Matʉyo 24
24
Yěsô ntsó ŋgâ Ndámboʼmvé náʼá mbɛ nyʉʼime
(Máá 13:1-4; Lúk 21:5-7)
1Yěsô kɛ twɔ́ Ndámboʼmvé tsé ŋgú. Ŋgíŋgye pé suʼú mbəb yɔ́b mbɛ́rɛ́ we, ne ŋgyɛ́ne a ntsʉyi njʉ́ mbziʼe njʉ́ pe ŋkwód Ndámboʼmvé nɛ́. 2Yěsô yɔ́ɔ́ ntsó, ntsɔ́ ne pɔ́b ŋgâ: «Puŋ zhʉ́ ŋkɔŋɔ yɔ́b ye ké nɛ́ náá? Mə səŋɛ wúŋ kpaʼ sísíŋ ŋgâ cyó ŋgɔʼ náʼá mbó ntsʉʼɔ́ ndúŋú cyó ŋkʉ́rʉ́ pó! Pe ŋkʉ́yó nyʉʼɛ́ ŋkɔŋɔ yé náá.» 3Njʉ́ Yěsô kɛ kɔ́ʼɔ́ ndúŋú ŋkə́ŋ Nsó vód Oliivə nɛ́, ŋgíŋgye pe suʼú mbəb yɔ́b mbɛrɛ wé ne mbaʼá, mvirɛ we ŋgâ: «Sɔ́ŋɔ́ ywí ne ŋkhoʼyɛ́ yɔŋ no náʼá mbɛ nɛ́. Kiŋi kʉ́yóne mo pwɛ zhyémve njʉyǐndzəb náʼá mbɛ́ɛ́ níŋ?»
No yɛ́ a ŋkʉ́yó ghɛmbɛ́ ne zhyémve njʉyǐndzəb nɛ́
(Máá 13:5-13; Lúk 21:8-19)
4Yěsô pɔ́rɔ́ ne pɔ́b ŋgâ: «Puŋ máʼ fǐ ndzó təŋé múŋ! Kii ŋɔŋ ndɛ shʉyɛ́ wúŋ! 5ŋkyé ŋgâ pɔŋ zááme ŋkʉ́yó ndɔ́ɔ́ tíí ya ntsɔ́ ŋgâ: “Á mo mbé Kristo”. Néré kɛ́ʼɛ́, pɔ́b shʉyɛ́ pɔŋ zááme. 6Puŋ ŋkʉ́yó ndzóʼó pɛ ntsɔ pwɛ ntsó no ntsɔ, puŋ zhyaŋa! Kii puŋ ndɛ mvód. A zɔŋɔ ŋgâ meno péré péé mbáŋ ŋkɔŋ. Ntsʉʼmbé kɛ́ʼɛ́ njʉ́yí pe pé ŋkhoʼyéré pó. 7Ŋkyé ŋgâ taʼ yáʼ ŋkʉ́yó máʼá ntsɔ pú cyó, taʼ ŋgɔŋ twɔ́ ndzəb cyó. Pecyó záá pɛ́rɛ́ ywoʼ ndúŋú tsetsáʼ mvɔrɔ́, títî gháʼmbwo. 8Ntsʉʼmbé ŋkɔŋɔ meno péré náá, pɛ́ɛ́ ndaʼ ndzye pɛ meno, njʉ́ ŋkhoʼ pfé yɛ́ ndzye Məŋgʉ́yé nɛ́. 9Pe ŋkʉ́yó fí wúŋ, puŋ zhʉ́ ŋgəʼo, pe nɔʼɔ wúŋ, ŋkɔŋɔ pɛ kiizɛ́mboʼmvé náá páŋa wúŋ ŋkyé tíí ya. 10Néré psyɛ́ndzɔʼ záá pɔŋ pɔ́d. Pɔ́b fí mbəb yɔ́b pwó pecyó, mbó mbáŋ mbəb yɔ́b tsetsɛrɛ pɔ́b. 11Ghaŋátsɔ́kpaŋató mbwɔ́ náʼá saʼá sáʼá njʉ́ ŋgɔ́ʼ nɛ́. A pe nɛ́ njʉ́ pɔ́b ŋgyɛ́ pɔŋ zááme sháŋa nɛ́. 12Njʉ́ kəpɔŋ ŋkʉ́yó ke mě mê mvii nɛ́, kəŋe pɔŋ zááme pɔ́d, 13ntsʉʼmbé ŋɔŋ wɛ́ a ŋkʉ́yó sɛ́ɛ́ kaʼatɛ mbáŋa ne myě nɛ́, Mboʼmve kpéé wé. 14Pe náʼá ncʉ́rɛ́ Ŋkəŋ Sʉ́ʼʉ Nofɔŋ Mboʼmve yɔŋ ndzó ŋkɔŋɔ mbǎʼmvé náá. Ŋkɔŋɔ pɛ kiizɛ́mboʼmvé náá zóʼ, ndǎ ndúŋú ntséʼé psyɛ́ndzɔʼ. Néré ŋkɔŋ, zhyémve njʉyǐndzəb pɔrɔ́ mbáŋa.»
Pɔŋ zááme ŋkʉ́yó njʉ́ ŋgəʼó
(Máá 13:14-23; Lúk 21:20-24)
15Yěsô pó ntsó ŋkʉ́rʉ́ ŋgâ: «Ŋkhoʼyɛ́ puŋ náʼá njʉ́ Mbúbuywoʼ wé Ghoʼotó, njʉ́ ŋgaŋatsɔ́kpaŋató Mboʼmvé Ndaniya kɛ ŋweʼe nɛ́, a ghɔ́rɔ́ ndzó ywoʼ yáŋme nɛ́. —Ŋɔŋ wɛ́ a fú nɛ́, a cʉ̌yi ndzóʼ!— 16Pɔŋ pɛ́ pɔ́b Zhʉde nɛ́, khí kɔ́ʼɔ́ ndúŋú pɛ ŋkə́ŋ. 17Ŋɔŋ wɛ́ a ntsɔ̌ʼndáb nɛ́, ndɛ shíí ne ndɔ̌ne yɔ́b yɛ́ a ndáb ye nɛ́. 18Ŋɔŋ wɛ́ a faʼ nɛ́ ndɛ mbód ndzəb ne ndɔ̌ne ndzwé fóó ye. 19Ŋgəʼo náʼá ŋgɛ́ mbɛ́ pwó pěŋgyé sǔme pwɛ pɛ memɔ́ŋ ne yéré zhyémve! 20Puŋ tséʼé Mboʼmvé ŋgâ yéré no ndɛ ŋkʉ́yó ne ŋgabmvé kəpɔŋ kii ŋgâ zhyéze. 21Ŋgəʼó zááme náʼá mbɛ ndzɔ́ʼɔ́ zhyémve péré kaʼatɛ, njʉ́ a kaa kɛ pɛ féré njʉ́ Mboʼmvé kɛ nuŋu mvé yé kaʼatɛ mbáŋ ndzebe nɛ́ po. Cyô zhyémve ghɛ́ náʼá mbé pé ŋkʉ́rʉ́ njʉ́ yéré nɛ́ pó. 22A ghɛ́ mbɛ Ntsɛɛpɔŋ pe kɔ́ɔ́ ndɔŋɔ zhyémve péré pó, mbǒ cyó ŋɔŋ wɛ́ a ŋkʉ́yó ntsɛ́ʼɛ́ ndzǔne nɛ́ ghú pó. A kiʼi kɔ́ɔ́ ndɔŋɔ zhyémve péré, ŋkyé pɔŋ pɛ́ a kɛ fú mbó ntsɔ́ʼ nɛ́. 23Néré, a tsɔ́ ŋɔŋ ne puŋ ŋgâ: “Kristo pɛ́ɛ́ ghaŋ!” kii ŋgâ: “A pɛ́ɛ́ ghiŋ!” kii puŋ ndɛ ndzóʼ ntswee yé. 24Ŋkyé ŋgâ pɛ fɛ̂ kristo pwɛ pɛ ghaŋátsɔ́kpaŋató mbwɔ́ náʼá ŋkʉ́yó. Pɔ́b náʼá ŋgyɛ́ pɛ meno shʉyédme pwɛ pe ghoʼotó ne shʉyɛ̌ne pɔŋ núŋ, mbɛ pɔŋ pɛ́ Mboʼmve kɛ tsɔ́ʼɔ́ wɔ́b nɛ́, mbé yɛ́ tɛɛmbɛ á nyí nɛ́. 25A pé nɛ́, mə ntʉ́ʉ́ tó yúŋ nɛ́!»
Mbziʼe yɛ́ Mɔ́ŋ ŋɔŋ náʼá ŋkʉ́yó nɛ́
(Máá 13:24-31; Lúk 17:23-24; 21:25-31)
26«A pɛ́ɛ́ yɛ́ pé ntsɔ́ ne puŋ nɛ́ ŋgâ: “A pé niŋ ghúŋkwéʼé”, kii puŋ ndɛ ŋgú yóʼó. Kii ŋgâ: “A pé nɔŋ ne mbaʼá”, kii puŋ ndɛ ndzóʼ ntswee yɔ́b. 27Ntsʉʼmbé zhyémve yɛ́ Mɔ́ŋ ŋɔŋ náʼá ŋkʉ́yó nɛ́, náʼá mbɛ́ɛ́ njʉ́ mbuŋ ndɛ nʉyi pépéé, ntwɔ́ ne sáʼá ménab ŋgú mbáŋa ne ntswɛ́ɛ́ ménab nɛ́. 28Ywoʼ yɛ́ pfɔ̂ yɔ́b yóʼó nɛ́, pɛ ŋɔ̌ŋɔ̂ ndɛ mbé kaa yóʼó pó. 29Fǐme njʉ́ ŋgəʼo zááme péré náʼá ndzáʼa zhyémve péré náá nɛ́, ménab síŋ, ménwɔ̂tsúʼ pó mbé ke fʉ́ʉ́ ŋkʉ́rʉ́ pó. Pɛ saŋ twɔ́ pépéé mvérɛ́ syé, tʉ̌ŋ pɛ a pépéé nɛ́ náʼá ŋyʉ́. 30Néré, kiŋi Mɔ́ŋ ŋɔŋ twɔ́ pépéé, ŋkɔŋɔ pfíí ndúŋú tsetsáʼ náá ntsúŋí. Pɔ́b náʼá njʉ́ Mɔ́ŋ ŋɔŋ a kʉ́yó ndzɔ́ʼɔ́ pfuŋ pépéé ne ŋkɔŋɔ tʉ̌ŋ mé náá, pwɛ ŋkɔŋɔ ghɛ́ɛ́ yé náá. 31A náʼá ntwɔ́ pɛ aŋgere pé ne pɛ ntaŋ kəkwéʼe, pɔ́b téré pɔ́ŋ pé pɛ a kɛ tsɔ́ʼɔ́ ndzó sáá mvé ye yíkwa nɛ́, ndzó ŋkɔŋɔ mbǎʼmvé náá, mbɛ pépéé ndzíyene ndúŋú cyó sáá ye kaʼatɛ mbáŋa ndúŋú cyó. 32Puŋ cʉ̌yi ndzóʼ fuʼno ndúŋú tsi mbéé yɔŋ sʉ́ʼʉ. Ŋkhoʼyɛ́ ntâmbwó mé tʉ́ŋ, fwo pé pó séʼé nɛ́, puŋ zé ŋgâ mbuŋ kyáŋá ŋkhú. 33Á ké mbé nɛ́, ŋkhoʼyɛ́ puŋ njʉ́ péré meno nɛ́, puŋ zé ŋgâ Mɔ́ŋ ŋɔŋ tsé ŋkʉ́yó. A kɛ pé nɛ́ pé ntswěndáb puŋ! 34Kpaʼ sísíŋ, mə sɔ́ŋɔ́ wúŋ ŋgâ ŋgɔbɔ ŋumésɔŋ ndzebe náʼá pfó náá kii ŋkɔŋɔ péré meno náá páŋ pó. 35Pépéé pú tsetsáʼ náʼá ndzáʼa, ntsʉʼmbé ntsó ya náʼá mbwó ne cyó zhyémve pó!»
Ŋɔŋ zɛ́ zhyémve pó, puŋ yáʼ sáŋ!
(Máá 13:32; Máá 13:35; Lúk 17:26-27; Lúk 17:34-35; 12:39-40)
36«Ŋgɛ ŋkhú ne zhyémve pwɛ ŋkhoʼmvé yɛ́ péré meno ŋkʉ́yó ndzáʼa nɛ́, ŋɔŋ yóʼó ndzé pó, mbɛ pɛ aŋgere pépéé, mbɛ Mɔ́ŋ, ndii ŋɔŋ fáá Tɛd, ndaʼ ye pó. 37Zhyémve yɛ́ Mɔ́ŋ ŋɔŋ náʼá nyóʼó mbəb yé pwó pɔŋ nɛ́, náʼá ke mbɛ́ɛ́ njʉ́ méno kɛ pé ŋkho yɛ́ Nuwa kɛ pé nɛ́. 38Ŋkyé ŋgâ tsʉŋtsʉ́ŋ njʉ́ pɔŋ kɛ zɔ̂, nɔ̂, kpáʼá ndáá, mbó fɛ́ pɔ́ŋ pɔ́b ndáb ndáá, kaʼatɛ mbáŋ zhyémve yɛ́ Nuwa kɛ ŋkúŋɔ ndzó páŋ nɛ́, Mboʼmvé zhyɛ́ ntséd ŋkhú nɛ́. 39Pé kɛ pé tsé kpáŋa cyó yɔ́b pó kaʼatɛ ntsed khú, ndɔ́ɔ́ wɔ́b náá. A ke mbé nɛ́ njʉ́ zhyémve yɛ́ Mɔ́ŋ ŋɔŋ náʼá ŋkʉ́yó nɛ́, náʼá mbɛ́ nɛ́. 40Kɛ́ʼɛ́, pɔŋ pépáá náʼá mbɛ́ faʼ, pé yɔ́ɔ́ taʼ yé, ntéé cyó. 41Péŋgyé pépáá pɛ pɔ́b náʼá mbɛ́ ywoʼ ghɔʼɔ ŋgəŋ nɛ́, pé yɔ́ɔ́ taʼ yé, ntéé cyó. 42Puŋ yáʼ sáŋ nɛ́, ŋkyé ŋgâ puŋ zɛ́ zhyémve yɛ́ Ntsɛɛpɔŋ wuŋ ŋkʉ́yó nɛ́ pó. 43Puŋ zóʼ sʉ́ʼʉ, a ghɛmbɛ ŋgaŋáywoʼ zé ŋkhoʼyɛ́ ghaŋámvé ŋkʉ́yó netsúʼ nɛ́, mbǒ, tɛɛmbɛ a yáʼ sáŋ mbé tee wé a tsú tsi ndáb yé pó. 44A zhyɛ́ yéré, mbɛ puŋ, puŋ tsúŋú mbəb yúŋ. Ŋkyé ŋgâ Mɔ́ŋ ŋɔŋ náʼá ŋgɛ́ ŋkʉ́yó, mvuwɛ wúŋ mvwí.»
Ŋgaŋáfaʼ ŋgerɛ́ŋged
(Lúk 12:42-46)
45«A wɛ́rɛ́ ŋgaŋafaʼ ŋgerɛ́ŋged mbó ntséʼé zé, wɛ́ ntsɛɛpɔŋ yé tíí wé ne tɛdfaʼ ghaŋáfaʼ pɛ́ pɔ́b ndáb yé nɛ́ ŋgâ a fɛ́ mɔ́b ne pɔ́b ŋkhoʼyɛ́ a zɔŋɔ nɛ́? 46Tɛdfaʼ wɛ́, ntsɛɛpɔŋ ghɛ́ ŋkhu, a tsé faʼa faʼ yéré nɛ́, mbéne sʉ́ʼʉ pwó yé! 47Kpaʼ sísíŋ mə ntsɔ́ ne puŋ ŋgâ a ntíí wé ndúŋú ŋkɔŋɔ foʼ yé náá, a tsé ndiŋɛ́. 48Ntsʉʼmbé a pɛ́ɛ́ yɛ́ a tɛdfaʼ kəpɔŋ, ntsɔ́ ndzó ndzɔʼ ye ŋgâ: “Ntsɛɛpɔŋ ya kyáŋa kyáŋá”, 49mvɔ́ tó pɛkpee pé tsé gbíí, ndzɔ̂ mbó nɔ́ pwɛ pɛ mbɛ́ɛ́yoʼ nɛ́, 50mbǒ Ntsɛɛpɔŋ yé náʼá ŋkhú zhyémve yɛ́ a zé nɛ́ pó pwɛ ŋkhoʼyɛ́ a tsé mbé ndzwəʼɛ nɛ́ pó. 51Ndzú wé, ŋgyɛ́ ne ye njʉ́ pé ndɛ ŋgyɛ́ ne pépwɔmíí nɛ́. Yóʼó a ŋkhɔ pfɔ́rɔ́ sɔŋ mé.»
ទើបបានជ្រើសរើសហើយ៖
Matʉyo 24: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
