:1-9; Lúk 9:28-36; 2Pě 1:17-18)
2Njʉ́ a kɛ ntsɔ́ ne pɔ́b kɛ́ʼɛ́ nɛ́, zhyé petóó záʼ, Yěsô yɔ́ɔ́ ndaʼ Pětro, ne Zhakə pú Zhâŋ pú pɔ́b paʼ, ŋgú ndúŋú taʼ ŋkə́ŋ sesɛ. Mbéne mé sɛrɛ síŋ pɔ́b. 3Ndzwé pé pó séd fʉ́ʉ́ kaʼatɛ nʉyí nʉyi. Fʉ́ʉ́ kaʼatɛ cyó yɔ́b yɛ́ tɛɛmbɛ a pɛ́ ndúŋú tsetsáʼ, ŋgyɛ́, yɔ́b fʉ́ʉ́ néré nɛ́ ghú pó. 4Elya, ne Mǔsê mvwi tsɛ́ síŋ pɔ́b, pwɛ Yěsô tsɔ́. 5Néré, Pětro tsɔ́ pwó Yěsô ŋgâ: «Rábi, a pú ŋgâ piŋi tsʉʼɔ́ ghaŋ. Piŋi ŋkwód ntab yíkyéd: Taʼ ye pwó wo, taʼ ye pwó Mǔsê, cyó taʼ ye ŋkʉ́rʉ́ pwó Elya.» 6A kɛ pé zɛ́ no yɛ́ a tsɔ́ nɛ́ pó. Ŋkyé ŋgâ pɔ́ɔ́ kɛ gbáá wɔ́b. 7Ŋkhoʼyéré taʼ pfuŋ twɔ́ ŋkʉ́yó ŋkubɔ́ wɔ́b, taʼ ndzəb twɔ́ ndzɔʼ pfuŋ yéré nsó ŋgâ: «Yɔŋ Mɔ́ŋ ya wé tʉŋɔ ndɔŋ. Puŋ zóʼ wé!» 8Ŋkhoʼyéré ŋgíŋgyé pe ntiŋɛ ne ŋgə́ yɔ́b mbó mbé zhʉ́ cyó ŋɔŋ, fáá ndaʼ Yěsô pfuŋ pɔ́b pó. 9Ŋkhoʼyɛ́ pɔ́b kɛ shíí ŋkə́ŋ nɛ́, Yěsô ntsɔ́ ne pɔ́b ŋgâ kii pɔ́b ntsɔ́ no yɛ́ pɔ́b zhʉ́ nɛ́ pwó ŋɔŋ tɛ mbáŋ zhyé yɛ́ Mɔ́ŋ ŋɔŋ zhʉyɛ́ ne vó nɛ́. 10Ŋgíŋgyé pe kɛ zoʼ ntswee ye, mbó mvirɛ mbəb yɔ́b tsetsɛrɛ pɔ́b ŋgâ: «Mə ŋgâ kâ, njʉyɛ́ne ne vo kaʼa mbɛ́ɛ́ ŋgâ kɔ́?»
Ŋgíŋgyé Psírí no ŋkyé Elya
(Mat 17:10-13)
11Pɔ́b kémbó psirɛ́ Yěsô ŋgâ: «A zhyɛ́ kɔ́ ghaŋákeʼekaŋ gháá Elya mbéé ŋkʉ́yó ŋkɔ́ŋ?» 12A pɔ́rɔ́ ne pɔ́b ŋgâ: «Ɔ́ŋɔ́! A sísíŋ ŋgâ Elya ntséʼɛ́ ne mběne ŋkʉ́yó, ne ntéŋéne ŋkɔŋɔ no náá ntíí. Ntsʉʼmbé a pó mbɛ́ɛ́ níŋ pe ŋweʼe ŋkyé Mɔ́ŋ ŋɔŋ ŋgâ a ŋkʉ́yó njʉ́ ŋgəʼo zááme, pe ntsébɛ wé. 13Puŋ zwəʼɛ mə sɔ́ŋɔ́ wúŋ: Elya kɛ náʼá ŋkʉ́yó, pɔ́b pó ŋgyɛ́ ŋkɔŋɔ yɔ́b yɛ́ pɔ́b kɛ ŋkʉye náá nɛ́ mbəb ye, ntsʉ́ŋtsʉ́ŋ njʉ́ a ŋweʼéme ndzó ŋweʼe yáŋme ŋkyé wé nɛ́.»
Yěsô pɛ́d taʼ mɔ́ŋ wɛ́ zhʉye kəpɔŋ kɛ pɛ mbəb ye nɛ́
(Mat 17:14-21; Lúk 9:37-43)
14Ŋkhoʼyɛ́ pɔ́b kɛ tsé mbáŋa pfúŋɔ́ pecyó ŋgíŋgyé nɛ́, pɔ́b zhʉ́ pɔŋ zááme zyɛ́ wɔ́b. Pwɛ ghaŋákeʼekaŋ tsé mɛʼɛ ntswee. 15Ŋkhoʼyɛ́ pɔŋ zááme kɛ fɛ̌ njʉ́ Yěsô nɛ́, pɔ́b gbéʼé, mbɛ wɔ́ fɛ́ʼɛ ne ŋgúne ntsɛʼɛ wé. 16Yěsô psirɛ́ ŋgíŋgyé pe ŋgâ: «Puŋ pɔ́b ntsɔ́ kɔ́?» 17Cyó ŋɔŋ twɔ́ ndzɔ́ʼɔ́ pɔ́b mbɔ́rɔ́ pwó ye ŋgâ: «Ntsɛ́ssó, mə ndɔ̂ mɔ́ŋ ya wɛ́ taʼ zhʉye kəpɔŋ ŋkirí ntsɔ́ no pwó ye nɛ́, ŋkʉ́yó né yé pfúŋɔ́ wo. 18Zhʉye kəpɔŋ ndɛ gbâ wé mbɛ pɛ́ɛ́, máʼá wé syé, kyɛ twɔ́ ntswee yé, a pfɔ́rɔ́ sɔŋ mé, mbó ntʉ́ʼɔ. Mə ndɔ́ŋɔ pwó ŋgíŋgye pe wo ŋgâ pɔ́b zú zhʉye kəpɔŋ wéré, a tsɛ́ɛ́ wɔ́b.» 19Yěsô ntsɔ́ ne pɔ́b ŋgâ: «Puŋ, ŋgɔbɔ ŋuŋmesɔŋ ndzebé, kii tséʼé psyɛ́ndzɔʼ! Piŋi mbɔ́rɔ́ ntsó fuʼ níŋ? Mə mbó gbǎ ndzɔʼ ya ŋkyé wúŋ ŋkɛ́ɛ́ yíkɔ́? Puŋ ŋkʉ́yó ne ye!» 20Pɔ́b yɔ́ɔ́ wé ŋkʉ́yó ne ye. Ŋkhoʼyɛ́ zhʉye wéré kɛ zhʉ́ Yěsô nɛ́, a zyé nyʉ́ne Mɔ́ŋ wéré ne ntʉŋ, a ntʉʼɔ́. A voo mburɛ́ syé, ŋkyɛ twɔ́ ntswee ye. 21Yěsô psírí tɛd yé ŋgâ: «A ŋkhoʼyɔŋ níŋ njʉ́ yéré no zyé nɛ́?» A pód ŋgâ: «Féré ŋǎne mé syé. 22Zhʉye wéré ndɛ máʼá wé mɔ́ɔ́ kii a ndzɔ́ʼɔ́ nse, ne nɔ̌ʼne wé. Ntséʼé tsaaghəghəŋ ŋkyé ywí, Mbéyɛ́ wo ŋkúʼú nɛ́, kpéé ywí!» 23Yěsô pɔ́rɔ́ pwó ye ŋgâ: «Mbéyɛ́ wo ŋkúʼú nɛ́? Cyó yɔ́b yɛ́ a ntsɛ́ɛ́ ŋɔŋ wɛ́ a ntséʼé psyɛ́ndzɔʼ nɛ́ ghú pó!» 24Kpaʼ ŋkhoʼyéré tɛd Mɔ́ŋ pód ne ntʉŋ ŋgâ: «Mə mbzyɛ́, ghebe ya, mbɛ njʉ́ psyɛ́ndzɔʼ ya khóó nɛ́!» 25Yěsô, zhʉ́ njʉ́ pɔŋ kɛ tɛ́rɛ́ yóʼó zááme nɛ́. Mǐ zhʉye kəpɔŋ, ntsɔ́ pwó ye ŋgâ: «Zhʉye moʼontswee pú təŋé, a tsɔ́ mo pwó wo, twɔ́ mbəb mɔ́ŋ wɔŋ, ndɛ́ náʼ mbó mbód ndzəb ŋkʉ́rʉ́ mbəb yé!» 26Zhʉye ghéʼ, nyʉ́ Mɔ́ŋ wéré ne ntʉŋ tɛ a ntʉ́ʼ, twɔ́ mbəb ye. Mɔ́ŋ wéré nú njʉ́ pfɔ́ ŋɔŋ nɛ́ tɛ ŋkɔŋɔ pɔŋ náá gháá: «A kɛ pfó!» 27Ntsʉʼmbé Yěsô gbáá pwó ye, ŋgyɛ́ a ŋáá sye ntsɛ́ nsó. 28Ŋkhoʼyɛ́ Yěsô kɛ pód ndzəb ndáb, kaʼatɛ a tsʉʼ pwɛ ŋgíŋgye pé ne ndúŋ pɔ́b nɛ́, pɔ́b psirɛ́ wé ŋgâ: «A zhyɛ́ kɔ́ psi pe kuʼɔ ne ndzǔne zhʉye wíŋ pɔɔ?» 29Yěsô pɔ́rɔ́ ne pɔ́b ŋgâ: «Yéré mbziʼe zhʉye, tɛ cyó yɔ́b pe túbɔ́ wé fáá tsɛʼɛ́mboʼmvé pó.»
Yěsô ké mbó nsó ŋkyé vó yé ne njʉyɛ́ne mé ne vó
(Mat 17:22-23; Lúk 9:43-45)
30Pɔ́b ŋáá yóʼó, syaʼa ŋgɔŋ Galílya. Yěsô kɛ tsé mbé zɔŋɔ ŋgâ pe zé pó. 31A kɛ fɛ́ ntʉ́ʉ́ pwó ŋgíŋgye pe ŋgâ: «Pe ŋkʉ́yó fi Mɔ́ŋ ŋɔŋ ndzó mbwó pumésɔŋ, pɔ́b nɔʼɔ wé. Ŋkhoʼyɛ́ pe nɔʼɔ wé nɛ́, zhyé pekyéd ghɛ́ ndzáʼá, a zhʉyɛ́ ne vó.» 32Ntsʉʼmbé, ŋgíŋgyé pé pe zoʼ ŋkê tsi nsó wéré pó. Mbó mbɔ́ɔ́ pɔ́ɔ́ ne mvírine wé núŋ.
A wɔ́ mbé ŋɔŋ kəkwéʼe?
(Mat 18:1-5; Lúk 9:46-48)
33Pɔ́b ghú Kapɛɛnawum. Ŋkhoʼyɛ́ pɔ́b kɛ pɛ ndáb nɛ́, Yěsô psirɛ́ wɔ́b ŋgâ: «Puŋ pě nyǐ mɛndɔ́b fiʼɛ kɔ́?» 34Ntsʉʼmbé pɔ́b zhírí zhírí. Ŋkyé ŋgâ a kɛ ghɛ́ mbɛ pɔ́b nyi mɛndɔ́b fiʼɛ ne ndzéne ŋɔŋ wɛ́ a tsɛ́ɛ́ wɔ́b nɛ́. 35Néré, Yěsô ghɔ́rɔ́ syé, fú ŋgíŋgyé pé ntsɔ̌b yípáá, ntsɔ́ ne pɔ́b ŋgâ: «A pɛ́ yɛ́ ŋɔŋ zɔŋɔ mbɛ sɔ́ ŋɔŋ nɛ́, a psyɛ́ mbéne njʉʉndzəb pwó ŋkɔŋɔ pɔŋ náá, mbó mbé ŋgaŋafaʼ pwó ŋkɔŋɔ pɔŋ náá.» 36Ndzáʼnéré, a yɔ́ɔ́ taʼ Mɔ́ŋ ntíí tsetsɛrɛ pɔ́b, mbaʼá wé, ntsɔ́ ne pɔ́b ŋgâ: 37«A pɛ́ɛ́ yɛ́ ŋɔŋ yɔ́ɔ́ taʼ Mɔ́ŋ njʉ́ wɔŋ nɛ́ sʉ́ʼʉ ŋkyé ya nɛ́, mbǒ a yɔ́ɔ́ paa nɛ́ sʉ́ʼʉ. Ŋɔŋ wɛ́ a yɔ́ɔ́ ya sʉ́ʼʉ nɛ́, mbǒ a yɔ́ɔ́ ndaʼ paa sʉ́ʼʉ pó, ntsʉʼmbé a yɔ́ɔ́ ŋɔŋ wɛ́ a twɔ́ ya nɛ́ sʉ́ʼʉ.»
Ŋɔŋ wɛ́ a mbáŋ wúŋ nɛ́ pó, a pǔŋ pɔ́b
(Lúk 9:49-50)
38Zhâŋ ntsɔ́ pwó Yěsô ŋgâ: «Kéʼeyáŋ, psi zhʉ́ cyó ŋɔŋ a yɔ́ɔ́ ntíí wo ndzú zhʉye kəpɔŋ núŋ. Mbénére psi táʼá ne nǎŋne wé ŋkyé ŋgâ a psi pɔ́b mbé ŋgíŋgyé pe wo pó.» 39Ntsʉʼmbé Yěsô pód ŋgâ: «Puŋ tee wé ŋkyé ŋgâ tɛɛmbɛ ŋɔŋ pe zhyɛ́ shʉrɛ́ ne tíí ya, ké mbó ntsé ŋkhoʼyéré fú tíí ya yé kəpɔŋ pó. 40Ŋɔŋ wɛ́ a mbáŋa wíŋi nɛ́ pó a piŋi pɔ́b. 41Ŋɔŋ wɛ́ a náʼá fɛ́ taʼ ndɔŋ nse ne puŋ ŋkyé ŋgâ puŋ pɔŋ Kristo nɛ́, mə sɔ́ŋɔ́ wúŋ nɛ́ kpaʼ sísíŋ ŋgâ, ntsɔʼ faʼ yé náʼá ŋkaa pó.»
Zhyaŋa mvǒne nzɔ́ʼɔ́ kəpɔŋ
(Mat 18:6-11; Lúk 17:1-2)
42Yěsô ké mbó nsó ŋgâ: «A zhyɛ́ ŋɔŋ taʼ mɔ́ŋ ndzɔ́ʼɔ́ pɔ́ŋ pɔŋ pɛ́, pɔ́b tséʼé psyɛ́ndzɔʼ nɛ́, sháŋa, a kuʼɛ́ pwó ye ŋgâ pe tsʉ́ ghɔ́ɔ́ kəkwéʼe myi yé, máʼ wé ndzó lepaanse. 43Mbéyɛ́, a zhyɛ́ pwó wo ŋgâ wo sháŋa nɛ́, tséé wé. A kuʼɛ́ pwó wo ne ŋkúŋne ndzó tsómvé ne taʼ pwó, ntsɛ́ɛ́ yɛ́ wo ŋkuŋɔ ndzó píí mɔ́ɔ́ ne mbwó membáá nɛ́, ndzɔ́ʼɔ́ mɔ́ɔ́ wɛ́ a ndɛ mbé pwó nɛ́ pó. [44A yóʼó, pɛ shʉ́ʼŋgɔ́ʼ pɛ pɔ́b yɛ́rɛ́ pfɔ́ pɔŋ nɛ́ pe pfɔ́ pó, mɔ́ɔ́ pó kpǐ yóʼó kii pwó.] 45Mbéyɛ́, a zhyɛ́ kpee wo ŋgâ wo sháŋa nɛ́, ntséé wé. A kuʼɛ́ pwó wo ne ŋkúŋne ndzó tsómvé, ntʉʼekpee, ntsɛ́ɛ́ yɛ́ pe máʼá wo ndzó píí mɔ́ɔ́ ne kpee mo membáá nɛ́. [46A yóʼó pɛ shʉ́ʼgɔ́ʼ pɛ pɔ́b yɛ́rɛ́ pfɔ́ pɔŋ nɛ́ pe pfɔ́ pó, mɔ́ɔ́ pó ŋkpǐ yóʼó kii pwó.] 47Mbéyɛ́, a zhyɛ́ mbzítíí wo ŋgâ wo sháŋa nɛ́, fiʼ ntúbú. A ŋkuʼɛ́ pwó wo ne ŋkúŋne ndzó Nofɔŋ Mboʼmvé, páŋantíí, ntsɛ́ɛ́ yɛ́ pe máʼá wo ndzó píí mɔ́ɔ́ ne míí membáá nɛ́. 48A yóʼó, pɛ shʉ́ʼŋgɔ́ʼ pɛ́ pɔ́b yɛ́rɛ́ pfɔ́ pɔŋ nɛ́ ndɛ mbé pfɔ́ pó, mɔ́ɔ́ pó mkpǐ yóʼó kii pwó. 49Mboʼmvé ŋkʉ́yó mbɛ́bɛ́ wúŋ ne mɔ́ɔ́ kaʼatɛ puŋ khʉ́, njʉ́ pe ndɛ ŋkhú mɔ́b ne nsé nɛ́. 50Nségbáŋ taʼ yɔ́b sʉ́ʼʉ. Ntsʉʼmbé, a pɛ́ɛ́ yɛ́ a psyé ŋkhʉ́ne mé nɛ́, mbǒ pé núʼɔ ŋkhʉ̌ne méré pé ne kɔ́? Nsé pɛ́ ndzó ndzɔʼ yuŋ. Puŋ pó ntsó tsetsɛrɛ puŋ ne mbúru.»
ទើបបានជ្រើសរើសហើយ៖
Máákuusə 9: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល