Matʉyo 13
13
Fuʼmeno ndúŋú Nofɔŋ Mboʼmve
(Máá 4:1; Lúk 8:4)
1A kɛ pé zhyémve yéré, Yěsô twɔ́ ndáb, ŋgú, ŋgɔ́rɔ́ ne gháá nse. 2Pɔŋ zááme tɛ́rɛ́ pfuŋ yé kaʼatɛ a kɔ́ʼɔ́ ndzó taʼ páŋ ŋgód. Ŋkɔŋɔ pɔŋ náá tsɛ́ ne gháá nse.
Fuʼno ndúŋú mvěmɔ́b
(Máá 4:2-9; Lúk 8:5-8)
3A ntsó meno zááme ne pɔ́b ne fuʼno ŋgâ: «Taʼ ŋgaŋapfɛ́mɔ́b kɛ twɔ́ ne mǎʼne mvěmɔ́b. 4Njʉ́ a kɛ máʼá nɛ́, pecyó míí mé pfed ŋgú ne gháá mɛndɔ́b. Péshʉŋ kʉ́yó tsóó náá. 5Pecyó míí mé pfed ŋgú ndzɔ́ʼɔ́ pɛ méŋkáb ŋgɔʼ, kii mbəbə tsetsáʼ. Fɛ́d sáʼ, ŋkyé ŋgâ tsetsáʼ kɛ záá pó. 6Ŋkhoʼyɛ́ ménab kɛ tɛ́ ne tʉ̌ŋ nɛ́, a zwɔ, njʉ́ a kɛ pe tséʼé mbɔŋ ŋaŋ mé nɛ́ pó, a kpíí. 7Pecyó pférɛ ndzɔ́ʼɔ́ mɛ́kɔb. Mɛ́kɔb ghóʼ fóó wɔ́b. 8Pecyó pférɛ ndúŋú tsetsáʼ sʉ́ʼʉ, ndzwɔ́ ntáá sʉ́ʼʉ. Taʼ tsoʼ fɛ́ kpǐ, cyó fɛ́ ghúbmétóó, cyó fɛ́ ghúbmekyéd. 9Ŋɔŋ wɛ́ a tséʼé ntəŋé zóʼó no nɛ́ a zóʼ!»
A zhyɛ́ kɔ́ Yěsô máʼá pɛ fuʼno?
(Máá 4:10-12; Lúk 8:9-10)
10Ŋgíŋgye Yěsô suʼú mbəb yɔ́b mbɛ́rɛ́ wé, mvirɛ́ wé ŋgâ: «A zhyɛ́ kɔ́ wo tsɔ́ no ne pɔ́b pé ne pɛ fuʼno?» 11A pɔrɔ́ ne pɔ́b ŋgâ: «ŋkyé ŋgâ a ne puŋ, Mboʼmvé zhyɛ́ ŋgâ puŋ zé meno ywʉ̂me pɛ́ ne Nofɔŋ yé nɛ́. Ŋgɛ ŋkhú ne pɔŋ pékénɛ́, yéré pó mbe pɛ́ ne pɔ́b pó. 12Ŋkyé ŋgâ ŋɔŋ wɛ́ a tséʼé nɛ́, pe náʼá fɛ́ pwó yé, a tséʼé a záá kaʼatɛ. Ntsʉʼmbé ŋɔŋ wɛ́ a tséʼé nɛ́ pó, yɛ́ a tséʼé nɛ́, pe kpéé. 13Yɔŋ yɔ́b yɛ́ a zhyɛ́ mə mbɛrɛ ntsɔ́ no ne pɔ́b máʼá fuʼno nɛ́, kɛ́ʼɛ́ ŋgâ pɔ́b ntiŋɛ́ mbé zhʉ́ pó, ndzóʼó mbé zóʼó pó, kii pó tsé ndzɛ́. 14Kɛ́ʼɛ́, tó no yɛ́ ŋgaŋátsɔ́ kpaŋató Mboʼmvé Ezaya kɛ ntsó, ŋkyé wɔ́b nɛ́, yúŋú. No yéré pɛ́ɛ́ ŋgâ:
“Puŋ kʉ́yé ndzwəʼɛ́ kaʼatɛ náʼá mbé zóʼ pó
Puŋ kʉ́yé ndiŋɛ́ kaʼatɛ náʼá mbé zhʉ́ pó.
15Ŋkyé ŋgâ ndzɔʼ pɔŋ pɔŋ shʉ̌,
Ntəŋé mɔ́b pó kpǐ,
Pɔ́b pwɔ̌ míí mɔ́b,
Yânéré ŋgâ pɔ́b ndɛ njʉ́ ne míí mɔ́b,
Kii pó ndzwəʼé ne ntəŋé mɔ́b,
Kii pó ndzóʼ ne ndzɔʼ yɔ́b
Kɛ́ʼɛ́ ŋgâ pɔ́b ndɛ sed mbzye yɔ́b.
Mbǒ mə kɛ pɛ́d ghɔŋ yɔ́b!”
16Ntsʉ́ʼmbɛ ne puŋ, mbéne sʉ́ʼʉ ne puŋ, ŋkyé ŋgâ míí múŋ tsé njʉ́ ywoʼ, ntəŋé múŋ pó tsé ndzóʼó. 17Kpaʼ sísíŋ, mə ntsɔ́ ne puŋ, ghaŋátsɔ́kpaŋató Mboʼmvé zááme pwɛ pɔŋ puŋgerɛ́ŋged zááme, kɛ kʉyě ne njʉ́ne meno pɛ́ puŋ zhʉ́ nɛ́, mbé zhʉ́ pó, ne ndzóʼne meno pɛ́ puŋ zoʼo nɛ́, mbé zóʼ pó.»
Keʼe tsi fuʼno mvěmɔ́b
(Máá 4:13-20; Lúk 8:11-15)
18Yěsô ntsó ŋgâ: «Ŋgɛ ŋkú ne puŋ, puŋ zóʼ kéétsi fuʼno mvěmɔ́b. 19Ŋkhoʼyɛ́ ŋɔŋ zóʼ ntsó Nofɔŋ Mboʼmvé mbé zé nɛ́ pó, mbǒ ŋgyɛ̌no kəpɔŋ kʉ́yó nɛ́, ndɔ́ɔ́ yɔ́b yɛ́ pe pfɛ̌ ndzó ndzɔʼ ye nɛ́. Ŋkhoʼyɛ́ a pé kɛ́ʼɛ́ nɛ́, a pɛ́ɛ́ njʉ́ mvěmɔ́b pɛ́ a pfɛrɛ́ ne gháá mɛndɔ́b nɛ́. 20Yɛ́ pé kɛ pfɛ́ ndzɔ́ʼɔ́ pɛ méŋkáb ŋgɔʼ nɛ́, a ŋgaŋáŋɔŋ wɛ́ a zóʼ Nsó Mboʼmve, mbzyɛ ŋkhoʼyéré ne ndebéne nɛ́. 21Ntsʉʼmbé nyí nsó Mboʼmve wéré pé yɛ́rɛ́ ndzó ndzɔʼ ye pó, a ke mbɛ́ɛ́ mɔ́ɔ́ záŋ. Ŋgəʼo kii tsɛ̌no ke ŋgɛ ŋkúŋɔ́ wé ŋkyé Nsó Mboʼmve, a vô. 22Yɛ́ pe pfɛ́ ndzɔ́ʼɔ́ mɛ́kɔb nɛ́, a ŋgaŋáŋɔŋ wɛ́ a zóʼ Nsó Mboʼmve, ntsʉʼmbé pɛ kpaŋató ndúŋú mɔ́b mvé pwɛ shʉyɛ̌ne yɛ́ foʼ mvémvé shʉyɛ́ pɔŋ nuŋ nɛ́, naŋ ŋgâ Nsó Mboʼmve ndɛ ntséʼé ghebe ndzó tsómvé yé. 23Yɛ́ pe pfɛ́ ndzó ywoʼ sʉ́ʼʉ nɛ́, a ŋgaŋáŋɔŋ wɛ́ a ndzwəʼé Nsó Mboʼmve, ndzóʼ nɛ́. Tsómvé ye mbɛ́ɛ́ njʉ́ mvěmɔ́b pɛ́ pé máʼ, taʼ ndíí fɛ́ kpǐ, cyó fɛ́ ghúbmétóó, cyó fɛ́ ghúbmekyéd nɛ́.»
Fuʼno ndúŋú ŋgəsáŋ pú ŋgə̌sáŋ
24Yěsô pó máʼ taʼ fuʼno ne pɔ́b ŋgâ: «Nofɔŋ Mboʼmve pépéé pɛ́ɛ́ njʉ́ taʼ ŋɔŋ wɛ́ a pfé ŋgə́sáŋ ndzó faʼ ye nɛ́. 25Ŋkhoʼyɛ́ pé kɛ zhyé náá nɛ́, ŋgaŋakəpeŋe ye ŋkʉyó ntəbe, mvě ŋgə̌sáŋ ndzɔ́ʼɔ́ mɔ́b pé, ŋgú yé. 26Ŋkhoʼyɛ́ ŋgəsáŋ kɛ sáʼ, ŋgóʼ, tóó tsoʼ pé nɛ́, ŋgə̌sáŋ ke mbó tóó yé. 27Ghaŋáfaʼ ŋgaŋa ywoʼ wéré ghú, ntsɔ́ pwó ye ŋgâ: “Ntsɛɛpɔŋ, ŋgâ wo kɛ pfɛ̌ ŋgəsáŋ ndzó faʼ wo? Tɛ ŋgə̌sáŋ pó twɔ́ pɛ́ɛ́ ndzɔ́ʼɔ́?” 28A pɔrɔ́ ne pɔ́b ŋgâ: “A zhyɛ́ taʼ ŋgaŋakəpeŋe kɛ́ʼɛ́.” Ghaŋáfaʼ tsɔ́ pwó ye ŋgâ: “Njʉ́ a kɛ́ʼɛ́ nɛ́, wo psyɛ́ ŋgâ psi ghú sɔ́ʼɔ?” 29Ŋgaŋa ywoʼ gháá: “Ɔ̂ŋɔ́ŋɔ, tɛɛmbɛ puŋ ghɛ́ sɔ́ʼɔ ŋgə̌sáŋ, ké mbó sɔ́ʼɔ ŋgəsáŋ sɔ́ʼɔ. 30Puŋ tee, pɔ́b kpáʼ náá ŋgóʼ kaʼatɛ mbáŋ zhyémve kába mɔ́b. Zhyémve yéré, mə nyaŋá ghaŋákába mɔ́b péé kpáá ŋgə̌sáŋ, ŋkwód kaʼ pé ne ntɔ̌ŋne ne mɔ́ɔ́. Ŋgɛ ŋkhú ne ŋgəsáŋ, pɔ́b káb, nuŋɔ ndzó ntaŋ ya.”»
Fuʼno ndúŋú míí mbɛrɛ̂tɛ́
(Máá 4:30-32; Lúk 13:18-19)
31Yěsô ke mbó máʼ taʼ fuʼno ŋgâ: «Nofɔŋ Mboʼmvé fwɛ́ɛ́ míí mbɛrɛ̂tɛ́ mɛ́, taʼ ŋɔŋ yɔ́ɔ́ máʼá faʼ yé nɛ́. 32A mvěmɔ́b pɛ́ a ŋkhóó ntsɛ́ɛ́ ŋkɔŋɔ pɛ mvěmɔ́b náá nɛ́. Ntsʉʼmbé, ŋkhoʼyɛ́ a sáʼ nɛ́, a ntsɛ́ɛ́ ŋkɔŋɔ pɛ tsí mɔ́b pɛ́ pé faʼa náá nɛ́, ntâmbwó mé ghɛ́ɛ́ kaʼatɛ péshʉŋ kʉ́yó ŋkwórɔ yáʼ mɔ́b ndúŋú.»
Fuʼno ndúŋú mvuʼ
(Lúk 13:20-21)
33Yěsô ke mbó máʼ cyó fuʼno ne pɔ́b ŋgâ: «Nofɔŋ Mboʼmvé pépéé fwɛ́ɛ́ mvuʼ yɛ́ taʼ Məŋgʉ́yé yɔ́ɔ́ niŋi ndzɔ́ʼɔ́ kílo ŋgəŋ pepe ghúbmebáá ne yítaŋ, ntɔ́b ŋkɔŋɔ ye náá kɔʼ nɛ́.»
Yěsô máʼá pɛ fuʼno ŋkyé kɔ́
(Máá 4:33-34)
34Ŋkɔŋɔ meno péré náá, Yěsô ke ntsɔ̂ pwó pɔŋ pé ne fuʼno. A kɛ pé tsɔ́ cyó no ne pɔ́b kii máʼá fuʼno pó, 35kɛ́ʼɛ́ ŋgâ tó no yɛ́ ŋgaŋatsɔ́kpaŋató Mboʼmvé kɛ ntsó nɛ́, yúŋú. No yéré kɛ pɛ́ɛ́ ŋgâ:
«Mə náʼá ŋáʼá ntswee ya máʼá pɛ fuʼno,
Mə náʼá ncʉrɛ́ meno pɛ́ pé kɛ ywʉ féré njʉ́ Mboʼmvé kɛ póʼ mvé nɛ́.»
Kéʼé tsí fuʼno ŋgəsáŋ pú ŋgə̌saŋ
36Néré, Yěsô tee pɔŋ, ŋgú ndáb pwɛ ŋgíŋgye pé. Pɔ́b suʼú mbəb yɔ́b fɛ́ pfuŋ ye, ntsɔ́ pwó ye ŋgâ: «Kéʼé tsí fuʼno ŋgə̌sáŋ ndzó faʼ né psi.» 37Yěsô tsɔ́ ne pɔ́b ŋgâ: «Ŋgaŋaŋɔŋ wɛ́ a pfé mvěmɔ́b sʉ́ʼʉ nɛ́, a Mɔ́ŋ ŋɔŋ. 38Faʼ pé mvé. Mvěmɔ́b sʉ́ʼʉ pe pɔ́ŋ pɛ́ pɔ́b ndzó Nofɔŋ Mboʼmvé nɛ́. Ŋgə̌sáŋ pé pú ŋgyɛ̌no kəpɔŋ. 39Ŋgaŋakəpeŋe wɛ́ a pfé ŋgə̌sáŋ nɛ́ pe Sátaŋ, saŋywoʼ. Zhyémve kába mɔ́b pe njʉyǐnjʉyî zhyémve. Ghaŋákába mɔ́b pe pɛ aŋgere. 40Njʉ́ pé ndɛ sɔ̌ʼ ŋgə̌sáŋ ne ntɔ̌ŋne ndzɔ́ʼɔ́ mɔ́ɔ́ nɛ́, a náʼá ke mbɛ́ɛ́ néré ne njʉyǐnjʉyî zhyémve. 41Mɔ́ŋ ŋɔŋ náʼá twɔ́ pɛ aŋgere pé, pɔ́b gbáá pɔŋ pɛ́ pɔ́b zhyɛ́ ŋgâ pɔŋ sháŋa, pwɛ pɔŋ pɛ pɔ́b zhyɛ́ pɛ meno kəpɔŋ nɛ́, ntúbɔ́ wɔ́b ne Nofɔŋ ye, 42mbó máʼá wɔ́b ndzó píí mɔ́ɔ́ kəkwéʼe, ywoʼ yɛ́ pé ŋkhɔ́ pfɔrɔ sɔŋ nɛ́. 43Néré, puŋgerɛ́ŋged siŋ Mboʼmve nyʉ́yí nyʉ́yí njʉ́ ménab nɛ́ ndzó Nofɔŋ Tɛd wɔ́b. Ŋɔŋ wɛ́ a tséʼé ntəŋé zóʼó no nɛ́, a zóʼ.»
Fuʼno ndúŋú foʼ ywʉ̂me
44«Nofɔŋ Mboʼmvé pépéé fwɛ́ɛ́ taʼ foʼ yɛ́ pe kɛ ywʉ́ ndzó taʼ faʼ, taʼ ŋɔŋ zhʉ́ nɛ́. Ŋɔŋ wéré ke mbó ŋgʉ́ yé ywʉ́ ŋkʉ́rʉ́. Mbɛ ndzɔ́ʼɔ́ ndebéne mé, a ghú fí ŋkɔŋɔ mɔ́b pe náá ndzúŋ faʼ yéré núŋ. 45Nofɔŋ Mboʼmve pépéé ké mbó fwɛ́ɛ́ taʼ mbéʼétáŋ wɛ́ a tsé ntaʼa mwɔ́məsəb pe tʉŋɔndɔŋ nɛ́. 46Ŋkhoʼyɛ́ a kɛ zhʉ́ taʼ ye yé tʉŋɔndɔŋ nɛ́, a ghú fí ŋkɔŋɔ mɔ́b pɛ́ a kɛ tséʼé náá nɛ́, ndzúŋ núŋ.»
Fuʼno ndúŋú mbúndzáá
47«Nofɔŋ Mboʼmvé pépéé ké mbó fwɛ́ɛ́ taʼ mbúndzáá yɛ́ pe máʼá nse, a ghóó ŋkɔŋɔ mbziʼe ssó náá nɛ́. 48Ŋkhoʼyɛ́ a yúŋ nɛ́, pé sú fɛ́ ne gháánse, ŋgɔrɔ́ syé, ntúbú pé sʉ́ʼʉ niŋi ndzó kékáʼá mbó ntubú pɛ a tséʼé ghebe nɛ́ pó, máʼ. 49A náʼá ke mbɛ́ɛ́ néré ne njʉyǐnjʉyî zhyémve. Pɛ aŋgere náʼá ŋkʉ́yó ŋkhirɛ́ pukəpɔŋ ndzɔ́ʼɔ́ pusʉ́ʼʉ, 50ndɔ́ɔ́ pukəpɔŋ máʼá ndzó píí mɔ́ɔ́ kəkwéʼe. Ywoʼ yɛ́ pé ŋkhɔ́, pfɔ́rɔ sɔŋ nɛ́.»
Kúrɔtó ntsó
51Yěsô pó ntsó ŋgâ: «Puŋ zóʼ ŋkɔŋɔ ntsó wɔŋ náá?» Pɔ́b pɔrɔ́ pwó ye ŋgâ: «Ɔ́ŋɔ́» 52Yěsô pó ntsɔ́ ne pɔ́b ŋgâ: «Néré kɛ́ʼɛ́ ntsye ŋgaŋákeʼekaŋ wɛ́ a zéʼ Nofɔŋ Mboʼmvé ndzé nɛ́, fwɛ́ɛ́ ŋgaŋaywoʼ wɛ́ a ghú ndzɔ́ʼɔ́ foʼ yé, ndzɛ́ yɔ́b zuŋ mbó ndzɛ́ ye ffé nɛ́.»
Mbé yaʼ Nǎzarɛd sirɛ́ Yěsô
(Máá 6:1-6; Lúk 4:16-24)
53Ŋkhoʼyɛ́ Yěsô kɛ mě pɛ fuʼno péré nɛ́, a ŋǎ yóʼó. 54Njʉ́ a kɛ paŋá ndzó ywoʼ yɛ́ a kɛ ghóʼ nɛ́, a ghú ndántéré pɔ́b, ndzyě ne ntʉ́ʉ́ne pɔŋ. No muʼɔ wɔ́b kaʼatɛ ne mbziʼe yɛ́ a kɛ fɛ́ yé ntʉ́ʉ́ nɛ́, pɔ́b gháá: «Yɔŋ zé twɔ́ pɛ́ɛ́ pwó ye, pwɛ pɔŋ shʉrɛ́meno? 55Ŋgâ a Mɔ́ŋ ŋkaamedáb? Mɛ́ ye pé pe Malya pɔɔ? Pɔ́ŋmɛ pé po pé Zhakə, Yesə́b, Símo ne Zhʉʉde pɔɔ? 56Pɔ́ŋmɛ pé pé pěŋgyé pé pɛ tsetsɛrɛ piŋi pɔɔ? Pé ké nɛ́ meno twɔ́ pɛ́ɛ́ pwó ye?» 57A kɛ pé néré tsetsɛrɛ pɔ́b, pɔ́b pé psyɛ́ ndzóʼó no yɛ́ a kɛ tsɔ̂ nɛ́ pó. Néré Yěsô tsɔ́ ne pɔ́b ŋgâ: «A ke mbɛɛ ndaʼ ndzó ndǎ ndáb ŋgaŋatsɔ́kpaŋató Mboʼmvé pwɛ ŋgɔŋ ye yɛ́, pɔŋ ndɛ mbé ghuʼɔ́ we nɛ́ pó!» 58Néré yóʼó, Yěsô pe zhyɛ́ pɛ meno shʉyédme zááme pó, ŋkyé ŋgâ pɔ́b kɛ zɛ̌zɛ̂.
ទើបបានជ្រើសរើសហើយ៖
Matʉyo 13: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
