Matʉyo 18
18
A wɔ̌ mbé ŋɔŋ kəkwéʼe ndzó Nofɔŋ Mboʼmve?
(Máá 9:33-37; Lúk 9:46-48)
1A kɛ pe ŋkhoʼyéré, ŋgíŋgye Yěsô suʼú mbəb yɔ́b fɛ́ pfuŋ yé, mvirɛ́ wé ŋgâ: «A kɛ́ʼɛ́ ntsɛ́ɛ́ wɔ́ ntsɛ́ɛ́ ŋkɔŋɔ pɔŋ náá ndzó Nofɔŋ Mboʼmvé?» 2A fú taʼ Mɔ́ŋ ntíí tsetsɛrɛ pɔ́b, 3ntsó ŋgâ: «Kpaʼ sísíŋ, mə səŋɛ wúŋ! A pɛ́ɛ́ yɛ́ puŋ sěd tsʉʼɔ́ njʉ́ pɛ Mɔ́ŋ nɛ́ pó, ŋgáŋ yɛ́, mbǒ puŋ náʼá ŋkúŋɔ ndzó Nofɔŋ Mboʼmvé pó. 4Ŋɔŋ wɛ́ nɛ́ a yɔ̌ mbəb ye njʉ́ Mɔ́ŋ wɔŋ nɛ́, mbǒ a ntsɛ́ɛ́ ye ntsɛ́ɛ́ ŋkɔŋɔ pɔŋ náá ndzó Nofɔŋ Mboʼmvé. 5Ŋɔŋ wɛ́ a ghəhɛ́ taʼ Mɔ́ŋ njʉ́ wɔŋ nɛ́ sʉ́ʼʉ ne tíí ya nɛ́, mbǒ a ghəhɛ́ páá sʉ́ʼʉ.»
Ndɛ mbé ŋkɔ́ʼyɛɛ shaŋa
(Máá 9:42-48; Lúk 17:1-2)
6Yěsô kémbó ntsó ŋgâ: «Ntsʉʼmbé, a zhyɛ́ ŋɔŋ taʼ Mɔ́ŋ ndzɔ́ʼɔ́ pɔ́ŋ pɔŋ pɛ pɔ́b tséʼé psyɛ́ndzɔʼ ŋkyé ya nɛ́, sháŋa, a kuʼɛ́ pwó ye ŋgâ pe cʉ́ ghɔ́ɔ́ kəkwéʼe myi ye, máʼ wé ndzó sə́b yɛ́ ndzó lepaanse nɛ́. 7Ndɔŋ tó mvémvé! Pɔ́b pɛ́ pɔ́b zhyɛ́ pɔŋ shaŋa zááme nɛ́! Ɔ́ŋɔ́, a sísíŋ ŋgâ shǎŋane náʼá ke mbɛ́ɛ́ pé, ntsʉʼmbé ndɔŋ tó ŋɔŋ wɛ́ shǎŋane ndzáʼa mbəb ye mbáŋa nɛ́. 8A pɛ́ɛ́ yɛ́ a zhyɛ́ pwó wo kii kpee wo ŋgâ wo sháŋa nɛ́, ntséé wɔ́b, máʼ taŋa sesɛ. A kuʼɛ pwó wo ne ŋkúŋne ndzó tsómvé ne taʼ pwó kii tʉʼekpee ntsɛ́ɛ́ yɛ́ wo ŋkúŋɔ ndzó píí mɔ́ɔ́ yɛ́ a náʼá mbwó nɛ́ pó, ne mbwó membáá kii ne kpee membáá nɛ́! 9A pɛ́ɛ́ yɛ́, a zhyɛ́ mbzítíí wo ŋgâ wo sháŋa nɛ́, fiʼɛ túbú máʼ taŋa sesɛ. A kuʼɛ pwó wo ne ŋkúŋne ndzó Nofɔŋ Mboʼmvé, páŋantíí, ntsɛ́ɛ́ yɛ́ pe máʼá wo ndzó píí mɔ́ɔ́ yɛ́ a náʼá mbwó nɛ́ pó, ne míí mó membáá nɛ́.»
Fuʼno mbəb mɔ́ŋmvó wɛ́ a kɛ pwó nɛ́
(Lúk 15:1-7)
10Yěsô ké mbó ntsó ŋgâ: «Puŋ zhyaŋa ne ncóʼne taʼ Mɔ́ŋ ndzɔ́ʼɔ́ pɔ́ŋ pɔŋ, ŋkyé ŋgâ mə səŋɛ wúŋ, a pépéé pɛ aŋgere pɔ́b ke ntsɛ́ síŋ Tɛd ya, pe kii fúrú. [ 11Mɔ́ŋ ŋɔŋ kɛ kʉ́yó ne ntáʼne mbó kpéé pɔŋ pɛ́ pɔ́b kɛ pwó nɛ́.] 12Puŋ zhʉ́ yúŋ pé níŋ? A pɛ́ɛ́ yɛ́ taʼ ŋɔŋ tséʼé kpǐ njʉyǐnjʉyî, taʼ yé pwó nɛ́. Mbǒ a ntê ghúbmepfuʼɔ ne yipfuʼɔ ghúŋkwéʼé, ŋgú ne ntáʼne taʼ yé wɛ́ a pwó nɛ́ pɔɔ? 13A pɛ́ɛ́ yɛ́ a zhʉ́ wé nɛ́, kpaʼ sísíŋ mə səŋɛ wúŋ ŋgâ, mbǒ a ntsɛ́ʼɛ́ ndebéne kaʼatɛ ŋkyé wé kaʼatɛ ntsɛ́ɛ́ ndebéne mɛ́ a ntséʼé ŋkyé ghúbmepfuʼɔ ne yipfuʼɔ pɛ́ pɔ́b pwó nɛ́ pó. 14Kɛ́ʼɛ́, Tɛd wúŋ wɛ́ a pépéé nɛ́ tsé mbé zɔŋɔ ŋgâ taʼ Mɔ́ŋ ndzɔ́ʼɔ́ pɔ́ŋ pékénɛ́ pwó pó.»
Ŋkhoʼyɛ́ mɔ́ŋmɛ́ yo vɔ̌no nɛ́
15Yěsô ké mbó ntsó ŋgâ: «A pɛ́ɛ́ yɛ́ mɔ́ŋmɛ́ wo zhyɛ́ no kəpɔŋ nɛ́, wo ghú mbɛ́rɛ́ wé, puŋ ye nsé, ndaʼ puŋ ye pépáá, wo tsɔ́ pwó yé. A pɛ́ɛ́ yɛ́ a zóʼ wo nɛ́, mbǒ wo kpéé wé nɛ́. 16A pɛ́ɛ́ yɛ́ a zóʼ wo nɛ́ pó, wo yɔ́ɔ́ taʼ ŋɔŋ kii pɔŋ pépáá kɛ́ʼɛ́ ŋgâ pe ghɛ́ njʉ̌yí sáʼá, ndzóʼ nsó pɔŋ pépáá kii pekyéd. 17A pɛ́ɛ́ yɛ́ a ke kirɛ kírɛ ne ndzóʼne wɔ́b nɛ́, wo tsɔ́ Ndáméted, Mbéyɛ́ a ke mbé zóʼ nɛ́ pó, wo tsʉ́ʼ ŋkhoʼyɔŋ ndiŋɛ́ wé pe njʉ́ taʼ kiizɛ́mboʼmvé nɛ́, kii ŋgâ taʼ ŋgaŋakpêsebe nɛ́. 18Kpaʼ sísíŋ mə səŋɛ wúŋ ŋgâ, ŋkɔŋɔ yɔ́b yɛ́ puŋ ŋkʉ́yó nʉ́ʉ́ ndúŋ tsetsáʼ náá nɛ́, ke ŋkʉ́yó mbɛ nʉ̌me pépéé, ŋkɔŋɔ yɔ́b yɛ́ puŋ ŋkʉ́yó ntsɔ́ʼɔ́ ndúŋú tsetsáʼ náá nɛ́, ke ŋkʉ́yó mbɛ ntsɔ́ʼme pépéé.»
Yěsô tsetsɛrɛ pɔŋ pɛ́ pɔ́b tɛrɛ́ ne tíí ye nɛ́
19Yěsô ké mbó ntsó ŋgâ: «Kpaʼ sísíŋ, mə sə́ŋɛ́ wúŋ ŋkʉ́rʉ́ ŋgâ: a pɛ́ɛ́ yɛ́ pɔŋ pépáá ndzɔ́ʼɔ́ puŋ ndúŋú tsetsáʼ, ntséʼé taʼ ntswee ne ndɔ́ŋne mbɛ́ kɔ́ nɛ́, mbǒ Tɛd ya wɛ́ a pépéé nɛ́ náʼá fɛ́ ne pɔ́b. 20Ŋkyé ŋgâ, ywoʼ yɛ́ pɔŋ pépáá kii pékyéd tɛ́rɛ ne tíí ya nɛ́, mə tsetsɛrɛ pɔ́b.»
Máʼá vɔ̌no tsetsɛrɛ pɔ́ŋmɛ́
(Lúk 17:4)
21Njʉ́ a kɛ pénéré nɛ́, Pětro suʼú mbəb ye fɛ́ pfúŋɔ́ Yěsô psirɛ wé ŋgâ: «Ntsɛɛpɔŋ, ŋkhoʼyɛ́ mɔ́ŋmɛ́ ya vɔ̌no mbəb mo nɛ́, mə ntsɛ́ʼɛ́ ne mǎʼne vɔ̌no ye ŋkɛɛ yíkɔ́? Kaʼatɛ mbáŋ ŋkɛɛ yísambáá?» 22Yěsô pɔrɔ́ pwó ye ŋgâ: «Mə ntsɔ́ pwó wo pé ŋgâ ŋkɛɛ yísambáá pó, ntsʉʼmbé kaʼatɛ mbáŋ ŋkɛɛ ghúbmesambáá ŋkɛɛ yísambáá.»
Fuʼno ndúŋú tsaa ghəghəŋ
23Yěsô ké mbó ntsó ŋgâ: «A ke mbé nɛ́ njʉ́ Nofɔŋ Mboʼmvé pépéé ghú nɛ́. A fwɛ́ɛ́ taʼ fɔŋ wɛ́ a kɛ fú ghaŋáfaʼ pé ŋgâ pú pɔ́b sí mɔ́b pé pɛ́ a ne pɔ́b nɛ́. 24Sɔ́ ŋɔŋ wɛ́ pé kɛ zyé mbəb ye nɛ́, ghɛ̌ nuʼɔ́ mbób pwó ye a fáá milyɔŋ ntsɔ́btaŋ. 25Njʉ́ a kɛ pe tséʼé yɔ́b yɛ́ a núʼɔ́ núŋ nɛ́ pó, ntsɛɛpɔŋ nyaŋá ŋgâ pe fí wé pú ŋgʉyé nné pɛ Mɔ́ŋ pwɛ ŋkɔŋɔ yɔ́b yɛ́ a tséʼé náá nɛ́ nuʼú kɛɛ ye núŋ. 26Néré ŋgaŋafaʼ wéré vɔ ne kpee ntsɛɛpɔŋ, ntsɔ́ pwó ye ne tsaa ŋkəbe ŋgâ: “Náʼá ndzéʼ ya, mə nuʼɔ́ ŋkɔŋɔ ye náá.” 27Ntsɛɛpɔŋ ŋgaŋafaʼ wéré tsaa ghəghəŋ, sebe kɛɛ ye, ntéé wé a ghú. 28Ŋgaŋáfaʼ wéré ghɛ́ ntwɔ́ pu taʼ ŋɔŋ ndzɔ́ʼɔ́ pɛkpee pé séré, wɛ́ a kɛ tséʼé kpǐ tɔ́ɔ́se yípáá ne ghúbmetáŋ ne nuʼúne pwó ye nɛ́. A tswɛ́ɛ wé ne táb ye, nɔ́d kaʼatɛ a ghɛ́ ke pfó pfo, ntsɔ́ pwó yé ŋgâ: “Nuʼú yɔ́b yɛ́ wo tsɛʼɛ ne fɛ́ne ne mo nɛ́.” 29Ŋgaŋakpee ye wéré vɔ́ ne kpee mé, mbóʼmbwó pwó ye, ntsɔ́ ŋgâ: “Náʼá ndzéʼ ya, mə nuʼɔ́.” 30Ntsʉʼmbé a kiri, mbó ŋgú ŋgyɛ́ pe gbáá wé máʼá ndátsáŋ mvíí ndúŋú, ŋgɛ ntsé ndzwəʼɛ ŋgâ a náʼá nuʼú kɛɛ ye. 31Ŋkhoʼyɛ́ pecyó pɛkpee pɔ́b kɛ zhʉ́ no yɛ́ a kɛ záʼ nɛ́, pɔ́b ntsuŋi kaʼatɛ, ŋgú səŋɛ ntsɛɛpɔŋ wɔ́b ne ŋkɔŋɔ no yɛ́ a kɛ záʼ náá nɛ́. 32Néré, ntsɛɛpɔŋ zhyɛ́ a kʉ́yó pfuŋ ye, a tsɔ́ pwó ye ŋgâ: “Ŋgaŋáfaʼ kəpɔŋ, mə kɛ sebé ŋkɔŋɔ kɛɛ wo náá ŋkyé ŋgâ wo kɛ póʼmbwó ne mo. 33Tómbəb wo, a ghɛ́ tɛɛmbɛ wo pe tsaa yo ghəghəŋ ŋgaŋakpee wo, njʉ́ mə ke tsaa yo ghəghəŋ nɛ́ pɔɔ?” 34Ndzɔ́ʼɔ́ pʉ̌ŋgye ye, ntsɛɛpɔŋ fɛ́ wé ndzó ywoʼ yɛ́ pɔŋ faʼa, pe po záá wɔ́b ne ŋgəʼo nɛ́, ŋgɛ ntsé ndzwəʼɛ ŋgâ a nuʼú ŋkɔŋɔ kɛɛ ye náá. 35A ke mbé nɛ́ njʉ́ Tɛd ya wɛ́ a pépéé nɛ́, náʼá fáʼa ne puŋ, Mbéyɛ́ ŋɔŋ ndzɔ́ʼɔ́ puŋ máʼ vɔ̌no mɔ́ŋmɛ́ ye ne ŋkɔŋɔ ndzɔʼ ye náá nɛ́ pó.»
ទើបបានជ្រើសរើសហើយ៖
Matʉyo 18: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
