Máákuusə 14
14
Menaŋ mɛ́, pé kɛ nyí ŋkyé Yěsô nɛ́
(Mat 26:1-5; Lúk 22:1-2; Zhâ 11:47, 49, 53)
1Zhyémve yípáá pé tɛ ndzáʼá, a pe ndebéne Pasəka mbó mbé ndebéne mbré kii mvuʼ. Pɛ ntsɛ́ssó ghaŋáshʉ́ pwɛ ghaŋákeʼekaŋ táʼá njʉ́ pɔ́b nyáʼá gbáá Yěsô nɔ́ʼ wé nɛ́. 2Néré, pɔ́b tsɔ́ tsetsɛrɛ pɔ́b ŋgâ: «A tsé mbé zɔŋɔ ŋgâ pe gbáá wé pé ndzɔʼɔ ndebéne pó, mbǒ a máʼá vaʼ kaʼatɛ.»
Taʼ məŋgʉ́yé núʼ vód tswɔtwɔ́ tó Yěsô
(Mat 26:6-13; Zhâ 12:1-8; Lúk 7:36-38)
3Yěsô kɛ pɛ́ Betáni ndáb Símo ŋgaŋakəkóó. Ŋkhoʼyɛ́ pɔ́b kɛ ghɔ́rɔ́ syé ntsé ndzɔ́ mɔ́b nɛ́, taʼ məŋgʉ́yé kuŋɔ ndáb ne vód tswɔtwɔ́ yɛ́, pé kɛ téŋé ne kpee ghaŋ yɛ́ pé kɛ fú ne Naa nɛ́, ndzó taʼ ncʉ́ŋ ffə́fó. Vód tswɔtwɔ́ yéré kɛ pe ndáá yéré. Ndɔŋ yé pó ntʉ́ŋ kaʼatɛ. A tsɔʼ ntswee yé sóʼó tó Yěsô. 4Pecyó ghəŋ pʉ́ʉ́ ŋgíyé kaʼatɛ, ntsɔ́ tsetsɛrɛ pɔ́b ŋgâ: «A pubɔ́ vód tswɔtwɔ́ yɔŋ ŋkyé kɔ́? 5A ghɛ́ mbɛ, tɛɛmbɛ pe fí vód mɔŋ kaʼatɛ a záʼ kpii mbób yíkyéd, ndɔ́ɔ́ yéré mbób fɛ́ pwó pɛ mbɔ́ŋmbɔŋ.» Néré, pɔ́b zyé ŋubúne ŋkyé məŋgʉ́yé wéré. 6Ntsʉʼmbé Yěsô nsó ŋgâ: «Puŋ tee wé fwóme. Puŋ záá wé ne ŋgəʼo kɛ́ʼɛ́ ŋkyé kɔ́? No yɛ́ a zhyɛ́ mbəb mo nɛ́, ndáá no sʉ́ʼʉ. 7Puŋ ké mbɛ́ɛ́ pé pwɛ pɛ mbɔ́ŋmbɔŋ, ŋkhoʼyɛ́ puŋ kʉye nɛ́, tɛɛmbɛ puŋ zhyɛ́ meno sʉ́ʼʉ mbəb pɔ́b. Ntsʉʼmbé, a ké mbé pɛ́ piŋi pó. 8No yɛ́ a ghɛ́ a kuʼɔ ne ŋgyɛ́ne nɛ́, a zhyɛ́. A núʼ mbəb ya kɛ́ʼɛ́ ntsuŋu ntsʉne mé ya núŋ. 9Kpaʼ sísíŋ, mə sɔ́ŋɔ́ wúŋ ŋgâ: ŋkɔŋɔ ywoʼ yɛ́ pe náʼá ŋkʉ́yó ncʉrɛ Ŋkəŋ sʉ́ʼʉ nɛ́, pe náʼá ke ntsɔ̌ no yɛ́ məŋgʉ́yé wɔŋ ŋáá ne ŋgyɛ́ne nɛ́, ndɔ̂ kpaŋa tíí yé núŋ.»
Yúda zɔŋɔ fí Yěsô pwó ntsɛ́ssó ghaŋáshʉ́
(Mat 26:14-16; Lúk 22:3-6)
10Taʼ ŋɔŋ ndzɔ́ʼɔ́ ghaŋántɔ́b Yěsô ntsɔ̌b yípáá, tíí pé Yúda Iskaryotə, kɛ ghú yóʼó pɛ ntsɛ́ssó ghaŋáshʉ́ ndzɔ́ŋɔ fí Yěsô ne pɔ́b. 11Njʉ́ pɔ́b kɛ zóʼ nɛ́, ndzɔ́ʼ yɔ́b yebé, pɔ́b kaʼ ŋgâ pɔ́b fɛ́ mbób pwó ye. Yúda táʼ ndáá saŋ njʉ́ a fí Yěsô nɛ́.
Yěsô zhyɛ́ ŋgâ pe tsuŋu mɔ́b Pasəka
(Mat 26:17-19; Lúk 22:7-13)
12A kɛ pé sɔ́ zhyémve ndebéne mbré kii mvuʼ, zhyémvé yɛ́ pé nɔʼɔ njʉyǐnjʉyî Pasəka nɛ́, ŋgíŋgye Yěsô psirɛ́ wé ŋgâ: «Wo zɔŋɔ ŋgâ psi ghú pɛ́ɛ́ ntsuŋu mɔ́b Pasəka, wo zɔ́?» 13Yěsô twɔ́ pɔŋ pepáá ndzɔ́ʼɔ́ ŋgíŋgye pé, ntsɔ́ ne pɔ́b ŋgâ: «Puŋ ghú mbɛ́lʉ́ŋ. Pǔŋ yɛ́ taʼ ŋúmbzi sɛrɛ, a kyɛ́ taʼ ywóʼnse tó ye. Puŋ tsʉ́ʼɔ́ ndzəb yé 14kaʼatɛ mbáŋa ndzó ndáb yɛ́ a ŋkuŋɔ nɛ́. Puŋ ŋkuŋ, mvirɛ pwó ŋgaŋaywoʼ wéré ŋgâ: “Kéʼeyáŋ gháá: Ya ywoʼ ghɔ́rɔ́ yɛ́? Ywoʼ yɛ́ psi yɛ́ ŋgíŋgye páá ndzɔ́ mɔ́b Pasəka nɛ́, pɛ́ pɛ̂?” 15Á nyóʼó taʼ tóndáb kəkwéʼe nsó ne ŋkɔŋɔ yɔ́b náá ndzô ne puŋ, puŋ tsuŋu mɔ́b péré yóʼó ne piŋi.» 16ŋgíŋgye pé ghú mbɛ́lʉ́ŋ. Ké njʉ́ ŋkɔŋɔ meno náá pe njʉ́ Yěsô kɛ tébé nɛ́. Pɔ́b tsuŋu mwɔ̌zó Pasəka.
Yěsô nsó ŋgâ taʼ ŋɔŋ ndzɔ́ʼɔ́ ŋgíŋgyé pé fi wé
(Mat 26:20-25; Lúk 22:14; Zhâ 13:21-30)
17A kɛ pé ne fwɔ̌nab, Yěsô páŋ pwɛ ntsɔ̌b ŋgíŋgyé pé pepáá. 18Ŋkhoʼyɛ́ pɔ́b kɛ ghɔ́rɔ́ ne ndzóne mɔ́b nɛ́, Yěsô nsó ŋgâ: «Kpaʼ sísíŋ mə sɔ́ŋɔ́ wúŋ: Taʼ ŋɔŋ tsetsɛrɛ puŋ fí ya, taʼ ŋɔŋ wɛ́ psi zɔ mɔ́b nɛ́.» 19Ŋgíŋgyé pé tsuŋí! Mbɛ wɔ wɔ gháá: «A kɛ́ʼɛ́ mbé mo?» 20Yěsô tsɔ́ ne pɔ́b ŋgâ: «A taʼ ŋɔŋ ndzɔ́ʼɔ́ ntsɔ̌b ŋgíŋgyé páá pepáá. Ŋɔŋ wɛ́ psi níŋɛ pwó ndzó káŋ nɛ́. 21Ŋkyé ŋgâ Mɔ́ŋ Ŋɔŋ nsé nɛ́ pe mɛndɔ́b njʉ́ a ŋweʼéme ŋkyé wé nɛ́. Ntsʉʼmbé ndɔŋ tó ŋɔŋ wɛ́ pe ndzáʼá mbəb ye fí Mɔ́ŋ ŋɔŋ nɛ́! A pú yɛ́ pé ŋgɛ́ mbé pfɛ́ wé nɛ́ pó!»
Mbziʼe yɛ́ Yěsô kɛ núŋu ntɛ́d nɛ́
(Mat 26:26-29; Lúk 22:15-20; 1Ko 11:23-26)
22Ŋkhoʼ zɔ́ mɔ́b, Yěsô yɔ̌ mbré. Níŋí mbúru ndúŋú. Mbóʼ fɛ́ pwó ŋgíŋgyé pé, nsó ŋgâ: «Puŋ kpéé, yɔŋ mbəb ya.» 23Ké mbó ndɔ́ɔ́ ndɔ́ŋ yoʼ, ntséʼé Mboʼmvé, fɛ́ pwó ŋgíŋgyé pé. Pɔ́b nɔ́ ŋkɔŋɔ wɔ́b náá. 24Yěsô tsɔ́ ne pɔ́b ŋgâ: «Yɔŋ nsə máá! Nsə kaŋ yɛ́ a mvérɛ́ ŋkyé pɔŋ zááme nɛ́. 25Kpaʼ sísíŋ mə sɔ́ŋɔ́ wuŋ: mə mbó nɔ́ yoʼ mɔ́ŋ ŋkʉ́rʉ́ pó, kaʼatɛ mbáŋ zhyémvé yɛ́ mə ŋkʉ́yó nɔ́ yé fé ndzó Nofɔŋ Mboʼmvé nɛ́.»
Símo Pětro ŋkʉ́yó sirɛ́ Yěsô
(Mat 26:30-35; Lúk 22:33-34; Zhâ 13:37-38)
26Ŋkhoʼyɛ́ Yěsô pwɛ ŋgíŋgyé pé kɛ mě zɔbɔ́ nse yɛ́ a twɔ́ ndzó Ŋweʼe zɔbɔ́ nse nɛ́, pɔ́b ghú ndúŋú ŋkə́ŋ pɛ tsi nsó vód Oliivə. 27Yěsô tsɔ́ ne pɔ́b ŋgâ: «Ŋkɔŋɔ wuŋ náá máʼ ya. Ŋkyé ŋgâ a ŋweʼéme ŋgâ:
“Mə nɔ́ʼɔ́ mvyébkɛd
Kɛ́ʼɛ́ ŋgâ njʉyǐnjʉyî gbéʼé.”»
28Yěsô psíʼí ŋgâ: «Ŋkhoʼyɛ́ mə njʉyɛ́ ne vó nɛ́, mə kpɛ́ɛ́ síŋ puŋ ndzwə́ʼɛ́ wúŋ Galílya.» 29Pětro tsɔ́ pwó yé ŋgâ: «Mbéyɛ́ ŋkɔŋɔ pɔŋ náá máʼ wo nɛ́, mbǒ mə mbɛ ndzóʼo pó!» 30Yěsô pɔ́rɔ́ pwó ye ŋgâ: «Kpaʼ sísíŋ mə sɔ́ŋɔ́ wo ŋgâ: ndzebé, netsúʼ wɔ̂ŋ, ŋkhoʼ ŋgɛ́ ntú ŋkɛ̌ yípáá, wo siri ya ŋkɛ̌ yíkyéd.» 31Pětro pó nsó ne kɔbɔndzɔʼ ŋkʉ́rʉ́ ŋgâ: «Mbéyɛ́ a tsyɛ́ ŋgâ paʼa pfó nɛ́. Ŋgáŋ! Mbǒ mə Siri wo pó.» Ŋkɔŋɔ wɔ́b náá kpaʼ ké ntsɔ́ɔ́ néré náá.
Yěsô tsɛ́ʼɛ́ Mboʼmvé Getsemani
(Mat 26:36-46; Lúk 22:40-46)
32Pɔ́b ŋáá ŋgú ndzó cyó ywoʼ yɛ́ pe fú ne Getsemani nɛ́. Yěsô tsɔ́ pwó ŋgíŋgye pé ŋgâ: «Puŋ ghɔ́rɔ́ ghaŋ mə ŋgɛ ntsɛ́ʼɛ́ Mboʼmvé.»
33A yɔ́ɔ́ Pětro, Zhakə pú Zhâŋ. Pépáá yé zyé sáŋne wé, ndzɔʼ ye gbî. 34A tsɔ́ ne pɔ́b ŋgâ: «Ménee ya tsé ntsuŋɛ kaʼatɛ mbɛ́ɛ́ njʉ́ tɛɛmbɛ ntsuŋine méré zhyɛ́, mə mpfó nɛ́. Puŋ tsʉʼɔ́ ghaŋ, puŋ yáʼ sáŋ.» 35A náʼá mbaʼ, féd kweʼé mé syé, ntsɛ́ʼɛ́ Mboʼmvé ntsɔ́ ŋgâ, mbéyɛ́ tɛɛmbɛ Mboʼmvé paʼ yéré ŋkhoʼmvé kəpɔŋ, a záʼ fáá tó yé nɛ́, a paʼ. 36A ké mbó nsó ŋgâ: «Aba, Tɛd ya, tɛɛmbɛ́ cyó yɔ́b pé tsɛ́ɛ́ wo pó. Suʼú yɔŋ ndɔ́ŋ ŋgəʼo pfúŋɔ́ mo. Ntsʉʼmbé ndɛ ŋgyɛ́ no yɛ́ mə ŋkʉ́yé nɛ́, zhyɛ́ yɛ́ a kʉ́yé wo nɛ́.» 37Yěsô pód ndzəb pfúŋɔ́ ŋgíŋgyé pé pekyéd, njʉ́ wɔ́b pɔ́b tsé ŋgye. A tsɔ́ pwó Pětro ŋgâ: «Símo, wo zhyé zhyé? Wo zyé mbé tséʼé tʉŋ ne ndaʼne sáŋ mbɛ ne taʼ ŋkhoʼmvé pɔɔ? 38Puŋ yáʼ sáŋ, ntsɛ́ʼɛ́ Mboʼmvé, kɛ́ʼɛ́ ŋgâ mkpeʼe ndɛ ntsɛ́ɛ́ wúŋ. Ndzɔʼ yuŋ tsé nɛ́ ndzɔ́ŋɔ ŋgyɛ́ no sʉ́ʼʉ kaʼatɛ, ntsʉʼmbé mbəb yuŋ pe psyɛ pó.» 39Yěsô pó suʼú mbəb ye ntséʼé Mboʼmvé ne nsó pɛ́, a pě tséʼé nɛ́. 40A pód ndzəb ŋkʉ́rʉ́ pfúŋɔ́ ŋgíŋgyé pe pekyéd, njʉ́ wɔ́b pɔ́b zhyé zhyé ŋkyé ŋgâ míí mɔ́b kɛ káŋ. Pɔ́b pe zɛ́ no yɛ́ pɔ́b kɛ ghɛ́ ntsɔ́ pwó yé nɛ́ pó. 41Yěsô suʼú mbəb yé mbɛ́rɛ́ yíkyéd, mbó ŋkhú ntsɔ́ pwó ŋgíŋgyé pé ŋgâ: «Puŋ zhyé, fúrú mbəb yuŋ. Kəŋ yɛ́ pfé nɛ́, ŋkhoʼ kuʼu, pe fí Mɔ́ŋ Ŋɔŋ ndzó mbwó pukəpɔŋ. 42Puŋ ŋáá sye! Piŋi ghú! Ŋɔŋ wɛ́ a fí ya nɛ́, kɛ páŋ.»
Pɛ kaŋátó gbáá Yěsô
(Mat 26:47-56; Lúk 22:47-53; Zhâ 18:2-11)
43Kpaʼ ŋkhoʼyéré, njʉ́ Yěsô kɛ tsɔ́ néré nɛ́, Yúda wɛ́ a kɛ pɛ́ ndzɔ́ʼɔ́ ntsɔ̌b ŋgíŋgyé Yěsô pepáá nɛ́, páŋ pwɛ ndzíʼ pɔŋ ne pɛ káfáá pwɛ kʉ́yé. Ŋgɛmbɛ a twɔ́ pɛ ntsɛ́ssó ghaŋáshʉ́, pɛ ghaŋákeʼekaŋ pwɛ ghəkód ntwɔ́ wɔ́b. 44A kɛ ghɛmbɛ Yúda kɛ tébé mbziʼe njʉ́ a ŋgyɛ́ nɛ́ pwó pɔŋ péré. A kɛ tsɔ́ ne pɔ́b ŋgâ: «Ŋɔŋ wɛ́ mə ŋkô wé nɛ́, a yé, puŋ gbáá wé, puŋ pɔ́b ghɛ́ ŋgú, puŋ psyéb wé sʉ́ʼʉ.» 45Fǐme wɛ́ Yúda kɛ páŋ nɛ́, a suʼú mbəb mbɛ́rɛ́ Yěsô, ntsɔ́ pwó ye ŋgâ: «Rábi.» Nkô wé. 46Pɔ́b máʼ mbwó mɔ́b gbáá Yěsô. 47Taʼ ŋɔŋ wɛ́ a kɛ pɛ́ yóʼó nɛ́, túbú káfáá yé gbíí ŋgaŋafaʼ tɛdshʉ́ kəkwéʼe, ntséé təŋé yé. 48Yěsô tsɔ́ ne pɔ́b ŋgâ: «Puŋ kʉ́yó ne gbǎne ya ne pɛ káfáá pwɛ pɛ kʉ́yé njʉ́ mə mbɛ́ɛ́ ghaŋámvé nɛ́! 49Piŋi mbɛ ŋkɔŋɔ zhyémvé náá ndámboʼmvé. Mə ntʉ́ʉ́ wuŋ, puŋ pe gbáá pó. Ntsʉʼmbé yɔŋ no pɛ́ɛ́ ŋgâ tó póʼ ŋweʼe yáŋme yúŋú.» 50Ŋkɔŋɔ ŋgíŋgyé pe náá máʼá wé, ŋkhí. 51Taʼ ŋkɔ́ʼŋɔŋ cʉ́ʼɔ́ ndzəb Yěsô, ŋgúbú mbəb yé ne ndzwé. Pe gbáá wé, 52tsʉʼ mbé a tee ndzwé yé ne pɔ́b, ŋkhi ntsíŋi.
Yěsô síŋ ghaŋásábáfiʼ kəkwéʼe pɛ Yúda
(Mat 26:57-68; Lúk 22:54-55, 63-71; Zhâ 18:12-18)
53Pɔ́b ghú ne Yěsô síŋ tɛdshʉ́ kəkwéʼe. Pɛ ntsɛ́ssó ghaŋáshʉ́, ghəkód pwɛ ghaŋákeʼekaŋ téré náá yóʼó. 54Yěsô kɛ ghǔ, Pětro nyáʼá mbɛ́rɛ́ wé kaʼatɛ ŋkuŋɔ ntɔ́ʼ tɛdshʉ́ kəkwéʼe, ŋgód pwɛ ghaŋápsíbɛ ntɔ́ʼ tsé ndzɔ́ɔ́ mɔ́ɔ́. 55Ntsɛ́ssó ghaŋáshʉ́ pwɛ ŋkɔŋɔ ghaŋásábáfiʼ kəkwéʼe náá táʼá pɔŋ pɛ pɔ́b ntsyɛ́ŋəŋ yɔ́b, pɔ́b yáá ndúŋú fúŋɔ́ wé, pé nɔʼ wé nɛ́, mbé tsé njʉ́ pó. 56Ŋkyé ŋgâ záá ghaŋátsyɛŋəŋ péré kɛ tsɔ̂ mbwɔ́ ŋkyé Yěsô. Meno pɛ pɔ́b kɛ tsɔ́ nɛ́, pó mbé tsé ntsyɛ́ pó. 57Pecyó pɔŋ kɛ ŋâ, ntíí paŋ tó Yěsô, ntsɔ́ ŋgâ: 58«Psi zóʼ a tsɔ́ ŋgâ: “Mo wɔŋ, mə ŋkʉ́yó ŋʉʼɛ ywoʼɔ́ze yɔŋ yɛ́ pɔŋ ŋkwód ne mbwó mɔ́b nɛ́, a ghɛ́ mbɛ zhyémvé pékyéd, mə ŋkwod cyó ntsʉʼmbé pɛ́ɛ́ ne mbwó pɔŋ pó.”» 59Mbɛ néré, no yɛ́ ghaŋátsyɛŋəŋ kɛ tsɔ́ nɛ́, pe tsé ntsyɛ́ pó. 60Tɛdshʉ́ kəkwéʼe ŋâ síŋ ŋkɔŋɔ pɔŋ náá mvirɛ Yěsô ŋgâ: «Wo tsé mbé pɔ́rɔ́ no, ne no yɛ́ pɔ́b tsɔ́ ŋkyé wo nɛ́ pó?» 61Yěsô naʼ, mbé pód no pó. Tɛdshʉ́ kəkwéʼe pó mvirɛ wé ŋgâ: «A wo mbé Kristo Mɔ́ŋ Mboʼmvé wɛ́, mbúru mbəb yé nɛ́?» 62Yěsô pɔ́rɔ́ pwó ye ŋgâ «Ɔ́ŋɔ́, a mo! Puŋ ŋkʉ́yó njʉ́ Mɔ́ŋ ŋɔŋ, a ghɔ́rɔ́ núŋu ndzáʼ pwó Mboʼmvé Fɔŋ metʉŋ ye maʼ, ké mbó ŋkʉ́yó njʉ́ wé a ŋkʉ́yó ndzɔ́ʼɔ́ pfuŋ pépéé.» 63Tɛdshʉ́ kəkwéʼe sɛ́ɛ́ ndzwé yé, nsó ŋgâ: «Kɔ́ yɔɔ! Ghaŋákpééntáŋ tséʼé ghebe ne piŋi ŋkʉ́rʉ́ pó! 64Puŋ zoʼo njʉ́ a tó Mboʼmvé nɛ́. Puŋ zhʉ́ yuŋ pé níŋ?» Ŋkɔŋɔ pɔŋ náá fúŋɔ́ wɛ́, nsó ŋgâ a tsyɛ́ ŋgâ pé nɔ́ʼɔ́ wé. 65Pecyó ntswə́ ntə́ mbəb yé. Mbwɔ záŋ yé, gbíí wé ntsɔ́ pwó yé ŋgâ: «Zhyɛ́ njʉ́ ŋgaŋatsɔ́kpaŋató nɛ́!» Ŋgaŋafaʼ yɔ́ɔ́ Yěsô mgbíí ntəŋé mé.
Pětro sirɛ́ Yěsô ŋkɛ̌ yíkyéd
(Mat 26:69-75; Lúk 22:56-62; Zhâ 18:25-27)
66Pětro pɛ syémasǎ mboʼmbab, taʼ ŋgaŋafaʼ tɛdshʉ́ kəkwéʼe wé məŋgʉ́yé páŋ. 67A zhʉ́ njʉ́ Pětro kɛ zɔ́ɔ́ mɔ́ɔ́ nɛ́, ndiŋɛ́ wé, ntsɔ́ pwó yé ŋgâ: «Tómbəb wo, wo kɛ ké mbé pú Yěsô ŋɔŋ Nǎzarɛd!» 68Pětro pód ŋgâ: «Mə ndzɛ́ wé pó, ké mbé tsé ndzóʼó no yɛ́ wo zɔŋɔ ntsɔ́ nɛ́ pó.» A ŋáá ŋgú tswěpoʼ. [ Ŋkhoʼ tú.] 69Ŋgaŋafaʼ tɛdshʉ́ kəkwéʼe wé məŋgʉ́yé zhʉ́ Pětro, ké mbó ntsɔ́ pwó pɔŋ pɛ pɔ́b kɛ pɛ́ yóʼó nɛ́ ŋgâ: «Yekénɛ́ cyó ŋgaŋakpê wɔ́b!» 70Ntsʉʼmbé Pětro ké mbó siri siri. A pó naʼ ŋgɛ kyáŋá, pɔŋ pɛ pɔ́b kɛ pɛ yóʼó nɛ́ ké mbó ntsɔ́ pwó Pětro ŋgâ: «A sísíŋ, a puŋ pɔ́b! Wo pó mbé taʼ ŋɔŋ Galílya.» 71Pětro səb kaʼatɛ səb ŋgâ: «Záŋ ya! Mə ndzɛ́ ŋɔŋ wékénɛ́ puŋ tsɔ́ kɛ́ʼɛ́ nɛ́ pó yɛ́!» 72Fǐme nɛ́, ŋkhoʼ tú mbɛ́rɛ́ yípáá. Tó Pětro fú ne no yɛ́ Yěsô kɛ pě ntsɔ́ pwó ye nɛ́, ŋgâ: «Ŋkhoʼ ŋgɛ ntú ŋkɛ̌ yípáá wo siri ya kɛɛ yíkyéd.» A twɔ́ ne ndéé, ŋkhɔ́!
ទើបបានជ្រើសរើសហើយ៖
Máákuusə 14: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល