Lúkaasə 5
5
Yěsô fú sɔ́ ŋgíŋgye pé
(Mat 4:18-22; Máá 1:16-20; Zhâ 21:1-11)
1A kɛ pé taʼ zhyémvé mve, Yěsô tsɛ́ ne gháánse tsɛ́muŋɛ́ yɛ́ pé fú ne Zhenezarɛd nɛ́. Mvuʼɔ́ pɔŋ kʉ́yó tsé ndzóʼó nsó Mboʼmvé, ndzáá kaʼatɛ fɛ́rɛ́ wé ffé d. 2Yěsô zhʉ́ páŋ yípáá ne gháánse. Mbǒ ghaŋá gbáá ssó kɛ twɔ́ tsé sóʼ mbúndzáá pɔ́b. 3Yěsô kɔʼ ndzó cyó páŋ yéré yɛ́ a kɛ pe yé Símo nɛ́, ntsɔ́ pwó yé ŋgâ: «Naʼ suʼú páŋ ne gháánse.» A ghɔ́rɔ́ ndzó páŋ ndzyě fɛ́ne ntʉ́ʉ́ pwó mvuʼ pɔŋ. 4Ŋkhoʼyɛ́ a kɛ mee nɛ́, a ntsɔ́ pwó Símo ŋgâ: «Pó suʼú páŋ fɛ́ ndzó ywoʼ yɛ́ nse sə̌ nɛ́, puŋ zóó mbúndzáá.» 5Símo pɔ́rɔ́ pwó yé ŋgâ: «Tɛd ya, psi zhʉ́ ŋgəʼo netsúʼ wɔŋ tɛ kii ŋgbǎ ndíí ssó. Ntsʉʼmbé, njʉ́ wo nsó nɛ́, mə mbó ndzóó mbúndzáá ŋkʉ́rʉ́.» 6Pɔ́b zóó mbúndzáá pɔ́b, ŋgbáá ssó kaʼatɛ mbúndzáá zɔŋɔ sɛ́ɛ́. 7Pɔ́b máʼ tswée pwó pɛkpee pɔ́b ndzó cyó páŋ ŋgâ pɔ́b kʉ́yó ŋgébɛ wɔ́b. Pɔ́b kʉ́yó pú pɔ́b kaa náá túbú ssó, páŋ yípáá yúŋ tɛ nzɔŋɔ nɔ́ɔ́ nse. 8Ŋkhoʼyɛ́ Símo Pětro kɛ zhʉ́ yéré no nɛ́, a vɔ ne mkpee Yěsô, nsó ŋgâ: «Ntsɛ́ɛ́pɔŋ, suʼú mbəb wo pfúŋɔ́ mo, ŋkyé ŋgâ mə mvɔ̌no.» 9Ŋkyé ŋgâ Símo pwɛ ŋkɔŋɔ pɛkpee pé náá, kɛ tséʼé pɔ́ɔ́ ŋkyé fuʼ ssó yɛ́ pɔ́b kɛ gbáá nɛ́. 10Pɔ́ɔ́ yéré kɛ ké ŋgbáá Zhakə pú Zhâŋ pɔŋ Zebede, pɛkpee Símo. Yěsô pɔ́rɔ́ pwó Símo ŋgâ: «Ndɛ mbɔ́ɔ́ cyó yɔ́b, ndzyěne ŋkhoʼyɔŋ wo ntʉʼɔ máʼá ŋgbáá pumésɔŋ.» 11Néré pɔ́b tyɛ́ páŋ, ntéé ŋkɔŋɔ yɔ́b náá, ntsʉʼɔ ndzəb Yěsô.
Yěsô pɛ́d taʼ ŋgaŋákəkóó
(Mat 8:1-14; Máá 1:40-45)
12A kɛ pé taʼ zhyémvé mve Yěsô pɛ ndzó taʼ mbɛ́lʉ́ŋ, taʼ ŋɔŋ pɛ yóʼó kəkóó gháʼmbwó mé. Ŋkhoʼyɛ́ á kɛ zhʉ́ Yěsô nɛ́, á vɔ ne kpee yé, ntyɛ́ tó yé syé, ŋguŋupfo yé nsó ŋgâ: «Ntsɛ́ɛ́pɔŋ, a pɛɛ yɛ́ wo kʉyě nɛ́, mbǒ tɛɛmbɛ wo zhyɛ́ mə fwó.» 13Yěsô sí pwó yé kébɛ́ wé nsó ŋgâ: «Mə mbzyɛ́, fwó!» Ŋkhoʼyéré kəkóó myé mbəb yé. 14A kɛ pé néré Yěsô sú təŋé yé ŋgâ: «Kii wo mwɔ́ ntsɔ́ ŋɔŋ. Ntsʉʼmbé, ghú nyóʼ mbəb wo pwó ŋgaŋashʉ́, fɛ́ shʉ́ ne khǐŋgóʼ njʉ́ kaŋ Mǔsê tsɔ́ nɛ́, ne kiŋi fwóne mo.» 15Pé kɛ ké ntsɔ́ no Yěsô nsó kii fúrú. Pɔŋ zááme kʉ́yó pfúŋɔ́ yé ne ndzóʼne nsó yé mbó nyoʼ ghɔŋ pɔ́b pwó yé ŋgâ a pɛ́d. 16Ntsʉʼmbé, Yěsô paʼ, ntsɛ́ʼɛ́ Mboʼmvé.
Yěsô pɛ́d taʼ pfɔ́mbəb
(Mat 9:1-8; Máá 2:1-12)
17A kɛ pé taʼ zhyémvé mve, Yěsô tsé fɛ́ ntʉ́ʉ́. Pɛ Farízya pwɛ ghaŋákeʼekaŋ pɛ́ ndzɔ́ʼɔ́ pɔŋ, ŋgɛmbɛ ntwɔ́ ndzó ŋkɔŋɔ pɛ yáʼ pɛ a ndzó pɛ́rɛ́ ŋgɔŋ Galílya pwɛ Zhʉde náá nɛ́, pwɛ mbɛ́lʉ́ŋ Yerʉ́salɛm. Tʉ̌ŋ Ntsɛ́ɛ́pɔŋ pɛ mbəb Yěsô, a pɛ́rɛ́ ghaŋághɔŋ núŋ. 18Pɔŋ páŋ, ŋkyɛ́ taʼ pfɔ́mbəb ndzó kɔʼ. Ntaʼa njʉ́ pɔ́b ŋgyɛ́ ŋgaŋághɔŋ ŋkúŋɔ ndáb mbáŋá síŋ Yěsô nɛ́. 19Njʉ́ pɔŋ kɛ gháʼmbwó, kaʼatɛ ywoʼ zaʼa pe pé nɛ́ pó, pɔ́b kɔʼɔ ntsɔ̌ʼndáb. Ntɔ́ɔ́ ywoʼ, ntiyaŋa pfɔ́mbəb wéré síŋ Yěsô ndúŋú kɔʼ yé tsetsɛrɛ ŋkɔŋɔ pɔŋ náá. 20Ŋkhoʼyɛ́ Yěsô kɛ zhʉ́ psyɛ́ndzɔʼ yɔ́b nɛ́, a nsó ŋgâ: «Mə máʼ kəpɔŋ wo.» 21Ghaŋákeʼekaŋ pwɛ pɛ Farízya kpáŋa ŋgâ: «Yɔŋ wɔ́? Ntó Mboʼmvé kaʼa! Tɛ a máʼ wɔ́ máʼ vɔ̌no ŋɔŋ fáá Mboʼmvé?» 22Yěsô zǐ kpaŋátó yɔ́b, mvirɛ wɔ́b ŋgâ: «Puŋ m kpáŋa ndzó ndzɔʼ yuŋ kɛ́ʼɛ́ ŋkyé kɔ́? 23A kaʼa nzyaŋa ne ntsóne ŋgâ: “Mə máʼ kəpɔŋ wo”? Kii a nzyaŋa ntsóne ŋgâ: “Ŋǎ syé nyi”? 24Kpaʼ sísíŋ, puŋ zɛ́ tó puŋ ŋgâ, Mɔ́ŋ ŋɔŋ kúʼɔ́ ne mǎʼne kəpɔŋ pɔŋ ndúŋú tsetsáʼ.» Yěsô pó séd mbəb yé, ntsɔ́ pwó pfɔ́mbəb ŋgâ: «A tsɔ́ mo pwó! Ŋǎ syé ndɔ́ɔ́ kɔʼ yo mbódndzəb ywoʼ wo.» 25Ŋkhoʼyéré, a ŋǎ syé síŋ ŋkɔŋɔ pɔŋ náá, ŋkyɛ́ kɔʼ yé, ŋgúʼɔ Mboʼmvé mbódndzəb ywoʼ yé. 26No tsɛ́ɛ́ ŋkɔŋɔ pɔŋ náá. Pɔ́ɔ́ gbáá wɔ́b, pɔ́b ghúʼɔ Mboʼmvé ntsɔ́ ŋgâ: «Psi zhʉ́ kii zhʉ́ ndzebé.»
Yěsô fú Levi
(Mat 9:9-13; Máá 2:13-17)
27Njʉ́ yéré no kɛ záʼ nɛ́, Yěsô twɔ́ zhʉ́ taʼ ŋgaŋakpêsebe tíí pé Levi, a ghɔ́rɔ́ ywoʼɔ́faʼ yé. Yěsô ntsɔ́ pwó yé ŋgâ: «Ntsʉʼɔ ndzəb mo!» 28Ŋɔŋ wéré ŋǎ, ntee ŋkɔŋɔ yɔ́b náá, nzɔŋɔ Yěsô.
29A kɛ pe néré, Levi zhyɛ́ taʼ ndebéne kəkwéʼe ndáb yé ŋkyé Yěsô. Záá ghaŋákpêsebe pwɛ pecyó pɔŋ zááme ké ghɛmbɛ yóʼó. 30Pɛ Farízya pwɛ ghaŋákeʼekaŋ ŋúbú ntsɔ́ pwó ŋgíŋgye Yěsô ŋgâ: «A zhyɛ́ kɔ́ ŋgâ puŋɛ pɛ́ ghaŋákpêsebe, pwɛ ghaŋázhyɛ́ meno kəpɔŋ zɔ̂ mbó nɔ̂?» 31Yěsô pɔ́rɔ́ ne pɔ́b ŋgâ: «Pɔŋ pɛ́ pɔ́b sʉ́ʼʉ nɛ́ tsé mbé ghú ndɔŋta pó, tsʉʼ mbé ndɔŋta tséʼé ghebe pe pwó ghaŋághɔŋ. 32Mə ŋkʉ́yó ne fûne puŋgerɛ́ŋged pó. Ntsʉʼmbé mə kʉ́yó ŋgâ ghaŋázhyɛ́ meno kəpɔŋ séd mbziʼe yɔ́b.»
Yěsô nsó no ne no zɛ̌nse
(Mat 9:14-15; Máá 2:18-20)
33Pɛ Farízya tsɔ́ pwo Yěsô ŋgâ: «Ŋgíŋgye psi pwɛ pé Zhâŋ ndɛ ndzɛ́ nse mbó ntsɛʼɛ Mboʼmvé, ntsʉʼmbé pó zɔ̂ mbó nɔ̂ ŋkyé kɔ́?» 34Yěsô pod ŋgâ: «Tɛɛmbɛ puŋ pe zhyɛ́ ghəŋ ŋgâ pɔ́b zɛ̌nse ne tsé fɔŋ pfúŋɔ́ pɔ́b ɔɔ? 35Ntsʉʼmbé zhyémvé mve tsé ŋkʉ́yó, pé túbú tsé fɔŋ tsetsɛrɛ pɔ́b, pɔ́b zɛ̌nse.»
Fuʼno ne yɔ́b zuŋ pú yé ffé
(Mat 9:16-17; Máá 2:21-22)
36Yěsô pó máʼ fuʼno yɔŋ ne pɔ́b ŋkʉ́rʉ́ ŋgâ: «Tɛ ŋɔŋ pé sɛ́ɛ́ pɛ́rɛ́ ndzwé f ffé ntɛ́ɛ́ ndúŋú yé zuŋ pó, mbǒ pe púbú yé ffé, yé zuŋ pó mbé ntyɛ́ pú yé ffé po! 37Tɛɛmbɛ ŋɔŋ pé níŋi yoʼ ffé ndzó ndzuŋ ghúŋ pó, mbǒ yoʼ ffé ŋgyɛ́ ghúŋ cʉ́, yoʼ pfed, pé psyé ghúŋ. 38A zɔŋɔ ŋgâ pé níŋi yoʼ ffé ndzó ghúŋ ffé. 39Ŋɔŋ wɛ́ a nɔ́ ndzuŋ yoʼ nɛ́, mbó kʉ́yé yoʼ ffé ŋkʉ́rʉ́ pó, ŋkyé ŋgâ a ntsɔ́ ŋgâ: “A ndzuŋ yoʼ mbé sʉ́ʼʉ!”»
ទើបបានជ្រើសរើសហើយ៖
Lúkaasə 5: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
